A industria musical creará uns novos premios e busca un Plan estratéxico

O Consello da Xunta aprobou hoxe a sinatura dun convenio coa Asociación Galega de Empresas Musicais (AGEM) para o desenvolvemento de distintas iniciativas de apoio á industria musical nos anos 2024-2025. O convenio conta cunha achega por parte da Consellería de Cultura, Lingua e Xuventude de 52.000 euros A través deste acordo coa AGEM crearanse uns galardóns de música novos cuxa primeira gala de entrega terá lugar na segunda metade de 2025. Segundo o presentado hoxe incluirán ata 15 categorías. Actualmente xa existen os Premios Martín Códax da Música Galega, organizados pola asociación Músicas ao Vivo, que representa aos artistas.

O documento contempla tamén a realización xa no mes de novembro deste ano e do que vén dunhas xornadas en Pontevedra de promoción musical para o encontro de promotoras e distribuidoras con profesionais da programación cultural de Galicia e do norte de Portugal. Ademais diso daranse pasos na elaboración do Primeiro Plan Estratéxico da Industria Musical de Galicia,unha folla de ruta que se estruturará en tres fases ata xullo de 2025 e que incluirá o deseño dun conxunto de medidas específicas e de políticas de apoio orientadas a estimular a creación, produción e distribución de contidos musicais tanto a nivel nacional como internacional así como as ferramentas de avaliación para cumprir cos obxectivos no período 2025-2030.