Nadadora volve quince anos despois do seu último traballo

En febreiro de 2013 o Teatro Lara de Madrid acollía o concerto de despedida da formación Nadadora. O grupo de indie pop orixinario de O Grove pechaba así a súa actividade comezada dez anos antes que os colocara naquel momento como unha banda emerxente do panorama estatal independente. Naquel momento remataban de presentar o seu terceiro traballo longo 'Luz, Oscuridad, Luz' (Ernie Records, 2010), iniciando etapa co selo de Caldas tras a súa etapa con Jabalina. Quince anos despois, xa noutros tramos vitais a nivel persoal, e de novo con Ernie Records, a banda retoma a composición de temas e as gravacións, volvendo coa presentación dun EP, tal e como fixeran xa en 2005 co seu primeiro traballo. Sara Atán (voz e guitarra), Gonzalo Abalo (voz e guitarra), Edu Romero (baixo), Daniel Abalo (batería) e Montxo Couselo (teclados) están de volta con 'Mañana y siempre'.

Presentados nos meses anteriores dous adiantos, os temas '1997' (con vídeo) e 'Aparecer', o disco, xa dispoñible en plataformas ofrece seis temas novos dos grovenses. O EP conta coa produción a cargo de Martí Perarnau (Zahara, León Benavente, Juno) e o enxeñeiro de son Pablo Pulido (Estudio Uno). Cancións que reúnen un son familiar e recoñecible con novos azos. O novo traballo soa a reencontro e descubrimento e lémbranos por que Nadadora non desapareceu do noso recordo e do noso imaxinario musical. Estes temas que falan de comezos, de perdas, de permanencias e ausencias, capturan a esencia do que fixo de Nadadora unha presenza musical distinguible no seu entorno musical con identidade propia. Con el a banda reconectará sen dúbida con aqueles que xa a seguían antes e chegará a novos públicos para os que será un descubrimento valioso. O disco, ademais do formato dixital publícase tamén en vinilo. O reencontro co público, en directo, aínda non ten datas precisas que a banda comunicará máis adiante e seguro que xa hai moitos fans desexando coñecelas.