MeGA

Os ponteareáns Capitan Furilo presentan cunha cea o seu primeiro disco

Xénero: Pop | 14 / 1 / 2008

Tras algo máis dun ano dende o nacemento do grupo, Capitan Furilo autoedita o seu primeiro EP. Baixo o título de “POP?”, para o grupo de Ponteareas a edición deste disco supón a consolidación do grupo e a definición do seu propio son. O traballo contén cinco temas e foi gravado o pasado mes de outubro de 2007 nos estudios Océano de Nigrán. A presentación oficial do disco será o vindeiro sábado 26 de xaneiro en Ponteareas cunha cea – concerto. A presentación do traballo será o punto de partida dunha xira de concertos o redor da xeografía galega nos próximos meses. Capitan Furilo formouse a finais do ano 2006 deu o seu primeiro concerto en La Iguana Club de Vigo o 1 de xuño de 2007, o grupo quedou finalista o pasado mes de setembro no primeiro concurso N´saio organizado pola Dirección Xeral de Xuventude. O 26 de xaneiro, ademais de presentar o disco, as cinco cancións que o integran publicaranse na rede co fin de que cada persoa libremente poida descargalas.

Máis información en SONO-TONE

Guadi Galego deixa Berrogüetto e entra Xabier Díaz a substituíla

Xénero: Folk | 10 / 1 / 2008

Nun comunicado aos medios o emblemático grupo folk Berrogüetto ven de anunciar dous importantes cambios na súa formación. Deixa o grupo a cedeirense Guadi Galego, cantante e gaiteira de Berrogüetto durante 10 anos, e entra nel, ocupando as mesmas labores, Xabier Díaz, vocalista, gaiteiro e percusionista. Despois da xira de presentación do seu traballo de aniversario “10.0”, o grupo afronta así un ano cargado de proxectos e comeza a pensar no seu quinto traballo discográfico. No comunicado a banda agradece a Guadi “os anos dedicados ó grupo, a súa voz, as súas composicións, a súa compañía e amizade.” Guadi Galego ten xa dous discos publicados con outros proxectos musicais á marxe de Berrogüetto nos últimos anos, “Espido”, co seu compañeiro de Berrogüetto Guillermo Fernández, e Nordestin@s con Ugia Blanco e Abe Rábade. Xabier Díaz ten editados os discos “Músicas de Salitre, tamén xunto a Guillermo Fernández, e “Coplas para Icia”.

Tema sobre Nordestin@s nos nosos arquivos

Publícase o concerto de fin de carreira do primeiro gaiteiro titulado superior

Xénero: Folk | 8 / 1 / 2008 + AUDIO + IMAXES + VIDEO

Xosé Luís Miguélez é a día de hoxe o primeiro gaiteiro titulado superior en Música Tradicional de toda a península, esta honra acadouna no 2006 despois de ser un dos primeiros en cursar esta titulación no Conservatorio Superior de Música de Vigo e de dar en novembro de 2006 o seu concerto de fin de carreira no Auditorio do devandito centro. Ese concerto é o que agora recolle nun disco gravado ao vivo e que titula “Esperanza”. A editorial Dos Acordes edita agora este CD que presenta un novo repertorio para gaita galega, baseado en composicións que van, dende a música inspirada na tradición, ata unha linguaxe máis contemporánea. O disco conta coas colaboracións de Lucía Martínez ou Pablo Diago entre outros e nel preséntanse composicións inéditas, algunhas delas estreadas para a ocasión, de músicos como, Ernesto Campos, Ricardo Courtier, Xan Míguez, Paulo González, David Bellas ou o propio Miguélez. Na súa faceta como saxofonista Xosé Luís, que ten un longo percorrido formativo, é tamén un dos novos valores do jazz do país.

Máis información no sitio de Xosé Luís Miguélez

Rogelio Groba e Rudesindo Soutelo cobran os dereitos de autor do himno galego oficial

Xénero: Coral | 21 / 12 / 2007

Todo o mundo sabe que o himno galego foi composto por Pascual Veiga en 1890. Pero o que escoitamos nos actos oficiais é a partitura de Veiga arranxada por Rogelio Groba, despois dun encargo que lle fixo Xosé Luís Barreiro en 1985, cando era vicepresidente da Xunta de Galicia (e que figura nos anexos á Lei de Símbolos). Sucede que Rudesindo Soutelo editou eses arranxos en “Arte Tripharia”, a súa editorial, e así o fixeron constar na SGAE. Iso implica que cada vez que se interpreta o himno oficial, tanto Groba como Soutelo, cobran. Rudesindo Soutelo, nunha entrevista realizada por este medio en 2003, explicou que os ingresos pola interpretación do Himno van entre 3.000 e 6.000 euros anuais porque “aínda que se interprete moito, non se declara”.

Máis información en La Voz de Galicia e sobre os dereitos na nosa hemeroteca. Ademais, consulta o noso tema sobre o himno

A Caricia da Serpe presenta o seu segundo disco “O Sorriso do Diaño”

Xénero: Miscelánea | 20 / 12 / 2007

A música de A Caricia da Serpe é difícil de clasificar, blues de Nova Orleáns, pop, rock, reggae, flamenco, referencias a bandas sonoras cinematográficas, cancións populares revisadas e tangos, e sempre cun marcado carácter literario. Co novo disco “O Sorriso do Diaño”(Wonderland) A Caricia da Serpe cumpren 10 anos da súa formación como banda e neste novo traballo presentan doce temas que inclúen poemas e cancións escritos por Lino Braxe e musicados por Rómulo Sanjurjo e Miguel Ladrón de Guevara. Con respecto ao seu anterior traballo “A caricia da Serpe” (Wonderland, 2005) a banda aposta moito máis pola música orixinal e ofrece menos versións que noutras ocasións. En canto ós contidos, o grupo, tenta achegarse aínda máis ás preocupacións sociais. O traballo será presentado o venres, 21 de decembro na FNAC de A Coruña e o xoves, 27 o Teatro Rosalía de Castro da mesma cidade será o concerto de presentación.

Máis información en MeGA sobre A Caricia da Serpe

Debut dunha cantante con 82 anos de “xuventude acumulada”

Xénero: Folk | 19 / 12 / 2007 + IMAXES + VIDEO

A Señora Carmen, compoñente do grupo Malvela, debuta en solitario con “Na flor dos meus anos” (PAI Música) arroupada por colaboracións tan importantes como as de Dulce Pontes, Xosé Manuel Budiño, Uxía ou Rodrigo Romaní no eido musical e os textos do escritor Fran Alonso no libro que acompaña ao disco e no que dá conta da vida desta muller singular. Co grupo Malvela, que xurdiu a partir dun cursiño de cantos populares dirixido pola cantante Uxía, a Señora Carmen presentou este mesmo ano o seu terceiro disco “Da miña xanela á túa” (PAI Música) conseguindo unha grande aceptación con numerosos concertos dentro e fóra de Galicia. O carisma e paixón musical desta muller fixo que pronto os produtores se fixasen nela para a elaboración dun disco propio. "Na flor dos meus anos" componse de 12 pezas de corte tradicional cheas de sentimentos nas que conta a súa vida mergullándose na Galicia que viviu de nena. Ademais do CD e o libro o paquete complétase cun DVD cun documental sobre a vida desta muller e varios vídeos das cancións así como da gravación nos estudios Casa de Tolos. O disco presentarase este venres, 21 de decembro, ás 12:00 horas no CGAC de Santiago.

Máis información en MeGA de Malvela

Doce anos de vida e cambios de Pai da Cana recollidos nun só disco

Xénero: Folk | 18 / 12 / 2007

O Grupo de Música Tradicional Pai da Cana recolle no seu novo disco, paidacana12 (Edicións do Cumio, 2007), os 12 anos de traxectoria do conxunto amosando as distintas formacións musicais que foi adoitando, así como unha parte do seu repertorio a través do que se pode percibir a súa evolución musical. O grupo, formado en 1995 na asociación cultural do mesmo nome de Poio, ten un repertorio de pezas das charangas galegas que existiron no país e mais en América dende finais do século XIX, ritmos importados coma o vals, a mazurca, a polca, a ranchera, o tango ou a rumba, que na altura se relacionaban co progreso e a modernidade, e outras pezas tradicionais arranxadas dentro desta estética musical de entreséculos que tamén levan ao seu vestiario de actuación. Na charanga de Pai da Cana a gaita e o acordeón se funden cos instrumentos propios das bandas de música como o clarinete, o saxofón, a caixa e o bombo con pratos. Forman o grupo María Vidal, Miguel Dopazo, Diego Rodríguez, Iria García, Oscar Pazos e Carlos Mouriño, baixo a dirección e arranxos de Óscar Ibáñez. O CD presentarase no Teatro Principal de Pontevedra o día 28 de decembro ás 20:30 horas, entrada libre.

Tino Baz presenta o primeiro disco en solitario da súa extensa carreira de cantor

Xénero: Cantautor | 17 / 12 / 2007 + VIDEO

Cinsa namorada ( PAI Música), é o primeiro traballo discográfico en solitario do artista guardés Tino Baz, músico de longa traxectoria en grupos como A Roda ou o Orfeón Treixadura. O disco, gravado en casa de Tolos coa produción de Segundo Grandío, ten como finalidade crear un soporte sonoro da obra de Baz como autor, músico e cantor. As once pezas que compoñen este proxecto, son músicas e textos de Tino Baz xunto a un poema da escritora luguesa Marica Campo. O veterano músico Moisés Quintas asume a dirección artística de Cinsa namorada e coordina a participación dos distintos instrumentistas que interveñen no proxecto. O disco presentarase ao público o vindeiro 19 de decembro no Centro Cultural da Guarda, ás 20 horas.

Aínda non comezaron as clases de oito materias da Escola de Artes e Oficios de Vigo

Xénero: Folk | 14 / 12 / 2007

O proceso de regularización dos profesores da Escola de Artes e Oficios de Vigo, que afectaba en boa medida ao Conservatorio de Música Tradicional, segue sen se resolver. Oito materias, entre elas algunhas coma zanfona ou requinta seguen sen iniciar a súa actividade, segundo a concelleira de Educación, “pola lentitude do proceso” de contratación. Boa parte dos alumnos, mentres, continúan con mobilizacións e protestas e temen que a solución que achegou o concello converta a escola nun conservatorio de elite.

Máis información en La Voz de Galicia; as crises dos conservatorios de música tradicional nos nosos arquivos

Ouvirmos presenta o disco de Resonet dedicado aos Cantares Gallegos de Rosalía

Xénero: Antiga | 13 / 12 / 2007

O grupo de Música Antiga Resonet fai unha nova interpretación musical de dezasete dos Cantares Gallegos de Rosalía de Castro tomando como punto de partida as melodías do tempo da escritora que mesmo puideron servir a esta de inspiración. Instrumentos e sonoridades que buscan trasladarnos ao contexto no que a poeta compostelá escribiu unha das súas máis famosas obras. O disco Cantares Galegos está editado pola discográfica Ouvirmos e presenta unha coidada presentación cun libreto de 88 páxinas que ofrece os poemas orixinais así como as súas traducións ao castelán – esta feita por Helena Villar Janeiro e Xesús Rábade-, inglés e francés. Resonet está dirixido por Fernando Reyes, arranxista das pezas, que creou o grupo en 1990 en Santiago de Compostela tomando o nome dunha peza do Códice Calixtino.