Os I Premios da Industria Musical recoñecen a Carlos Ares como Artista do Ano

A Axencia Galega das Industrias Musicais (AGEM) daba a coñecer este 13 de novembro o fallo dos galardóns honoríficos dos I Premios da Industria Musical Galega. Carlos Ares foi recoñecido como Artista do Ano, mentres Francisco Gómez Gandy recibirá o galardón á Persoa do Ano 2025. Os premios entregaranse o vindeiro 27 de novembro na compostelá Sala Capitol.

Segundo sinala a directiva da AGEM, o galardón a Carlos Ares recoñece a "súa traxectoria e a súa contribución á difusión da cultura galega, como un talento innegable que se consolidou no circuíto grazas á súa singular identidade artística e ao seu fermoso directo, gañando novas e novos seguidores día a día". Canda a isto, destaca que se converteu "nun dos fenómenos musicais dos últimos anos en España", desde o lanzamento de Peregrino en 2024, que "despois de anos sendo un dos produtores de referencia da escena nacional, supuxo un paso adiante na súa traxectoria, como unha proposta musical vangardista na súa concepción orgánica e un manifesto estético que acada a súa máxima expresión no directo". A presentación en 2025 de La boca del lobo "serviu para revalidar o éxito do seu debut e ampliar unha base de fans ampla e transversal".

Como Persoa do Ano 2025, a entidade seleccionou a Francisco Gómez, popularmente coñecido como Gandy, "pola súa traxectoria e o seu compromiso constante coa música en Galicia", co seu labor desde Copra Producciones, "é unha desas figuras fundamentais que, sen estar sempre diante dos focos, sostivo e sostén a estrutura do que somos como sector". Deste xeito, "o seu traballo é esa labor silenciosa que constrúe comunidade: apoiar proxectos cando simplemente son unha intuición, abrir camiños, conectar persoas, crear espazos... E facelo sempre con profesionalidade, respecto, paixón é un sorriso na cara", explica AGEM.

Canda a eles, as votacións populares seleccionaron o festival Surfing The Lérez como gañador do Premio á Excelencia na Experiencia do Público. O galardón recoñece "aqueles proxectos, espazos ou eventos que puxeron ás persoas espectadoras no centro, ofrecendo unha vivencia inesquecible". Ao encontro pontevedrés seguíronlle en votos as propostas Noites do Porto e o Atlantic Pride da Coruña.

A organización deu a coñecer tamén as 42 propostas finalistas que o xurado seleccionou para as distintas categorías dos galardóns. Anxela Baltar, Cecilia Carballido, María Baqueiro, Noel Miguélez, Tito Lesende, Javier Becerra e a Fundación Paideia encargáronse da escolla.

Finalistas dos I Premios da Industria Musical Galega

· Mellor deseño de iluminación
- Laura Iturralde e José Faro “Coti”, de Nononon.lab, por Síntese horizonte, de Guadi Galego.
- Teresa Tresandí, por DILUVIO, de Tanxugueiras.
- José Faro e As Dúas e Punto, de Nononon.lab, por A RONDA, de Mondra.

· Mellor implementación de son
- Iago Blanco, por La máquina del buen rollo, de The Rapants.
- Rubén Montes, por La boca del lobo, de Carlos Ares.
- Sara Martínez, por Uxía Lambona e a Banda Molona.

· Mellor empresa provedora de servizos
- Escena Sonora.
- Luxevan.
- Vacaline.

· Mellor profesional de produción
- Paco Iglesias.
- Victoria Blanco.
- Xabi Carnota.

· Mellor manager
- Aitana Cuétara.
- Kin Martínez.
- Manuel Tarrío.

· Mellor produción discográfica
- Iago Pico, por Pouland Studios.
- Juan de Dios, por Feira, de De Ninghures.
- Hevi, no Laboratorio Soyuz, por DE RONDA, de Mondra.

· Mellor posta en escena
- Mondra e Daniel Rodríguez, por A RONDA, de Mondra.
- Marina Oural e Ugia Pedreira, da Oficina Galega de Outros Asuntos do Movemento, por Síntese horizonte, de Guadi Galego.
- Tanxugueiras, Diana Ballesteros “Dii Feeling” e Manuel Escurís por DILUVIO, de Tanxugueiras.

· Mellor promotor/a-programador/a
- David Pedrouzo, de Todo Medre.
- Iván Arias, de WORK ON SUNDAY.
- Julio Gómez e Luis Campos, de Sinsalaudio.

· Mellor proxecto de comunicación
- Equipo de Dinamización da Lingua Galega do IES Rafael Dieste da Coruña, por Aquí tamén se fala.
- The Office Comunicación, polo Atlantic Pride.
- Bring the Noise, polo Resurrection Fest Estrella Galicia.

· Mellor identidade visual
- Zeltia Iglesias, Sofía Taboada, Daniel Rodríguez, Adriana Lado e María Ferradas por DE RONDA, de Mondra.
- Adrián Canoura, Carlota Pereiro e Alejandro Guillán por Barullo, de Baiuca.
- Lara Caeiro, Sandra Montero, Noemí Solla, Kika V Ramil, Arantxa Brandón e Fillas de Cassandra por Hibernarse, de Fillas de Cassandra.

· Mellor videoclip
- Lorenzo Negueruela, Yago Rodríguez, Mara Iglesias, Melania Freire e Lara Caeiro, por En fin, que máis dá, de De Ninghures.
- Santi Iglesias, Sergio “Steel” e Fillas de Cassandra, por Hibernarse, de Fillas de Cassandra.
- Xaime Miranda, por Ontes fun moi malo, de Grande Amore.

· Mellor evento cultural / musical
- Noites do Porto.
- Surfing the Lérez.
- WOS Festival x SON Estrella Galicia.

· Mellor espazo musical
- Sala Capitol.
- Náutico de San Vicente.
- Café Torgal.

· Mellor proxecto de sustentabilidade
- Festival Agrocuir da Ulloa.
- Festival de la Luz.
- Festival Sinsal SON Estrella Galicia.