CORREO
RSS
Ti estás aquí > Inicio / música en galego
Música en galego
Unhas conferencias poñen de manifesto o papel do galego na música
Xénero: | 5 / 12 / 2011
As cantigas tradicionais galegas son, en palabras de Anxo Lourenzo, secretario xeral de Política Lingüística, “un tesouro musical, pero tamén lingüístico, polos innumerables exemplos de galego de calidade que conteñen”. E este enfoque histórico e lingüístico é o que teñen as conferencias “A música na memoria” que se desenvolverán na sede do Conservatorio Profesional de Música de Santiago nas vindeiras semanas. Son tres cita a cargo de profesionais de gran relevancia no estudo da tradición musical de Galicia: Dorothé Schubart, Javier Jurado e Miguel López Fariña que falarán de cantigas, música de banda e a vida musical de Santiago a finais de século. Un enfoque musical para dar conta da situación do idioma nese contexto.
Leilía pura
Xénero: | 5 / 12 / 2011
Xa está nas rúas o agardado novo disco de Leilía. Logo de seis anos de silencio o grupo de pandeireteiras volta con Consentimento (Fol Música), un álbum no que continúan a recuperación de melodías tradicionais que lles caracteriza pero no que a música queda máis espida que en anteriores traballos. O pasado xoves 1 de decembro presentaban o traballo na sede do Consello da Cultura Galega en Compostela e facíano cun pequeno recital que agora che presentamos.
Anxo Lorenzo Trío leva o premio do público no Folkherbst Festival
Xénero: | 2 / 12 / 2011
O público do Folkherbst Festival que se celebrou a finais do pasado mes de outubro en Alemaña, escolleu os galegos Anxo Lorenzo Trío como mellor grupo da última edición. O grupo deste gaiteiro actuou no evento o pasado 29 de outubro, conseguindo unha grande aceptación dos afeccionados no que é a principal cita de música folk en Alemaña. Nas votacións, os galegos impuxéronse á formación irlandesa Nua Caladh e aos checos Bezobratri. No próximo mes de xaneiro a banda voltará a este país para recibir o premio e ofertar un novo concerto en Plauen. O premio do xurado do festival foi para premio do xurado foi para os franceses Pad Prapad.
César Morán canta a Cunqueiro en Haberá primavera
Xénero: | 23 / 11 / 2011
Haberá Primavera. Catorce poemas, catorce cancións é o título da última gravación de César Morán. Un libro-disco no que o músico canta catorce poemas de Álvaro Cunqueiro e un tema propio con colaboracións como a de Uxía Senlle. O lanzamento, ademais, inclúe un segundo CD no que se pode escoitar a última entrevista que concedeu Cunqueiro en vida ao propio Morán. A obra, cun carácter fondamente intimista, achega guitarra, frauta traveseira, saxo alto, contrabaixo e a percusión. A obra inclúe un libro de 56 páxinas e sae á venda cun prezo de 29 euros.
Nordestin@s despídese cun concerto en Santiago
Xénero: | 21 / 11 / 2011 + VIDEO
Cinco anos despois de asistir ao seu Nacemento, o Teatro Principal de Santiago verá a despedida do proxecto musical Nordestin@s. Guadi Galego, Ugia Pedreira e Abe Rábade subirán o vindeiro 19 de decembro por última vez a un escenario no marco deste proxecto, que conseguiu un amplo respaldo da crítica e do público desde o lanzamento do seu disco homónimo. A cita será ás 21 horas e as entradas están á venda no servizo de Novagaliciabanco.
Vaamonde, Lamas e Romero presentan O tambor de prata
Xénero: | 18 / 11 / 2011
O tambor de prata. Aventuras e desventuras de Os Trintas de Trives é o título do segundo álbum que lanza o trio Vaamonde, Lamas & Romero da man de Do Fol. O proxecto comprende un CD con temas inspirador polo grupo dos Trintas, que desenvolveron a súa actividade musical a comezos do século XX, así como un DVD cunha actuación ao vivo de Suso Vaamonde, Pedro Lamas e Xosé Lois Romero canda a Banda Sinfónica da Coruña no Pazo da Ópera desta cidade. O vindeiro 4 de decembro o grupo fará un miniconcerto no marco do Culturgal en Pontevedra, e o 13 do mesmo mes será a presentación oficial no Salón Teatro de Santiago.
Unha vida en clave de folk
Xénero: | 14 / 11 / 2011
O pulso da terra é o título da biografía que do coñecido grupo folk Berrogüetto acaba de editar Galaxia. Para alén dun libro que repasa, da man de Fernando Neira, os quince anos de traxectoria do conxunto, a obra inclúe un CD e un DVD que recollen o concerto que deu a banda en Compostela o pasado mes de novembro de 2010.
Os Cempés reúnen en tempo récord 5.000 euros para o seu vindeiro disco
Xénero: | 8 / 11 / 2011
En só catro días desde que comezou a recadación de achegas para que Os Cempés graven o seu novo disco, o grupo colleitou xa 5.420 dos 5.500 euros que precisan. En total foron 122 os doadores que fixeron ata o momento a súa contribución ao proxecto a través do web Verkami, especializado no financiamento de proxectos mediante este sistema.
Un vento que zoa na música galega
Xénero: | 2 / 11 / 2011
Hoxe pola mañá o Consello da Cultura Galega presentou Vento que zoa, un web que servirá de base para as iniciativas de difusión da música galega entre todos os públicos. Segundo afirman Maximino Zumalave e Sergio Sieiro, este será o punto de partida a partir do cal a Sección de Música do CCG quere levar o coñecemento da música clásica galega a públicos moi amplos, a partir de Internet. Nestes momentos, Vento que zoa permite escoitar e ver o traballo de seis compositores galegos clásicos, consagrados e emerxentes. Un novo xeito de coñecer a música do país.
Najla Shami e Héctor Lorenzo lanzan Haikus
Xénero: | 2 / 11 / 2011
Lobalú é o nome do proxecto da cantante Najla Shami e mais o guitarrista Héctor Lorenzo. Os dous músicos presentan hoxe Haikus, o seu primeiro disco, cun concerto ás 21 horas no Salón Teatro de Compostela, no marco do ciclo ST Música Presente. Influencias de música galega, brasileira e jazz mestúranse nunha iniciativa que percorre as estacións do ano con tres temas para cada unha delas. O proxecto, que sae baixo o selo Inquedanzas Sonoras, conta con colaboracións coma as de Guillerme Fernández, Quim Farinha ou Sérgio Tannus entre outros. Parte do disco está dispoñible no MySpace do grupo e pódese escoitar íntegro en Spotify.