CORREO
RSS
Ti estás aquí > Inicio / música en galego
Música en galego
A banda Oh Ayatollah presenta o seu primeiro disco longo
Xénero: | 2 / 2 / 2018
A Sala Capitol de Santiago acolle hoxe o concerto de presentación do primeiro disco longo da banda Oh! Ayatollah. O grupo compostelán presentarán Volve a canción protesta (Autoeditado) que sae en edición dixital e vinilo e para a ocasión estarán acompañados por outras bandas amigas (Familia Caamagno, Atrás tigre, Ataque Escampe e The Homens). Nove temas propios en galego enchen o disco Volve a canción protesta ofrecendo unha liña musical emparentada co pop-punk dos primeiros tempos máis contestatarios da movida dos oitenta, cunha actitude claramente sarcástica e irreverente. Mentres pezas como Animal poden levarnos a unha escoita "mod" moi británica hai outros como Case todo é o que parece conéctanos directamente cos ecos daqueles Aerolíneas Federales. Na lista de cancións tamén hai lugar para propostas máis guitarreiras como en Ei Ei. A frescura, variedade e coherencia da lista son promesa de bos directos. O álbum foi gravado e mesturado por Hevi no Laboratorio Soyuz en xullo do 2017 e masterizado por Cem Oral en Jammin' Masters (Berlín). O tema de lanzamento, que da nome ao disco, xa foi lanzado previamente en decembro cun videoclip. O concerto comeza ás 21:15 na Sala Capitol.
Ith presentan o seu segundo disco 'O mínimo que o contén todo'
Xénero: | 1 / 2 / 2018
Tres anos despois do seu primeiro álbum Forte (2015), a banda de rock de Mesía, Ith, ven de sacar un novo traballo que xa está á venda na Fnac e no Corte Inglés, e tamén pode conseguirse contactando directamente con Ith. Co título O mínimo que o contén todo, os Ith ofrecen seis temas de composición propia, así como un poema musicado do poeta samanense Fiz Vergara Vilariño nun disco gravado, producido e mesturado en Abrigueiro Estudios (Friol - Lugo) por Arturo Vaquero. En O mínimo que o contén todo a banda -Lucía, Miguel, Toxo, Gonzalo e Folgueira- segue a manter o espírito de facer rock galego e en galego, aínda que con novas ideas e sons que a banda quixo deixar plasmados nel. A temática das cancións vai dende a reivindicación social ata o máis puro sentimento e emoción. A primeira data coñecida da xira de presentación deste novo disco será o 17 Marzo, no Pub Óxido de Lalín, e a banda xa ten máis citas para os seguintes meses en outros locais.
Outro que tal baila é o terceiro álbum de Tiruleque
Xénero: | 30 / 1 / 2018
O vindeiro 17 de febreiro chega ás tendas e preséntase ao vivo na Sala Capitol de Compostela Outro que tal baila, terceiro álbum de Tiruleque. Cinco anos depois de Mu!, o grupo lanza dez temas novos nos que continúa a explorar as posibilidades da música de raíz para a festa e o baile. O álbum autoeditado recolle tres temas propios, "nos que se xoga cos límites dos xéneros", segundo explica a presentación do proxecto, canda a "seis versións de temas tradicionais recollidos por investigadores como Pablo Carpintero ou o americano Alan Lomax. Os temas propios son Ribazo de Razo, definida como unha muiñeira contemporánea de corte tradicional; Mazo té, mazo, xota para dúas gaitas e resto de instrumentos, ou Rumbanera, composición a medio camiño entre a rumba e a habanera. Nas versións, destacan temas tradicionais como a Muiñeira dos dous golpes, o Romance dos paragüeiros ou Asubíame de lonxe.
Cristian Silva presenta Manual ególatra básico
Xénero: | 29 / 1 / 2018
A editorial Ton e Son está a presentar o terceiro volume da súa colección 20 pezas para gaita galega. Depois dos libros-CD de Carlos Estévez e de Xurxo Jachía, Cristián Silva continúa a serie con Manual ególatra básico. O volume recolle as transcricións dunha vintena de pezas para dúo, trío de gaitas e solista, moitas delsta a incluír tamén cifrados para facilitar o acompañamento con outros instrumentos. A nivel sonoro, o CD recolle cinco dos temas do volume interpretados polo propio Silva. O álbum gravouse nos Estudos atárxicos e ChisPún! Estudio.
Eduardo Estévez integra música, poesía e banda deseñada en De baleas
Xénero: | 29 / 1 / 2018
De baleas, o último poemario de Eduardo Estévez, transcende a literatura e preséntase como un produto transmedia no que colaboran diferentes creadores. O volume, editado por Caldeirón, integra canda aos textos do poeta unha banda deseñada de Tokio sobre dous poemas da obra. Ademais, un CD mestura cantos de baleas con once temas creados por músicos como Macarena Montesinos, o dúo Tiberevi, Benxamín Otero, Estevo Creus, Daniel Quaranta, Ariel Ninas, Pablo Seoane e Gabriela Acosta, Mónica de Nut, Mig Seoane, Madamme Cell e Belén Bermejo, acompañada por Andrés Díaz. O autor atópase en plena xira de presentación deste traballo, e visitará Lugo este día 31. Ferrol, Sarria, Outes e Padrón son outras das paradas previstas neste itinerario.
Samarúas bota a andar con Prólogo
Xénero: | 22 / 1 / 2018
Tardaron case seis anos, e moitos concertos, en entrar no estudio de gravación. Samarúas acaba de presentar este mes de xaneiro Prólogo, o seu primeiro álbum autoeditado. Sete temas compoñen este lanzamento que aposta polo instrumental, con só tres temas cantados que adaptan poemas de Celso Emilio Ferreiro, Xosé Iglesias e unha letra propia. A formación achega un son complexo que combina "temas propios cos tradicionais nun folk fresco con personalidade propia" mercé ao traballo dos seus sete membros. Miguel Vázquez (Gaita e saxo), Antonio Prado (Percusión), Tania Caamaño (Voz e percusión), Fran Barcia (Acordeón), María Blanco (Violín), Carlos Barcia (Guitarra) e Isaac Pérez (Batería). O álbum ten como capa unha obra de Manfred Gnädinger Man.
Manolo Bacalhau leva ao disco os cantos da taberna con Sondobar
Xénero: | 19 / 1 / 2018
Logo dunha exitosa campaña de crowdfunding, o ferrolán Manolo Bacalhau debuta no mercado discográfico con Sondobar. A seguir a súa traxectoria de colaboracións no campo da música da raíz, este cantor aposta pola reivindicación dos cantos de taberna para o seu primeiro traballo. Temas populares galegos e portugueses, poemas musicados de Rosalía ou Curros ou unha versión de Zeca Afonso danse cita nos dez cortes que achega este traballo. Ademais do CD, o proxecto comprende un DVD cun documental sobre o músico e varios temas gravados ao vivo. O Teatro Jofre de Ferrol acolleu o pasado 13 de setembro o multitudinario recital de presentación.
Fernando Barroso continúa carreira en solitario con Silence Lovers Club
Xénero: | 16 / 1 / 2018
Swing, jazz música persa, sons barrocos e raíz popular atópanse no segundo álbum de Fernando Barroso. O instrumentista continúa carreira en solitario co seu segundo álbum, Live at Silence Lovers Club, no que presenta doce temas novos coa súa mandolina acompañada do violoncello de Margarida Mariño. Presentado como unha actuación no imaxinario club que lle dá título, no álbum "a idea era crear un repertorio de directo cun instrumento que me permitise versatilidade, interpretar melodías protagonistas, pero que ao mesmo tempo tivera recursos rítmicos e harmónicos para poder acompañar. Pensei na mandolina, da que sempre gostei", segundo explica Barroso na presentación do proxecto. Ademais de Mariño, Barroso conta coa colaboración da portuguesa Celina da Piedade que pon voz e acordeón ao tema Ausencia.
Cancións que son receitas con Mamá Cabra en 'Eu cociño, ti cociñas?'
Xénero: | 11 / 1 / 2018
Gloria Mosquera Roel e Tomi López, compoñentes do grupo de música infantil Mamá Cabra asinan como autores o libro-disco Eu cociño, ti cociñas? (Sonárbore de Editorial Galaxia, 2017) que supón un dos novos espectáculos de Mamá Cabra. Música, teatralidade e alimentación xúntanse nesta proposta que parte dun proxecto do mesmo nome que se ven levando a cabo desde hai anos no CEIP Sigüeiro impulsado polas mestras María Salgado e Pilar Rivas e que amosa ás crianzas as virtudes da alimentación saudable feita por un mesmo. O libro-CD presentouse recentemente na feira Culturgal e ofrece un contido ilustrado por María Lires cheo de receitas e de cancións para que os pequenos e as pequenas da casa se acheguen sen medo á cociña cun ánimo e unhas bases saudables ao mesmo tempo que cantan e se divirten. A formación acaba de abrir tamén a súa propia canle en You Tube para facilitar o acceso aos seus vídeos.
Maria Fumaça bota un ollo atrás con As que máis molan!!!
Xénero: | 10 / 1 / 2018
A conmemorar cinco anos de traballo, o proxecto Maria Fumaça bota a ollada atrás e presenta o seu primeiro recompilatorio. As que máis molan!!! recupera temas dos seus tres traballos, Maria Fumaça, Xiqui xoque, fiú fiú! e mais Aire e complétaos con dúas cancións inéditas. Logo da presentación do álbum en Vigo o 23 de decembro e mais no Auditorio da Illa de Arousa o pasado día catro, o Auditorio de Galicia de Santiago de Compostela acollerá o 27 de xaneiro o vindeiro concerto da xira deste proxecto no que participan Uxía, Magín Blanco ou Sérgio Tannus entre outros. A colección Sonárbore de Galaxia é reponsable unha vez máis novo libro-CD do proxecto.