CORREO
RSS
Ti estás aquí > Inicio / música en galego
Música en galego
Morre o Mestre gaiteiro 'Bartolo'
Xénero: | 9 / 12 / 2022
Manuel Miramontes Fandiño, era coñecido en Santiago co alcume de 'Bartolo', e como Mestre Bartolo axudou durante décadas a centos de rapaces a coñecer e amar a gaita galega e a música tradicional. Este xoves, con 88 anos faleceu e rematou con el unha traxectoria de ensino que tamén incluía a fabricación artesanal dos instrumentos.
Berto presenta "SINTO"
Xénero: | 7 / 12 / 2022
Xa está dispoñible nas plataformas dixitais "SINTO", o segundo disco longo da traxectoria en solitario de Alberto Mira, 'Berto' (ex-Verto). O artista presenta neste disco un rexistro musical moito máis dirixido ao baile que no seu intimista primeiro traballo " Viaxe ao espazo interior"(2021), sen renunciar a letras tamén cargadas de profundidade, reflexión e, sobretodo, en coherencia co título do disco escrito en maiúsculas, sentimentos intensos. Trece cancións conforman este disco do que algunhas delas xa foron avanzándose, comezando por "Bágoas de cocodrilo". Polo medio entre ambos disco o artista foi rpesentando aoutros temas e un EP, 'Bailar chikito', en colaboración coa pontevedresa Marinha Paz. A rtista é unha das colaboracións tamén no novo traballode Berto, xunto con ela o disco conta coas achegas de Guadi Galego, Ash Diz, Sleepy Spice, Fillas de Cassandra e Nía Twee. Para este "Sinto", Berto recoñece no seu son as influencias non escondidas de artistas como Rosalía, Dualipa ou The Weekend. Músicas urbanas que o mesmo transitan por un electro-pop, como entran en cadencias do disco funk, a electrónica urbana, o trap e outras sonoridades inseridas nunha actitude vitalista que dá cohesión a todo o traballo. Berto acturará este domingo no Teatro Colón dentro do programa da final dos Premios NARF da Deputación da Coruña.
Seso Durán busca a transcendencia con 'Ascensión'
Xénero: | 30 / 11 / 2022
Seso Durán iniciou a súa carreira musical nos anos 90 como integrante e compositor no grupo folk Liorna. Tras 10 anos afastado dos escenarios, durante os que centrou a súa actividade profesional na docencia da música, en 2017 debutou en solitario co disco "Son da Memoria" que revisaba o terror vivido en Galicia tras o golpe de 1936. Este ano Durán presentou un novo traballo, "Ascensión" (Inquedanzas Sonoras, 2022) co que marca o inicio dunha nova etapa na que Durán explora temáticas máis achegadas á actualidade. A través dos dez cortes do álbum, o artista tira de letras comprometidas que falan de cuestións relevantes e preocupantes do mundo actual: a violencia de xénero, a soidade no mundo das redes sociais, o estrés da vida dixital, o amor incondicional, a crise ecolóxica, etc. O título do álbum xorde dunha reflexión moi persoal de Durán que expresa así: "Ser humano é aburridísimo. Dalgunha maneira precisamos elevarnos: pirámides, rañaceos, relixións, récords deportivos, followers… Non abonda chegar a ser quen es. Queremos transcender, expandirnos, porque sabemos que non imos durar; nin nós nin nada do que fagamos". O disco está dispoñible en plataformas e pode adquirirse tamén a través da editora.
Sés publica hoxe o novo álbum 'Diante un eco'
Xénero: | 25 / 11 / 2022
Xa pode escoitarse en plataformas dixitais o novo traballo de María Xosé Silvar 'Sés' do que xa se adiantará algún tema como "Cantan as balas". 'Diante un eco' é o título deste oitavo álbum da artista, que ofrece unha ducia de temas fieis no concepto ás súas características máis definitorias, actitude combativa, letras comprometidas e críticas, con perspectiva feminista e política e cunha forza que non admite filtros. De feito, neste novo disco a contundencia faise máis eléctrica e roqueira do habitual en moitos dos temas, incluíndo o de adianto ou o que dá nome ao álbum. O título do disco fai referencia á concepción cíclica da historia, que a autora ve presente na deriva sociopolítica actual. Ademais seguindo esa liña o traballo preséntase como unha volta da cantautora aos seus inicios, desde o oficio dunha carreira de once anos e a madurez.
Fanny & Alexander volven cun disco reparador de perdas
Xénero: | 23 / 11 / 2022
Xa van alá máis de doce anos desde a anterior presentación dun disco do dúo compostelán Fanny & Alexander (Antes Fanny + Alexander), o proxecto musical de Efi Arias e Noel Feáns. Hoxe o dúo sorpréndenos cun novo traballo que, a pesares de ser un celebrado regreso, titúlase tristemente "A túa ausencia neste ar" e o fan da man da volta á actividade este ano do selo ARequeifa2.0, a plataforma coa que xa editaran os seus tres primeiros traballos "Lusco e Fusco" (2006), "Finais dos 70s, comezos dos 80s" (2007) e "Alfaias" (2009). Con estes tres traballos o dúo ofrecía nesa primeira década do século unha aproximación ao pop electrónico en galego e cunha ollada postpunk que era quen, xa daquela, de integrar a poesía de autoras contemporáneas con sons da nosa música tradicional, do folk e da música de cámara nunha proposta sonora que hoxe ten moitos adeptos con éxito e que merece manterse entre as escoitas habituais. O seu impacto, igual que o de algúns outros coetáneos daquel intre como Projecto Mourente e The Homens e Ataque Escampe entre outros foi tanto como para seguir a ser lembrados de moitos xeitos malia a desaparición dalgúns deses grupos. As cancións do dúo estiveron presentes en recompilacións como a feita por Galeguiza-T da "Nova antoloxía da música galega contemporánea" e tamén nos paneis da exposición "cantámola en galego" presentada o pasado 2021. A última vez que neste medio tivemos noticia sobre eles foi cando compuxeron a canción "Illa pedra", feita para a curtametraxe do mesmo título asinado por Adriana Páramo en 2010.
Máis seis milleiros de persoas forman parte dalgunha coral galega
Xénero: | 22 / 11 / 2022
En Galicia hai 266 corais que agrupan a unhas 6100 persoas. O 70 % dos integrantes destas entidades teñen máis de 60 anos, son maioritariamente mulleres e a súa formación é autodidacta, malia que están dirixidas por profesionais titulados. É o perfil das formacións que describe o informe "As corais en Galicia", o primeiro estudo sobre esta realidade que acaba de elaborar o Observatorio da Cultura Galega, servizo dependente do Consello da Cultura Galega (CCG). O informe, que xa está dispoñible na web do organismo para a súa descarga, presentouse no marco da xornada 'As corais: dinamizadoras imprescindibles do tecido cultural galego', que busca achegarse á importante función divulgativa e pedagóxica que desempeñan as corais e profundar no seu papel como forzas vertebradoras e dinamizadoras do tecido cultural.
Miro Casabella percorre Galicia afondando no coñecemento da zanfona
Xénero: | 18 / 11 / 2022
O Fondo de proxectos culturais en lingua galega Xacobeo 2021-2022 da Xunta de Galicia ofrece en aberto na rede o documental de 60 minutos "Arredor da roda. De Cántigas da Terra a Miro Casabella", producido pola AC Cantigas da Terra e dirixido por Federico A. Rioboo. A Aula de zanfonas de Cántigas da Terra liderada por Miro Casabella (1946), inicia neste documental unha investigación sobre este máxico instrumento e a súa relación co Camiño de Santiago. Acompañado por dous alumnos avantaxados, Manuel Rioboo e Erea Estévez, Miro viaxa por toda Galicia na procura do organistrum, devanceiro da zanfona e presencia de honor no Pórtico da Gloria. Inclúe unha visita ao obradoiro do Xaneco, músico e mestre luthier que está a rematar unha zanfona encargada por Miro; ao Pórtico da Gloria, onde se ven os instrumentos esculpidos polos artesáns do Mestre Mateo e a interpretación de diversas pezas. Mesturando amizades con paisaxes, música de cego con clases maxistrais, os protagonistas completan un mosaico sobre a importancia deste instrumento, considerado por algúns intelectuais como a alma de Galicia.
Nova edición do encontro 'Tradición en Feminino'
Xénero: | 15 / 11 / 2022
Dar visibilidade e recoñecemento ao papel da muller no eido da música e o baile tradicional é o obxectivo do encontro " Tradición En Feminino que este ano chega a súa cuarta edición. A Asociación de Gaiteir@s Galeg@s (AGG) en colaboración coa Deputación da Coruña. organiza este evento que o vindeiro domingo 20 de novembro terá lugar na Casa de Rosalía en Padrón. O programa ofrece relatorios e debates que incidirán en aspectos como os estereotipos de xénero na música e o baile tradicional e as vías da súa erradicación. Ademais tamén se presentarán publicacións e proxectos. O encontro poderá seguirse tamén en liña a través do perfil de Facebook da AGG.
LaMontagne & Pico Amperio sacan hoxe o seu primeiro álbum
Xénero: | 8 / 11 / 2022
Tras varios anos de intensa presenza nos escenarios e eventos de toda Galicia o dúo LaMontagne & PicoAmperio sacan hoxe o seu primeiro disco longo autoeditado. "Algo que sinalar" é o título deste traballo de oito temas que hoxe xa está disponible nas plataformas dixitais e que tamén hoxe mesmo, martes 8 de novembro, defenderán en directo nunha actuación no Pub Modus Vivendi en Santiago de Compostela ás 21:00 horas.
A música tradicional chora o pasamento de Antón Cabaleiro
Xénero: | 31 / 10 / 2022
A música tradicional galega magóase estes días pola perda de Antón Cabaleiro Millares, actualmente membro da emblemática formación Treixadura. Cabaleiro, natural de Vigo, falecía o pasado sábado aos 71 anos de idade e desde as redes sociais de Treixadura despedían con fondo sentimento ao seu barítono: "Seguimos o noso camiño longo e ti seguirás nel por sempre, coa túa pandeireta, co teu canto amable, coa túa tenrura e gratitude e sorrindo para todos nós." Ademais de en Treixadura, Antón cabaleiro expresou o seu amor pola cultura tradicional galega tamén como profesor de danza e percusión tradicionais, foi un dos membros fundadores do grupo A Roda a finais dos anos 70 e estivo noutras formación similares como Petapouco e Castaña antes de entrar na que sería a súa "familia musical" dos pasados anos, o grupo Treixadura. A formación, que está a celebrar o seu trinta aniversario, ten na súa axenda unha próxima actuación na Coruña, no marco das Festas do barrio de Monte Alto o vindeiro 12 de novembro. Na súa despedida a Cabaleiro Treixadura avanzan xa a que será a súa homenaxe en forma de música: "Con 'Vento das Cíes' e 'Froles Mareliñas' choramos a túa ausencia e honraremos a túa memoria coa nosa música".
novidades discográficas
O Noso Tempo
Hugo Guezeta
Cāldo
Catuxa Salom
Vertentes
Garza
Obra social
ORTIGA
Barullo
Baiuca