CORREO
RSS
Noticias
O Monte do gozo reunirá ata 5.000 persoas no ciclo O Son do Camiño - Perséidas
Xénero: | 4 / 6 / 2021
Cos seus formatos "tranquilos", sen acumulación de concertos e con programas expandidos durante días e cheos de nomes galegos e da escena estatal con poucas presenzas internacionais, os eventos musicais ao aire libre seguen dando un paso adiante para non deixar o verán en baleiro musical. O anuncio do programa do ciclo O Son do Camiño -Perseidas que se celebrará no Monte do Gozo entre o 14 de xullo e o 8 de agostocompleméntase coas máis recentes novidades en festivais que veñen de engadirse á axenda estival. Xunto cos que adiantamos xa anteriormente van facéndose marcas no calendario vestindo de citas este verán aínda pandémico.
Pauliña re-volta co seu terceiro disco 'Testemuñas'
Xénero: | 2 / 6 / 2021
Pouco máis de tres anos despois da presentación do seu primeiro traballo longo De-xeneración( Xonix records, 2018) o nome de Pauliña xa é un elemento de primeira orde na música en galego. A de Cambados ven de presentar fai uns días en concerto o que xa é o seu terceiro álbum Testemuñas, con apenas un ano de separación do anterior A Malfalada(2020), todos eles publicados baixo o selo Xonix records, de Bandeira (Silleda). O novo disco é unha nova mostra da versatilidade de Paula Chaves para transitar por diversos rexistros sonoros que van de novo desde o ská ata o rock, o swing ou eses blues electrizantes nos que se lle ve tan cómoda como ese Remordementos cuxo vídeo, asinado por Xaime Miranda servíu de presentación do novo disco.
Bala presentan o seu novo álbum 'Maleza'
Xénero: | 31 / 5 / 2021
Case cinco anos separan este Maleza (Century Media Records, 2021) do segundo traballo de Violeta Mosquera (batería e voces) e Anxela Baltar (guitarra e voces) naquel auténtico bombazo recoñecido pola crítica que foi Lume(Matapadre, 2017). Nada perderon e moito gañaron as Bala neste tempo. Polo pronto o apoio dun selo internacional como o alemán Century Media, especializado na música Metal e con artistas coma Angelus Apatrida ou Arch Enemy no seu catálogo. Gañan tamén engadindo o galego ao seu repertorio de letras, con ese magnífico Rituais, do que xa sacaron vídeo de presentación. Ademais gañan cun nivel de produción sonora de enorme calidade e cheo de detalles que fan dos nove temas de Maleza unha experiencia de viaxe ao máis escuro recuncho do corazón da besta desde ese trmendo Agitar de apertura.
A Programación Lírica da Coruña homenaxeará á soprano Ofelia Nieto
Xénero: | 31 / 5 / 2021
A programación lírica da Asociación de Amigos de la Ópera da Coruña renderá homenaxe á soprano de orixes galegas e enda en Santiago Ofelia Nieto (1900-1931) coa produción da ópera Payasos, de Ruggero Leoncavallo. Así, o Teatro Colón acollerá os días 24 e 26 de setembro esta ópera, baixo a dirección de Fernando Briones. Na produción participa o Teatro Lírico Nacional La Zarzuela de Madrid e mais a Orquestra e Coro Gaos, cos barítonos Juan Jesús Rodríguez e Gerardo Bullón, os tenores Alejandro Roy e Pablo Carballido, e a soprano Vanessa Goikoetxea nos roles principais. A escolla deste título é unha homenaxe á soprano de orixe santiaguesa Ofelia Nieto, cando se cumpre un século desde que a cantante a interpretara no Teatro Real de Madrid.
A Banda de Música de Santiago achega os instrumentos tradicionais ao ensino
Xénero: | 28 / 5 / 2021
Achegar aos centros de ensino os instrumentos musicais da tradición galega e explorar as súas posibilidades. Este é o obxectivo do proxecto Os nosos instrumentos hoxe, que presenta a Banda de Música de Santiago de Compostela da man do Concello. A iniciativa consiste nun concerto no que a formación, a empregar dezasete aparellos como o acordeón, o asubío, a castañeta, o charrasco, a gaita, a ocarina, a pandeira ou a zanfona, interpreta once pezas entre cantigas populares e composicións clásicas de autores coma Wagner, Bizet ou Rossini.
Lingua para ver coas orellas abertas
Xénero: | 27 / 5 / 2021
Son as oito da tarde do 25 de maio e nun recuncho da Praza de Ourense de Pontevedra, fronte aos xardíns de Casto Sampedro, vaise reunindo un grupiño de xente. Alí, diante da montaxe en letras que nos deixa claro cal e a cidade na que estamos, érguense cinco columnas cheas de nomes, imaxes e cores. É a exposición "CantáMOLA en galego" que repasa os últimos 20 anos da creación musical no noso idioma e este grupo de xente está aquí para atender á segunda das visitas guiadas previstas no programa deste proxecto que leva aquí todo o mes de maio e que xa despedirá deste lugar o vindeiro luns tras coincidir nesta fin de semana xustamente coa festival galegote Rock que reunirá na cidade ata 15 propostas musicais co nexo común do idioma galego, o mesmo que actúa de liña de continuidade nestes catorce paneis preparados polo crítico musical Pepe Cunha e a xornalista Teresa Cuíñas, que hoxe actúan de anfitrións e guías por esta historia que non por ser recente deixa de ser unha historia que hai que contar. Ademais, como pon por escrito Cuíñas nun dos paneis: "Se estás aquí seguro que é porque as cancións son importantes para ti e porque a banda sonora da túa vida é un dos teus tesouros".
As Xornadas de Música Contemporánea celébranse co lema Invisibles e sonoras
Xénero: | 27 / 5 / 2021
Concello, Deputación da Coruña, Universidade de Santiago e Centro Galego de Arte Contemporánea organizan a nova edición das Xornadas de Música Contemporánea. A capital galega acolle entre os vindeiros 1 e 29 de xuño un programa composto case ao completo por mulleres, baixo o lema Invisibles e sonoras. En total serán nove concertos que comprenden tres estreas absolutas e unha a nivel estatal.
Risco máximo de desaparición para as salas de música e os seus 6000 concertos
Xénero: | 26 / 5 / 2021
O informe Estudio sobre as salas de concertos na provincia de A Coruña , levado a cabo pola asociación de salas de concertos Clubtura co financiamento da Deputación da Coruña, presentouse esta mañá da man de Xurxo Couto, Deputado de Cultura, Alberto Grandío, Presidente de Clubtura, e Tomás Legido, Secretario da entidade, que foi o encargado de desgranar os datos recollidos nun documento que, segundo explicaba o propio Alberto Grandío, "busca facerlles ver ás diversas administracións que colaborar a creación e mantemento de salas de concertos nas súas localidades é un investimento en cultura e en cohesión social de grande impacto de cada euro público que se aporte". O documento deixa clara a relevancia das salas privadas de concertos dentro do impulso cultural: "preto de 6000 concertos celebrados en 2019 en todas as salas galegas, uns 5000 deles en salas socias de Clubtura. Esa actividade cultural está en risco", explica Tomás Legido, que recalca que "o estudo pon de manifesto os múltiples efectos beneficiosos que ten a existencia de salas de concertos no aspecto cultural, turístico, social e económico para unha localidade".
Triángulo de Amor Bizarro encabeza a presenza galega nos Premios MIN
Xénero: | 26 / 5 / 2021
Os Premios MIN 2021, principais galardóns da música independente a nivel estatal, daban a coñecer na mañá deste 26 de maio os nomes das propostas que competirán na final das vinte categorías en que se organizan. Da escena sonora galega destacan entre os finalistas as catro candidaturas que acumula Triángulo de Amor Bizarro. O grupo de Boiro opta a se facer cos recoñecementos a Mellor Artista do ano, así como aos de Mellor Produción, Álbum do ano e Mellor Álbum de Rock polo seu oɹɹɐzıqɹoɯɐǝpolnƃuɐıɹʇ.
Tonhito de Poi reivindica a súa personalidade salvaxe en 'In-dios'
Xénero: | 26 / 5 / 2021
Tonhito de Poi (Castiñeiras, 1969) volve sacar inspiración musical das súas experiencias selváticas e ven de presentar o seu terceiro traballo en solitario: In-dios (Autoeditado, 2021). Se das anteriores dúas viaxes a Amazonía xurdiron os traballos O soro da verdade(2013) e Non hai onde esconderse (2019) o ribeirán volveu ás selvas do Amazonas fai dous anos e trouxo unha reivindicación de si mesmo coma parte da comunidade india mundial que desemboca nos temas que foron gravados en estudio para este novo álbum. In- dios xa está dispoñible nas plataformas dixitais.