CORREO
RSS
Noticias
A Fundación Barrié inclúe a súa sede de Vigo no programa do seu undécimo Ciclo de Jazz
Xénero: | 4 / 4 / 2006
O Ciclo de Jazz reunirá durante o mes de abril unha variada representación de figuras do jazz internacional. A apertura do ciclo comezou o sábado na Coruña coa proxección da película francesa “Swing” á que seguiu o domingo o Festival Gypsy Jazz Manouche co cuarteto de Tchavolo Schmitt. Por primeira vez a Fundación programará na súa sede de Vigo tres concertos, dun caracter máis intimista que os que propón para a Coruña, onde figuras emerxentes na escena mundial compartirán cartel con músicos consagrados, ademais dunha Jam Session na que tomarán parte músicos galegos. En Vigo actuarán entre outros o Benny Green Trío ou o Ronnie Mathews Trío e a representación galega na “jam session” programada para o día 20 estará integrada por Manu Gómez, Roberto Somoza, Carlos López, Pablo Seoane, Alfonso Morán e Javier Pereiro. Na Coruña están previstos os concertos do cuartetos de Eliane Elías e de Jim Hall, ademais da actuación de Gary Burton & Makoto Ozone. Todos os concertos son de balde previa retirada da invitación.
Máis información na Fundación Pedro Barrié de La Maza
O camiño de Santiago centra o certame que substitúe ao Festival Internacional de Música de Galicia
Xénero: | 30 / 3 / 2006
Os cambios no Xacobeo: de xerente, de orientación e de colocación dentro do organigrama da Xunta (agora depende da Dirección Xeral de Turismo) comezan a traducirse na programación. O primeiro dos cambios é que o Festival Internacional de Música de Galicia deixa paso a outro certame, tamén musical, que contará con 30 concertos que teñen ao Camiño de Santiago como razón de ser. Ademais, segundo publica hoxe "La Voz de Galicia", o novo evento terá un orzamento sensiblemente inferior ao vello, pasando dos tres millóns aos 900.000 euros, sen que iso supoña unha diminución notoria do seu nivel.
Máis información en La Voz de Galicia
Agafono preséntase como a primeira asociación que reúne empresas discográficas galegas
Xénero: | 29 / 3 / 2006
A tan discutida crise da industria discográfica tamén afecta a Galicia. E aínda que desta volta non é tanto a pirataría coma o pouco mercado, as discográficas do noso país tamén deben axeitarse aos novos tempos. Catro delas están a piques de presentar Agafono, a Asociación Galega de Fonografistas, que quere converterse nun referente do sector.
A Cova Folk da Coruña pechou despois de catorce anos de actividade musical e hosteleira
Xénero: | 23 / 3 / 2006
Un dos locais destacados dentro do panorama da música folk en Galicia, A Cova Folk, pechou no pasado día de San Patricio as súas portas definitivamente. O pub é propiedade de dous dos membros do grupo Luar na Lubre, Bieito Romero e Pachi Bermúdez, e o próximo derrube do edificio no que está na Rúa do Orzán número 38 obriga á súa desaparición. Polo local, pioneiro no apoio ao folk, pasaron nestes anos figuras destacadas da música como Carlos Núñez , Susana Seivane, Milladoiro, Manu Chao , Paco Ibáñez membros de Capercaillie ou The Chieftains. Malia todo haberá unha certa continuidade xa que Romero e Bermúdez abrirán, a cen metros de alí na rúa Cordonería, un novo local de nome Espiral Folk.
Máis información en La Voz de Galicia
O primeiro disco do grupo Arán mestura sons tradicionais irlandeses e galegos
Xénero: | 21 / 3 / 2006
Aínda que inicialmente este quinteto naceu co obxectivo único de dar concertos en vivo o seu percorrido dá agora un xiro ao presentar a súa primeira gravación, o disco “GalÉire”. Neste traballo os membros de Arán mesturan a partes iguais pezas tradicionais irlandesas con temas galegos. O grupo naceu a partir do dúo formado polo gaiteiro Antón Davila e Xosé Liz, mestre na Escola de Música Popular de Vigo; e eles uníronse o inglés Harry Price, ao violín, Suso Alonso nas percusións e Álvaro Iglesias no contrabaixo. No disco tamén contan con colaboracións como as de Pancho Álvarez, Barry McGrath e Helena Paz.
Máis información en La Opinión
O goberno galego financiará economicamente o programa “Cultura Quente”
Xénero: | 21 / 3 / 2006
O festival “Cultura Quente” contará este ano coa axuda do goberno galego. Segundo publica hoxe “Diario de Pontevedra” o director xeral de Creación e Difusión Cultural, Luís Bará, confirmou verbalmente ao concelleiro de Cultura de Caldas, Manuel González, que se implicará economicamente no festival. A programación do evento que se desenvolverá do 1 ao 16 de xullo, está practicamente pechada e xirará ao redor da emigración e da recuperación da memoria histórica.
Máis información no Diario de Pontevedra e sobre o festival na nosa hemeroteca
O grupo folk Milladoiro faise co premio anual da Fundación Otero Pedrayo
Xénero: | 21 / 3 / 2006
A Fundación Otero Pedrayo acordou conceder o premio que leva o nome do escritor ao grupo Milladoiro "pola súa importante contribución ao desenvolvemento da cultura galega, así como pola proxección da mesma máis aló das nosas fronteiras". Milladoiro leva vinte e cinco anos de carreira dando a coñecer a nosa tradición musical.
Máis información no web da Fundación
O proxecto Directo Xove do Concello de Cangas levará a música de doce bandas canguesas polos locais do municipio
Xénero: | 14 / 3 / 2006
Cada venres entre o 24 de marzo e o 9 de xuño actuará unha das doce bandas de balde nun dos cinco locais inseridos no proxecto. Os grupos que participan do programa son Estado Puro, Dos Pelos Negros,, Rabuñaldes, Thunn!, Fly Bronze Lines, Dátrebil, Jit!, Fijado Korroldo, Ludovaina, Lavorda, Dianota e Ëxodo. Un festival de dous días no areal de Rodeira no que participarán estas doce bandas máis un cabeza de cartel invitado cada día pecharán o programa. Dentro do proxecto tamén está prevista a edición dun disco cun tema de cada grupo participante e do que se tirarán 1000 copias. Directo Xove 06 está organizado pola Concellería de Xuventude e a Casa da Xuventude do Concello de Cabgas, coa colaboración da Deputación de Pontevedra, os 40 Principales e o programa El Maketón, Frigoríficos do Morrazo e a produtora Saraiba.
Máis información Directo Xove
Eloi Caldeiro promove a revista de información cultural Naz-on
Xénero: | 10 / 3 / 2006
O músico e empresario Eloi Caldeiro presentou hoxe o primeiro número da revista bimestral Naz-on. O compoñente de Brath e director da discográfica Sons Galiza dirixe esta iniciativa que ten como obxectivo cubrir todos os eventos culturais que está a ter lugar e toda a produción cultural do país. Segundo Caldeiro a revista, que xa está en quioscos e librarías, “nace para quedarse” e confirma a súa saída por un período inicial dun ano. Caldeiro apuntou a gran necesidade que ten a cultura galega de verse recollida nos medios de comunicación xa que “sen repercusión da actividade cultural é imposible manter un mínimo de profesionalidade”.
Máis información en Naz-on
Milladoiro, Carlos Jean e Amaro Ferreiro son finalistas nos X Premios da Música
Xénero: | 10 / 3 / 2006
Hoxe comeza a segunda e definitiva quenda de votacións que decidirá os gañadores dos X Premios da Música. Entre os finalistas do certame que organiza a Academia das Artes e das Ciencias da Música hai varios galegos. Na categoría de mellor álbum tradicional está Milladoiro con“25”, traballo co que celebra as súas vodas de prata. Pola súa banda, Amaro Ferreiro é finalista como mellor autor revelación polo tema "Turnedo", que interpreta o seu irmán Iván, ex-vocalista de Los Piratas. Ademais, o ferrolá Carlos Jean é candidato a mellor álbum de banda sonora cinematográfica por “Ausentes”. Por ultimo, Nova Galega de Danza, Xabier Díaz e Mamá Cabra compiten ente si polo premio a mellor canción en galego. Nesta edición o álbum “No te olvides de mi”, de Diana Navarro é a gran favorita con seis candidaturas.
Máis información no web da Academia das Artes e das Ciencias da Música