CORREO
RSS
Dani Cornes comparte experiencias íntimas co seu segundo disco
Xénero: | 27 / 2 / 2026
O grovense Dani Cornes é unha rara avis que chegou primeiro á viralidade en redes, sendo apenas un rapaz en 2012, con aquel paródico xogo musical que foi o 'Rías Baixas Style' para despois ir madurando fóra do foco e ir crecendo como músico e tamén no audiovisual, a súa outra faceta artística. Un primeiro disco autoeditado en 2018, 'Días de rosas', precede a un parón musical no que céntrase no audiovisual que o leva a Barcelona. Desde alí, pero coa ollada posta na súa casa é como creou este disco 'Aquí sempre tes casa' (Dotbeat, 2026), que destila as emocións da súa experiencia vital, común dunha xeración na que foron moitos os que coma el, tiveron que deixar atrás as súas casas na procura dos seu soños. O álbum, do que xa foi entregando tres temas previos, sae hoxe ao público e sitúa a Cornes, unha vez dispoñibles as súas once pezas, nunha posición destacada entre os compositores galegos emerxentes. Estamos con toda seguridade ante un dos discos galegos e en galego do ano.
Dioivo recupera con 'Que soe o trono' a música da súa anterior formación
Xénero: | 26 / 2 / 2026
A coincidir co Día de Rosalía o dúo vigués de metal rock Dioivo lanzou o que xa é o seu terceiro álbum de estudio completo, titulado 'Que Soe o Trono' (Romantic Songs Records, Loita Underground e Speedhammer Records). O novo traballo longo chega tres anos despois do 'Cara os Ceios Incrementes' (Sleaszy Rider Records, 2023) Con este novo álbum, a banda celebra non só 10 anos como Dioivo, senón tamén 15 anos dende a fundación da súa formación predecesora, Rust in Peace, que en 2016 converteuse no dúo Dioivo actual.
Antía Muíño presenta 'Anfibia por veces'
Xénero: | 25 / 2 / 2026
A compostelá Antía Muíño recollía no ano 2022 o Premio Martín Códax á Artista Emerxente e ese mesmo ano sacaba o seu álbum de debut, 'Carta aberta' (Raso estudio, 2022), co que conseguiu ser seleccionada pola plataforma dixital Spotify como embaixadora da música española na lista EQUAL, que recolle o talento feminino feito en distintos países do mundo. Con estes antecedentes e un bo numero de actuacións desde entón, saca agora un novo traballo, 'Anfibia por veces' (Raso estudio, 2026), producido por ela mesma xunto a Hevi. Neste novo traballo Muíño combina sensibilidade e eclecticismo. Mantendo a canción como eixo central, o disco abre o abano estilístico e sonoro xa amplo da cantautora sen perder coherencia. A xira de presentación de Anfibia por veces terá a súa primeira parada galega o vindeiro 5 de marzo no teatro Principal de Santiago de Compostela.
O coruñes Teo Montero gaña o Premio Internacional de Composición Portus Apostoli
Xénero: | 25 / 2 / 2026
A IV edición do Premio Internacional de Composición Portus Apostoli, convocado polo Festival Internacional de Arpa Vila de Noia, xa ten obra gañadora. O xurado outorgou a distinción á creación Alén do azul, do compositor coruñés Teo Montero Rey (A Coruña, 2005) . O galardón, que conleva unha achega económica de 4.000 euros, suporá tamén a estrea absoluta da obra durante a celebración da 13ª edición do Noia Harp Fest, que decorrerá do 29 de xullo ao 1 de agosto, da man da Real Filharmonía de Galicia.
Volven Agoraphobia con 'Kamikaze'
Xénero: | 23 / 2 / 2026
No último semestre do ano 2019 a banda Agoraphobia presentaba o que era o seu segundo traballo de longa duración 'Unaligned' (Dotbeat, 2019) e apuntaba a un despegue cheo de potencia e proxección, o crise pandémica cortou ese impulso como tantos outros na cultura nese momento. Aínda así o grupo puido recoller en 2020 entre mascaras sanitarias e con medidas de seguridade o Premio Martín Códax a mellor proxecto de rock. Tras diso pouco máis se soubo delas que, agás algunhas participacións en festivais, non tiñan moita máis actividade visible. Pero o pasado ano 2025 a banda anunciou estar a preparar xa un novo traballo e sacou dous adiantos, os temas Eyes Never Lie e Fck You Tony. Dúas pezas explosivas que quitaron calquera dúbida sobre a continuidade da liña da banda. Agora xa está cara ao público o disco ao completo, Kamikaze (Dotbeat, 2026), unha resposta creada con pausa e coidado ás esixencias de inmediatez, consumo rápido e xeración constante de contido que dominan na industria musical.
O trío de hip hop Lumedoloop confirman calidade no seu álbum de debut
Xénero: | 20 / 2 / 2026
Cando en outubro do pasado ano deuse a coñecer o proxecto Lumedoloop, comezou de inmediato a crear expectación nos numerosos seguidores do hip hop galego. A razón fundamental era a reunión de tres figuras musicais relevantes da escena urbana neste xénero. Por unha banda, Jamas (voz principal), un dos MCs máis carismáticos dos nosos escenarios, cun estilo que mestura contundencia e sensibilidade, posuidor dun flow natural cargado de musicalidade e forza explosiva. Pola outra, Møu (produción musical e voz), o produtor que marcou a evolución do rap en Galicia, cunha identidade sonora tan asentada coma en constante exploración. Ambos, fundadores de Dios Ke Te Crew, referencia indispensable do rap en galego, alíanse neste proxecto artístico con DJ Mil (scratches e djing), virtuoso dos pratos cunha carreira consolidada cuxos cortes e seleccións son parte esencial da narrativa sonora de Lumedoloop. Tras varios adiantos nestes pasados meses, este venres 20 de febreiro, o trío compostelán saca á luz o seu álbum debut, '(Re)existencia', que presenta como unha obra conceptual que vai alén dun conxunto de cancións para ser a materialización dunha filosofía de vida e, moi especialmente, un mapa de navegación para tempos convulsos.
Galicia destaca nas votacións dos premios MIN da música independente
Xénero: | 16 / 2 / 2026
As listas dos semifinalistas na 18ª edición dos Premios MIN da música independente de España trae un retrato da puxanza da creación musical actual de Galicia. A través dun xurado profesional amplo, conformado por arredor de 300 persoas, ven de presentarse unha selección de semifinalistas nas diferentes categorías destes galardóns convocados pola Ufi (Unión de fonográficas independentes). Con artistas galegos presentes na maioría delas, é no Premio ao Álbum do Ano 2025 onde a presenza de artistas galegos acada cotas máximas, resultando que dos 29 discos semifinalistas do Estado, son 14 os que levan sinatura galega, practicamente a metade. Ademais diso, moitos de eles destacan en unha ou varias categorías con vistas a seguir nas seguintes fases cara aos premios. Un xurado máis reducido de profesionais especializados proseguirá agora a selección de finalistas e gañadores.
Volve O Caimán do Río Tea
Xénero: | 13 / 2 / 2026
O Caimán do Río Tea é unha formación que se fixo moi coñecida no xa histórico Xabarín Club da TVG dos anos 90. Co seu tema 'Estou na lavadora' acadaron entón gran popularidade e formaron parte fundacional do movemento bravú. En 1995 publicaron 'Feito na Casa' o seu primeiro disco editado por Sons Galiza e gañan o V Certame Galego da Canción editando un EP con cinco temas. Igual que algúns coetáneos como Heredeiros da Crus, o grupo de Ponteareas (de aí o río Tea) ausentouse da escena musical durante algúns anos, volvendo brevemente en 2014 para celebrar o 20 aniversario de 'Estou na Lavadora'. Tras diso tardaron dez anos e foi en 2024 cando sacaron o álbum "Sandsbridge lonely hearts club band", un disco tributo a súa terra, O Condado. Agora, trinta e cinco anos despois do seu debut, e baixo o selo Ferror Records, presentan un traballo longo: 'Vou pa Portujal'.
'Océano Eskizo' reúne as esencias do punk coruñés
Xénero: | 11 / 2 / 2026
Na "movida coruñesa" do século pasado houbo formacións musicais que destacaron, incluso a nivel nacional, en diferentes estilos que ían desde o punk sen concesións ata o pop ou o rock máis experimental. Bandas como Radio Océano, Los Eskizos ou Viuda Gómez e Hijos axudaron a construír unha escena musical propia da cidade herculina e deixaron recordos que aínda ecoan. Alguns dos integrantes desas formacións históricas reuníronse de novo cun proxecto novo que xa presentaron en directo o pasado verán: Océano Eskizo. Agora, a través de Ferror Records veñen de publicar unha primeira gravación con catro temas: 'Demos no soto'.
Axenda
novidades discográficas
Dani Cornes
Dioivo
Antía Muíño
Agoraphobia
Lumedoloop
O Caimán do Río Tea
Océano Eskizo
Comeza o Xogo
Vimbio