Ti estás aquí > Inicio / Xéneros / BSO
Música BSO
O compositor Sergio Moure recibirá o Premio especial do OUFF
Xénero:
| 29 / 4 / 2021O compositor Sergio Moure de Oteyza (A Coruña, 1969) recibirá o Premio Especial da 26 edición do Festival de Cine de Ourense -instituído na 25 edición-, pola súa ampla traxectoria como músico de cinema e como autor de máis de medio cento de composicións para longametraxes, curtametraxes e series de televisión, á parte o seu labor como músico sinfónico. Así llo comunicou persoalmente ao compositor Manuel Baltar, presidente da Deputación de Ourense, institución que dende 2018 lidera o rexurdir do festival xunto á Fundación Carlos Velo. Co gallo do premio, o Ourense Film Festival publicará un volume autobiográfico do propio Moure na súa serie Monografías, que será presentado nas mesmas datas.
A SEMUÁ-Semana das Músicas do Audiovisual chega á súa cuarta edición
Xénero:
| 24 / 10 / 2019Esta semana que pon o foco no elemento musical das produción audiovisuais, organizada pola Academia Galega do Audiovisual co apoio do Concello da Coruña, a Orquestra Sinfónica de Galicia e a Banda Municipal de Música da Coruña, celebrarase entre o 27 de outubro e 1 de novembro na Coruña, baixo a dirección artística unha vez máis do compositor Nani García e co obxectivo de revalidar o éxito de público das tres edicións anteriores. A Semana das Músicas do Audiovisual-SEMUÁ, pon en valor o traballo dos profesionais da composición, produción e interpretación das músicas que acompañan as obras audiovisuais a través dun programa suxestivo que abarque a público de todas as idades. Na súa cuarta edición, a SEMUÁ dedicará unha especial atención á figura do pianista e compositor arxentino Federico Jusid, compositor de bandas sonoras para máis de 60 películas e 30 series de televisión, entre as que destacan títulos como El secreto de sus ojos, Gran Reserva, Loving Pablo ou Fariña entre outras moitas. Jusid dirixirá á Orquestra Sinfónica de Galicia no Teatro Colón dentro do programa As nosas músicas; no que serán interpretadas algunhas das súas partituras máis coñecidas xunto a pezas dos compositores galegos Manu Riveiro e Pablo Barreiro, entre as que destacan unha suite a partir da banda sonora do filme galego Sempre Xonxa no trixésimo aniversario da súa estrea.
A Academia do Audiovisual reedita a semana dedicada ás bandas sonoras
Xénero:
| 15 / 11 / 2017O Palacio da Ópera da Coruña acolleu a presentación da segunda edición da Semana das Músicas do Audiovisual, un festival singular organizado pola Academia Galega do Audiovisual e pola Orquestra Sinfónica de Galicia coa intención de dar protagonismo ás músicas compostas para cine, televisión e outros medios audiovisuais. Esta segunda edición celebrarase dende o 27 de novembro ata o 1 de decembro na Coruña, Compostela e Narón, baixo a batuta de dirección do evento do compositor Nani García.
Cine mudo e música en directo no ciclo Cineconcertos do Teatro Jofre
Xénero:
| 8 / 2 / 2017O teatro Jofre de Ferrol acollerá un novo ciclo no que mesturará o cine e a música dun xeito pouco habitual. Os Cineconcertos, que comezarán o vindeiro sábado 11 de febreiro, ofrecerán tres proxeccións de clásicos do cine mudo con música interpretada en directo polos seus propios compositores, músicos experimentados e de sona nas súas respectivas escenas musicais moi vencelladas ao jazz. A banda de jazz-rock e rock progresivo Pegasus serán os que abran o ciclo coa banda sonora creada para o filme Berlín, sinfonía dunha gran cidade (Walter Ruttman, 1927) a mítica banda formada orixinariamente en 1981, replantexaron técnica e artisticamente esta banda sonora en directo, que xa presentaran orixinariamente en 1986 por encarga dos directores da Setmana Internacional de Cinema de Barcelona. Haberá que agardar un mes ata a seguinte xornada do ciclo, e o 11 de marzo, cando o pianista e compositor Jordi Sabatés interpretará en directo a banda musical que creou para a película Sherlock Jr. (1924) de Buster Keaton, título que se coñeceu en España como O moderno Sherlock Holmes. Sabatés conta cunha carreira de máis de corenta anos ás súas costas na que combinou propostas musicais de todos os tipos de xéneros e estilos, do jazz ao rock pasando pola canción, o lied, cancións sobre textos dos trobadores provenzais, a música de cámara e a sinfónica. O ciclo terminará o 28 de abril coa proxección da película The kid, de Charles Chaplin, 1921) co acompañamento musical agrupación instrumental formada en Vigo en 2013, Caspervek Trio. A formación clásica dos compoñentes do grupo e a utilización de recursos do jazz, o minimalismo, a música electrónica ou o folk, conforman a paisaxe sonora deste trío.
Unha semana para facer protagonista á musica que acompaña imaxes
Xénero:
| 14 / 9 / 2016Na actividade organizada desde a Academia Galega do Audiovisual a música será a protagonista absoluta da película coa axuda da Orquestra Sinfónica de Galicia (OSG) e da Fundación SGAE. Dous concertos a cargo da formación sinfónica en Ourense e Ferrol serán a actividade principal sobre a que xirará o programa da Semana das Músicas do Audiovisual que tamén inclúe paralelamente actividades educativas, charlas de compositores, unha Masterclass sobre dereito de autor das músicas no audiovisual e un obradoiro de iniciación á produción musical para o audiovisual que durará toda a semana e impartirase na sede da Fundación SGAE en Santiago. Deste xeito entre concertos e outras actividades catro son as cidades nas que se reparten as actividades do programa e nas que o evento acadou diversas colaboracións. Algunhas das actividades serán abertas ao público e outras como os concertos, o obradoiro e determinadas Masterclass serán de pago.
Nico Casal recibe un premio pola música dun vídeo promocional sobre o MAC
Xénero:
| 10 / 7 / 2013Son uns premios modestos que naceron co obxectivo de promover aos creadores novos. Toman o seu nome do coñecido e popular compositor de bandas sonoras, Jerry Goldsmisth, autor de bandas sonoras como O planeta dos Simios, Chinatown, Alien ou La profecía entre moitos outros. Con compositores chegados de todo o mundo, este ano hai no palmarés deste certame un compostelán, o pianista e compositor Nico Casal que recibe o premio na categoría de Vídeo Promocional. A música composta para dar a coñecer o Museo de Arte Contemporánea Unión Fenosa, o MAC (antes coñecido como Macuf) deulle este galardón. Os premios concedéronse nunha gala celebrada en Córdoba a semana pasada.
Sae á venda a banda sonora de Secuestrados
Xénero:
| 10 / 3 / 2011Vintecinco minutos de música ambiental que pretende xerar desasosego. Esta é a proposta que fai Sergio Moure coa banda sonora orixinal do filme Secuestrados producido por Vaca Films, coa que foi candidato ao Goya nesta categoría. O disco, que acaba de saír á luz da man de Karonte distribucións, consolida a carreira de Moure na música para filmes, un xénero no que xa realizara o acompañamento de Retornos ou Un buen hombre.
O disco coa banda sonora de Retornos está xa nas tendas
Xénero:
| 8 / 11 / 2010O compositor Sergio Moure segue engadindo á súa carreira novas obras para a cinematografía coa banda sonora que asina para a película Retornos. A música composta para o filme dirixido por Luís Avilés Baquero xa está nas tendas, editado como xa é habitual polo selo Karonte. Nesta gravación o propio Moure toca varios instrumentos de corda como as guitarra acústica e eléctrica, mandolinas, guitarra portuguesa, así como o piano. A película producida por Vaca Films estreouse en cines o pasado 29 de outubro coincidindo coa saída ao mercado deste novo disco de Sergio Moure. O compositor coruñés xa asinou anteriormente outras bandas sonoros como as das películas Inconscientes, Cargo ou Un buen hombre e tamén asina a da película Secuestrados (2010) pendente aínda de estrea. O disco conta tamén con música adicional de Diego Lipnizki.