CORREO
RSS
Ti estás aquí > Inicio / música en galego
Música en galego
Riobó presenta o seu primeiro disco
Xénero: | 13 / 5 / 2011 + VIDEO + IMAXES
O apelido de Begoña Riobó, recoñecida violinista do panorama folk galego, sérvelle de nome á formación que lidera e mais ao primeiro disco da mesma. Riobó chega ás tendas da man de Zouma Records, e recupera melodías tradicionais con arranxos actuais dentro do estilo presentando 10 temas neste traballo. Para alén de Begoña, o grupo conta con Fernando Barroso (guitarra), Marcos Campos (gaita, acordeón e flautas), Xosé Liz (bouzouki), e Fernando Pérez (flautas e requinta). Begoña Riobó ten acompañado cos seus violíns de xeito habitual músicos como Carlos Núñez, Susana Seivane ou Anxo Lorenzo entre outros.
Chegan os Ulträqäns
Xénero: | 5 / 5 / 2011 + AUDIO
Logo de tres anos e medio, o grupo Ulträqäns presenta o seu primeiro disco. Folk, punk, sintetizadores ou ritmos balcánicos mestúranse nun proxecto difícil de definir pero que os seus responsables reivindician como fusión retrofuturista ou steampunk. Dezasete temas, dos que só catro teñen letra, son a carta de presentación do conxunto, que se autoproduciu e gravou na casa un proxecto que sae autoproducido baixo o selo Lobicán. comeza agora unha xira na que, cun repertorio bastante mais cantado, o grupo amosará o seu bo facer en directo ao longo e ancho do país.
A cidade protagoniza dous ciclos en Lugo
Xénero: | 4 / 5 / 2011
Música e Cidade é o lema da terceira edición do ciclo Sons Creativos que se vai desenvolver en Lugo os vindeiros 20 e 21 de maio. O encontro, organizado no marco da iniciativa Lugo Cultural, pretende servir de punto de encontro para compositores e músicos internacionais de vangarda. O programa desta edición inclúe un concerto coa participación de José Luis Carles e Cristina Palmese, Efraím Díaz, Pilar Cabeza, Elena Hidalgo, Antonio Alcázar e mais alumnos de Miguel Molina e do Grupo de Creación Musical da USC, así como mesas redondas sobre paisaxes sonoros ou música, cidade e pedagoxía. De xeito paralelo, está a se celebrar tamén en Lugo o VII Curso de Primavera da Facultade de Humanidades. Co lema Sub Urmen: historia, sociedade e cultura da cidade diferentes especialistas abordan o papel das cidades ao longo da historia, con aspectos como a arquitectura, a alimentación ou a pegada das urbes na Idade Media galega.
Ataque Escampe presenta Violentos anos dez o seu novo disco
Xénero: | 4 / 5 / 2011 + AUDIO
Logo de apostar polo "decrecemento", o grupo Ataque Escampe presenta Violentos anos dez,o seu cuarto disco. Cunha aposta polos ritmos da música negra do sur do Estados Unidos, como o soul ou toques country, a banda achega letras menos sarcásticas do que en anteriores traballos. O disco, gravado no estudios Abrigueiro de Lugo, está autoeditado e achega dez temas, que se poden descargar de balde no web aregueifa.net baixo licenza Copyleft. Neste mesmo mes porase a venda a vesión física do disco, que achega as letras e mais un tema "freestyle". No seu blog, o grupo explica polo miúdo cada unha das cancións que inclúen neste traballo.
Lugo reivindica a Xoán Montes cunha semana de actos
Xénero: | 26 / 4 / 2011
Xoán Montes. Sóache? é o título do programa de actividades coas que o Museo de Lugo quere dar a coñecer a figura deste músico entre a cidadanía. O proxecto inclúe actividades como unha exposición no propio centro a explicar a vida e a obra do músico, unha ruta polos lugares da cidade relacionados con el, conferencias sobre a súa época e o seu traballo e mais concertos con algunhas das pezas máis coñecidas do compositor entre outras actividades que se desenvolven ata o vindeiro 29 de abril.
A volta á Idade Media
Xénero: | 26 / 4 / 2011 + VIDEO + IMAXES + AUDIO
A fronda dos cervos, o último disco do veterano grupo DOA recolle cantigas de amor, de amigo e de escarnio e maldicir. O CD inclúe no seu caderno textos explicativos de cada un dos temas e unha introdución á lírica galego-portuguesa da Idade Media asinada por Federico Pérez, tamén hai un limiar da poeta Eva Veiga.
Toxos e Froles recupera o congreso de música tradicional Terra de Trasancos
Xénero: | 18 / 4 / 2011
Levaba varios sen realizarse, pero a asociación Toxos e Froles acaba de anunciar que unha das súas iniciativas destacadas para este 2011 é a celebración do Congreso de Música Tradicional Terra de Trasancos. A cita comezará o vindeiro vernes 29 de abril en Ferrol e desenvolverase ata o sábado. Carlos Núñez será o encargado de abrir o encontro que, será de balde (previa inscrición en info@toxosefroles.com) e que contará con conferencias e concertos.
Musiqueoh! busca reunir as diferentes iniciativas sobre música galega da rede
Xénero: | 25 / 3 / 2011
A música galega ten un novo valedor virtual en Internet coa aparición de Musiqueoh, un agregador de páxinas que falan de música e que nutren a través dos seus fluxos RSS este contedor. En Musiqueoh! podemos acceder aos contidos de páxinas como Malmequer, Komunikando, MeGA (de Culturagalega.org), Galiza Electrónica, Temazo, e-Trad e moitas outras. O obxectivo é presentar de xeito cómodo e compacto as novas que se xeran nas moitas webs en galego sobre música que existen. Musiqueoh actualízase cada hora coas últimas novas. Ademais das novas máis recentes dispón de vídeos e imaxes relacionados coa música, tamén un buscador especializado na música en galego e reúne dous reprodutores dos podcast da Radio Galega Música e dos podcast musicais máis destacados de Podgalego, e por último Verme TV, o xermolo dunha canle de videoclips de música galega.
A asociación cultural Leña Verde de Pol presenta o seu terceiro disco
Xénero: | 15 / 3 / 2011
Con máis de 15 anos de traballo detrás a asociación cultura Leña Verde de Pol ven de presentar no Pazo de San Marcos da Deputación de Lugo o que é o seu terceiro disco A contratempo. Leña Verde está dedicada á promoción e recuperación do patrimonio inmaterial cultural galego, nomeadamente o musical e o seu grupo de folk mestura a música tradicional con arranxos propios e influencias de outras músicas do mundo, neste terceiro traballo o grupo gravou temas tradicionais así como composicións propias e é a primeira vez que contan con pezas cantadas, na voz de Noemi Basanta e Begoña Coya. Ademais, o disco ten a colaboración de moitas persoas como Naír García, membro do grupo de baile, ou o cantautor Dani Flaco, e os músicos Xaneco Tubío e Bruno Villamor e a gravación do disco, que se realizou nos estudos de Óscar Trigo. No acto de presentación o vicepresidente da Deputación de Lugo, Antón Bao, comprometeu a actuación de Leña Verde nos Xardíns da Deputación dentro do ciclo de actuacións de verán “Cultura Aberta nos Xardíns da Deputación”. O disco pode mercarse na tenda virtual da asociación.
Ler, ouvir e cantar... con Mamá Cabra
Xénero: | 14 / 3 / 2011
Un disco que é tamén un conto ilustrado e que ademais ten versión en karaoke. Esta é a última aposta que fai o grupo Mamá cabra para os máis novos. Ola, ola, la! chega da man de Galaxia cun texto de Gloria Sánchez que enfía as letras das cancións nunha única historia, mentres as ilustracións deste traballo corren por conta de Kristina Sabaite. Os interesados en contemplar en directo o espectáculo correspondente a este lanzamento, teñen a ocasión nos concerto que o grupo está a realizar no marco do programa de dinamización lingüística Bocaberta.