CORREO
RSS
Ti estás aquí > Inicio / Xéneros / Folk
Música Folk
A gaita e os seus intérpretes nas paredes do museo
Xénero: | 29 / 9 / 2021
O Museo de Pontevedra inaugura mañá a exposición "Gaiteiraos" no claustro do edificio Sarmiento. Esta mostra presenta un total de 35 debuxos de recoñecidas gaiteiras e gaiteiros de Galicia feitos polo artista César Lombera, moi coñecido pola súa faceta de escultor. A través destes 35 debuxos Lombera pretende reivindicar a figura do gaiteiro como un exemplo do patrimonio inmaterial galego. Avelino Cachafeiro, Ricardo Portela, Susana Seivane, Carlos Núñez, Cristina Pato, Os Trinta de Trives, o gaiteiro de Guillarei e os de Soutelo, son algunhas das persoas representadas nos gravados reunidos nesta mostra que abrirá ao público tralo acto de inauguración que terá lugar o xoves, día 30 de setembro, ás 20:00 h e poderá visitarse ata o 28 de novembro. O capitel de Melide, unha peza do século XIV pertencente á colección do propio museo provincial, complementa esta proposta expositiva dado que representa nunha das súas faces unha escena musical que inclúe un laúde e unha gaita. Na mostra, ademais, poden coñecerse explicacións sobre a orixe da gaita e a súa área de expansión.
Paraíso Canto e Charanga Trébede gañan o certame Interritmos
Xénero: | 28 / 9 / 2021
A nova edición do certame 'Interitmos: Sons do Rural' rematou coa proclamación das bandas Paraíso canto e Charanga Trébede como gañadoras tras da audición levada a cabo esta fin de semana pasada no Naútico de San Vicente do Mar entre as seis formacións finalistas. O Concurso, organizado polos Grupos de Desenvolvemento Rural (GDR) coa Asociación de Desarrollo Local Deloa, está destinado a propostas musicais instrumentais ou vocais, de ata un máximo de 8 compoñentes, con traballos que versen tanto na recreación ou evolución de pezas tradicionais, como en pezas de nova creación que beban da música de raíz. Este certame busca promover a cultura como motor de desenvolvemento territorial, así como dar visibilidade e potenciar a profesionalización de grupos e bandas que apostan pola evolución da música tradicional e de raíz.
O TradFest volve levar a Santiago a variedade da música de raíz
Xénero: | 28 / 7 / 2021
Santiago de Compostela festexará o vindeiro sábado 31 a contemporaneidade da música galega de raíz cunha nova edición do TradFest, que inclúe 20 concertos, ruadas e unha feira de artesanía, entre outras actividades, coa participación de máis de 60 artistas galegos e internacionais. A nova edición volve a realizarse no parque e igrexa de San Domingos de Bonaval usando varios palcos polos que pasará un abano de artistas representando unha gran variedade de estilos e estéticas dentro da música tradicional: o Cuarteto Caramuxo, Marcos Coll , Caldo, Caamaño & Ameixeiras, Tobie Miller, Najla Shami, Mulleres de Gharghamala!, Xico de Carinho e Cuchús Pimentel, Grupo 1500, Os da Porfía, TOR, Mozart á galega, Antonio Prado e Miguel Vázquez. O evento pechará cunha foliada ao vivo na praza da Quintana que contará coa participación da Banda da Crechas e convidades de luxo: Felisa Segade, Os da Porfía, Marcos Coll, Caamaño & Ameixeiras, Sheila Patricia. Todas as actuacións son de balde pero é precisa a retirada previa de entradas.
Xabier Díaz, Xabarín Club e Anxo Angueira premios Rebulir 2021
Xénero: | 28 / 7 / 2021
Mediante un comunicado deuse a coñecer a decisión do Xurado dos Premios Rebulir da Cultura Galega 2021, un recoñecemento creado desde a asociación cultural do mesmo nome, para sinalar persoas ou colectivos que contribúan á difusión e posta en valor da cultura autóctona nas súas diferentes manifestacións. Tres galardóns en tres categorías outorgou onte o xurado: Música galega, Artes escénicas e un premio de Homenaxe. Anxo Angueira, escritor e presidente da Fundación Rosalía de Castro, foi o escollido pola comisión para recibir o premio Homenaxe, "pola súa contribución a literatura galega, e a súa vinculación persoal e profesional con Ramirás e a comarca de Terras de Celanova", segundo o fallo. Un dos aspectos que defende este galardón é a proxección do nome de Galicia alén das súas fronteiras, facendo fincapé no establecemento de vínculos interculturais e de raíz. O músico Xabier Díaz tamén resultou recoñecido co premio Rebulir, "pola súa dilatada traxectoria no eido da música tradicional tanto dentro como fora de Galicia". Na categoría de Artes escénicas o xurado decidiuse por galardoar ao espazo infantil da TVG, Xabarín Club, "por ter contribuído desde o audiovisual, e máis concretamente desde a animación, a normalización lingüística e difusión da cultura galega", di o xurado. O acto de entrega de ditos galardóns terá lugar o sábado 18 de Decembro de 2021, no marco da Gala Central do Festival Internacional Rebulir 2021, a cal se celebrará previsiblemente no Complexo Polideportivo de O Picouto (Concello de Ramirás).
Xisco Feijoó pon en valor a cantiga de creación colectiva en 'Peixe'
Xénero: | 7 / 7 / 2021
Logo dun incesante labor de recuperación etnográfico ao longo de máis de trinta anos, e de colaborar en máis de vinte discos e espectáculos de artistas de raíz con proxección internacional (como Mercedes Peón, Xosé Manuel Budiño, Carlos Núñez, Berrogüetto, Kepa Junquera ou Rodrigo Romaní, entre outros), Xisco Feijoó presenta o seu primeiro traballo discográfico, Peixe (Sorte Discos), unha creación que bebe do máis puro e ancestral para achegar a modernidade alén das peixeiras. O álbum é o resultado dun incesante traballo de recuperación polas aldeas galegas, nas que o artista gravou e recolleu historias, músicas e cancións. Con Peixe, Xisco Feijoó pretende achegar, desde a súa óptica particular, unha visión atrevida, moderna e contemporánea sobre a música de creación colectiva galega. O disco, composto por dez temas, pon en valor o papel da cantiga tradicional, da que o artista salienta a súa identidade e significado propio, e sobre as que que fía un relato de historias con tintas autobiográficas e conectadas por un eixo común: a diversidade humana. "Peixe fala de sentimentos, de sensacións, de querencias e de desexos. Fala de todo o que queremos ser e non somos quen. E do que somos e non desexamos. Fala da aceptación, de deixar atrás a resignación, e de entender que, entre nós, non hai gaiolas nin peixeiras que nos pechen. Peixe somos cada un de nós, únicos e irrepetibles", sinala Xisco Feijoó.
Enreguéifate falla os galardóns do certame 2021
Xénero: | 21 / 6 / 2021
O certame Enreguéifate, que premia os mellores traballos de improvisación oral en galego acaba de dar a coñecer os galardóns de 2021. O xurado, composto por María López, concelleira en Teo e profesora; Manolo Maseda, mestre, músico e regueifeiro; Séchu Sende, mestre, escritor e regueifeiro; e A Rabela, rapeira, filóloga e regueifeira, escolleu as propostas gañadoras entre as 42 que participaron no concurso.
Zas suspende por segundo ano a súa Festa da Carballeira
Xénero: | 16 / 6 / 2021
Tampouco en 2021 haberá Festa da Carballeira de Zas. A 38 edición do festival folk, que xa non se puido celebrar en 2020, foi suspendida pola organización do evento. Segundo sinala nun comunicado a Asociación Cultural Castro-Meda "a situación sanitaria actual segue sen permitirnos garantir a seguridade de todas as persoas participantes no festival". A entidade chama ao público a asistir ao evento en 2022, previsto para os días 5 e 6 de agosto. Dáse a circunstancia de que o festival foi declarado Festa de Interese Turístico Galego en febreiro de 2020, sen que desde aquela se puidese celebrar por mor da situación sanitaria.
As Efémeras debutan desde Redondela con música de proximidade
Xénero: | 9 / 6 / 2021
"Música para escoitar, danzar e reflexionar. Música comunitaria. Inspiración poética e política de quilómetro cero: desde Redondela para o mundo". Así se presentan As Efémeras, un grupo que debutou ao vivo no verán de 2020 e que acaba de lanzar o seu primeiro traballo, co mesmo nome da formación. O CD autoeditado achega trece temas con "letras de intelixencia racional e emocional. Composicións novas e frescas con inspiración nas músicas populares. De Galiza e Portugal. Musicas lixeiras e contundentes. Bailables, mais que dan que pensar".
A Banda de Música de Santiago achega os instrumentos tradicionais ao ensino
Xénero: | 28 / 5 / 2021
Achegar aos centros de ensino os instrumentos musicais da tradición galega e explorar as súas posibilidades. Este é o obxectivo do proxecto Os nosos instrumentos hoxe, que presenta a Banda de Música de Santiago de Compostela da man do Concello. A iniciativa consiste nun concerto no que a formación, a empregar dezasete aparellos como o acordeón, o asubío, a castañeta, o charrasco, a gaita, a ocarina, a pandeira ou a zanfona, interpreta once pezas entre cantigas populares e composicións clásicas de autores coma Wagner, Bizet ou Rossini.
Os Premios Opinión da Música de Raíz recoñecen o Festival de Ortigueira
Xénero: | 24 / 5 / 2021
A vixésima edición dos Premios Opinión de Música de Raíz celebrou na noite do venres 21 de maio a súa gala. Na mesma, o Festival do Mundo Celta de Ortigueira recibiu o premio Andaina Senlleira en recoñecemento ao seu labor a prol deste tipo de música ao longo das súas trinta e cinco edición. No fallo, destácase que o encontro é "un referente no mundo festivaleiro" que "co paso dos anos o grande espírito lúdico e a calidade presente no escenario fixeron de Ortigueira un lugar moi especial e unha cita ineludible para moitas persoas". Os responsables do evento afirmaron a súa intención de recuperar a cita para o verán de 2022 logo da pausa motivada pola pandemia.
REPORTAXE
Aprender das cantigas
Data.Antón Castro aproveita a nosa música tradicional para ensinar solfexo aos seus alumnos
