CORREO
RSS
Ti estás aquí > Inicio / música en galego
Música en galego
Álex Fernández presenta Brisa en Valencia
Xénero: | 10 / 1 / 2017
A discográfica Fresh Sounds publica Brisa o terceiro LP da carreira do batería cangués Iago Fernández. O que xa está considerado un dos mellores baterías de jazz do Estado inclúe nesta ocasión na súa formación a Enrique Oliver, Wilfried Wilde e Reinier Elizarde, aos que se suman Zé Pedro Coelho, Xan Campos e Inês Sousa. Entre todos achegan nove temas novos dos cales son da súa propia autoría. Canda a eles, gravou When I Fall in Love de Victor Young, Conception de George Shearing e Everything I Love de Cole Porter. A sala Jimmy Glass de Valencia será a primeira parada na xira de presentación, na que Fernández se acompaña de Javier Vercher ao saxo, Wilfried Wilde á guitarra, e Demian Cabaud ao contrabaixo.
Pablo Díaz amplía a súa fórmula con Tic tac toc
Xénero: | 3 / 1 / 2017
Con todas as entradas vendidas anda estes días Pablo Díaz a presentar Tic tac toc, o seu cuarto disco. De novo os máis pequenos protagonizan este libro-CD que sae da man de Galaxia na colección Sonárbore. Temas como No San Xoán, Queremos galego, O mundo máxico de Antón ou Señor gato amosan a capacidade de Díaz de explorar novos ritmos. Folclore de diferentes lugares do ritmo mestúrase con ska, country ou rock nos distintos temas para os que Díaz se acompaña dunha banda na que participan nomes como Olga Kirk, Diego Barral, Antón Díaz, Carlos Freire e colaboracións puntuais dos irmáns Tinaquero, Xabier Díaz ou Tito Calviño, todo envolto nas ilustracións de Almudena Aparicio.
Os Carunchos presentan o seu sexto disco 'Cantares'
Xénero: | 28 / 12 / 2016
Os Carunchos presentan este venres en Vincios, Gondomar, o que é o seu sexto traballo discográfico ao longo dos seus 22 anos de traxectoria, de título Cantares. Dezasete pezas conforman este disco editado co selo Inquedanzas Sonoras, con melodías cantadas arredor da poesía popular, letras propias e tamén musicando as poetas. Rosalía de Castro, Manuel María, Celso Emilio Ferreiro, Darío Xohán Cabana, Manolo Pipas e Carlos Fontes están presentes en temas deste traballo que segundo afirma o grupo nun comunicado, “quere ser humilde resposta, o pago ao inmenso amor á nosa cultura e lingua que estes e outros autores espallan en poemas.” Os Carunchos” presentarán en concerto o novo sexto disco o vindeiro 30 de decembro ás 21:00h, no Centro Cultural de Vincios (Gondomar). O grupo naceu a finais de 1994 coa idea de mesturar temas cantados co repertorio de gaiteiros solistas, conseguindo naquel momento unha formación nova e orixinal coa que Os Carunchos participan nos máis importantes festivais folk do país. O seu anterior traballo foi TI QUE? (PAI Música) en 2013, no que trataron temas de denuncia social de actualidade.
Radio Cos culminan un ano de éxito presentando o seu novo disco
Xénero: | 26 / 12 / 2016
Inspirándose para o seu nome no betanceiro Parque do Pasatempo a formación Radio Cos presentou estes días en sucesivos directo por Santiago, Coruña e Vigo este novo disco, o segundo da banda tras Radio Cos (BOA, 2013). En Pasatempo Radio Cos volven a traballar sobre o repertorio tradicional reinterpretándoo e facéndoo evolucionar co seu estilo propio. Desde o traballo de investigación etnográfica realizado desde hai moitos anos por Quique Peón e Xurxo Fernandes, cantantes e percusionistas de Radio Cos, veñen estas melodías recollidas nos seus arquivos de gravacións de campo. Xan Pampín ao acordeón, Pedro Lamas coa gaita e saxo tenor e o violín de Nikolay Velikov completan o quinteto.Radio Cos levan a metade do ano xirando co estas cancións dando concerto por toda a xeografía española e foron os representantes da música tradicional galega nos concertos oficiais do WOMEX 2016. Este ano tamén compartiron escenario e mesmo melodías coa formación balcánica Fanfare Ciocarlia no festival feito a Man experimentando con eles mesturas galego-balcánicas. O irmanamento de culturas e son está no cerne deste novo traballo e daí parte a idea de chamalo como ao famoso recinto creado polos irmáns Naveira en Betanzos.
Ialma saca hoxe á rúa o seu quinto disco, ‘Camiño’
Xénero: | 16 / 12 / 2016
Hoxe sae á rúa o quinto álbum do grupo de pandereteiras galego-belgas Ialma, titulado Camiño. Case vinte anos despois de comezar a xuntarse para cantar e cinco despois do anterior Simbiose (2011), volven de novo cun novo disco debaixo do brazo no que contan a súa historia e a das súas familias e no que queren facer unha homenaxe aos galegos e galegas da emigración. Camiño, que leva como subtítulo De Bruxelas a Santiago, é a historia da súa emigración e da dos seus pais, pero que segue a evolucionar "porque un camiño nunca se para", din. "É un camiño de loita, cultural, de diversidade, de descubrir e de contactar co público e coa xente doutras culturas. É un camiño que levamos percorrendo moitos anos e que cantamos a través das nosas cantigas". O novo disco tamén é un canto á diversidade: "Descubrirmos novas culturas musicais permítenos enriquecernos e coñecernos mellor", afirman, definindo así a evolución que fixo o grupo que contribuíu a perpetuar, renovar e facer evolucionar a música tradicional galega.
Carlos Núñez celebra 20 anos de 'A Irmandade das Estrelas' cunha xira internacional
Xénero: | 15 / 12 / 2016
Por estas datas do ano 1996 Carlos Núñez presentaba o seu primeiro disco asinado en solitario A irmandade das estrelas, no que o gaiteiro vigués reunía as colaboracións de grandes personalidades musicais a moitas das cales xa estaba unido anteriormente no seu percorrido profesional. O disco foi un enorme éxito e marcou un momento especial, achegando a música de raíz celta feita en Galicia non só a España se non tamén ao circuíto internacional. Agora Carlos Núñez celebra o vinte aniversario deste fito cunha xira internacional na que invita a artistas novos de toda a península para crear un novo espectáculo. A xira, que comezou o pasado día 8 de decembro en Málaga, percorrerá 17 cidades de España e 15 dos EE.UU. rematando o 9 de abril no Fairmount Theater de Montreal, en Canadá. Tres das datas principais, arredor do Nadal, terán lugar en Galicia: o día no Teatro Rosalía da Coruña; o 23 na súa cidade natal no teatro AFundación; o día 26 no Teatro Jofre de Ferrol.
María Fumaça trae Aire co seu novo disco
Xénero: | 15 / 12 / 2016
Dezaoito novos temas cheos de "ganas de divertírmonos xuntos, cantar e bailar ata rebentar". Esta é a proposta que fai o proxecto Maria Fumaça con Aire, a súa terceira entrega discográfica que está xa á venda na colección "Sonárbore" de Galaxia. O libro-CD, que mantén as ilustracións de P. Pastor, inclúe un DVD con vídeos dos temas e achega "unha invitación a entrar no universo do noso maquinista Ruí, nos seus xogos, no seu mundo rico, imaxinativo e diferente, a entendelo por riba de todo e a respirar o mesmo aire", segundo explica a presentación do álbum. Uxía Senlle, Sergio Tannus, Magín Blanco ou Santi Cribeiro capitanean un equipo que suma máis de 30 persoas en escena, con nomes como Tatán, Andrés Giráldez, Antonio Castillo, Raquel Domínguez, Pablo Ces, Oli Xiráldez, Chus, Ana, Manola ou Ruí. Esta mesma mañá, o CEIP compostelán Lamas de Abade acolle unha presentación pública do proxecto. A primeira parada ao vivo será Ourense, onde o Auditorio Municipal acollerá un concerto o vindeiro 18 de novembro, Vigo seguirá na xira o 28 de decembro e a Illa de Arousa o 4 de xaneiro.
Eladio y Los Seres Queridos homenaxean á musica tradicional en Cantares
Xénero: | 2 / 12 / 2016
Como unha particular homenaxe á música tradicional que escoitaban os seus pais e eles mesmos de cativos, Eladio y Los Seres Queridos presentan un disco novo Cantares (Esmerarte). O álbum confórmano dez temas seleccionados einterpretados desde os sons pop que van desde o Fonte do araño, de Emilio Cao ao Teño saudade de Andrés do Barro pasando por Marín por ti, Flor da murta, unha versión de A Bruxa de Milladorio, dúas versións das cancións de Fuxan os Ventos Cantiga de amigo e Meu amor é mariñeiro, Camariñas, Havemos de ir a Viana e Quen puidera namorala de Luis Emilio Batallán. Deste particular canto a Galicia a banda explica que facer este disco era unha “débeda” que tiñan "coas cancións da nosa infancia, un cariño para os nosos pais pero tamén para os nosos fillos, para que non as esquezan", din desde o grupo. Pero Cantares tamén é segundo Eladio y Los Seres Queridos “un disco para que os que non son galegos descubran parte do noso cancionero.”
Vinte anos que pasaron como vinte segundos para Ruxe Ruxe
Xénero: | 30 / 11 / 2016
Tras vinte anos na escena musical como referentes do punk rock en galego os Ruxe Ruxe nin se oxidaron nin pensan desaparecer, de feito para eles todo este espectacular devir musical con 11 albumes propios editados pasoulles tan rápido que transformaron os anos en segundos no título deste novo disco de celebración do aniversario, que deron en chamar 20" . Como no seu primeiro disco Ruxe Ruxe (1999) no novo LP recuperan para a portada a imaxe dun centolo, máis vizoso aínda que o primeiro e desta vez armado cun cartucho de dinamita, deixando claro que non renuncian ás súas características distintivas orixinais de rock combativo , rock do país de corpo a corpo directo e emocional. Segundo apuntan no libreto do CD " 20" son unha nota do caderno dos días que arden entre cascallos, historias e latexos". 20" ofrece quince temas e dous 'extras' ou 'estalos' como eles os denominan entre os que se inclúe o tema Non temos medo do seu segundo LP do mesmo nome (2000).
Luar na Lubre repasa nun novo álbum 30 anos de carreira
Xénero: | 25 / 11 / 2016
Para o vindeiro nove de decembro sae á rúa XXX aniversario, o álbum co que Luar na Lubre celebra tres décadas de traballo. Segundo anuncia o grupo, o disco recolle unha selección personal que quere "non caer no convencional, sen as cancións máis coñecidas e recoñecidas" e busca "a excelencia dos temas máis agochados do noso repertorio". Canda a elas, sorpresas na forma de revisións de temas como Morrison's jig, Dun tempo para sempre ou o Soldado desgraciado, ou unha transgresora reinterpretación do clásico Fonte do Araño de Emilio Cao. Tamén se poderá ouvir a versión que Mike Oldfield fixo de O Son do Ar. Entre os colaboradores deste novo proxecto, nomes como Ismael Serrano, Coral de "Ruada", Nani García, Victor Iglesias, Christian Delgado, Fernando Fraga ou Irene Cerqueiro.