CORREO
RSS
Ti estás aquí > Inicio / música en galego
Música en galego
Pirilampo dálle voz aos animais no seu novo traballo
Xénero: | 12 / 6 / 2018
A procurar tirarlle a mala sona a animais como a píntega ou a serpe chega o novo traballo de Pirilampo. O grupo capitaneado por Xosé Lois Seixo está en xira de presentación de Serpe de cristal, un libro-CD publicado por Galaxia na colección Sonárbore. O golfiño, a abella, a serpe sapeira, a píntega, o tritón, o reiseñor, a bubela ou os peixes collen a palabre en once novos temas orixinais que se presentan con ilustracións de Federico Fernández. Colaboracións de Xurxo Souto, Andrea Seijo e Antía enriquecen este traballo que integra frautas, gaitas, acordeón, guitarras ou percusión.
Tanxugueiras comeza a xira de presentación do seu primeiro disco
Xénero: | 4 / 6 / 2018
A Sala Capitol de Santiago acollía onte, tres de xuño, o concerto de presentación de Tanxugueiras, o disco de debut do trío homónimo. Sabela Maneiro, Aida Tarrio e Olaia Maneiro metéronse no estudio de gravación logo de dous anos de traballo nos que se deron a coñecer a través das redes e coas súas colaboracións con músicos como Xabier Díaz ou A banda das Crechas. Agora, presentan da man de Inquedanzas Sonoras unha selección de doce temas nos que a percusión e a voz collen todo o protagonismo, con arranxos coidados que conectan a tradición con sons de alén do Atlántico.
Nastasia Zürcher volta con premio para Galicia do festival Liet Internacional
Xénero: | 29 / 5 / 2018
O festival Liet International 2018, que se desenvolveu na cidade holandesa de Leewarden o pasado 23 de maio, acabou con recoñecementos para Galicia. Esta competición musical para bandas e solistas que traballan en linguas minorizadas de europa contou nesta décimo segunda xeira coa presenza de dúas formacións galegas, a banda Familia Caamagno e mais a solista Nastasia Zürcher. Foi esta última a que conseguiu o recoñecemento no evento, quedando segunda na clasificación xeral, na que se viu superada pola banda córnica The Rowan Tree. Ademais, a cantante galega trouxo para a casa o premio dos músicos, que outorgan os propios participantes no evento. Zürcher contou co seu produtor Adrián Saavedra ao piano para interpretar o seu tema Espertos no festival.
Xardín Desordenado musica a María Victoria Moreno
Xénero: | 22 / 5 / 2018
Oito textos de María Victoria Moreno compoñen Victoria da luz, o disco que Xardín Desordenado lle dedica a autora homenaxeada no Día das Letras. Temas como Eu quixera, Díptico gramatical, Duns folios que foron brancos, Único amor ou Camiñantes cobran nova vida neste proxecto. O grupo está en plena xira de presentación do álbum, que sae baixo o selo Sul Produciones.
A Orquestra Folk Sondeseu presenta o seu quinto disco 'Beiralúa'
Xénero: | 16 / 5 / 2018
Este vindeiro sábado o Auditorio Municipal de Cangas acollerá o concerto de presentación de Beiralúa quinto disco da orquestra folk SondeSeu. En Beiralúa(Fundación Sondeseu) sobresaíntes compositores e músicos galegos, xunto con voces representativas do panorama actual se xuntan aos mestres e compoñentes da orquestra para danzar baixo a luz da lúa unha coreografía simbólica de unión en torno a un proxecto que os trouxo dende as ondas daquel inicial Mar de Vigo (Fol Música, 2003) ata o máis recente Danzas brancas (Do Fol, 2013. Deste xeito entres os dezaoito temas que ofrece este novo traballo hai pezas encargadas pola orquestra a prestixiosos compositores como Xosé Lois Romero, Quico Comesaña ou Pedro Lamas entreveranse con cancións presentes xa no imaxinario colectivo, clásicos como Ahi ven o Maio ou Campanas de Bastabales, interpretadas por grandes voces como Rosa Cedrón ou o Orfeón Treixadura e a colaboración de Susana Seivane, rematando cunha composición de Anxo Pintos para a candidatura das Illas Cíes a Patrimonio da Humanidade dedicada á Illa de San Martiño que pon de manifesto as enormes posibilidades tímbricas da formación viguesa creada hai dezasete anos no seo da actual Escola Municipal de Música Folk e Tradicional, a ETRAD, e está consolidada xa como a gran Orquestra Folk de Galicia. A seguinte presentación en directo tras cangas será en Santiago de Compostela o vindeiro 22 de xuño.
O "...mañá..." máis maduro de Carmen Rey
Xénero: | 14 / 5 / 2018
A cantora coruñesa Carmen Rey , que foi finalista este ano ao premio Martín Códax de Blues, funk e soul, está xa a presentar o seu novo disco, …mañá… (Autoeditado), un traballo que se fixo agardar oito anos despois da publicación do seu anterior disco, Meu(Audia records, 2009) precedido por Fuera(2004). Carmen ofrece neste álbum oito temas orixinais de soul e funk cantados en galego con elegantes arranxos e que nalgúns caso xogan coa improvisación jazzística e mesmo algún arranxo jazz sobre unha peza tradicional como en Porqué non hei. A cantante e compositora considera que este traballo pode diferenciarse dos seus anteriores nunha madurez propia que amosa, "considero que madurei a nivel harmónico sobre todo e melódico e iso nótase moito a diferencia dos discos anteriores", asegura Rey, que opina que o son desta xeira musical resulta "máis complexa e máis rica" que nos discos anteriores. Nestes oito anos entre discos Carmen Rey sempre estivo en actividade e crecemento profesional, compaxinando o seu proxecto persoal co traballo á fronte doutros proxectos como o de ser directora e arranxista do coro feminino de música moderna Sisters in the House (finalista dos premios Martín Códax) e do cuarteto vocal Ejazz (gañadoras do Martín Códax, 2017 na categoría de coros e música vocal). O disco gravouse nos estudios Disquesí da Coruña cun grupo composto por Sergio Delgado, aos teclados, Rubén Appratto no baixo, a guitarra de Tito Calviño e Miguel Cabana na batería. Para o directo presenta tamén un formato en acústico, piano e voz, acompañada aos coros de Angeles Dorrio e Sara Lorenzo.
Lucía Pérez sopra soles polos seus quince anos de carreira con 'Quince soles'
Xénero: | 11 / 5 / 2018
Lucía Pérez presenta hoxe o seu novo disco coincidindo en vésperas coa celebración do festival Eurovisión no que ela participou en 2011. A artista do Incio saca hoxe o seu sétimo traballo Quince soles (Autoeditado) un traballo con quince temas para celebrar quince anos no mundo da música no que estes "soles" tomán o relevo das tradicionais candeas de aniversario. Pérez tira de axenda neste disco e conta con numerosas e importantes colaboracións para desenvolver este álbum no que todas as cancións cántanse en galego, incluso a as que comparte con artistas non galegos como Chenoa ou Chema Purón. Tonhito de Poi, Susana Seivane, Emilio Rúa, Rosa Cedrón, Sito Sedes, Xabier Díaz e Vizcaíno súmanse a esta celebración musical poñendo tamén as súas voces en diferentes temas. O repertorio tradicional, arranxado, ten un importante peso pero tamén hai composicións de Purón, Tonhito de Poi, Uxía Senlle ou, como no caso de Moraima, interpretada con Sito Sedes, é un tema composto por Jesús Vaamonde e Miguel Ángel Campos sobre un poema de Celso Emilio Ferreiro. Estes Quince soles, que tamén presentan unha rica variedade tonal, configuran una celebración moi especial da artista na que como sempre achega unha visión positiva e amorosa cara á súa terra e orixes e ademais amosando a súa calidade artística e sensibilidade. O lanzamento hoxe do disco acompáñase da presentación do primeiro videoclip e sinxelo Tocando enfrente. O disco xa está en plataformas como Spotify.
Luar na Lubre presenta o seu novo disco 'Ribeira Sacra'
Xénero: | 9 / 5 / 2018
Luar na Lubre presentou o seu novo traballo musical como a "banda sonora" da Ribeira Sacra, unha produción na que colabora a Deputación de Ourense e que foi gravada o outono pasado no mosteiro de San Pedro de Rocas (Esgos), conxugando natureza, tradición e etnografía, e incorporando por primeira vez nunha composición musical o idioma do afiador, o barallete.
Anxo Moure e Servando Barreiro cantan a cultura fluvial en 'A música da Auga'
Xénero: | 30 / 4 / 2018
A través da editorial de Contos Solidarios 2Teixos, o contacontos Anxo Moure, xunto con Servando Barreiro, presentan o libro-cd A Música da auga. Un volume que serve para a recuperación da cultura tradicional xurdidas das beiras fluviais e dos cauces e fontes. Contos que se cantan e cantares que se contan arredor do propio ciclo natural da auga e das súas mitoloxías nestes 11 cortes do disco-libro de Barreiro e Moure para o que contaron coa colaboración de músicos como Rubén Pastoriza ou Marce Villaverde. O libro disco está ilustrado con acuarelas do propio Servando Barreiro e como proxecto comezou a xestarse fai quince anos nunha actividade da asociación Barcas do Minho chamada Embarcaescola coa que se foi visitando todos os centros escolares dos concellos galegos da beira do Miño divulgando o patrimonio cultural e ambiental do río. O libro-disco comeza cunha cantiga do espertar da auga no pedregal de Irimia e a través dos seus temas coñeceremos as figuras das xacias (mulleres peixe), barqueiros, cesteiros, etc. Contos da chuvia e das fontes que divulgan a riqueza dos ecosistemas fluviais e marítimos e propoñen hábitos para o seu coidado. A Música da Auga se está a presentar nestes dias en centros educativos e festivais de música como o "Plis plas" que se celebrará o 12 e 13 de maio na cidade de Vigo.
Pontevedra acolle o festival de música en galego Galegote Rock
Xénero: | 27 / 4 / 2018
Xa está en marcha en Pontevedra unha nova edición do Galegote Rock, o festival de bandas en lingua galega. A Sala Karma acollía onte as primeiras actuacións do programa que terá o seu punto álxido estre sábado nunha carpa situada na Praza da Pedreira con entrada libre. Oito banda e dúas sesións de Dj encherán o sábado de música en galego desde as 12:30 do mediodía. Hoxe será a formación Monoulious DOP a que actuará no Pub El Pequeño da Sala Karma, para mañá o programa o abrirá SonDaRúa e inclúe os concertos de Cinta Adhesiva; Espiño; Esposa; Ataque Escampe; Os Amigos dos Músicos; Dakidarría; The Lelly Kelly’s e as sesións de Sr. Fiuza e Manuele Tremendo Caamagno.
novidades discográficas
O Noso Tempo
Hugo Guezeta
Cāldo
Catuxa Salom
Vertentes
Garza
Obra social
ORTIGA
Barullo
Baiuca