Os I Premios da Industria Musical recoñecerán 17 categorías

O sector musical galego reunirase o vindeiro 27 de novembro na Sala Capitol de Santiago de Compostela para celebrar a edición inaugural dos Premios da Industria Musical de Galicia. Estes galardóns de nova creación promovidos desde a Asociación Galega de Empresas Musicais, AGEM incluíanse no Plan Estratéxico da Industria Musical de Galicia negociado coa Xunta de Galicia o pasado ano. Os premios recoñecerán ata un total de 17 categorías, moitas delas de cariz técnico ademais de outras artísticas, dentro do complexo mundo da profesión musical. Artista do ano, deseño de iluminación, sustentabilidade, excelencia na experiencia do público serán algunhas delas. Os novos premios, que veñen sumarse sen confrontación cos xa existentes Premios Martín Códax a proxectos musicais organizados desde Músicas ao Vivo (MAV), pretenden ser unha ferramenta para dar visibilidade ao talento galego e fortalecer a industria musical como motor cultural, social e económico desde unha perspectiva sectorial profesional.

Esta primeira edición dos premios pretende visibilizar e poñer en valor aquelas traxectorias, proxectos e iniciativas no eido musical que destacan polo seu compromiso coa creatividade, a innovación, o respecto e a sustentabilidade. En definitiva, exemplos a seguir no sector profesional galego. En palabras da presidenta de AGEM, Patricia Hermida, "a música galega vive un momento de madurez e diversidade extraordinarias. Os I Premios da Industria Musical de Galicia nacen para celebralo, para agradecer o talento e o compromiso de quen fai posible o seu crecemento, e para recoñecer o valor das persoas e proxectos que converten a nosa industria nun verdadeiro motor cultural e humano para Galicia".

17 categorías
Os I Premios da Industria Musical de Galicia premiarán un total de 17 categorías. Delas, 14 serán outorgadas polo xurado profesional: deseño de iluminación, implementación de son, provedor de servizos, profesional de produción, manager, produción discográfica, posta en escena, promotor/a-programador/a, proxecto de comunicación, identidade visual, videoclip, evento cultural/musical, espazo musical e proxecto de sustentabilidade. Ademais, a Xunta Directiva de AGEM seleccionará outras dúas categorías: artista do ano e persoa do ano. Finalmente, haberá un premio por votación popular: o da excelencia na experiencia do público. As votacións abriranse nas vindeiras semanas a través das redes sociais e da web de AGEM.

Un xurado independente formado por profesionais expertos en xornalismo musical, divulgación, produción, creación artística, sustentabilidade e emprendemento cultural será o encargado de propoñer e outorgar os premios nas diferentes categorías. A súa misión será destacar aquelas persoas, empresas e proxectos que contribúen ao avance colectivo do sector e que representan boas prácticas dentro da industria musical galega. Moi pronto daranse a coñecer as persoas integrantes do xurado nesta primeira edición dos premios.