CORREO
RSS
Ti estás aquí > Inicio / Xéneros / Folk
Música Folk
Milesios continúa Indoevindo no seu novo traballo
Xénero: | 22 / 2 / 2017
Catro anos despois daquel Alén mar, Milesios publica o seu segundo traballo discográfico. Indoevindo continúa a senda de mestura entre a música galega e irlandesa en once temas que beben das dúas tradicións e que integran sons tradicionais con composicións propias. O septeto formado por Maite Veiga, Marta Portela, Manuel María Veiga, Manuel do Moucheiro, Noelia Fersán, Paula Veiga e Senén Montero integra percusións, baixos, guitarra, batería, violíns gaitas, bouzouki, mandolina, acordeóns, bodhran e mesmo gadañas nuns arranxos complexos e coidados. Arturo Vaquero foi o responsable da gravación do álbum nos estudios Abrigueiro. O proxecto, autoeditado, ve a luz en formato libro-CD, nun volume con 52 páxinas e fotos orixinais de Daniel Díaz Trigo e que inclúe ademais unha paisaxe sonora e dúas músicas extras. A Casa do Saber en Lugo acolle este venres 24 de febreiro o concerto de presentacion.
Pesdelán pon a bailar o Entroido
Xénero: | 6 / 2 / 2017
A agrupación Pesdelán presenta estes días o seu segundo traballo editado, o DVD Entroidanzas . Mantendo o seu obxecto de espectáculo e proxecto didáctico Pesdelán pretende con este traballo achegar os xeitos en que distintas zonas do mundo celebran con música e danza os seus entroidos. Tras unha pesquisa global e un traballo de documentación importante a agrupación seleccionou once temas con músicas e danzas que se puidesen reproducir nos seus espectáculo e sempre cos parámetros de poder ser bailadas por xentes de todas as idades. Italia, Grecia, Colombia, Arxentina, Perú Brasil e Venezuela están representadas nesta compilación de celebracións do carnaval tradicional deses países. Do folclore galego Pesdelán seleccionou dúas pezas: a Mazurca-Valse de Meira (Moaña) e os Folións de Ourense. No DVD, xa a venda en puntos de venda físicos e a través de Internet, Pesdelán amosa cada danza explicando didacticamente o xeito no que se leva a cabo, contando co aparticipación de máis de 50 persoas que tomaron parte nestas gravacións. Para aqueles interesados só na parte musical o grupo tamén pon á venda as pistas en MP3 do DVD a través do correo electrónico. Con este traballo Pesdelán estará presente este ano no Entroido ofrecendo obradoiros e actuacións en vivo, en Lugo e Compostela inicialmente.
Luar na Lubre inicia a xira de 30 aniversario con nova vocalista
Xénero: | 31 / 1 / 2017
O concerto co que comezou da xira de trinta aniversario de Luar na Lubre, este 28 de xaneiro en Compostela, foi tamén o de despedida de Paula Rey como vocalista logo de seis anos. O conxunto que capitanea Bieiro Romero acaba de anunciar a remuda do cantante. A coruñesa Belém Tajes será a quinta voz no conxunto folk, e estrearase de xeito oficial no concerto que a banda ten previsto para este venres 3 de xaneiro en Almería. Sevilla, Granada, Madrid, Ponferrada e Porto serán as seguintes etapas dun tour que prevé recalar na Coruña a coincidir coas vindeiras festas de María Pita e en Pontevedra o vindeiro mes de xullo. Guanajuato, Miranda de Ebro, Valladolid, Barcelona, Lisboa,Barakaldo, Cáceres, Albacete, Castelló e Logroño son outras paradas xa confirmadas nesta xira. Tajes, especialista en musicoterapia, ten participado en formacións como Voodoo e Sisters in the House, e o pasado ano participou no proxecto de intercambio entre músicos en linguas minorizadas Tosta Cultural Cargo.
Primordiais dá a coñecer o seu primeiro álbum
Xénero: | 26 / 1 / 2017
A promoción de Droguería Moderna, o seu primeiro álbum, está a mobilizar o dúo Primordiais. Acaban de subir á rede o vídeo do seu single Por ti moreno e preparan concerto para o vindeiro 18 de febreiro no marco da Rede de Músicas Soltas de Redondela. Luis Martíns e Marcelo DoBode combinan arpa, voz e percusión nunha orixinal reinterpretación da tradición do país con aires improvisados, e toques jazz que denominan "músicas de OrTa" e "musicas en crecemento". O álbum ve a luz da man de Mada Producións
Fol Música reúne unha representación feminina da nosa música no disco 'Mujer Raíz- Root Woman'
Xénero: | 20 / 1 / 2017
O selo discográfico Fol Música ven de presentar un disco recompilatorio no que fai unha homenaxe ás mulleres da música de raíz. En Mujer Raíz – Root Woman reúnense voces femininas esenciais da música galega actual copando a maioría dos 14 temas do disco, complementadas con outras propostas de mulleres de Brasil ou África , por exemplo. No disco están presentes Mercedes Peón, Guadi Galego, Ugía Pedreira, Uxía, Susana Seivane, Cristina Pato, Rosa Cedrón e Sés. Tamén están como grupo Malvela, Doa e Fuxan os Ventes, estes últimos acompañados de Sabela Rodríguez. O músico ourensán Magín Blanco tamén aparece colaborando en dúas das cancións, nunha delas coa brasileira Luanda Cozzetti. A través dun comunicado o selo di querer comezar así o ano "porque -din- presentimos que vai ser un ano transcendental para os dereitos das mulleres. Van caer moitas barreiras e derrubar muros de prexuízos e inxustizas que aínda existen en todo o mundo. As mulleres van tomar conciencia da súa forza e a súa poder e sen renunciar aos seus valores, á feminidade, a intuición, a compaixón. A empatía e a non violencia, van dar un salto cuántico para lograr a igualdade e ocupar lugares e posicións relevantes en todos os ámbitos políticos e culturais." O álbum está xa dispoñible nas plataformas dixitais.
Sae á venda Enxebre, o último disco de Brath
Xénero: | 12 / 1 / 2017
Aínda que levan un anos presentándoo ao vivo, non foi ata este mes de decembro que saíu á venda Enxebre, o último disco de Brath. A veterana banda folk que capitanea Eloi Caldeiro presenta dez novos temas nos que os títulos remiten a elementos da tradición galega (A Santa Compaña, O Trasno, A Bruxa Meiga, As fogueiras de lume novo) que se mesturan con referencias celtas como Druídas, Samhaín, Lughnasadh ou Beltane das fachas. Fiel ao seu estilo, o proxecto continúa unha aposta de folk no que a batería e a percusión teñen unha grande importancia e onde non faltan tampouco guitarras eléctricas. Segundo asegura Caldeiro, o título supón un retorno aos comezos de Brath, que conmemora con este álbum 36 anos de traballo. Enxebre ve a luz nun formato de libro-CD con múltiplos contidos extras e unha edición a toda cor.
Os Carunchos presentan o seu sexto disco 'Cantares'
Xénero: | 28 / 12 / 2016
Os Carunchos presentan este venres en Vincios, Gondomar, o que é o seu sexto traballo discográfico ao longo dos seus 22 anos de traxectoria, de título Cantares. Dezasete pezas conforman este disco editado co selo Inquedanzas Sonoras, con melodías cantadas arredor da poesía popular, letras propias e tamén musicando as poetas. Rosalía de Castro, Manuel María, Celso Emilio Ferreiro, Darío Xohán Cabana, Manolo Pipas e Carlos Fontes están presentes en temas deste traballo que segundo afirma o grupo nun comunicado, “quere ser humilde resposta, o pago ao inmenso amor á nosa cultura e lingua que estes e outros autores espallan en poemas.” Os Carunchos” presentarán en concerto o novo sexto disco o vindeiro 30 de decembro ás 21:00h, no Centro Cultural de Vincios (Gondomar). O grupo naceu a finais de 1994 coa idea de mesturar temas cantados co repertorio de gaiteiros solistas, conseguindo naquel momento unha formación nova e orixinal coa que Os Carunchos participan nos máis importantes festivais folk do país. O seu anterior traballo foi TI QUE? (PAI Música) en 2013, no que trataron temas de denuncia social de actualidade.
Radio Cos culminan un ano de éxito presentando o seu novo disco
Xénero: | 26 / 12 / 2016
Inspirándose para o seu nome no betanceiro Parque do Pasatempo a formación Radio Cos presentou estes días en sucesivos directo por Santiago, Coruña e Vigo este novo disco, o segundo da banda tras Radio Cos (BOA, 2013). En Pasatempo Radio Cos volven a traballar sobre o repertorio tradicional reinterpretándoo e facéndoo evolucionar co seu estilo propio. Desde o traballo de investigación etnográfica realizado desde hai moitos anos por Quique Peón e Xurxo Fernandes, cantantes e percusionistas de Radio Cos, veñen estas melodías recollidas nos seus arquivos de gravacións de campo. Xan Pampín ao acordeón, Pedro Lamas coa gaita e saxo tenor e o violín de Nikolay Velikov completan o quinteto.Radio Cos levan a metade do ano xirando co estas cancións dando concerto por toda a xeografía española e foron os representantes da música tradicional galega nos concertos oficiais do WOMEX 2016. Este ano tamén compartiron escenario e mesmo melodías coa formación balcánica Fanfare Ciocarlia no festival feito a Man experimentando con eles mesturas galego-balcánicas. O irmanamento de culturas e son está no cerne deste novo traballo e daí parte a idea de chamalo como ao famoso recinto creado polos irmáns Naveira en Betanzos.
Ialma saca hoxe á rúa o seu quinto disco, ‘Camiño’
Xénero: | 16 / 12 / 2016
Hoxe sae á rúa o quinto álbum do grupo de pandereteiras galego-belgas Ialma, titulado Camiño. Case vinte anos despois de comezar a xuntarse para cantar e cinco despois do anterior Simbiose (2011), volven de novo cun novo disco debaixo do brazo no que contan a súa historia e a das súas familias e no que queren facer unha homenaxe aos galegos e galegas da emigración. Camiño, que leva como subtítulo De Bruxelas a Santiago, é a historia da súa emigración e da dos seus pais, pero que segue a evolucionar "porque un camiño nunca se para", din. "É un camiño de loita, cultural, de diversidade, de descubrir e de contactar co público e coa xente doutras culturas. É un camiño que levamos percorrendo moitos anos e que cantamos a través das nosas cantigas". O novo disco tamén é un canto á diversidade: "Descubrirmos novas culturas musicais permítenos enriquecernos e coñecernos mellor", afirman, definindo así a evolución que fixo o grupo que contribuíu a perpetuar, renovar e facer evolucionar a música tradicional galega.
Carlos Núñez celebra 20 anos de 'A Irmandade das Estrelas' cunha xira internacional
Xénero: | 15 / 12 / 2016
Por estas datas do ano 1996 Carlos Núñez presentaba o seu primeiro disco asinado en solitario A irmandade das estrelas, no que o gaiteiro vigués reunía as colaboracións de grandes personalidades musicais a moitas das cales xa estaba unido anteriormente no seu percorrido profesional. O disco foi un enorme éxito e marcou un momento especial, achegando a música de raíz celta feita en Galicia non só a España se non tamén ao circuíto internacional. Agora Carlos Núñez celebra o vinte aniversario deste fito cunha xira internacional na que invita a artistas novos de toda a península para crear un novo espectáculo. A xira, que comezou o pasado día 8 de decembro en Málaga, percorrerá 17 cidades de España e 15 dos EE.UU. rematando o 9 de abril no Fairmount Theater de Montreal, en Canadá. Tres das datas principais, arredor do Nadal, terán lugar en Galicia: o día no Teatro Rosalía da Coruña; o 23 na súa cidade natal no teatro AFundación; o día 26 no Teatro Jofre de Ferrol.
REPORTAXE
Aprender das cantigas
Data.Antón Castro aproveita a nosa música tradicional para ensinar solfexo aos seus alumnos
