CORREO
RSS
Noticias
O mellor da música galega do ano en 51 nomes
Xénero: | 7 / 10 / 2021
As Bodegas Martín Códax, en Cambados, foron o escenario este mércores 6 de outubro do encontro de finalistas dos 8º Premios Martín Códax da Música, organizados por Músicas ao Vivo. No acto déronse a coñecer os nomes das 51 bandas e artistas, tres por categoría, que pasan á recta final desta edición 2021 e dos proxectos finalistas na categoría de Comunicación e Difusión Musical. O domingo 3 de outubro finalizaban as votacións do xurado dos Premios, a partires de agora, do 11 ao 24 de outubro serán as socias e socios de Músicas ao Vivo, as que voten entre os proxectos finalistas, e o 27 de outubro, no Pazo da Cultura de Pontevedra, celebrarase a gala de entrega.
Soa Bonaval convida a reinterpretar o son tradicional
Xénero: | 4 / 10 / 2021
Concertos, conversas e itinerarios sonoros compoñen o programa da primeira xeira do festival Soa Bonaval. O Museo do Pobo Galego organiza este evento que entre os vindeiros 22 e 24 de outubro achegará a Compostela os concertos da asturiana Lorena Álvarez, os pontevedreses Peña, ou o compostelán Libredón, que desfragmenta e recompón pezas clásicas cunha linguaxe analóxico-dixital. Ademais, o programa achega a estrea do proxecto Exvba, que nace da unión de Elba Fernández e Xavi Font e que foi creado de xeito específico para a igrexa de San Domingos de Bonaval.
A Xunta patrocina o circuíto 'Música en Salas' con Clubtura
Xénero: | 1 / 10 / 2021
A falta de coñecer as condicións nas que se levará a acabo a actividade cultural en recintos pechados neste outono, onte fíxose público que a Axencia Galega das Industrias Culturais (Agadic), da Xunta de Galicia asinará un convenio de colaboración coa Asociación de Salas de Música ao VivoClubtura para a posta en marcha dun novo circuíto co título de 'Música en Salas' con máis de 100 concertos ata decembro de 2021 nos espazos membros deste colectivo. O programa, que pasa a formar parte da carteleira cultural para o Xacobeo 21-22, conta cun orzamento de 200.000 euros, deles 140.000 resérvanse para os cachés artísticos e os 70.000 restantes destínanse a gastos de produción, protocolos de seguridade e demais conceptos de coordinación e xestión.
Facer recollidas hoxe
Xénero: | 30 / 9 / 2021
Nun momento no que os arquivos sonoros reclaman a súa importancia na creación musical do país, aparece a cuestión de onde fica o traballo de recollida da tradición. Fronte ás voces que sinalan que xa non é posible conseguir nada novo neste ámbito, investigadoras como Xulia Feixoo reivindican a necesidade de seguir achegándose ás fontes. O proceso, no entanto, enfronta tamén a problemática dos dereitos destas persoas sobre ese material. Abordamos con esta entomusicóloga as posibilidades das recollidas contemporáneas.
A gaita e os seus intérpretes nas paredes do museo
Xénero: | 29 / 9 / 2021
O Museo de Pontevedra inaugura mañá a exposición "Gaiteiraos" no claustro do edificio Sarmiento. Esta mostra presenta un total de 35 debuxos de recoñecidas gaiteiras e gaiteiros de Galicia feitos polo artista César Lombera, moi coñecido pola súa faceta de escultor. A través destes 35 debuxos Lombera pretende reivindicar a figura do gaiteiro como un exemplo do patrimonio inmaterial galego. Avelino Cachafeiro, Ricardo Portela, Susana Seivane, Carlos Núñez, Cristina Pato, Os Trinta de Trives, o gaiteiro de Guillarei e os de Soutelo, son algunhas das persoas representadas nos gravados reunidos nesta mostra que abrirá ao público tralo acto de inauguración que terá lugar o xoves, día 30 de setembro, ás 20:00 h e poderá visitarse ata o 28 de novembro. O capitel de Melide, unha peza do século XIV pertencente á colección do propio museo provincial, complementa esta proposta expositiva dado que representa nunha das súas faces unha escena musical que inclúe un laúde e unha gaita. Na mostra, ademais, poden coñecerse explicacións sobre a orixe da gaita e a súa área de expansión.
Cita co rock galego para o outono na Estrada
Xénero: | 29 / 9 / 2021
Un novo festival ven de sumarse ao circuíto galego destes eventos e faino deslocalizándose temporal e xeograficamente , colocándose no calendario de outono escaso destes eventos, centrándose no rock de artistas e bandas galegas e ademais convocando desde a Galicia interior, na Estrada, unha localidade que xa tivo algúns intentos previos de organizar este tipo de evento, sen resultado ata agora. A primeira edición do festival Son dos arrieiros da Estrada, organizada desde a produtora Dotbeat! ofrece un programa que se desenvolverá na Fundación de Exposicións e Congresos desta localidade pontevedresa na fin de semana do 29 e 30 de outubro. A proposta de O son dos arrieiros, ideada como un festival de mediano formato e cunha capacidade fixada inicialmente nunhas 550 persoas, está fundamentada no rock, dentro do que abrangue moi diferentes estilos, ademais de ter en conta a perspectiva de xénero con bandas integramente femininas como Bala e Agoraphobia e a sesión de Señora DJ, quen picará música feita, cantada e tocada por mulleres. O cartel. Xa presentado, inclúe tamén nomes como Novedades Carminha, Heredeiros da Crus e Terbutalina.
Un documental en liña recolle a historia do festival Cantos na Maré
Xénero: | 29 / 9 / 2021
A evolución do festival Cantos na Maré desde a súa xestación en 2003 en Pontevedra ata a súa primeira edición compostelá. Este é o contido de Cantos na maré, 2003-2020, que se presentou o pasado 22 de setembro a coincidir coa última xeira do evento e que chega agora ás redes. O web da Secretaría Xeral de Política Lingüística recolle o audiovisual íntegro, que participou do Fondo de Proxectos Culturais Xacobeo 21.
A Reixa trae ao galego as historias de Little Neno
Xénero: | 28 / 9 / 2021
As aventuras dun cativo que, cada vez que soña, coñece unha banda histórica da música pop e rock. Esta é a premisa da colección "Little Neno", unha proposta que procura achegar os máis cativos á música con textos de Dani Llabrés e debuxos de Jaime Pantoja, e que agora ve a luz na nosa lingua. A tenda compostelá A Reixa dá o paso á edición cos dous primeiros volumes do proxecto, Little Neno descobre os Beatles e Little Neno descobre os Rolling Stones.
Paraíso Canto e Charanga Trébede gañan o certame Interritmos
Xénero: | 28 / 9 / 2021
A nova edición do certame 'Interitmos: Sons do Rural' rematou coa proclamación das bandas Paraíso canto e Charanga Trébede como gañadoras tras da audición levada a cabo esta fin de semana pasada no Naútico de San Vicente do Mar entre as seis formacións finalistas. O Concurso, organizado polos Grupos de Desenvolvemento Rural (GDR) coa Asociación de Desarrollo Local Deloa, está destinado a propostas musicais instrumentais ou vocais, de ata un máximo de 8 compoñentes, con traballos que versen tanto na recreación ou evolución de pezas tradicionais, como en pezas de nova creación que beban da música de raíz. Este certame busca promover a cultura como motor de desenvolvemento territorial, así como dar visibilidade e potenciar a profesionalización de grupos e bandas que apostan pola evolución da música tradicional e de raíz.
O Xacobeo relanza a verbena con sete festivais e 50 orquestras
Xénero: | 23 / 9 / 2021
Co sector pendente do enunciado final do Decreto que traerá un novo nivel de apertura e capacidades para os eventos culturais, tal como avanzou onte en rolda de prensa o Conselleiro de Sanidade, Julio García Comesaña, a Xunta de Galicia ven de presentar a celebración co seu apoio de sete festivais nos que actuarán 50 coñecidas orquestras galegas e que terán lugar durante esta fin de semana na Coruña, Narón, Ourense, Pontevedra, Santiago de Compostela e Vigo, ademais de na área de Lugo nunha data próxima que será confirmada nos vindeiros días. Este circuíto intensivo enmárcase dentro da programación do Xacobeo 21-22, ao tempo que supón un importante reforzo da axuda económica que as empresas deste ámbito veñen recibindo por parte do Goberno galego para lles facer fronte aos efectos da crise sanitaria.