CORREO
RSS
Noticias
Un disco recolle unha selección do patrimonio musical da provincia de Pontevedra
Xénero: | 14 / 5 / 2008
A Deputación de Pontevedra presentou esta semana o primeiro disco dunha nova liña editorial dedicada á difusión do patrimonio sonoro do seu Servizo de Patrimonio Documental e Bibliográfico. “Pontevedra en Música” é o título do CD que, realizado en colaboración con Edicións Do Cumio, recolle una selección de diferentes agrupacións e estilos da música tradicional. Gaiteiros solistas, grupos de gaitas, bandas de gaitas, pandereiteiras, grupos de música tradicional, grupos de música folk, masas corais, bandas de música e canción galega está presentes neste CD. Nomes como os de Iván Costa, Óscar Ibáñez, Os Alegres, Xistra de Coruxo, Ardentía Pai da cana, O Fiadeiro, Crema de Gaita, Liorna, Coral Casablanca ou a Banda Artística de Merza entre outros representan á musica da provincia nas 22 pezas deste volume.
A Sinfónica de Galicia desdóbrase para achegar dúas óperas na apertura do Festival Mozart
Xénero: | 14 / 5 / 2008
“Grandes artistas, grandes directores de escena, grandes cantantes para interpretar un gran teatro de autor”. Esta é a declaración de intencións que Paolo Pinamonti avanzou sobre esta nova edición do Festival Mozart que comeza o xoves 22 na Coruña. Unha nova liña que aposta, non só por recuperar obras do compositor salzburgués, senón tamén polo carácter renovador da escena lírica do seu tempo. Publicacións, proxeccións pero sobre todo moitos concertos compoñen o cartel desta edición que contará con dúas producións propias: “Cosí Fan Tutte” e “O Rapto no Serrallo”. Ademais, xa se avanzou que a vindeira temporada réndelle homenaxe a Graham Vick, outro dos drandes directores de escena do século XX.
Xosé Constenla presenta o seu segundo disco con temas unidos por un sentimento de entusiasmo
Xénero: | 14 / 5 / 2008
"Olladas dun entusiasta" (Setestrelo Editora) constitúe o segundo traballo discográfico do cantautor compostelán Xosé Constenla, despois de “Quen fixo berrar ao silencio” (autoedita, 2005). Este álbum de 13 composicións propias é unha produción do propio Xosé Constenla en colaboración con Ramón Feáns (arranxos e dirección musical) para o selo de nova creación Setestrelo Editora. Gravado e misturado nos estudios PINK de O Milladoiro (Ames) conta con moitas colaboracións, entre as que destaca a presenza do cantautor madrileño Javier Bergia. Ramón Feáns (guitarras, bouzouki, baixo e programacións), Paulo Gacio(frauta traveseira e saxo soprano), Paco Nogueiras (acordeón) e Javier Rodríguez (teclados) foron os músicos que gravaron os distintos instrumentos que aparecen no traballo. O artista presentará o seu traballo este xoves no Pub Tarasca de Santiago e a distribución do disco correrá da man de Lonxa Cultural.
Jabón Blue pásase á autoedición co seu segundo disco “By the White”
Xénero: | 13 / 5 / 2008 + AUDIO
O proxecto musical de Javi Maneiro busca a consolidación co seu segundo disco, “By the White”, que eles mesmos producen e editan e co que presentan tamén una nova xira “A la Crocha Tour”. Quince temas que, cunha base rocanroleira, van desde a festa máis salvaxe do “Himno da Crocha” –única canción en galego- ata as baladas como “Tela de araña” pasando polos aires máis power-pop en “Mi voz”. As súas letras falan do entorno cotián, traballo, parella, drogas, a vertixe da vida, referencias locais do Barbanza, etc. O quinteto do que forman parte Javi Maneiro, Diego Castaño, Marcos Otero, Pony e Kuervo gravou o disco o pasado mes de febreiro nos Estudios Hispamusic de Madrid. A primeira subida a escena cos temas de “By the White” fíxose o pasado mes no Ateneo Valle-Inclán de Ribeira e o vindeiro concerto programado será o 28 de xuño en Dodro.
Un estudo destaca a dependencia da industria musical da Administración
Xénero: | 13 / 5 / 2008
Os músicos do país non son só músicos, son tamén traballadores noutras profesións. Para exercer o seu traballo musical teñen unha gran dependencia da administración, están moi pouco especializados e actúan como pequenos “home-orquestra” que producen, editan e se representan a si mesmos. Estas son algunhas características da industria musical no noso país que recolle o informe elaborado por E-burbulla para o IGAEM e cuxos datos principais publica hoxe El País.
Os versos de Álvarez Blázquez saltan á música no DVD “Palabras liberadas”
Xénero: | 13 / 5 / 2008
O Concello do Porriño presentaba onte o proxecto "Palabras liberadas" para Xosé maría Álvarez Blázquez. A iniciativa inclúe a presentación dun DVD no que se recitan e se presentan versións musicadas de textos do autor, con estilos coma o rock, o rap ou a música coral a cargo de El Cubo, Kedro ou Uxía. Os recitados corren por conta de poetas e escritores coma Luz Pozo, Xavier Rodríguez Baixeras ou Manuel Forcadela. A iniciativa conta co apoio da Consellaría de Cultura, que presenta outras propostas no web 17demaio.org.
A SGAE destaca un incremento das representacións de teatro, danza e os concertos en directo
Xénero: | 7 / 5 / 2008
As actuacións en directo da música pop viven a súa época dourada no noso país. As cifras dos asistentes aos concertos de Maná, Joaquín Sabina e Serrat ou Fito & Fitipaldis provocaron un espectacular ascenso dos dereitos de autor dese ano, un 31% máis que no anterior. É o que se avanza do informe anual da Sociedade Xeral de Autores (SGAE). Canda esta cifra, o que tamén medrou foron as representacións de teatro, danza e demais artes escénicas (un 11.1%). En canto á actividade de xestión desta entidade, os seus ingresos medraron en Galicia un 2%, e tamén subiu o número de afiliados nun 4.7%, que se traduce en 2.650 socios.
Nadadora salta ás pistas de baile co seu novo disco
Xénero: | 7 / 5 / 2008 + IMAXES + AUDIO
O cuarto disco da carreira de Nadadora leva por título "La química que nos une" (Jabalina Música) e desde esta semana está nas tendas. Un mini CD que, ademais do tema inédito que o abre "Septiembre no está tan lejos" e o vídeo de "El bosque", dirixido por Alberto Baamonde e Cristina López, inclúe catro remesturas de cancións do seu segundo álbum, “Hablaremos del miedo”, a cargo de Jaime Cristóbal de Souvenir, Dorian, Javier de Standard e Homeboy dj todos eles artistas relevantes da escena musical independente que han achegan unha visión diferente das cancións do grupo de O Grove. O disco adapta as cancións de Nadadora para a pista de baile, e anticipa unha maior presenza do son electrónico e as bases programadas nas vindeiras composicións da banda sen deixar de lado os sinais de identidade do quinteto. A masterización estivo a cargo de Arturo Vaquero, nos estudios Abrigueiro de Friol (Lugo).
O programa Outra + Outra facilitará a gravación de dezaoito discos
Xénero: | 6 / 5 / 2008
Un total de 18 propostas musicais, xa sexa de formacións como de solistas pertencentes en todo caso á Rede Cultural da Deputación da Coruña, poderán acceder ás axudas para gravación do programa Outra+Outra impulsado pola Deputación e a Fundación Paidea. O convenio que pon en marcha esta edición foi asinado onte polo presidente da institución provincial, Salvador fernández Moreda, e a súa homóloga da fundación, Rosalía Mera. Un xurado de especialistas escollerá os 18 beneficiarios deste programa entre todas as solicitudes enviadas ante do 16 de maio. Cada un dos seleccionados gravará o disco no Centro Mans e disporá despois de un milleiro de copias do mesmo. A Deputación destina a este obxectivo un total de 34.800 euros que cubrirán o 50% do custe da gravación e edición, a outra metade correrá a cargo dos artistas.
O Xacobeo levará a organización artística do festival de Ortigueira
Xénero: | 6 / 5 / 2008
Aínda que xa participara en outras edicións como patrocinador do Festival Internacional do Mundo Celta a S.A. de Xestión do Plan Xacobeo entrará este ano directamente na organización do evento. O conselleiro de Innovación e Industria, Fernando Blanco, asinou hoxe un convenio asumindo a contratación e produción dos espectáculos e actividades paralelas, así como o deseño da publicidade e imaxe corporativa a cargo do Xacobeo. A parte da organización artística do prestixioso festival quedará así enteiramente nas mans do Xacobeo. O alcalde de Ortigueira, Rafael José Girón, tamén asinou o convenio polo que o Concello comprométese en cuestións loxísticas, de vixilancia, limpeza, transporte, servizos sanitarios, licencias e autorizacións, etc.