CORREO
RSS
Ti estás aquí > Inicio / música en galego
Música en galego
O Plan Cultural de Pontevedra apoiará a 1.100 agrupacións
Xénero: | 13 / 3 / 2012
A Deputación de Pontevedra resolveu recentemente a convocatoria do seu Plan Cultural, polo que apoiará con máis dun millón de euros actuacións musicais e escénicas por toda a provincia. O programa afectará a 1.100 agrupacións, que a entidade estima que comprenden máis de 30.000 persoas. Un total de 168 corais, 127 grupos folclóricos, 120 grupos de gaitas, 108 de pandeireteiras, 104 de teatro e 79 kbandas de músicas son algúns dos beneficiados das axudas, que tamén chegan a grupos de rock, poetas, cantautores ou humoristas. Os cachés dos seleccionados oscilarán entre os 170 e os 600 euros por actuación.
O canto agochado entre pipotes
Xénero: | 12 / 3 / 2012
¿Quen dixo que as tabernas de toda a vida están condenadas á desaparición? Nos últimos anos multiplícanse as iniciativas para lles dar nova a vida da man da música. Os cantos tabernarios resoan por todos os recantos do país cada vez con máis forza. Pontevedra é a última en se sumar á iniciativa, da man de Maravallada, cun ciclo dedicado a esta forma da nosa tradición. Os que se queiran iniciar, téñeno ven sinxelo, xa está dispoñible na rede un Repertorio Tabernario cos ghits que mais soan onda os pipotes.
Sumrrá celebra o seu aniversario cunha xira
Xénero: | 9 / 3 / 2012
Hoxe mesmo arrinca en Vigo a xira galega coa que o trío de jazz Sumrrá celebra os seus doce anos de traballo. Manuel Gutiérrez, Xacobe Martínez Antelo e LAR Legido realizaron neste período catro lanzamentos discográficos e milleiros de concertos a nivel internacional. A intención do grupo é percorre Galicia ao longo deste ano nunha serie de recitais cos que queren agradecer aos seus seguidores o apoio recibido neste tempo.
Con Fado com outro acento María do Ceo presenta o seu disco máis portugués
Xénero: | 8 / 3 / 2012
Cunha longa traxectoria artística ás súas costas a cantante ourensá de orixe portuguesa María do Ceo presenta hoxe o seu novo disco Fado com outro acento (Zouma, 2012) gravado en Lisboa. Un disco totalmente de Fado, cantado en portugués, no que a artista mergúllase nas súas raíces a través de trece fados a maioría deles tradicionais e dous deles compostos para o disco polo seu compositor habitual, Armando González: A menina das calças pardas e Cántame un fado minhoto. Un disco no que María canta a Luis de Camoes, Amalia Rodrigues, Vasco Macedo, Arlindo de Carvalho, Armando Gonzalvez ou Alberto Janes entre outros. Destacan interpretacións como a da canción María la portuguesa, coñecido tema de Carlos Cano, cantado nunha versión en portugués. Participaron na gravación, José Manuel Neto na guitarra portuguesa, Miguel Gonçalves coa guitarra clásica e Daniél Pinto no Baixo. O Nome do disco ven dado pola peculiaridade do acento da cantante na súa condición raiana entre o luso e o galego, condición reivindicada no tema Cántame un fado minhoto.
Dj Budiño e Mc Blanco
Xénero: | 8 / 3 / 2012
Da gaita aos pratos, Xosé Manuel Budiño muda de terzo e pásase á música electrónica. O artista de Moaña forma dúo con Carlos Blanco en iLalelo, un proxecto no que se mestura música e humor. Monólogos a ritmo de rap que fan cantar ao público e nos que se mestura o texto preparado con cuestións centradas na actualidade e vencelladas a cada lugar onde chega a actuación.
Machina lanza Ensaio sobre o silencio
Xénero: | 20 / 2 / 2012
A finais de 2011 entraban no estudio, e o pasado venres presentaban en Compostela a primeira audición pública. Machina lanza o seu segundo LP, Ensaio sobre o silencio, no que achegan trece temas cheos de forza no que mesturan os ritmos do rock e o metal alternativos, co hardcore. O volume, gravado nas instalacións de Javier Abreu coa produción de Pablo Iglesias, conta coas colaboracións de O Leo i Arremecaghona, Juan Prego, Diego Carreira, César Ríos e Nacho Goris. A estrea oficial do disco será o vindeiro 17 de marzo nun concerto en Cerceda.
Trece finalistas compiten polos Premios Opinión de música folk
Xénero: | 17 / 2 / 2012
As tres categorías dos Premios Opinión de música folk, mellor tema, mellores artistas e mellor disco, contan este ano con trece aspirantes. Os galardóns inauguran nesta XI Edición unha nova fórmula, pola que os gañadores só se coñeceran no transcurso da gala de entrega que se celebrará o vindeiro mes de maio. Malia a que estaba previsto que houbese catro finalistas por categoría, un empate nas votacións deu en que finalmente haxa cinco candidatos a mellor tema.
Iago Fernández debuta con Agromando
Xénero: | 15 / 2 / 2012
Da man de Freecode Jazzrecords chega ás tendas Agromando, primeiro disco do batería cangués Iago Fernández. O proxecto achega dez cortes de jazz contemporáneo, mesturado con diferentes influencias, dos cales sete son da autoría deste músico e outros tres versións Radiohead ou Djaván. Canda a el, participan no proxecto Demian Caboud, Xan Campos, André Fernandes, Virxilio da Silva, Zé Pedro, João Mortágua e mais Baptiste Techer. A obra gravouse e masterizouse nos Boom Studios de Vila Nova de Gaia o pasado mes de xuño
Comezan os concertos da Rede Galega de Música ao Vivo
Xénero: | 14 / 2 / 2012
O trío 3Azoteas abrirá mañá día 15 no Jazz Filloa da Coruña a programación da Rede Galega de Música ao Vivo. En total serán 226 actuacións as programadas para o primeiro semestre do ano, 58 menos que no mesmo período do 2011, e en principio son 29 as salas coas que o AGADIC ten acordo de colaboración aínda que agardan poder algunha máis ata un tope de 35. O director da Axencia Galega de Industrias Culturais, Juan Carlos F. Fasero quixo remarcar na presentación da programación o salto cualitativo experimentado polas salas en dotación técnica e instalacións segundo un estudo levado a cabo pola propia axencia. Para este semestre a Rede conta cun orzamento de 96.893 euros a repartir nun 85% a cargo de AGADIC en un 15% a cargo das salas adscritas. En total serán 69 os grupos que actuarán na Rede ademais de dous magos e dúas compañías teatrais. Na presentación, levada a cabo no Pub Ultramarinos de Santiago, Fasero estivo acompañado polo secretario xeral de Cultura Anxo Lorenzo que aproveitou para reforzar o apoio ao papel de AGADIC como “pivote fundamental da acción da Xunta no eido das industrias culturais” así como a necesidade de que o sector cultural "camiñe cara a autosuficiencia" en condicións de mercado. O representante da asociación de salas Clubtura , David Paz, quixo recalcar a importancia desta rede que "permite levar bandas e actuacións a moitas vilas pequenas do país que doutro xeito non sería posible levar".
Quiosco: Ao vivo 11
Xénero: | 2 / 2 / 2012
A Axencia Galega das Industrias Culturais acaba de publicar o Pdf do número 11 da revista Ao vivo. O lanzamento dedícalle a súa capa a Iván Ferreiro, que repasa a súa traxectoria. Canda a el, o último lanzamento de Leilía e o retorno de Os Cempés son outros contidos destacados. A revista complétase con artigos sobre Pedrito Diablo y los Cadáveras, O Neno Elliott e Magín Blanco, o pub Ultramarinos ou o acordeonista Xosé Ramón Vázquez, sen esquer un repaso de 2011, as últimas novidades discográficas ou a habitual axenda.