CORREO
RSS
Ti estás aquí > Inicio / Xéneros / Pop
Música Pop
A banda da Loba volta con Lovismo
Xénero: | 20 / 1 / 2025
Co amor nas súas múltiples formas de expresión ("o desexo, as relacións, a maternidade, o amor propio, a sororidade, o amor polo noso...") como eixe, A banda da loba lanzaba este 17 de xaneiro Lovismo, o seu quinto traballo de estudio. Os once temas do álbum chegan da man de Seispés Producións Creativas e foron gravados nos estudios Abrigueiro.
Sen Senra segue a súa viaxe creativa cunha nova obra íntima
Xénero: | 18 / 11 / 2024
O pasado ano Sen Senra, nome artístico do músico Christian Senra (San Miguel de Presqueiras, Forcarei) , presentaba o disco 'PO2054AZ (Vol.1)', unha obra que anunciaba como a primeira dunha triloxía destinada a ser considerada como unha obra magna. Coas orixes culturais e íntimas como base e a matrícula do coche vello do seu pai como título, o artista iniciaba unha viaxe declarativa da súa identidade e estilo propios, facéndose un sitio especial dentro das actuais músicas urbanas, unha escena na que desde os seus primeiros temas xa foi quen de destacar, mesmo a nivel internacional. Agora ven de sacar 'PO2054AZ Vol. II' (Sonido Muchacho) e, mantendo a intención, segue o seu periplo de manter presentes as orixes, xa mirándoas desde a perspectiva do emigrado. Nese sentido entre os 24 cortes que presenta este disco inclúense 4 mensaxes de audio recibidos polo músico nas voces da súa nai e a súa avoa, gravacións que nos colocan na vivencia da familia na distancia que ten o artista. Este segundo volume da triloxía preséntase así como unha homenaxe a historia galega da emigración, aos paisanos e a súa familia e "a todos os que nalgún momento tiveron que saír do seu fogar", unha viaxe non só física, senón tamén interior. Se ao anterior álbum considérase 'A Orixe' este subtitúlase como 'O emigrante'.
Carlangas volve con ganas de baile
Xénero: | 18 / 10 / 2024
Apenas ano e medio máis tarde do seu álbum de debut en solitario chega o segundo traballo de Carlangas, nome artístico de Carlos Pereiro (Monterroso, 1987) ex-Novedades carminha. 'Bailódromo vol. 1' (Virgin records), preséntase como unha re-volta estética e frenética sobre diferentes ritmos de baile. Desde a música disco ao punk, desde os ritmos latinos ás soundystem. Acompañado pola formación Los Cubatas, Carlangas inspírase para este traballo en discos como 'Guitarras callejeras' de Pata Negra ou 'No mires a los ojos de la gente' de Golpes Bajos, segundo o comunicado que acompaña ao lanzamento hoxe do disco en plataformas dixitais. O disco inclúe o tema en galego 'Nosoutros', unha adaptación en galego do coñecido bolero de mesmo título, que neste caso Carlangas canta xunto a Russian Red. A través das letras de moitos dos temas as referencias galegas, sobre todo a lugares da nosa terra como escenarios das súas historias, aparecen continuamente, como é marca da casa do artista. Algunhas das sete cancións que conforman este disco xa foron aparecendo nos meses anteriores, tamén a través dos seus concertos e desde esta fin de semana comeza unha xira de presentación por cidades como Sevilla, Granada, Madrid, Donosti, Murcia, Oviedo ou Pamplona. Para a produción artística contou coa colaboración do enxeñeiro de son e produtor musical Luca Petricca, un habitual desde Novedades Carminha. O disco sairá editado en vinilo de 12" o vindeiro 8 de novembro.
Eladio Santos asina o seu primeiro traballo en solitario
Xénero: | 6 / 8 / 2024
O verán trouxo consigo un novo xiro do vigués Eladio Santos que rompe un silencio de anos. Alma mater de Eladio y Los Seres Queridos, metade indispensable de dúo inclasificable con Tony Lomba e creador dalgúns dos temas máis memorables do pop independente galego deste século, o músico ven de dar a sorpresa presentando un disco asinado en solitario, aínda que estea ben acompañado na súa feitura. 'Estëreo estrada' (Autoeditado) é o nome deste traballo que o artista defenderá cada mércores en directo no local vigués La Casa de Arriba, antes dunha posible xira de outono. O disco xa está nalgunhas plataformas dixitais e pódese acceder a un vídeo de 15 minutos en YouTube para unha escoita máis devagar dalgúns dos temas que o compoñen. Unha experiencia moi recomendada para os seguidores da traxectoria do músico que atoparán aí a esencia do seu son.
DEVALO refresca o pop co seu terceiro disco
Xénero: | 26 / 4 / 2024
DEVALO, ou o que é o mesmo David Miranda, ven de sacar un novo traballo longo, o terceiro do seu percorrido, "Azul vindeiro” (Ferror Records, 2024). A súa proposta de pop sen complexos, refresca o xénero sen renunciar a influencias e colocando o seu son no marco do indie de finais do século XX e principios do XXI, pero non por iso soando antigo, senón ao contrario como unha renovación enerxética e unha evolución natural por un camiño que xa non son moitos artistas os que o percorren sen complexos e acadando un produto de total actualidade. Na parte da composición e a gravación o artista admite unha intención de espir as cancións, en comparación cos anteriores discos nos que o son estaba composto a base de capas de arranxos superpostos de guitarras, sintetizadores e voces. Neste caso "Azul vindeiro" conta segundo Miranda cunha menor superposición de elementos: "A miúdo aparecen varias melodías levadas por distintos instrumentos que dialogan entre si, mais deixándose espazo en vez de formar capas de son.
The Rapants poñen en marcha 'La máquina del buen rollo'
Xénero: | 15 / 3 / 2024
Os muradáns The Rapants son hoxe en día unha das bandas máis presentes da escena galega do pop, desde que en 2021 gañaron o concurso de bandas emerxentes Sonidos Mans Salas a formación non fixo máis que aumentar a súa presenza e alcance en salas e festivais. Agora presentan o seu terceiro traballo longo, 'La máquina del buen rollo', apenas un ano máis tarde que o anterior 'O Corasón como un after'(2023). Con este novo disco a formación quere amosar unha evolución do seu son e un retrato sonoro o máis fiel posible ao espírito da banda. Nove temas cheos de enerxia para desfogar bailando, ateigado, segundo eles, de chiscadelas á vida muradá e con moitas referencias case universais dentro do mundo do pop. Rock, rap ou country son algúns dos estilos polos que transita este 'La máquina del buen rollo', un traballo que os rapantes gravaron o pasado outono nos estudios de Paco Loco, quen axudou á banda a ultimar os detalles dun disco no que cada tema "ten entidade propia". Cada corte ten características propias, mais todos son parte dun mecanismo que fai que o álbum procure reproducir os directos de The Rapants. The Rapants contrapón letras tristes e escuras (nas que contaron coa colaboración de Sara Faro, de Fillas de Cassandra, para Rue Franklin, e Nuno Pico, de Grande Amore, en Cando Pensa en Min) con ritmos e melodías animadas, feitas para bailar.
Brais Moran abre a pista de baile con 'Revolución Chic'
Xénero: | 15 / 2 / 2024
Seis anos tardou Brais Morán en presentar este novo traballo discográfico que é o terceiro do seu percorrido en solitario, aínda que neste caso asina acompañado da formación Nasaufunk. 'Revolución Chic" (2024) é unha nova mostra da actitude musical vitalista e aberta deste artista, alegre e buscando mover os corpos ao baile, neste caso entrando nas sonoridades da música 'disco' dos anos 70 nas súas formas mais 'negras' . Son dez temas e un remix do que dá título ao álbum e en todos eles podemos notar ecos coñecidos pero ao mesmo tempo baixo unha produción actualizada na que se nota a man de Arturo Vaquero (Abrigueiro Estudios). Non deixamos de ter na mente ao escoitalo a enerxía daquel mítico programa americano da primeira música disco 'Soul train' pero ao tempo notamos influenzas moito máis modernas que van empapando o son en cada recuncho e mesmo hai momentos do funk tropicalista que xa estaba en anteriores traballos de Morán. A sala Garufa da Coruña acollerá o vindeiro 1 de marzo o concerto de inicio da xira de presentación deste traballo no que Morán estará acompañando da formación Nasaufunk (Xabier Cid, Fran Castro, Manu Seoane e Antón Torroncho) que tanto achegan en cada tema.
Xoel López publica o seu novo disco 'Caldo Espírito'
Xénero: | 11 / 10 / 2023
Xoel López presentou a pasada semana o que é o seu décimo sexto álbum, 'Caldo Espírito' (Esmerarte 2023), un disco que entre os seus once novos temas inclúe unha canción no noso idioma 'Xiana', pechando o disco. O álbum xa está dispoñible nas plataformas dixitais ademais de en formato físico (CD ou vinilo). O lanzamento deste traballo chega acompañado da estrea do videoclip do tema "Mágica y Eterna" e a única presentación prevista de "Caldo Espírito" terá lugar o 29 de novembro no WiZink Center de Madrid.
Francisco Castro publica o seu primeiro traballo musical
Xénero: | 25 / 9 / 2023
O escritor e ex-director xeral da Editorial Galaxia, Francisco Castro (Vigo, 1966) saca hoxe á luz o seu primeiro traballo discográfico. "Agora é o tempo" é o título co que Castro nomea este traballo discográfico que xa está á venda e que presentará en concerto o vindeiro 28 de outubro no Teatro Salesianos de Vigo contando co acompañamento da Banda dos Borges . O disco, publicado baixo o selo Awanta Producciones S.Coop. Galega, conta na produción con Federico Welicki e, segundo o propio autor, foi gravado entre Vigo, A Estrada, Madrid, Los Ángeles, Buenos Aires e Seattle. Segundo a descrición que acompaña á presentación, a súa música "gravita arredor de ritmos pegadizos e, sobre todo, letras intensas que reflicten a súa forza poética". Trátase de letras e músicas "para reivindicar a vida pero tamén para pelexar contra dunha realidade que merece ser, cando menos, pensada", aseguran. Segundo explica o autor nas súas redes sociais son cancións que "explican quen son, como sinto, e que quero do mundo. Saíron das tripas", afirma Castro.
Xoel López presenta disco en directo do concerto ' X Aniversario Atlántico'
Xénero: | 1 / 8 / 2023
O concerto na Coruña co que Xoel López celebrou o pasado ano o décimo aniversario do seu primeiro disco en solitario Atlántico( 2012) ven de converterse nun novo disco na súa carreira. O artista presenta estes días ' X Aniversario Atlántico' (Esmerarte) en todas as plataformas, un disco directo que recolle os temas interpretados naquel concerto de conmemoración. O lanzamento sae acompañado do vídeo correspondente á canción 'Hombre de ninguna parte' coa que abre o disco no que ofrece ata 12 temas. Xoel é tamén noticia porque ven de presentar fai unhas semana a canión "Fort Da", primeiro adianto do seu vindeiro disco de estudio 'Caldo Espírito' que se estreará o vindeiro outono.
REPORTAXE
Disco con etiqueta
Data.O vinte de maio o público e un xurado escollerán o Primeiro disco pop do ano de solistas galegos
