CORREO
RSS
Noticias
Grande Amore presenta o seu segundo disco
Xénero: | 14 / 9 / 2023
Desde hoxe xa está dispoñible nas plataformas o segundo disco de Grande Amore, o proxecto de Nuno Pico xunto a Clara Redondo e mariagrep. Baixo o título de "II" e o selo de Ernie Records este traballo ofrece dez temas orixinais dos que catro deles xa foron previamente adiantados: 'Do meu corpo van nacer outros corpos', 'Pelea', 'Onde ela me quer levar' e 'Ben Sabe Dios Que O Intentei'. A proposta de "II" mantén as liñas narrativas do seu disco de debut "Grande Amore" (Ernie Records, 2021), cun existencialismo escuro que retrata a vida contemporánea cotián cunha certa rabia e desesperación. Nuno amósase máis seguro tras do seu paso polos escenarios e festivais e pola acollida que tivo por parte do público nel e iso nótase nesa reafirmación de estilo que é este "II". A nivel sonoro os temas adquiren máis forza e potencia, máis velocidade en xeral.
O documental Dorothé na vila xa se pode ver íntegro na rede
Xénero: | 13 / 9 / 2023
Coa mensaxe "Dorothé sempre dixo que o seu traballo nos pertence a todas. Desde hoxe, podedes ver o documental en aberto", Alejandro Gándara e Olaia Tubío, responsables do documental Dorothé na vila publicaban este 12 de setembro esta peza audiovisual na plataforma Vimeo.
A Arca da Noe pon á venda o seu primeiro libro-CD
Xénero: | 11 / 9 / 2023
Cando parou a realización de concertos no medio da pandemia pola Covid-19, Noemi Vázquez, responsable da sala A Arca da Noe, en Vilar de Santos, decidiu armar o primeiro libro-CD deste proxecto. A iniciativa, que viu a luz finalmente este verán e está a chegar ás tendas de todo o país, cristalizou no libro-CD Oceanoe. Travessia polo mar das antelas. O volume achega colaboracións inéditas na música galega e lusófona artelladas pola propia Noe que interpretan dezanove temas dos cales a maioría son pezas inéditas, con dúas versións e outras dúas cancións tradicionais.
Adeus á señora das cantigas: Falece Dorothé Schubarth
Xénero: | 8 / 9 / 2023
O seu nome leva anos a se reivindicar como a peza clave que permitiu o coñecemento sistemático do noso patrimonio sonoro. Dorothé Schubarth, a etnomusicóloga suíza que asinou o monumental Cancioneiro popular galego coa axuda do filólogo Antón Santamarina, falecía este 6 setembro nun hospital de Basilea (Suíza), aos 80 anos de idade, ao parecer por complicacións dun accidente bascular que sufrira hai un tempo.
Eduardo Soutullo recibe o Premio Nacional de Música
Xénero: | 5 / 9 / 2023
A cultura galega recibe un novo recoñecmento estatal tras o Premio Nacional de Literatura dramática a Paula Carballeira. O compositor vigués Eduardo Soutullo (Vigo, 1968) recollerá un dos Premios Nacionais de Música 2023 outorgados polo Ministerio de Cultura e Deportes. Está a primeira vez que un destes galardóns da área de música recae nun artista galego. O xurado concedeu ao músico o galardón desta arte na modalidade de composición motivando a súa decisión polo "unánime recoñecemento internacional da súa música, especialmente a súa produción orquestral, destacando a estrea en 2022 en San Petersburgo da súa cantata 'O lamento dos xirasois'". O premio está dotado co 30.000 euros. O compositor iniciou a súa formación musical no Conservatorio Superior de Música de Vigo. Ten un mestrado da Universidad Complutense de Madrid en 'La música en España e Hispanoamérica: métodos y técnicas actuales de investigación'; é doutor pola Universidade de Vigo cunha tese sobre música española contemporánea, ademais de profesor superior polo Conservatorio Superior de Música de Santiago de Compostela. Eduardo Soutullo está emparentado co tamén compositor Reveriano Soutullo (Ponteareas, 1880-1932), que era irmán do seu bisavó.
Baiuca, Caamaño & Ameixeiras, Ailá e Trilitrate seleccionados para os escenarios internacionais do WOMEX
Xénero: | 4 / 9 / 2023
Ven de presentarse a programación da vindeira edición do mercado das músicas Womex (Worldwide Music Expo), o máis importante encontro mundial de música folk e de raíz, que terá lugar na Coruña do 25 ao 29 de outubro. A música galega terá unha importante presenza nos escenarios deste encontro internacional que volve a Galicia tras os encontros de 2014 e 2016 en Santiago de Compostela. O proxecto Baiuca forma parte da selección oficial que cada ano elixe un xurado internacional, mentres que Ailá e Trilitrate actuarán no escenario Atlantic Connections, instalado no Teatro Rosalía Castro e a través do que se celebrarán os fondos vínculos culturais e históricos entre Galicia e América Latina. Ademais, a organización acaba de anunciar que Caamaño & Ameixeiras actuará xunto con Karmeto (Castela-A Mancha), Niño Josele (Andalucía) e Tarta Relena (Cataluña) no espectáculo inaugural 'Resounding Picasso: Celebrating de Master’s Journey'. Nesta Noite Inaugural, Womex súmase á conmemoración dos 50 anos do pasamento do pintor Pablo Picasso, ofrecendo unha viaxe musical pola súa vida e obra da man de catro bandas que representan os lugares que marcaron a súa infancia e xuventude.
Tanxugueiras prometen unha apoteose de fin de xira en decembro na Coruña
Xénero: | 31 / 8 / 2023
O concerto de fin de xira das Tanxugueiras preséntase como a apoteose final dunha etapa moi especial, a que comezou cun éxito cargado de polémica e seguiu co recoñecemento e achegamento masivos dentro e fóra de Galicia á música de raíz representada nestas tres mulleres. O trío, que neste período de dous intensos anos sacou o seu disco "Diluvio"e ofreceu máis de 110 actuacións por toda a Península despídese por todo o alto del e pecha a denominada Xira Midas con O DERRADEIRO DILUVIO, un concerto especial que terá lugar o sábado 16 de decembro no recinto Coliseum da Coruña. As entradas estarán á venda ao público xeral o venres 1 de setembro ás 11:00h a través da web oficial de Tanxugueiras.
O festival WOS anuncia o seu cartel con dúas estreas mundiais
Xénero: | 25 / 8 / 2023
Dúas estreas mundiais e dezasete a nivel estatal destacan na presentación do programa do VII WOS Festival x SON Estrella Galicia, que celebra a súa nova edición en Compostela entre os vindeiros 14 e 17 de setembro. Unha trintena de espectáculos de arte sonora a cargo de formacións dunha quincena de países compoñen un programa no que se entrecruza "a música de vangarda máis evocadora cos sons de baile do presente-futuro".
O festival Agrocuir da Ulloa decrece na súa VIII edición
Xénero: | 23 / 8 / 2023
"Unha festa máis pequena, máis sinxela e con máis lugar para atoparse". Así presenta a organización do Festival Agrocuir da Ulloa a oitava edición deste evento, que se desenvolve entre os días 25 e 26 de agosto na vila de Monterroso. A sede da Deputación de Lugo acollía estes 22 de agosto a presentación da iniciativa, que conta co apoio económico desta entidade provincial.
Falece Eladio Quevedo, histórico director da Coral de Ruada
Xénero: | 23 / 8 / 2023
Eladio Quevedo, que foi presidente da Coral de Ruada de Ourense entre 2002 e 2015, falecía este 22 de agosto aos 82 anos idade. Quevedo estivo implicado desde a súa infancia nesta histórica formación a tocar diferentes instrumentos e desempeñar distintos postos na súa directiva ata ocupar a presidencia.