CORREO
RSS
Noticias
Pesar polo pasamento de Moncho Díaz
Xénero: | 20 / 2 / 2023
Ramón "Moncho" Díaz falecía o pasado venres, 17 de febreiro aos 70 anos, como consecuencia dunha enfermidade que viña padecendo desde hai tempo. O monfortino foi un dos piares de Fuxan os Ventos desde o ano 1979, onde ademais de tocar as frautas e a guitarra engadía a súa poderosa voz aos temas da formación, sumando o seu timbre aos das outras emblemáticas voces, como a da súa parella Tareixa Novo. Na parte profesional, Móncho Díaz exerceu como técnico de son de radio, traballando en emisoras como Radio Obradoiro e Radio Galega. Todos os medios do país e outros a través de edicións locais, recolleron o pasamento de Díaz. Nas redes sociais a formación folk publicou unha foto de Moncho, acompañada da frase, "Sempre e máis despois", título dun poemariod e Manuel Antonio e tamén do disco gravado en directo pola formación en 1999, co que volveron ao primeiro plano da escena musical tras moitos anos sen gravar.
Måi preséntase co álbum Nigredo
Xénero: | 17 / 2 / 2023
Xa está dispoñible o disco 'Nigredo', primeiro traballo longo de Måi, unha nova formación liderada pola artista Iseo Agilda, que conta co produtor Tomás Ageitos e a cellista Margarida Mariño. Unha década de traxectoria musical en outros proxectos como Sacha na Horta e Blues do País avala a experiencia de Iseo, que con Måi fao o seu proxecto máis persoal, que presenta a través da Plataforma A Regueifa 2.0. Nos oito temas que presenta 'Nigredo' ofrécese, segundo comunica a plataforma, unha simbiose do orgánico e o artificial que vai do folk ao pop e á electrónica, unha proposta que parte dun son moi persoal, urbano e ecléctico, deseñado xunto a Tomás Ageitos na produción e composición e gravado en Estudios A Ponte. O cello de Mariño xúntase co manexo da electrónica de Ageitos que actúa sobre ás percusións tradicionais na creación de atmosferas densas e cálidas nas que sobrevoa a voz de Iseo. O disco xa pode escoitarse nas principais plataformas en rede. O álbum conta tamén coas colaboracións nas voces de Yolanda Pose (Pura Mesura), achegando o seu rap no tema "Cando volvan as mareas" do que xa hai un vídeo de presentación; e de Fernando Barroso co oud e o bouzouki no tema Inshalla.
Nace en Bruxelas o festival Emigrason
Xénero: | 14 / 2 / 2023
"Levar a cultura, folclore, tradición e vangarda musical de Galicia á vila das frites e a cervexa". Este é o obxectivo de Emigrason, festival musical que se celebra en Bruxelas o vindeiro 25 de marzo. The Rapants, Lemon Pears, Familia Caamagno, Fillas de Cassandra, Filloas e Berto compoñen o cartel da primeira xeira desta iniciativa.
Consternación pola inesperada morte de Mangüi Martín
Xénero: | 16 / 1 / 2023
"Todo amor e un músico extraordinario" así definía Xurxo Souto a Mangüi Martín nun emocionado artigo publicado este domingo no xornal La Voz de Galicia apenas 24 horas despois de que se fixese pública a súa inesperada morte. Martín, de 50 anos de idade, aparecía morto na mañá do sábado no domicilio familiar, sen enfermidade previa nin causa aparente. A noticia caeu como unha bomba sobre o sector da escena musical galega e máis marcadamente na súa cidade, A Coruña, onde era moi coñecido pola súa actividade e gabado pola súa disposición e carácter. O músico, que nos seus primeiros pasos profesionais como baixista acompañou a Luar Na Lubre en varias actuacións en directo, ou formou parte de proxectos como Miki Nervio & The Bluesmakers, firmou algúns dos seus mellores achegas formando parte do Diplomáticos de Monte Alto, cos que estivo once anos, entre 1990 e 2001 e cos que gravou algúns dos máis emblemáticos traballos da formación coruñesa: 'Arroutada Pangalaica' (1991), 'Parrús' (1993), '¡Avante toda!' (1995) e 'Capetón' (1999). Na Coruña, lugar onde residía e onde creceu, malia ser natural do Ferrol, o seu falecemento causou fonda consternación, deixando clara a estima que se lle tiña, polas súas calidades non só como músico senón tamén persoais. Así, a triste nova motivou a publicación de mensaxes de condolencia que fluíron, tanto desde a escena musical e cultural da cidade herculina, como desde as súas institucións, como o propio Concello da Coruña, que tamén fixo público o seu pesar, así como varias das formacións políticas que o integran. Souto, compañeiro nos Diplomáticos, que foi quen recrutou a Mangüi para a formación deixa clara a enorme achega do músico e o fondo da súa pegada no país: "A súa liberdade foi impulso do noso bravú".
O Espalla Rimas confirma a Lupe Blanco como mellor regueifeira do país
Xénero: | 9 / 1 / 2023
O Pazo da Cultura de Carballo acolleu na tarde deste sábado 7 de xaneiro a segunda edición do festival Espalla Rimas. O encontro dedicado á improvisación oral coroou de novo a Lupe Blanco como mellor reguefeira do país. A bergantiñá impúxose, ao igual que o pasado ano, na categoría RegueiAstros, onde competía contra os bergantiñáns Suso e Antonio de Xornes, os vigueses Bieito Lobariñas e Mani Braga, e O Rabelo, de Cercedo. Suso de Xornes foi finalista neste apartado.
A Asociación Amigos da Ópera de Santiago comeza o ano con dúas producións propias
Xénero: | 3 / 1 / 2023
Dous espectáculos no Auditorio de Galicia inician a actividade da Asociación de Amigos da Ópera de Santiago en 2023. O vindeiro xoves día 12 chega a escena, dirixida por Rafael F. Villalobos, A voz humana, unha adaptación da obra de Francis Poulenc en pequeno formato. A soprano dramática Nicola Beller Carbone, o pianista Juan Pérez Floristán e o actor Luis Tausía protagonizan esta montaxe que ten xa á venda as súas entradas.
Portamérica, Río Verbena e WOS Festival sitúanse finalistas nos premios dos festivais europeos
Xénero: | 23 / 12 / 2022
Tres festivais galegos mantéñense como finalistas nos European Festival Awards, os galardóns da industria do sector destes eventos a nivel europeo, que este ano celebran a súa XIIª edición. Dos oito eventos galegos que presentaron as súas candidaturas nalgunhas das 16 categorías, só tres deles aguantan xa como finalistas: Portamérica, Río Verbena e WOS Festival. Este último, o WOS Festival x SON Estrella Galicia, figura como finalista ao premio a Mellor festival celebrado en recinto pechado do 2022. Nesta categoría o evento santiagués xa foi recoñecido en 2018 como o mellor de Europa daquel ano.
O Consello da Cultura pon na rede unha primeira gravación sinfónica do compositor Carlos López García-Picos
Xénero: | 22 / 12 / 2022
Neste 2022 a piques de rematar celebrouse o centenario do nacemento de Carlos López García-Picos (Betanzos, 1922- Oleiros, 2009) músico sobranceiro e multifacético (compositor, director de corais, dinamizador cultural, etc) sempre comprometido coa causa galega. Unha efeméride que o Consello da Cultura Galicia encaixou dentro da atención especial ás contribucións á cultura galega realizadas no exilio, en consonancia coa figura elixida no Día das Letras Galegas, Florencio Delgado Gurriarán. No marco da conmemoración o Consello ven de difundir en aberto a través da súa páxina web institucional a primeira gravación realizada da obra sinfónica de García-Picos ' Sindy, A.31', estreada o 8 de agosto de 1976 dentro dun concerto da Tempada Oficial do Teatro Colón de Bos Aires, pola Orquestra Filarmónica de Bos Aires baixo a dirección de Mario Benzecry. A peza, de 11 minutos de duración, pode escoitarse íntegra na sección especial de contidos dedicados á comemoración da memoria do músico. A gravación difundida repousaba na Colección Pampillón do Arquivo Sonoro de Galicia que agora, como colofón dos actos de celebración do centenario do nacemento do músico, o Consello da Cultura galega (CCG) pon na rede cun estudo contextualizador a cargo de Javier Ares Espiño e María del Carmen Lorenzo Vizcaíno.
Concerto sinfónico con música de videoxogos en Vigo
Xénero: | 22 / 12 / 2022
"Música e videoxogos: unha odisea sinfónica" é o título do orixinal concerto que a Orquestra Vigo 430 dará este venres ás 20.00 horas no Auditorio Mar de Vigo. Ao xeito do que habitualmente faise con bandas sonoras de películas ou outras producións audiovisuais, esta actuación ofrecerá un percorrido pola historia da música dos videoxogos, desde os anos 80 do século XX ata a actualidade, a través dunha coidada selección feita pola musicóloga Erea Carbajales e o músico Brais González. As músicas de xogos que xa forman parte da historia dos videoxogos como 'The Legend of Zelda', 'Super Mario', 'Crash Bandicoot', "The Sims", "Candy Crush" ou 'Mortal Kombat' entre outros moitos, serán revisadas pola Orquestra Vigo 430, baixo a dirección de Isabel Rubio, que contará coa colaboración en directo do YouTuber e gamer León Picarón, quen fará a través dunha pantalla unha demostración con varios xogos ao tempo que soan as músicas.
Os festivais galegos toman posicións nos premios ibéricos do sector
Xénero: | 20 / 12 / 2022
Abriuse unha nova edición, á sétima, dos Iberian festival Awards, o galardóns que premian a excelencia no sector profesional dos festivais de música celebrados na península ibérica. Trece das vinte e cinco categorías a premiar dependen, nunha primeira fase, do voto do público a través da web ata o vindeiro 16 de xaneiro. En dez desas trece categorías abertas á influencia publica está agora mesmo máis dunha ducia de eventos celebrados este ano en Galicia, moitos deles tamén aparecen nas dez categorías a valorar directamente por xurados profesionais. Na lista a grandes festivais só entra este ano, pola banda galega, o festival O Son do camiño, que tamén opta noutras das categorías ; mentres, onde máis representación galega aparece, nestas primeira listas a votar, é nas categorías de festivais de tamaño medio e na de tamaño pequeno. Nas primeiras están PortAmérica, Revenidas, Río Verbena Fest, SonRías Baixas e ViveNigrán Festival; na segunda entran a competir as edicións deste ano de 17º Ribeira Sacra; Festival Sinsal Son Estrella Galicia; Revolta do Umia Festival; Underfest Son Estrella Galicia e WOS Festival x SON Estrella Galicia. Outros eventos entran nas quinielas desta fase, non só os estritamente musicais, como por exemplo os Ferve Estrella Galicia, de Pontevedra e a Mostra Internacional de Curtametraxes Vila de Noia, que compiten polo premio a mellor festival non musical. Ademais diso outros festivais, ou partes deles, como actuacións concretas dentro deles ou fotografías tomadas neles, están na lista de candidatos a outros premios desta edición dos Iberian festival Awards. A gala final de entrega de premios terá lugar na localidade portuguesa de Maia o vindeiro 11 de marzo.