NOTICIAS
O FESTIVAL INTERNACIONAL DE CINEMA CONTARá CON IMPORTANTES RETROSPECTIVAS DE REALIZADORES HISTóRICOS E TRECE FILMES GALEGOS EN COMPETICIóN25/04/2024
O festival internacional de cinema Play-Doc de Tui xa ten todo preparado para celebrar a súa vixésima edición entre os vindeiros días 1 e 5 de maio. Ao longo de varias semanas o festival foi dando a coñecer algúns avances da súa proposta para este ano. Sete filmes participarán na súa sección oficial internacional, entre os que destaca o traballo póstumo de Jean-Luc Godard, 'Film annonce de film qui n'existera jamais:"Drôles de guerres"' (Francia, 2023). O festival, que se destaca por presentar primeiras retrospectivas dedicadas a aclamados cineastas e directores de culto, anunciou tamén entre outras, unha revisión da pouco coñecida obra documental do recentemente desaparecido William Friedkin (1935-2023), un dos realizadores máis influentes de todos os tempos e autor dalgunhas das películas máis emblemáticas do cinema contemporáneo, cuxos orixes como cineasta estiveron ligados ao cinema documental. A tradicional sección competitiva galega propón a través de trece títulos (entre longametraxes e curtametraxes) un percorrido caracterizado pola diversidade de propostas, tanto no formal como no temático.
HOXE COMEZA EN SANTIAGO DE COMPOSTELA O FESTIVAL CINE BARATO
24/04/2024
Unha proposta atípica dentro do sector audiovisual comeza hoxe a súa andaina na capital galega, tres cine clubes locais únense para organizar o Festival Cine Barato. O certame, que durará tres días, acolle as creacións audiovisuais realizadas con poucos recursos e de carácter "amador". Cineclube Compostela, Club de cine Facom e CineMazarelos son as asociacións que organizan esta nova cita que presume de contar con "tan poucos recursos como as películas que proxecta". O festival, fiel ao seu nome, tampouco cobra entradas, aínda que propón billeteira inversa, pagando a vontade tras o visionado, para cubrir gastos. Ademais diso tamén ofrece obradoiros sobre as posibilidades da produción alternativa e sen recursos.
O FILME DO CORUñéS MARTíN ROMERO GAñOU O MESTRE MATEO E O GOYA DE CURTAMETRAXES DE ANIMACIóN
23/04/2024
Tras do seu triunfal paso polos Premios Goya e os Premios Mestre Mateo, a curtametraxe "To bird or not to bird" ven de acadar un novo recoñecemento na oitava edición do Skyline Benidorm Film Festival. O filme escrito e dirixido polo director coruñés Martín Romero e producido por Chelo Loureiro (Abano Produccións) e Iván Miñambres (Uniko) recolleu o Premio a Mellor Curtametraxe de Animación. A película, que tamén pasou polo festival de Cannes, segue así o seu percorrido polos certames aumentando o seu palmarés, que conta con utros recoñecementos en diversos festivais nacionais, conformando a súa relevancia na produción de animación galega e español este ano. A historia da película ofrece , a través duns personaxes que son paxaros, unha ollada crítica e calidoscópica do mundo actual.
A MEIRANDE PARTE ESTáN ORGANIZADOS DESDE ASOCIACIóNS CULTURAIS
22/04/2024
Dez eventos repartirán os 300.000 euros da recente convocatoria de subvencións a festivais audiovisuais para este ano. A Axencia Galega de Industrias Culturais (AGADIC) ven de publicar a resolución da convocatoria para esta liña de axudas. Co incremento orzamentario do 33% que supuxo esta convocatoria son en total dez as citas que serán beneficiadas, dúas delas co máximo previsto de 50.000 euros que son o Play-Doc de Tui e a Mostra de Cinema Periférico da Coruña. En total a metade dos festivais acadan os importes solicitados, mentres que a outra metade ven reducida a contía pedida. Ademais diso, se ben a convocatoria comprende tres modalidades de festivais en función da entidade que os organiza (asociacións culturas. Entidades locais e empresas privadas) a maioría dos concedidos vai para o asociacionismo, sete das dez, unha para unha empresa privada (Matrioska producciones S.L, polo festival Novos Cinemas de Pontevedra) e dúas para entidades locais: Concello de Carballo (polo Carballo Interplay) e Santiago de Compostela a través do Auditorio de Galicia (Curtocircuíto) . Na valoración final de solicitudes admitidas quedaron fóra do reparto catro: 46 Semana do Cine de Lugo; XII Festival de Curtametraxes e diversidade Andaina; VI Mostra mares da Fin do Mundo e Mostra de Curtametraxes Vila de Noia, organizada desde o concello noiés. As catro recibiron baixas valoracións do proxecto presentados así como no apartado de "Calidade da programación, profesionalización e repercusión da convocatoria anterior".
A ACCIóN TEN UN ORZAMENTO DE 600.000 EUROS
22/04/2024
A Axencia Galega das Industrias Culturais (AGADIC) publicou hoxe no Diario Oficial de Galicia as bases para a subvención de actividades de dsitribución para industrias culturais. Dase a particularidade de que a convocatoria deste ano fora anulada pola propia administración autonómica o 16 de febreiro, un día despois de ser publicada no DOG. A nova convocatoria preserva o mesmo orzamento, 600.000 euros, orientados á "distribución exterior e interior de bens e servizos culturais producidos por empresas vinculadas ás artes escénicas e ou musicais e proceder á súa convocatoria para o ano 2024". O prazo de presentación rematará aos cinco meses de publicación no DOG.
A PRIMEIRA EDICIóN DESTA CONVOCATORIA DA AGADIC DISTRIBúE 270.000 EUROS
19/04/2024
A Axencia Galega das Industrias Culturais publicaba no seu web este 19 de abril a resolución da primeira xeira das subvencións para a escrita de guións audiovisuais. Un total de 30 proxectos reparten os 270.000 euros con que conta esta liña de axudas. Nomes coñecidos do audiovisual galego como Hector Carré, Olga Osorio, Xacio Baño, Chelo Loureiro son algúns do beneficiados por esta convocatoria.
