CORREO
RSS
Ti estás aquí > Inicio / música en galego
Música en galego
Frescura e experiencia nos Premios Martín Códax
Xénero: | 30 / 5 / 2025
Os Premios Martín Códax da Música de Galicia atoparon gañadores un ano máis entre o aplauso de todo o sector no Pazo da Cultura de Pontevedra. Esta 12ª edición dos galardóns convocados por Músicas ao Vivo repartiu os seus vinte recoñecementos, que chegaron a proxectos de moi diferentes estilos e cunha mestura de veteranos e novas fornadas, cun claro protagonismo da música en feminino. Perto de cinco mil persoas votaron nesta décimo segunda edición dos premios á que se presentaron 512 proxectos musicais. Na gala, presentada por Lupe Blanco e Xisco Feijóo, coa música ao vivo do grupo Ailá e que homenaxeou á oralidade e á música tradicional, acompañaron á directiva de Músicas ao Vivo representantes das entidades e institucións que apoian os Martín Códax da Música. O evento serviu un ano máis para apelar á unión da comunidade musical, reivindicar o talento galego e defender o acceso á cultura de toda a cidadanía, como fixo a directiva de Músicas ao Vivo no seu discurso.
Falece o músico Emilio Cao
Xénero: | 26 / 5 / 2025
Un novo golpe para a escena musical galega ven de chegar este luns co anuncio do falecemento de Emilio Cao (Santiago de Compostela, 1953). O artista, unha figura esencial para entender a música en Galicia desde a transición, falecía onte na súa cidade, Santiago de Compostela aos 72 anos de idade deixando tras de si unha traxectoria profesional impecable e pola que, xustamente fai un ano, recibía un galardón honorífico por parte da profesión musical do país nos Premios Martín Códax da Música Galega. Naquel momento o premio foi recollido na gala polo seu fillo. No ano 2008 viu tamén galardoada a súa traxectoria co Premio Opinión a unha Andaina Senlleira na primeira edición desta modalidade dos galardóns da música folk Premio Opinión. Os seus restos mortais están no tanatorio do Hospital Clínico Universitario de Santiago. Será incinerado o martes na intimidade familiar, segundo comunica o xornal La Voz de Galicia.
A Estrada organiza un festival de pop-rock para os cativos
Xénero: | 22 / 5 / 2025
O Concello de A Estrada ven de presentar unha nova iniciativa no eido dos festivais enfocada no público máis novo. O Festival dos Arreiriños, a celebrar nunha única xornada o vindeiro 1 de xuño, preséntase coma o primeiro festival infantil de Pop-Rock de Galicia. O cartel reunirá tres das ofertas actuais da escena galega pensadas para o público máis novo ou familiar, ademais de ofrecer actividades complementarias. Pakolas, a banda de Uxía Lambona e os vigueses Broken Peach conforman a oferta musical neste caso.
The Killer Barbies celebran seu trinta aniversario cun novo álbum
Xénero: | 16 / 5 / 2025
Tras trinta anos en activo, Silvia Superstar e Billy King seguen a manter a esencia de The Killer Barbies, a banda coa que desde Vigo proxectáronse a todo o mundo. 'El Pop se autodestruirá en 4, 3, 2, 1..." (Subterfuge Records) é nome do seu novo disco, o sexto da súa longa carreira, que xa avanzaron en decembro co tema ' Quiero tu corazón y nada más', peosteriormente presentaron a que é unha versión propia dun coñecido tema de The Clash como 'Si me quieres o si no'. Guitarras potentes, teclados e a proposta dun son actualizado sen deixar de ser a banda de rock que sempre foron é a oferta deste novo traballo de dez temas que xa está dispoñible en plataformas dixitais. O vindeiro 20 de maio farán a presentación en directo na Sala El Sol de Madrid.
Premio Honorífico Martín Códax para Leilía
Xénero: | 13 / 5 / 2025
No ano no que o Día das Letras homenaxea á poesía oral popular e ás cantareiras, Músicas ao Vivo ven de anunciar a concesión do Premio Honorífico Martín Códax da Música 2025 a Leilía. Nome referente na música galega que transita do século vinte ao vinteún, o grupo nacido en 1989 en Santiago de Compostela, despedíase recentemente dos escenarios sendo as súas integrantes consideradas pioneiras na difusión da música e do canto tradicional. Músicas ao Vivo, entidade promotora dos Premios Martín Códax da Música, destaca como as Leilía abriron camiño a moitas artistas e agrupacións que viñeron detrás, e considera o recoñecemento a Leilía nesta 12ª edición dos premios como un tributo obrigado da comunidade artística no ano no que o 17 de maio, por segunda vez na súa historia, fai unha homenaxe colectiva, desta volta co recoñecemento ás cantareiras e á oralidade. O 28 de maio recollerán no Pazo da Cultura de Pontevedra o galardón honorifico dos Premios Martín Códax 2025, o recoñecemento da comunidade musical ao traballo feito, nun momento no que a oralidade e o canto tradicional, grazas en boa parte á andaina das Leilía, gozan de moi boa sáude entre as novas xeracións de artistas e públicos.
Falece o músico Xoán Eiriz aos 68 anos
Xénero: | 12 / 5 / 2025
O pasado sábado, 10 de maio, falecía na súa cidade A Coruña, o músico Xoán Eiriz (1956) aos 68 anos por unha enfermidade. O músico tivo unha longa carreira musical que comezou discográficamente nos anos 80 e na que hai ata 14 discos publicados, cun repertorio variado no que musicou poemas dalgúns dos máis coñecidos escritores en galego e trouxo para o galego pezas doutros autores, en claro compromiso coa súa lingua e a súa terra. Exercía actividade como profesor de música.
Cincuenta e sete proxectos na fase final dos Premios Martín Códax
Xénero: | 8 / 5 / 2025
As portas das Bodegas Martín Códax, en Cambados, abríronse este mércores para celebrar a festa de finalistas dos 12º Premios Martín Códax da Música, promovidos por Músicas ao Vivo. Tras a votación do xurado profesional, corenta e cinco bandas e artistas, tres por categoría, son os proxectos que pasan á segunda fase da edición. Foron desvelados ademais os nove proxectos finalistas nos tres Premios Organistrum: Salas, Festivais, e Comunicación e Difusión Musical. Tamén, os artistas emerxentes, na categoría de mesmo nome na que este ano son finalistas Ash Diz, Paracetafolk e Ulex. Cincuenta e sete proxectos recolleron o seu agasallo das Bodegas Martín Códax en recoñecemento pola súa inclusión na fase final de votación. A partir do 8 e ata o 25 de maio, as socias e socios de Músicas ao Vivo poden votar os seus favoritos e, como xa aconteceu o pasado ano, o público xeral; o 28 de maio, a gala, no Pazo da Cultura de Pontevedra.
Mondra publica o seu agardado novo álbum
Xénero: | 6 / 5 / 2025
Desde hoxe xa está dispoñible en plataformas dixitais 'De ronda', o segundo traballo discográfico de Mondra. O novo disco do cantareiro e bailador chega dous anos despois do seu debut con 'ARDĒN' (Altafonte, 2023), un traballo que recibiu numerosos recoñecementos e que impulsou ao artista á primeira liña da escena musical galega, sendo quen de recibir o Premio Martín Códax ao Mellor Álbum de Electrónica 2024, ou o Premio Mestre Mateo ao Mellor Videoclip 2025 por 'MARIMONDRA'. A sexualidade, o amor propio, a celebración, a comunidade e o valor da mocidade son os temas que atravesan as 11 cancións cheas de irreverencia e desenfado. Segundo a proposta trátase de "11 estados do corpo" nos que aborda "a sedución, seducir ou ser seducido", e nos que Mondra presenta un novo son, orgánico e fresco da man da produción musical de Hevi en Laboratorio Soyuz sen perder o seu diálogo constante con elementos propios da tradición oral galega.
FAIA presenta o seu segundo disco 'Alvela'
Xénero: | 24 / 4 / 2025
FAIA presenta o seu segundo disco en solitario, 'Alvela', un traballo complexo e sutil, como xa fora 'Ao cabo leirín' (2019), con dez temas que transitan pola experiencia da maternidade, a memoria do corpo e as violencias que o atravesan, mais tamén sobre a forza que reside no íntimo, no desexo e no pracer. A artista, membro da formación De Vacas, o Coro Encaixe ou Apatacón revisa neste proxecto persoal arrolos, romances e outras cantigas tradicionais acompañada unicamente por instrumentos de corda e gravacións de campo manipuladas, unha constrición creativa que lle confire a Alvela unha coherencia sónica e unha organicidade singular.
O Museo do Pobo presenta a súa programación sobre as Cantareiras
Xénero: | 9 / 4 / 2025
Este venres, 11 de abril, o Museo do Pobo Galego inaugurará a exposición 'Cantareiras. Oralidade, creación, transmisión', producida co gallo da homenaxe das Letras Galegas 2025 ás creadoras e transmisoras da poesía popular oral. Trátase dunha mostra que recompila materiais sonoros, procedentes dos fondos do proxecto de recuperación, catalogación e dixitalización do Arquivo do Patrimonio Oral da Identidade do Museo do Pobo Galego e o arquivo gráfico e documental, así como pezas pertencentes á colección do Museo ou cedidas por particulares para a ocasión, ademais de material audiovisual realizado expresamente para o proxecto. Alén diso o Museo presentou o resto das actividades programadas ata finais de setembro que tamén irán na liña de poñer en valor a transmisión oral e ás cantareiras en particular. Comprende actividadsn sobre baile, charlas, concertos e accións didácticas,