CORREO
RSS
Noticias
O Galegote volve aos bares e inclúe artistas portugueses
Xénero: | 9 / 4 / 2024
O 27 de abril terá lugar unha nova edición do Galegote (anteriormente Galegote Rock) en Pontevedra, o festival que reúne unha selección da ampla oferta da escena musical en lingua galega. A cita, promovida polo Servizo de Normalización Lingüística do Concello de Pontevedra, presenta algunhas novidades nesta edición número 12, ademais da simplificación do seu nome. Unha das novidades máis importante é o feito de que recupera os bares como escenarios principais e ofrecerá neles 14 actuacións repartidas durante o día nos seguintes establecementos: O Diaño, Tabula Rasa, Nasa, La Hormiga, La Pomada, O Grifón, O’Panderetas, La Verbena, Chirala, The Groove House e Sopa de Gallo. Outra da novidades é á incorporación de música do veciño portugal, na súa lingua propia. Así o cartel do festival, que non renuncia ao xénero do rock aínda que é máis amplo, agrupa bandas galegas con traxectoria, voces emerxentes e representación local, con nomes coma Moura, Lacón sen Jrelos, Ataque Escampe, Caldo, Hydn ou Zeltia Irevire, ente outros, e inclúe ademais dúas presenzas lusas: Duques do Precariado e compositora Érika Machado. Entre todos conforman o programa desta xornada festiva e musical, que contará tamén con programación infantil, da man de Cora Velasco e Sandra Asín. Todas as actuacións teñen entrada libre e de balde.
Nova edición do Ciclo de Música Relixiosa de Barcia de Mera
Xénero: | 8 / 4 / 2024
A igrexa barroca de San Martiño de Barcia de Mera, pertencente ao conxunto que coa reitoral foi declarado o pasado ano Ben de Interese Cultural (BIC) acollerá unha nova edición, a número XVI do Ciclo de Música Relixiosa de Barcia de Mera. O programadesenvolverase do 27 de abril ao 14 de setembro cun total de oito concertos que se celebrarán dentro desta singular igrexa situada no rural do concello pontevedrés de Covelo dinamizando o lugar, próximo a Mondariz. O primeiro concerto correrá a cargo de Vox Stellae. O 25 de maio será a quenda do grupo Ars Longa, mentres que o 15 de xuño de Ensemble Orphelion. En xullo, a primeira das citas será o día 6 da man de Judith Jauregui e o día 20 actuarán Beatriz Díaz, Jose Luis Bieito, Camilo García e Maife Gil. Xa en agosto, con dúas citas, encherán de música a Igrexa de San Martiño de Barcia de Mera o Grupo Fua o día 15 e Cancellos o día 31. O concerto de clausura desta XVI edición do ciclo será o 14 de setembro con Camerata OSG. Todos os concertos están programados para as 20,00 horas.
Triángulo de Amor Bizarro celebra vinte anos nunha xira cun repertorio decidido ao azar
Xénero: | 5 / 4 / 2024
A coñecida banda Triángulo de Amor Bizarro está de actualidade por dous motivos: celebra este ano o vinte aniversario desde a súa formación e un dos integrantes do grupo, o teclista e guitarra Zippo, deixa o proxecto por iniciativa propia tras trece anos. Lamentando a súa saída o grupo segue adiante cos seus plans e xa como trío, formación que xa tiveron nalgún momento da súa traxectoria, veñen de presentar a xira de concertos coa que celebraran a súa efeméride, uns eventos que terán algo moi especial xa que o repertorio a interpretar en cada concerto de entre a súa discografía dependerá do azar.
Boyanka Kostova propoñen unha 'Foliada no Inferno'
Xénero: | 4 / 4 / 2024
Os Boyanka Kostova (Chicho e Cibrán) xa teñen desde hoxe o seu propio álbum de referencia infernal como todos os grupos de culto desde finais dos anos setenta. 'Foliada no Inferno' (Ernie records, 2024) é o sexto disco longo deste dúo que é bandeira do novo rap en galego. O disco preséntase como "un tratado de 'escarnio e maldizer'", nel, O Chicho do Funk (Ortiga) e Cibrán García maldín todos os males do seu tempo: as relacións sociais, as drogas, o desamor... Pero isto sempre dende o escarnio, mantendo o seu característico toque de humor retranqueiro nas súas letras. Fai menos dun ano que publicaban o seu anterior LP ' Os meus peidos cheiran a pétalos perfumados? (Ernie Records, 2023) co que aínda poden gañar nuns días o Premio Min a Mellor Álbum en Galego e agora suman esta referencia, afastada no son da anterior, cun resultado moito máis ecléctico e nun traballo máis longo (11 temas fronte aos 10 do anterior) e que xa desde a portada representa unha antítese co do ano pasado.
Mundo Prestigio presenta o froito da súa 'Eterna Constanza'
Xénero: | 1 / 4 / 2024
'Ruada' é título do tema co que Mundo Prestigio abre o que é o seu primeiro traballo longo 'Eterna Constanza' (Ernie Records, 2024). Para este tema en concreto a banda conta coa colaboración doutro dos artistas da discográfica, Carlangas. Xustamente esta formación, baixo o nome de Los Cubatas son os que acompañan en xira ao ex-Novedades Carminha. Mundo Prestigio está integrado por Ju, Brais, Fiz e Fer, en 'Eterna Constanza' preséntanse con 13 cancións, pasaxes a modo de interludio e colaboracións con seis dos seus artistas favoritos do panorama musical nacional, ademais de Carlangas conforman esta lista Antía Van Weill, Kimberley Tell, Kiliki Frexko (de Chill Mafia), Erik Urano e Cibrán (Boyanka Kostova), que é practicamente un quinto membro do clan. Para a produción do disco a banda contou coa experta man do coñecido Hevi, unha figura esencial para entender o panorama da música actual en galego. O disco presenta un compendio estilístico variado e un equilibrio entre temas instrumentais, moi ambientais nun senso chill out e outros cantados grazas maiormente á colaboracións.
Coñécense os proxectos seleccionados para as Residencias Artísticas Mariñán
Xénero: | 27 / 3 / 2024
A Deputación da Coruña daba a coñecer este 26 de marzo a resolución da segunda xeira das Residencias Artísticas Mariñán de Literatura e Pensamento. Carmen Marina Vidal Valiña protagonizará a residencia de pensamento mentres Francisco Rodríguez Casal, Esperanza Mariño Davila e Laura Martínez Mateo foron escolleitos para as literarias.
Cemento Musgo debuta cun visuálbum pioneiro
Xénero: | 25 / 3 / 2024
Once cancións acompañadas doutros tantos vídeos compoñen o visuálbum co que se presenta Cemento Musgo. Neste formato pioneiro no noso país combínanse as artes de Sokram, voz de Dios ke te Crew, ilustrador e muralista, do produtor parisino Coio, que corre coa parte musical do proxecto, e mais do artista visual A.L. Crego, pioneiro do gif art, que achega o aspecto gráfico. O álbum foi gravado, mesturado e masterizado por Møu, de Dios ke te Crew, en Rapapoulo Estudio.
Tanxugueiras e Fillas de Cassandra finalistas en catro categorías dos Premios MIN
Xénero: | 21 / 3 / 2024
Pasadas as fases de votación do público e do xurado profesional os XVI Premios Min da música independente española presentaron onte a lista de finalistas de cada categoría, xa con vistas a resolverse o vindeiro 17 de abril na gala de entrega de galardóns. Cinco proxectos musicais compoñen esta lista final de cada premio e ata doce nomes proveñen da escena musical galega. No caso do premio ao Mellor Álbum en Galego os candidatos que poden levar o premio deste ano son Grande Amore, por II (Ernie Records); Fillas de Cassandra, por Acrópole (Tremendo Audiovisual); Caamaño & Ameixeiras, por 'Quitar o aire' (Raso estudios); Ortiga, por 'Ortiga e Pili Pampín' (Ernie Records) e Boyanka Kostova, por ' Os meus peidos cheiran a pétalos perfumados' (Ernie Records). A categoría está claramente dominada por apostas que transitan entre a música urbana e a tradicional, con tres referencias da discográfica Ernie records e unha duplicidade por parte de 'Chicho do funk', presente a través do seu proxecto Ortiga e tamén como metade do dúo Boyanka Kostova. Ademais diso, esta é unha das dúas categorías onde compiten entre si Fillas de Cassandra e Caaamaño & Ameixeiras, que tamén son finalistas a Mellor Álbum de Música de Raíz. En concreto, o proxecto de Fillas de Cassandra xunto co das Tanxugueiras, son as representacións da escena galega máis presentes nestas candidaturas finalistas dos Premios MIN, aspirando a levara ata catro galardóns.
Costas e Soto recuperan o repertorio de Siniestro Total para os directos
Xénero: | 19 / 3 / 2024
A piques de cumprir dous anos do que foi o derradeiro concerto de Siniestro Total, celebrado no Wizink Center de Madrid o repertorio dos 40 anos de actividade da banda xa ten continuidade sobre os escenarios e ademais con autenticidade absoluta. Será o vindeiro 30 de abril cando debute en directo a formación Hey Hematoma, unha banda que vai máis alá do tributo, xa que son algúns dos membros fundadores de Siniestro Total os que a conforman. En concreto son Javier Soto e Miguel Costas os que abandeiran este proxecto musical sobre o repertorio da banda. Os dous formaron parte do grupo inicial, se ben Costas deixouna en 1994, pero Soto seguiu ata o final nela. Acompáñalles nesta aventura Andrés Cunha, o que foi o último batería que pasou por Siniestro desde 2018, xunta eles completan a formación Alberto Cunha e Chus Dasilva. O legado da banda que foi recoñecida cunha Medalla Castelao en 2023 terá lexítima continuidade así, canda menos sobre os escenarios.
Tres festivais galegos son os mellores da península nas súas categorías
Xénero: | 18 / 3 / 2024
O mellor Festival de Pequeño tamaño da península ibérica no ano 2023 foi o 17° Ribeira Sacra e o mellor dos celebrados nun recinto interior foi o Underfest SON Estrella Galicia, de Vigo. Ademais diso o Festival O Son do Camiño de 2023 foi recoñecido polo xurado profesional da oitava edición dos Iberian festival Awards como aquel cuxa organización dá aos artistas a mellor acollida e recepción. A gala final de entrega destes galardóns deixou un palmarés no que están presentes catro eventos galegos entre premios absolutos a nivel peninsular e aqueles que se conceden a niveis estatais. Entre este últimos volve estar o festival do Monte do Gozo, O Son do camino, polo traballo de cobertura audiovisual feito pola promotora Esmerarte nesta edición, que destaca así entro resto de festivais españoles. Tamén a edición de 2023 de o festival SonRías Baixas de Bueu, acadou un galardón estatal pola súa capacidade promoción turística. Ao final, dos oito festivas galegos que optaban a premio na fase de finalistas foron a metade os que consequiron algún dos dezaseis galardóns aos que optaban.