CORREO
RSS
Ti estás aquí > Inicio / música en galego
Música en galego
Rafael Carracedo recupera a historia e os sons orixinais da requinta da Ulla
Xénero: | 9 / 1 / 2018
O libro-cd A requinta da ulla. Obradoiro Riobó de Rafael Carracedo Crespo, contén a historia dos inicios e o desenvolvemento deste tipo de frauta tradicional no Val do Ulla, así como a historia do Obradoiro García Riobó (A Estrada), o taller de gaitas e requintas máis antigo de Galicia aínda en funcionamento. O volume de 192 páxinas, que acaba de saír publicado pola editorial Embora e en colaboración coa Secretaría Xeral de Cultura da Xunta de Galicia, inclúe fotos de instrumentos antigos e modernos, de agrupacións tradicionais e bandas de música e máis de oitenta partituras transcritas a partir do cancioneiro de melodías que foran interpretadas no repertorio dos vellos requinteiros. O CD que acompaña o texto contén exemplos das pezas transcritas nas partituras e os sons das vellas gaitas, requintas e percusións.
Pakolas debuta en solitario co seu primeiro libro-CD
Xénero: | 4 / 1 / 2018
Paco Cerdeira, membro fundador de A Gramola Gominola, comeza carreira en solitario con Pakolas. A editorial Galaxia presenta na súa colección Sonárbore este libro-CD que conta coa colaboración do Colexio Profesional de Logopedas de Galicia e que achega dez cancións orixinais ademais de varios contos. O proxecto propón historias fantásticas con elementos educativos que se complementan cunha serie de contidos pedagóxicos aos que se pode acceder a través da rede. Con animais como protagonistas de moitas das historias, o novo libro-CD "é unha obra musical e literaria concibida para facilitar o traballo dos profesionais da fala e da linguaxe, achegándonos material que servirá como ferramenta e complemento ao noso labor diario con rapazas e rapaces. Ao memso tempo é un traballo divertido, co que tanto nenos e nenas como adultos poderán gozar corando e bailando os seus temas, así como aprendendo coas súas historias e contos".
Trece bandas renovan a banda sonora para estas festas en 'Nada(L)'
Xénero: | 21 / 12 / 2017
Xonix Records quere cambiar a música de fondo destas festas e para iso reuniron nun disco cancións orixinais feitas ex-profeso sobre o Nadal. Son temas moi diferentes e con sons e ritmos do máis variado e letras en galego, que a súa temática fai que poidamos agrupalas como panxoliñas malia que pouco ou nada teñen que ver con esas tradicionais cancións. Nada (L) (Xonix Records, 2017), ofrece 13 temas inéditos compostos por 13 bandas galegas actuais e nso que cada unha delas achega unha perspectiva musical diferente co ánimo facerse un oco en casa e celebracións pouco dadas ao convencionalismo durante estas festas. O disco, presentado en formato físico digipack, foi gravado e mesturado por Lolo Arincón nos Estudios Xonix Records. Esta dispoñible xa en tendas físicas e en todas as plataformas dixitais. As bandas e artistas reunidas por Xonix Records para esta proxecto son variadas e moi coñecidas na escena musical do país, The Lákazans, Espiño, Oscar Avendaño e Los Wavy Gravies, Esposa con pantis, Raiba, Piti Sanz, Ruxe-Ruxe, Zënzar, Acid Proyect, Tu Mujer Nos Engaña, Liviao de Marrao, Maskarpone e Som do Galpom.
A Roda celebra 40 anos co seu primeiro disco ao vivo
Xénero: | 19 / 12 / 2017
Tiveron que pasar catro décadas de traballo para que o grupo vigués A Roda se decidise a publicar un álbum en directo. Agora, a conmemorar eses corenta anos de traballo, a formación acaba de presentar A Roda Live / A Roda ao vivo en Ortigueira, un álbum que recolle a actuación que realizou no Festival Internacional do Mundo Celta deste 2017. Xan Barcón, David Cabaleiro, Alfredo Dourado, Christian García, Alex Nores e Manoele de Felisa, a actual formación co combo, achegan ao volume dezaseis temas clásicos da banda canda a catro inéditos, cos bonus tracks de estudio 40 anos máis e Os cabaleiros da roda, da man de Inquedanzas Sonoras.
Davide Salvado, Guadi Galego e Sumrrá participarán no festival M.A.R. en Portugal
Xénero: | 1 / 12 / 2017
O vindeiro día 8 de Decembro, oito propostas musicais provenientes de varias latitudes e con linguaxes artísticas ben distintas, daranse cita no Cine-Teatro Garret da Póvoa de Varzim, no norte de Portugal. Davide Salvado, Guadi Galego e a formación Sumrrá serán a representación da música galega no festival M.A.R. O evento M.A.R. Movimento Artístico em Rede resulta da cooperación entre 7 axencias europeas, entre elas 3 galegas: Culturactiva, Luneda Producións e Mada Producións. As outras catro son de Portugal, Italia, Cataluña e as Illas Canarias. Este evento é o primeiro que xurde da decisión destas sete axencias pequenas especializadas en música do mundo en cooperar entre elas para promocionar os seu artistas e entrar noutros mercados. O formato que agora se vai levar a Póvoa de Varzim xa ten propostas de itinerar por outros lugares relacionados coas axencias pero aínda non se concretou esta posibilidade, segundo fontes de Luneda Producións. Ademais deste festival o acordo de cooperación entre axencias ten outras ideas sobre a mesa e os froitos desta xuntanza de forzas entre pequenas empresas está por pechar máis proxectos. O M.A.R. non conta actualmente con ningún tipo de apoio público nin a nivel estatal, autonómico nin europeo. Os concertos alternaranse entre tres espazos do teatro: o auditorio principal, o café concerto e a sala de ensaios. As entradas xa están á venda por un prezo xeral de 15€ para todo o festival.
Magín Blanco convida pasear os seus Camiños
Xénero: | 1 / 12 / 2017
Trece novas cancións acompañadas de contos e poemas de Carlos Meixide, Víctor F. Freixanes, Ledicia Costas, Francisco Castro, Paula Carballeira, Anxos Sumai ou María Lado entre outros autores e autoras do país. Esta é a proposta que realiza Magín Blanco en Camiños, o seu novo libro-CD para público familiar. O volume de 68 páxinas, editado por Fol con ilustracións de Leandro Lamas, foi gravado no estudio Casa de Tolos. Unha variedade de ritmos acompañan temas líricos nos que se mesturan atmósferas electrónicas, rock ou coros de alumnos de primaria con colaboracións como as de Héctor Lorenzo ou De Vacas. Os textos da cancións son da autoría de Blanco, agás no caso de Paxariño novo, que adapta unha letra de Valle-Inclán. O músico presentará o seu traballo este sábado 2 de decembro ás 11:00h no Culturgal.
Sés revisa o seu primeiro traballo con 'Readmirando a condición'
Xénero: | 29 / 11 / 2017
En xullo de 2011 irrompía na escena musical galega María Xosé Silvar, de nome artístico Sés, co seu primeiro disco Admirando a condición baixo o selo e produción da discográfica Airapro e ofrecendo once temas de rhythm & blues, jazz, rock, ritmos latinos e son big band en galego. Sés partía dunha banda anterior, Chámalle Xis!, un dos grupos gañadores do concurso Acoruna Son, apadriñado por Santiago Auserón. Aínda que paseniñamente a artista foi acadando recoñecemento e un lugar propio a base de sorprender cun directo potente e contestatario que a levou por todos os recunchos do país con este traballo e cos posteriores Co xenio destrozado (Fol Música, 2013), Tronzar os valos (Fol Música, 2015) e Opoñerse á extinción (Fol Música, 2016), talvez o seu álbum máis traballado e combativo ata o de agora e co que se elevou como referente claro dun novo xeito de canción-protesta reivindicativa en temas de liberdades, igualdade e defensa da lingua. Este venres a artista presentará no marco feira Culturgal de Pontevedra o que será o seu quinto disco Readmirando a condición. Entre o Admirando e o Readmirando entrarán as diferencias propias dun traballo autoproducido e independente no que se refai o seu primeiro disco desde a súa perspectiva e experiencias actuais e facendo del un traballo aínda máis persoal, se cabe co que implica que ela mesma tome as responsabilidades de produción e executivas. Readmirando a condición é tamén o tema combativo na súa liña co que abre o disco, que está composto por doce tracks escritos, musicados e arranxados pola propia Ses, que exerce nel de produtora musical e executiva. O disco só estará dispoñible á venda nos concertos de Sés e na súa web www.ses.gal. Este sábado e o domingo a partir das 17:00h a música estará asinando discos no seu propio posto.
Propostas trasgresoras nacionais e internacionais para o cartel do Vº A Candeloria de Lugo
Xénero: | 24 / 11 / 2017
É a cita festivaleira máis temperá de cada ano e a cada edición consegue consolidarse máis e crecer. O festival A Candeloria de Lugo celebrará entre o 22 e o 24 de febreiro a súa quinta edición reunindo unha vez máis un interesante cartel de bandas de punk e rock das escenas internacional e nacional con presenza sempre de propostas galegas entre a súa selección e un carácter contestatario en moitas das súas propostas. A falta aínda de dúas bandas por anunciar xa son 20 os nomes confirmados durante esta semana para esta edición, a mítica banda británica GBH encabeza o cartel e con eles estarán outra coñecidas formacións como Dubioza kolektiv, Mafalda ou Narco ademais de Bala, Agoraphobia, Habelas Hainas, Aphonnic, Machina, Ses, O Puto Coro do exército Froilanista, True Mountains, Satanic Surfers, No Fun At All, As Punkiereteiras, Skama La Rede, CRIM, Huntza, Leo Arremecághona e Desakato. O festivasl xa leva vendias máis dun milleiro de entradas e o abono de 3 días + Acampada está dispoñible por 36€.
'Hemisferios' reúne a oito voces femininas nun espectáculo reivindicativo
Xénero: | 24 / 11 / 2017
As cantantes Pilocha, Ugia Pedreira, Silvia Penide, Uxía, Sonia Lebedynski, Belén Tajes, Carmen Rey e Alba Rodríguez subirán hoxe ao escenario do Teatro Colón da Coruña no espectáculo Hemisferios impulsado pola área de Cultura da Deputación da Coruña. O espectáculo nace dunha acción reivindicativa cunha canción interpretada por 8 mulleres arredor do 8 de marzo, Día Internacional das Mulleres, e preséntase como un concerto único este venres, véspera do Día Internacional contra a Violencia Machista. Cada artista interpretará unha canción do seu repertorio e xuntas cantarán o tema Hemisferios.
Xoel López retrata o seu momento vital no novo álbum 'Sueños y Pan'
Xénero: | 17 / 11 / 2017
Con só botar unha ollada á lista de cancións do novo disco de Xoel López Sueños y Pan (Altafonte baixo licenza exclusiva de Esmerarte) sabemos que estamos ante un traballo diferente do artista coruñés. Cada un dos dez temas que conforman este traballo denomínase cunha soa palabra, practicamente todas substantivos agás Durme, unha nana en galego dedicada ao seu fillo. Esta proposta nominativa desvela un concepto e un momento diferente que se deixa sentir nas letras e nas melodías deste álbum que é "moi Xoel" pero é diferente na actitude tamén respecto aos dous anteriores Paramales (Esmerarte 2015) e Atlántico (Esmerarte 2012). Sueños y pan está desde hoxe nas plataformas dixitais e López fará unha presentación esta mesma noite no Fnac de Callao, en Madrid. Na capital do Estado gravouse este trababalo e á cidade e ao vencello que o liga a ela dedica tamén unha canción o coruñés neste. Poderiamos dicir que este é o disco máis luminoso e que máis mira ao presente debuxando unha sorte de instantáneas a través das que se retrata unha nova etapa non só profesional senón tamén vital a nivel persoal do artista. A nota máis nostálxica a pon a outra canción en galego neste disco, Serpes, falando das saudades infantís na súa terra. O músico coruñés segue dando mostra do seu estilo musical particular mesturando con naturalidade o pop con sons latinoamericanos e galegos, incluíndo a gaita nalgún tema como nun dos temas adiantados estas semanas, Jaguar. A xira oficial de presentación deste traballo comezará en marzo de 2018.