CORREO
RSS
Noticias
Os pontevedreses Heissel chegan á final do concurso de maquetas de Hard Rock Café e Sennheisser
Xénero: | 11 / 6 / 2007
Superando as diferentes fases de selección que deixaron fóra máis de cento corenta grupos musicais a formación pontevedresa Heissel conseguiu chegar á final do “Concurso You Play! de maquetas para Jovenes Artistas” organizado pola cadea de restaurantes Hard Rock Café e empresa alemá de produtos electro-acústicos Sennheiser. Despois de superar unha primeira fase de pre-selección por votacións en liña na que foron elixidos entre os 20 mellores dos 147 que se presentaron de toda España, un xurado de profesionais da industria musical escolleu a súa maqueta para formar parte do grupo de seis semifinalistas. Tras dunha actuación o pasado día 7 no Hard Rock Café de Madrid Heissel foi elixida unanimemente como finalista polo xurado por diante das actuacións dos grupos madrileños Otra Cara e The Moonstones. Será o vindeiro xoves 14 na terraza do restaurante en Madrid onde terá a oportunidade de optar a gañar o concurso fronte aos grupos Versatile, de Barcelona, e Tyr, de Málaga, finalistas escollidos en Barcelona. O gañador recibirá un equipo de microfonía valorado en máis de 2.600 euros e actuará nos festivais Metrorock 2007 e Viñarock 2008.
Máis información no sitio de YouPlay!
Fernando Vázquez prepara un musical que combina todos os estilos musicais practicados no noso país
Xénero: | 11 / 6 / 2007
Música sinfónica, popular, melódica e folk. Son os diferentes xéneros que se practican no noso país e a base que conforma o musical “Gallaecia”. Unha proposta do compositor e director de orquestra Fernando Vázquez Arias que ten data de estrea o 15 de agosto en Melide. Alberto Lago, Enrique Rodríguez, Xosé García Serrano e Prudencio Romo, pouco antes de falecer, foron os encargados dos arranxos de músicas de Andrés Do Barro, ou Los Tamara que conforman este orixinal musical.
Máis información na edición de domingo de El Ideal Gallego
O compositor catalán Sebastiá Torrent gaña o premio Andres Gaos da Deputación da Coruña
Xénero: | 8 / 6 / 2007
A sétima edición do premio de composición musical Andrés Gaos organizado pola Deputación da Coruña foi parar ao compositor catalán Antoni-Ernest Sebastiá Torrent pola obra “Angelus Novus”. A obra gañadora traza unha relación directa da música coa pintura de Paul Klee. O premio está dotado con 6.500 euros e a obra gañadora será interpretada pola Orquestra Sinfónica de Galicia na temporada 2008-2009, segundo indicou Félixe Palomero, comisario do premio e xerente da OSG. O fallo do xurado tamén incluía unha mención á obra “Tentativi” de Manuel Martínez como finalista.
Máis información en El Ideal Gallego
Blusens chega a un acordo para distribuír na rede o catálogo de Universal Music
Xénero: | 8 / 6 / 2007
Dunha banda unha empresa galega que fai reprodutores de música, Blusens, e da outra, unha de creación de contidos, Universal Music. O resultado desta alianza é a posibilidade de que o usuario poida achegarse ás 100.000 cancións do catálogo de Universal e Vale Music de xeito legal e ilimitada cunha boa calidade. Un feito que é posible grazas ao convenio asinado entre ambas entidades e presentado onte pola empresa galega.
Máis información no web de Blue Sens
Os coruñeses Nashgul sacan un disco conxunto cun grupo xaponés nun selo alemán
Xénero: | 8 / 6 / 2007
O seló alemán Power It Up acaba de editarlle á banda coruñesa Nashgul un novo disco, conxuntamente co grupo xaponés World Down Fall. Trátase dun vinilo de sete pulgadas que contén cinco temas dos galegos por un lado e tres dos nipóns polo outro, incluindo unha versión de Denak. Nashgul é un cuarteto cunha intensa actividade discográfica, e xa ten entrado nos circuitos europeos do seu estilo musical, o grindcore. A portada desta nova gravación é obra da debuxante Emma Ríos e o deseño gráfico de Álvaro López, ambos coñecidos autores galegos de banda deseñada.
O disco pódese comprar en liña xa en Power it Up
O programa Alalá da TVG recibirá un galardón da Academia de Televisión
Xénero: | 7 / 6 / 2007
O programa da Televisión de Galicia Alalá, que dirixe Senén Bernárdez e presenta Pilar García Rego, recollerá este sábado en Sevilla o galardón ao mellor programa de Tradición musical outrogado pola Academia das Ciencias e das Artes de Televisión. Alalá naceu como documental musical que se interna nas historias e vidas cotiás da xente que loita para que non se esqueza a sabedoría tradicional. Alalá é un dos programas que a TVG presentou dentro da súa renovación de contidos e supón unha revisión do xeito en que a televisión difunde a tradición musical, encadrando a actuación dun grupo ou artista dentro do seu marco social, laboral ou persoal. A gala de entrega dos premios, que tamén celebra o décimo aniversario da Academia das Ciencias e das Artes de Televisión retransmitirase por todas as canles autonómicas da FORTA.
Máis información na Academia de Televisión
e sobre Alalá na TVG
Reúnense en Bruxelas tres voces galegas femininas de primeira fila no espectáculo “Ida e volta”
Xénero: | 6 / 6 / 2007
As cantantes Guadi Galego, Uxía e a belgo-galega Verónica Codesal estarán acompañadas no escenario do Teatro Molière por Didier Laloy (acordeón), Pascal Chardome (guitarra), Cédric Waterschoot (baixo) e Osvaldo Hernandez (percusión). O trío Ad Cominotto abrirá ás 20 horas a velada na que as tres artistas galegas amosarán o son actual da tradición musical galega. O espectáculo "Ida e volta" esta organizado pola Fundación Muziekpublique coa colaboración da Consellaría de Cultura e a Fundación Galicia-Europa. Está previsto que este espectáculo se repita despois en outros lugares.
Ponse en marcha a Orquestra Filharmónica Cidade de Pontevedra
Xénero: | 6 / 6 / 2007
43 músicos integran a nova Orquestra Filharmónica Cidade de Pontevedra. Segundo o coordinador da proposta, Luís Costa, o 90% dos integrantes son de procedencia galega. A orquestra, segundo Costa, aspira a “integrarse na vida social da cidade e converterse nun referente no panorama simbólico de Galicia”. Trátase dun proxecto financiado pola Deputación de Pontevedra, o Concello e a Xunta de Galicia coa colaboración do Conservatorio de Música de Pontevedra. A Orquestra estará dirixida por Javier Viceiro-Filgueira e dará tres concertos de presentación nestes días. O inaugural será hoxe, mércores, ás 21 h. no Pazo da Cultura de Pontevedra. O sábado 9 será o seguinte, no Auditorio Martín Códax do Conservatorio Superior de Vigo e no Auditorio de Galicia o vindeiro día 12.
Máis información en Galicia Hoxe
Preséntase o disco no que trinta grupos fan versións de temas de Andrés do Barro
Xénero: | 4 / 6 / 2007 + VIDEO + AUDIO
Son tempos de Do Barro. Se onte mesmo a Televisión Galega emitía a gala de homenaxe a Andrés do Barro, mañá chega ás tendas "Manifesto Dobarrista", un CD editado por Falcatruada. Baixo este título unha trintena de grupos galegos presentan cadansúa versión dun éxito deste pioneiro do pop en galego. Entre os participantes neste disco, grupos coma The Homen, Narf, Niño y Pistola Fanny + Alexander ou Projecto Mourente. De xeito paralelo, está xa na rede o web dobarrismo.com, que quer ser un punto de encontro para os admiradores deste artista.
Máis información no web de Falcatruada, en Dobarrismo.com, en Galicia Hoxe; en La Voz de Galicia; trailer do documental O tren que me leva en AVG; o noso tema sobre Do Barro; escoita mostras dalgúns dos temas en Mega
14 promotoras musicais únense para abrir unha canle de diálogo coa Administración
Xénero: | 1 / 6 / 2007
Hoxe presentouse en Santiago de Compostela a AGEM (Asociación Galega de Empresarios Musicais). A asociación, que aínda está en fase de creación, xunta a 14 empresas do sector musical e ten entre os seus obxectivos servir “de interlocutor entre as empresas do sector e as diferentes Administracións” e “crear un panel para intercambiar ideas e experiencias en beneficio do exercicio da profesión da promoción, producción e distribución de concertos musicais”. A asociación está presidida por Lucila Fernández, de Idea Rock e os seus promotores subliñaron que se trata dunha “iniciativa pioneira no sector da música en directo”. Entre os socios atópanse Zouma Records, Nordesía Produccións, Nocturna Producciones e XXL Produccións.