CORREO
RSS
Noticias
O V Festival PEDRA integra patrimonio e música en Ourense
Xénero: | 11 / 9 / 2025
Unha visita ás escavacións do castro de Trelle, situado entre Toén, Cartelle, Barbadás e A Merca, abre este venres 12 de setembro a quinta edición do Festival PEDRA. O "festival de saberes" que combina, arqueoloxía, patrimonio inmaterial, música e escena medra nesta xeira e reivindica "a figura do asociacionismo que programa cultura dende o rural".
Conde Varo presenta o seu segundo disco '14:41'
Xénero: | 10 / 9 / 2025
Conde Varo é o proxecto co que Xián Gómez (Santiago de Compostela, 1998) tenta poñer en palabras todas esas cousas que sentimos e non sempre sabemos como expresar. Tras un primeiro disco longo 'Proyecto Manhettan, Auto editado, 2022) ven de presentar este verán un novo traballo '14:41' (Autoeditado, 2025), do que adiantou tres pezas o pasado ano nun EP e que agora chega con dez temas de composición propia. Pop-rock de autor con moitas influenzas melódicas nalgúns casos e máis "sureñas" noutros, coas guitarras en primeiro plano e con letras pegadizas e retrousos moi pop que dan conta de historias universais de intimidade, tristura, amor e desamor. Un traballo de composicións axustadas e boa calidade instrumental que buscará promocionar en vindeiras datas e que de seguro ten boa acollida en circuítos de cantautor e de pop -rock. O disco xa está dispoñible nas plataformas dixitais.
O WOS afianza a súa continuidade e crecemento en Galicia
Xénero: | 9 / 9 / 2025
O apoio institucional fixo posible este ano que o festival WOS recuncase cunha nova edición, non só en Santiago de Compostela onde naceu, senón en Galicia. Así o expresou hoxe Iván Arias, director do evento, que explicou como, tras a cancelación do pasado ano ante a imposibilidade de levar a cabo a edición cos estándares nos que xa estaba colocado festival cos premios profesionais recollidos en 2018 e 2023 como mellor festival en recinto pechado de Europa e da península respectivamente, púxose sobre a mesa un plan de viabilidade que, co apoio solicitado das administración públicas (Concello de Santiago, Deputación Provincial da Coruña e Xunta de Galicia) pode permitir a permanencia e crecemento deste proxecto singular que contribúe a dar unha proxección de Galicia na cultura da creación contemporánea alternativa e de vangarda. De feito, segundo o reconto na venda de entradas e abonos desde a organización xa confirman que o 52% dos asistentes chegan desde fóra de Galicia, maioritariamente da comunidade madrileña, e deles o 4% de fóra de España. Arestora o festival xa ten os abonos esgotados e o ritmo de venda entradas só deixa dispoñibles apenas un cento para o venres e o sábado. Arias presentou hoxe as actividades complementarias aos concertos que ofrecerá estes días a oitava edición do WOS, entre o 11 e o 14 de setembro.
Triángulo de Amor Bizarro actuará para 'Live on KEXP'
Xénero: | 4 / 9 / 2025
O grupo boirense Triángulo de Amor Bizarro, é un dos seleccionados para participar nunha serie de directos que terán lugar en Bilbao, e que serán filmados e transmitidos a través da canle 'Live on KEXP' de You Tube. Esta histórica emisora de radio, con sede en Seattle e que forma para da rede de emisoras públicas de radio dos EUA, foi das primeiras en dar difusión a bandas como Nirvana ou Pearl Jam e pola súa canle de YouTube, que acumula 3,7 millóns de seguidores sendo unha referencia indispensable na difusión mundial de música, pasan bandas de primeiro nivel da escena internacional alternativa de todos os xéneros como Arctic Monkeys, Charles Bradley, Bomba estéreo, The XX e outros moitos, chegando os seus vídeos de actuacións en directo a acumular ducias de millóns de reproducións.
A Orquestra Sinfónica de Galicia achegará 33 actuacións na Coruña durante a súa nova temporada
Xénero: | 3 / 9 / 2025
Vinte e dous concertos nos venres e once nos sábados compoñen a programación de abono que a Orquestra Sinfónica de Galicia desenvolverá na Coruña ao longo da vindeira temporada, entre 10 de octubre e o 13 de xuño. O director titular Roberto González-Monjas abrirá o programa con tres concertos nos que, coa colaboración de Alexandre Kantorow ao piano, se interpretarán pezas de Prokofiev, Tchaikovski e Rimski-Korsakov.
Vimianzo M.O.L.A. convida a se mergullar na creatividade
Xénero: | 1 / 9 / 2025
Desde o pasado 29 de agosto e ata o 11 de setembro, o castelo de Vimianzo acolle a cuarta xeira de Vimianzo M.O.L.A. O festival que combina muralismo, oralidade, literatura e arte. Baixo o lema Un Castelo de lenda, o programa desta edición inclúe a realización de catro murais na vila, xornadas de cultura urbana, encontros literarios e artes escénicas.
O Festival de Poesía do Condado volve reunir en Salvaterra aos creadores contemporáneos
Xénero: | 29 / 8 / 2025
O Festival de Poesía do Condado, en Salvaterra do Miño mantén a súa chama acesa e celebra a súa 37ª edición os vindeiros 5 e 6 de setembro. A cita co xénero lírico, complementada cunha oferta musical, reunirá na vila unha importante representación da poesía contemporánea que ten a lingua e cultura galegas como nexo de unión. Silvia Penas, Samuel Merino, Daniel Salgado, Nieves Rodríguez, Emma Couceiro, Aurora Abelairas, Silvia Mota, Paco Barreiro, Masha Álvare a O Leo Arremaghona conforman o cartel poético. Ademais dos recitais abertos, poderanse ver as actuacións musicais de Dakidarría, OMIRI, Hugo Guezeta, Cuarteto Caramuxo, Xosé Lois Romer & Aliboria e a Banda Xangai, liderada por Xurxo Souto entre outros.
O programa Dinamiz-ARTj achega 112 funcións a 18 concellos galegos
Xénero: | 29 / 8 / 2025
A terceira edición do programa Dinamiz-ARTj desenvolverá ao longo dos vindeiros 10 meses un total de 112 actuacións de diferentes artes en 18 concellos galegos. O Ministerio para a Transición Ecolóxica, a través do Instituto para a Transición Xusta e a Fundación Cidade da Enerxía, apoia esta iniciativa, que conta cun orzamento de 3 millóns de euros e conta con desenvolver un total de 1.095 actuacións en 174 concellos de todo o Estado.
Sete concertos e visitas guiadas compoñen o programa do novo Espazos Sonoros
Xénero: | 29 / 8 / 2025
Co lema 'Escoitar con asombro, alento da memoria' o festival Espazos Sonoros inicia este 31 de agosto a súa nova edición. O Convento de Santo Antonio de Herbón, en Padrón, acollerá nesa data unha actuación dos suízos Il Concerto Intempestivo, a interpretar A consagración da primavera. Baroque Edition. A esta proposta seguiranlle outros seis recitais ademais de visitas guiadas en diferentes espazos naturais e patrimoniais ata o vindeiro 4 de outubro.
O Vilablues cambia de vila pero non de esencia
Xénero: | 28 / 8 / 2025
Dez edicións despois o Vilablues achou un novo sitio onde celebrarse este ano. O festival máis itinerante da oferta galega, que naceu en Vilagarcía, onde celebrou varias edicións, fixo este mesmo ano no mes de maio unha versión curta en Santiago de Compostela, pero antes diso pasou en anteriores épocas por Noia ou Ferrol. Agora, presentado como 'Vilablues Mar de Santiago' volve á beira do mar e leva os sons do soul blues e rythm'blues a Vilanova de Arousa esta fin de semana, e ademais ofréceos de balde co apoio dos Concertos do Xacobeo da Xunta de Galicia.