CORREO
RSS
Noticias
A Orquestra Sinfónica de Galicia gaña un Goya pola banda sonora do filme "Sei quen es"
Xénero: | 16 / 4 / 2001
A produción galega "Sei quen es", dirixida por Patricia Ferreira acadou un Goya á mellor banda sonora o pasado sábado tres de febreiro. Detrás da banda sonora desta produción houbo un esmerado traballo de coordinación entre directora do filme e o músico, José Nieto, un profesional de recoñecido prestixio, que xa acadara varios Goya pola música de películas coma "El bosque animado", "El rei pasmado" ou "El maestro de esgrima". Xuntos desenvolveron un traballo de visionado e un intenso proceso de discusión coa intención de definir perfectamente a sensación que a música debía transmitir en cada escena. A idea básica que vertebra todas as pezas musicais partiu dunha escena da película, aquela na que o protagonista, que sufre amnesia recupera momentaneamente a súa memoria. A partir deste intre concreto desenvolvéronse vinte e unha pezas musicais que xiran arredor duns personaxes que tentan esquecer o seu pasado para fuxir do destino. As pezas foron gravadas pola Orquestra Sinfónica de Galicia baixo a dirección do propio José Nieto, no Auditorio da Coruña.
O selo independente Lixo Urbano saca o segundo disco dedicado a bandas punk rock galegas e estranxeiras
Xénero: | 15 / 3 / 2001 + AUDIO
Desde debaixo da terra, as bandas independentes máis ruidosas atópanse reunidas no segundo recompilatorio do selo musical Lixo Urbano Ediçons: "Killer Lixo vol.II -O retorno do Lixo Assassino". Punk-rock en galego, español e inglés feitos por bandas de todos os recantos do mundo. Desde os composteláns Fame Neghra aos finlandeses The Flaming Sideburns, pasando por vascos, cataláns ou madrileños. Esta variedade supón unha internacionalización do traballo desta casa, que xa sacara un volume de Killer Lixo "o primeiro recompilatorio galego de punk-rock" só con grupos galegos. Aquí presentan unha mostra da presenza galega neste recompilatorio. Desde Compostela os Samesugas ou o xa desaparecido Fame Neghra; desde Vigo unha formación con historia, Foggy Mental Breakdown, e desde Coruña chega Mistakens. Outra banda coruñesa que comeza a soar "Thee virus" aportou a este recompilatorio "Como un animal". Rematamos cunha versión dun clásico do xénero, "Those boots are made for walking", a cargo do novo grupo Japón 84, no que participan algúns ex-membros de Fame Neghra.
Do Cumio edita un duplo CD co concerto de homenaxe a José Afonso en Castrelos no 1985
Xénero: | 1 / 12 / 2000 + AUDIO
"Galiza a José Afonso" (Edicións do Cumio, 2000) é un duplo CD que constitúe, ademais de o seu innegable valor musical, todo un documento sonoro dun momento histórico: o concerto que reuniu en agosto de 1985 a amigos e admiradores do cantautor portugués durante máis de doce horas no Parque de Castrelos, en Vigo. Unha auténtica maratón musical e cultural na que poetas, músicos e escritores homenaxearon a Zeca Afonso, que naquel momento estaba loitando contra a doenza que o consumía. O concerto, que tiña entre os seus obxectivos reunir diñeiro para axudar o Zeca no grave momento que vivía, foi quizais o máis semellante ó Woodstock americano, que houbo nestas terras. Así, saltaron ó escenario: poetas para recitar algúns dos temas e ideas que el defendía, amigos que lle dedicaron unhas palabras, músicos para recrear ó propio Zeca e pechando a homenaxe o grupo de maior resonancia musical da época, Fuxan os Ventos.
Sae á rúa o segundo disco de Nen@s da Revolta
Xénero: | 20 / 11 / 2000 + AUDIO
"As vozes roubadas" (Boa Music, 2000) é o segundo disco desta formación saída no ano 93 de entre as iniciativas musicais que xurdiron do Centro Social Ocupado Ruela de Vigo. Letras comprometidas e con aire de disidencia, expresión de posturas culturais, sociais e políticas. Música de mestizaxe e experimentación sonora. Hip-hop, reggae, ska, rumba, raggamuffin... Integrando no discurso sonoro as pandeiretas e gaitas cos teclados e os samplers. Unha proposta de revolta asentada nunha idea cultural da que a música, aínda que importante, non é o límite no que queren quedar estes seis músicos. Nen@s da revolta preocúpase por temas sociais como a desigualdade das mulleres, os dereitos dos traballadores, a liberación dos animais, a identidade cultural. Estas ideas, que xa estaban no seu primeiro disco "A revolta d@s Nen@s /Raggaliza dissidente" (Sons de Luita, 1998), volven agora arroupadas por unhas composicións musicais máis coidadas e impactantes, tanto en arranxos como en produción, que afastan ó grupo de todo folclorismo cara a unha mensaxe musical máis o pé das rúas do fin de século. Os da revolta fortalecen a escena casque esmorecente dos novos sons, que dende hai anos non tiñan unha representación clara.
Quinta Feira presenta no seu primeiro disco cancións con letras de literatos contemporáneos e trobadores medievais
Xénero: | 15 / 11 / 2000 + AUDIO
A casualidade reuniu en 1997 enriba dun escenario a Tito Maqueira(guitarra), Marcos Seixo (zanfona e percusións) e Toño Domínguez (frauta e voz) para dar un concerto de intención case que anecdótica. A boa comunicación que acadaron entre eles levounos a comezar a cavilar nun proxecto de formación musical estable. Aquel día da casualidade era un xoves, e os músicos decidiron lembrar o encontro dándolle ó seu proxecto o nome do día, Quinta Feira. Agora, tres anos despois editan o seu primeiro disco "...de seu" (Sons Galiza, 2000). En Quinta Feira conviven cordialmente o jazz, o rock, a bossa, aires portugueses e, como non, a referencia da música tradicional galega. A metade das cancións do seu disco son instrumentais, mentres que as letras das outras cinco baséanse en textos de autores galegos. tanto contemporáneos (Roberto Blanco Torres, Castelao) coma trobadores medievais (Xoán de Cangas, Mendinho, Martín Codax). A presentación do disco "...de seu" fíxose o pasado 20 de outubro no Teatro Principal de Pontevedra, co apoio da Concellaría de Cultura do concello da cidade do Lérez. A formación caracterízase por unha vocación didáctica que se materializou cando, en 1998, fixeron unha xira por centros de ensino e asociacións culturais. O espectáculo didáctico que presentaron entón, no que se mesturaban música e literatura, facía un percorrido pola historia e cultura dos trobadores medievais
Mercedes Peón aproveita o éxito do tema orixinal da serie Mareas vivas para sacar o seu primeiro disco "Isué"
Xénero: | 1 / 11 / 2000 + AUDIO
Isué (Resistencia, 2000) é o primeiro traballo da artista coruñesa Mercedes Peón, que dende os dezasete anos percorre a xeografía musical galega recuperando ás raíces tradicionais no mesmo campo onde nacen. Mercedes Peón pasou tres anos preparando este disco, a boa acollida que ten entre a xente o tema que fixo para a serie "Mareas vivas" animouna a sacalo. De feito ese mesmo tema "O Mar" aparece neste álbum cunha entrada a capella. No disco a artista non rexeita certos tipos de mestizaxe coas músicas norteafricanas, nas que atopa similitudes cos ritmos galegos que a fan "mirar máis cara o sur." O disco presentouse a mediados de outubro e, segundo a artista, é "un traballo feito con todo o amor" que pretende expresar a súa aprendizaxe e coñecemento da tradición musical oral.
Xistra do Coruxo reivindica o espazo musical común do sur de Galicia e norte de Portugal no seu terceiro disco
Xénero: | 1 / 11 / 2000 + DOCUMENTO + AUDIO
En "Xistralia, república independente" (Zouma Records, 2000), Xistra do Coruxo recuperan os sons, os instrumentos e as pezas tradicionais do sur de Galicia e do norte lusitano. Cando en 1998 "Xistra do Coruxo" irrompeu no panorama folk, nacía co obxectivo de estudar, divulgar e actualizar aquelas pezas musicais que recollían o sentir e o lecer das xentes do sur galego. Unha vocación didáctica que plasmaron ó longo da súa discografía e, en especial, neste último de traballo. Neste terceiro albume Xistra de Coruxo recupera problemas e temas que malia parecer actuais, están na nosa cultura dende sempre. O seu compromiso particular son as Treboadas, unha cita ineludible en tódolos seus traballos. No seu disco, ademais de 14 pezas musicais, Xistra engade as partituras das pezas populares orixinais que toman como base do seu traballo.
Rodrigo Romaní presenta o seu primeiro traballo en solitario tras da súa saída de Milladoiro
Xénero: | 30 / 10 / 2000 + IMAXES + AUDIO
O primeiro disco de Rodrigo Romaní en solitario, Albeida (Boa Music, 2000) presentouse no Centro Galego de Arte Contemporánea de Santiago. O álbum do antigo compoñente e co-fundador de Milladoiro levantou moita expectación, xa que supón a volta ós escenarios deste arpista despois da súa separación do mítico grupo. Con Albeida, Romaní pretende facer unha homenaxe á paisaxe humana do sitio onde vive. "Quería facer todo o que non fixera antes en 22 anos, porque non lle podía impor ós demais o que eu quería", explicaba Romaní na presentación. O álbum, aínda que contén sons recoñecibles da súa anterior etapa, ofrece a diferenza que dá un traballo concibido na súa integridade por este músico, actual director do Conservatorio de Música Tradicional da Universidade Popular de Vigo. As catorce pezas do disco presentan un abano heteroxéneo de sons, ademais da novidade que supón o seu protagonismo vocal como cantante. Albeida está cheo das colaboracións de Susana Seivane, Anxo Pintos, Maximino Zumalave, Laura Quintillán, ademais da Orquestra Sinfónica da cidade de Praga, a Orquestra Camerata Viguesa, o Coro fiadeiro e a Agrupación Treixadura. A gravación do disco tivo lugar nos estudios As Galesas (Outes, A Coruña) e na Casa de Tolos (Gondomar, Pontevedra), Todo o proceso, tanto de creación como de gravación quedou recollido nun documental realizado por Suso Iglesias, o director do Xabarín Club (TVG). Imaxes da elaboración, e comentarios dos colaboradores e amigos de Rodrigo aparecen neste vídeo de media hora de duración.
Máis información sobre Albeida en Boa
Primeiro disco no mercado do grupo Xarín, gaiteiros do Incio
Xénero: | 10 / 10 / 2000
Os gaiteiros do Incio son a festa en si mesmos. Nados nas "terras bravas" do Incio, no sur da provincia de Lugo, no 1985, o seu repertorio é un percorrido pola extensa e variada música tradicional, facendo especial mención a aquela vinculada coas terras das que proveñen: o Incio e o Caurel. O seu primeiro disco "Xarín. Gaiteiros do Incio" é froito da xuntanza coa distribuidora Zouma P.A. O disco foi gravado nos estudios Areamaster de Vigo en Abril de 1999 e na "Casa de Tolos" de Mañufre-Gondomar en Xullo de 1999. O disco contén doce temas de todos os estilos da música tradicional, pero con especial predilección por aqueles que se tocaban antigamente nas festas da zona á hora de comezar o baile agarrado. Desde os seus comezos o grupo foi evolucionando desde unha formación autodidacta ate un traballo serio de cultivo de música tradicional, da que partiron para chegar a amosar arranxos musicais cun son refrescante que tenta revivir "a auténtica festa galega, onde a música e o baile foron e serán a mesma alma do pobo."
O disco dos composteláns Ruxe Ruxe aposta polo estilo "bravú"
Xénero: | 10 / 10 / 2000 + VIDEO + AUDIO
"Ata a aboa cando muxe escoita radio ruxe". Así di unha das letras deste grupo, Ruxe Ruxe, que segue a se autodenominar bravú cando o termo xa semella ter esgotado a algúns dos seus creadores. Estes nove músicos da comarca compostelá presentan nestas datas o seu novo disco con toda unha declaración como título "Non temos medo" (Clave Records, 2000). O seu anterior traballo, o primeiro da súa carreira editárono en 1999 con título homónimo do grupo Ruxe-Ruxe. Dos catorce temas que compoñen "Non temos medo", todos agás un son composicións asinadas polo cantante, Víctor Neira. O grupo apoia as súas pezas na forza das guitarras eléctricas, no pulo dun acordeón incansable manexado por Sebas Méndez "O neno", e na achega doutros instrumentos como o violín, a gaita, a pandeireta e a frauta todo elo sen forzar a adaptación duns sons con outros.