O novo disco de Tiruleque homenaxea os espazos urbanos de foliada

A formación coruñesa Tiruleque ven de sacar o que xa é o seu quinto disco de estudio 'Repichoca'. Precedido inmediatamente polo disco co que en 2021 celebraban a súa traxectoria de dúas décadas 'Tiruleque 20 anos no camiño', chega agora este novo álbum conformado por dez cancións e que procura evocar tanto as orixes da propia banda coma os espazos urbanos dedicados á música galega. Con ese duplo obxectivo, o traballo discográfico colle o seu título do nome dun histórico local coruñés desaparecido en 2021 que durante preto de dúas décadas actuou dende a rúa Orillamar como catalizador, canteira e escaparate para a escena da música galega da cidade herculina. Nese espazo consideran que naceu a formación e agora fanlle esta homenaxe á historia compartida deste grupo, deste xa mítico local e de toda unha xeración que medrou nas foliadas modernas e urbanas que se celebraron ao seu abeiro. O álbum, en definitiva, é unha chamada á festa, ao encontro e mais á memoria.

O disco presentarase oficialmente este vindeiro domingo no Teatro Colón da Coruña cun concerto no marco do ciclo 'Folk no Colón', impulsado polo Concello da Coruña. O repertorio escollido por Tiruleque neste cuarto traballo discográfico aposta pola forza das voces femininas que deron forma á tradición da música cantada en galego e que este ano está a reivindicarse incluíndo o Día das Letras Galegas. Recóllense tanto a enerxía coma a tradición das mulleres de xeracións anteriores que se encargaron de transmitir as composicións para que chegasen aos nosos días. Partindo dese punto, a formación potencia a enerxía hipnótica da pandeireta co trance das liñas de baixo, combina o brillo da gaita coa forza do metal e mestura a percusión tradicional coa moderna; sempre coa particularidade de manterse fiel ao espírito verdadeiro das músicas, sen artificios innecesarios, respectando o seu sentido orixinal, dentro da foliada, para cantar e bailar coma sempre se fixo.