MeGA

Kalandraka publica Orfeo e Eurídice na súa colección de ópera para nenos

Xénero: Infantil | 13 / 12 / 2007

A historia de amor e descenso á casa dos mortos entre o músico e poeta Orfeo e a ninfa Eurídice forma parte do corpus da mitoloxía grega e tamén do da música universal a través da ópera composta polo alemán Christoph Willibald Gluck e estreada en 1762. A editorial pontevedresa Kalandraka suma agora esta peza á súa colección de ópera ofrecendo o libreto da mesma adaptado a pequenos lectores e acompañado de fermosas ilustracións de Pep Montserrat e o CD con 11 cortes seleccionados da obra e interpretados por unha soprano e dúas mezzosopranos acompañadas da orquestra e coros do Drottningholm Theatre, de Estocolmo. Esta colección, que xa conta con tres títulos anteriores, é froito do traballo conxunto coa editorial catalá Hipótesi, especializada en libros de ópera.

Máis información de outros títulos da colección en MeGA

Sae ao mercado o disco de homenaxe aos Diplomáticos de Monte-Alto

Xénero: Fusión | 5 / 12 / 2007

O dobre disco no que máis de vinte bandas e artistas fan una homenaxe aos desaparecidos Diplomáticos de Monte-Alto xa está á venda na plataforma dixital Trastenda. Com e a partires da semana que ven estará nas tendas. “120 Capadores” (Falcatruada) presentouse oficialmente o pasado 2 de novembro en Chantada no marco da quinta edición do festival Castañazo Rock, no que se conmemorou de diversas formas o inicio do momento bravú en 1994. A iniciativa de Komunikando.net e do Centro Social Atreu impulsou este disco no que poden escoitarse as achegas dos míticos Rastreros de Chantada, os Festicultores, Lamatumbá ou Os Tres Trebóns, a actual banda de Xurxo Souto. No dobre disco “120 Capadores” atopamos a particular versión do Gaiteiro de Dixebra, o Castiburón dos Cuchufellos, Esta noite hei de ir aló d’O sonoro maxín e até o Subastado da Banda Potemkin, aínda que tamén as particulares revisións de Galegoz ou Safari Orquestra. Porén, o disco inclúe catro temas inéditos dos Diplomáticos ao vivo.

Os actos do centenario do himno galego terán lugar en cinco cidades simultaneamente

Xénero: Folk | 4 / 12 / 2007

O 20 de decembro de 1907 o Gran Teatro de La Habana acolleu a estrea do Himno galego. Unha celebración que se conmemorará o próximo sábado día 8 neste mesmo teatro pero que, esta vez, se estenderá a outras cidades. No Centro de Galicia-Olivos de Bos Aires, Milladoiro e Xeito Novo ofrecerán un concerto; o Centro Galego Carrasco de Montevideo acollerá outro de Susana Seivane e Los Williams; San Salvador de Bahia, en Brasil, terá un con Uxía Senlle, Carlos Núñez e Chico César no cartel. Completa o programa a Orquestra Panorama tocando desde o Gran Marina Hotel en Barcelona. A celebración será retransmitida en directo por Televisión de Galicia.

Máis información en La Voz de Galicia e sobre o himno na nosa hemeroteca

A Compañía do Ruído prepara unha festa na rúa para gravar en directo un novo disco

Xénero: Fusión | 28 / 11 / 2007

A banda de Ribeira desembarcará o vindeiro día 8 en plena zona da movida do concello de Boiro para facer un concerto de rúa do que sairá o seu novo CD/DVD. Baixo una carpa de rúa os integrantes da ecléctica formación A Compañía do Ruído invitan a asistir de balde a este directo que quedara gravado en imaxe e música. Co nome de “A todo Punkchi!!” os once compoñentes deste divertido combo prometen festa e diversión para esta singular ocasión da que sairá o seu cuerto traballo. A festa-concerto comezará a partir das 21 horas, haberá carpa e servizo de autobús de balde entre Ribeira, Palmeira, Pobra e Boiro entre as 20 e as 24 horas.

Máis información en Komunikando

Budiño reúne influencias e colaboracións diversas nun disco con ambición universal

Xénero: Folk | 26 / 11 / 2007 + IMAXES + AUDIO + VIDEO

Por segunda semana consecutiva a discográfica coruñesa Falcatruada pon nas tendas un disco de importancia asegurada no panorama musical. O cuarto disco do gaiteiro Xosé Manuel Budiño, “Home” (Falcatruada, 2007), sae o día 27 de novembro xusto cando se cumpren dez anos da publicación do seu primeiro traballo “Paralaia” (Resistencia, 1997) e é o menos solitario dos seus traballos xa que está cheo de colaboracións de amigos como Xoel López, Deluxe, quen lle presta a voz en Ollos de Sal, Mercedes Peón, Kepa Junkera, Jorge Pardo, Paco Charlín e Antón Reixa entre outros. Nos seus dez temas “Home” preséntase como unha proposta de “World music” nacida pola influencia das múltiples viaxes e desde a música tradicional galega. O disco foi gravado nos Estudios Ardora polo propio Budiño e mesturado en casa de Tolos por Segundo Grandío e Budiño. O gaiteiro abrirá a súa xira de presentación o vindeiro 19 de xaneiro no festival Celtic Connections de Glasgow e tamén estar o vindeiro 8 de decembro na Habana para participar nos acto conmemorativos do centenario do himno galego.

NAO presenta o seu primeiro disco “As palabras espidas”

Xénero: Rock | 21 / 11 / 2007 + IMAXES

Con dúas maquetas ben acollidas tras de si e unha presenza importante en concertos e festivais o quinteto formado na Estrada presenta agora o seu primeiro traballo discográfico “As palabras espidas” (Kamikaze Música). O disco ofrece 11 novos temas creados desde referencias rock, hardcore, metal e punk, poñendo moita importancia nas letras, en galego, que tratan de poesía, amor e revolta social. NAO gravaron este traballo durante o mes de agosto nos estudios Gárate de Andoain (Guipuzkoa) baixo a produción de Kaki Arkarazu e o disco foi masterizado nos estudios Masterispont en Madrid. Cun amplo percorrido por outras bandas como Xenreira, MDR ou A Matraca Perversa os cinco integrantes do grupo gravaron anteriormente dúas maquetas “Usa a palabra” e “Somos”, esta última foi seleccionada en febreiro de 2007 como maqueta do mes pola revista Rockzone cunha crítica moi favorable.

Maís información en Komunikando

Lalín oferta 62.000 euros para manter o Conservatorio Folque en 2008

Xénero: Folk | 19 / 11 / 2007

Os orzamentos do Padroado de Cultura de Lalín prevén un orzamento para o Conservatorio de Música Tradicional e Folque de 62.000 euros. A partida, moi por baixo dos 150.000 euros anuais que, segundo o Padroado, reclama a actual dirección, é aproximadamente a mesma que nos últimos anos. Ao tempo, o organismo municipal denunciou a escasa presenza de alumnos de Lalín no centro e adiantou a posibilidade de orientar este conservatorio nun sentido máis local. Ao tempo, o voceiro do Padroado, Saturno Valdés, apuntou que é posible a actual directiva xa teña acordado desenvolver o seu traballo noutro concello.

Máis información en La Voz de Galicia, Diario de Pontevedra (en pdf), en El Correo Gallego, e nos nosos arquivos

Narf reúne no seu segundo disco a experiencia de vinte anos coa guitarra nas costas

Xénero: Fusión | 19 / 11 / 2007 + AUDIO + VIDEO + IMAXES

O novo disco do compostelán Fran Pérez representa o camiño de volta á casa dun músico cargado de influencias e experiencias atesouradas durante as súas viaxes. Co seu segundo traballo, TOTEM (Falcatruada) o palindromático Narf ofrece melodías pop que lle dan forma a sons de todo o mundo a través dos trece temas deste disco editado en formato Digipack. Árabe, flamenco, brasileiro, africano e moitas máis influencias recoñecidas neste TOTEM que marca vinte anos de andaina musical de Fran e que desde o 20 de novembro xa está dispoñible nas tendas, ademais de na rede como xa é habitual nos produtos da discográfica Falcatruada. Neste mesmo ano Narf estivo a presentar en Inglaterra as súas novas cancións, algunhas delas con letras de Xelís de Toro, Pepe Sendón e poemas doutros autores. Compositor da música de moitos espectáculos teatrais galegos e portugueses, Fran Pérez leva unha longa andaina artística como colaborador do grupo de Chévere e integrante da banda Psicofónica de Conxo, a composición e dirección musical do CD “O labirinto dos soños” e a súa participación no espectáculo “Cantos na maré”, o seu anterior disco “NARF, fran pérez directo en compostela” editouse no ano 2003.

Máis información en Falcatruada

A Orquestra Sinfónica de Melide estrea o musical “Gallaecia”

Xénero: Miscelánea | 15 / 11 / 2007

O Teatro Colón na Coruña, o Jofre de Ferrol e o Auditorio de Galicia en Compostela acollerán nos primeiros meses de 2008 a estrea do musical “Gallaecia” que pon en escena a Orquestra Sinfónica de Melide. Esta produción reúne nun mesmo escenario 100 artistas dedicados á música e á danza que achegarán mostras de música sinfónica, folk, popular e melódica nun mesmo espectáculo.

Máis información en La Opinión; no Diario de Ferrol, no web da Deputación da Coruña, en Galicia Hoxe; e en La Voz de Galicia; outros musicais galegos: Robin Hood e Imperial Café Cantante; máis nos nosos arquivos sobre a orquestra

O quinteto Xúa presenta o seu primeiro disco editado por Galiza Sons

Xénero: Folk | 14 / 11 / 2007

Xúa son un quinteto novo no panorama discográfico pero os seus compoñentes son músicos de moita experiencia. Hoxe presentaron no Club Internacional de Prensa o seu primeiro disco, de nome homónimo do grupo, editado por Sons Galiza. O grupo está formado Vadim Yukhnévich (acordeón e voz), Nuria de León (voz, arpa e frautas) Ramón Feáns (bouzouki, guitarras), Pablo Pérez (baixo e contrabaixo) e Xacobe Gallego (batería). Moitos deles teñen tocado con grupos como Brath, Fía na Roca, Anubía ou Driade. A banda basea a súa filosofía sonora na nosa tradición folk sen renunciar á incorporación de sons doutras culturas ou doutros xéneros como o jazz ou o funk. O grupo dá moita importancia á voz nos seus temas e algunhas letras están inspiradas en textos de Celso Emilio Ferreiro, Lorca e Eduardo Galeano. A banda tamén trata outra das características históricas dos músicos en Galicia: a lingua do barallete. O propio nome do grupo é unha palabra do barallete, posto que significa “lume”.

Máis información en Sons Galiza