CORREO
RSS
Noticias
Primeira canción e videoclip do disco en solitario co que Miguel Costas volve a escena musical
Xénero: | 22 / 8 / 2008 + IMAXES + VIDEO
Miguel Costas, membro fundador e compositor de parte do repertorio máis coñecido de grupos como ”Siniestro Total” , ”Aerolíneas Federales” ou ”Los Feliz” xa ten a piques de saír o seu primeiro disco en solitario “Condenados a Costas” que ven sendo o número 17 da súa carreira e que estará á venda o 13 de outubro. O músico volve á escena musical despois de catro anos de silencio tras rematar con Los Feliz e das súas actuacións con A banda Turca. No seu novo disco, editado pola discográfica independente G. Domani Records, Costas ofrece himnos rock & roll no estilo que tantos éxitos le supuxo na súa etapa con Siniestro Total, o seu primeiro sinxelo é a canción “Baja el pantalón” que xa se pode escoitar e da que hai gravado un videoclip no que aparecen moitos veciños do músico da localidade de Escairón, onde vive actualmente. Acompañado dos músicos Juan Naya, Landy e Tony, Miguel Costas iniciará o vindeiro 30 de agosto en Vilalba a xira 2008-2009 na que tamén está prevista unha actuación nas Festas de San Froilán en Lugo xunto cos vigueses Def Con Dos.
O programa da TVG “Alalá” recoñecido coa Gaita de Ouro “Constantino Bellón”
Xénero: | 21 / 8 / 2008
O Ateneo Ferrolán decidiu conceder a Mención de Gaita de Ouro “Constantino Bellón” correspondente ao ano 2008 ao programa da TVG “ALALÁ” pola súa labor de difusión e defensa da música tradicional galega. O acordo tomado en Xunta Directiva polo xurado dos prestixiosos premios de gaita recoñece así a este programa dirixido por Senén Bernárdez e presentado por Pilar García Rego que xa ten no seu haber outros importantes premio como o galardón ao mellor programa de Tradición musical outorgado pola Academia das Ciencias e das Artes de Televisión en 2007 e o Premio Galicia Comunicación da Xunta no mesmo ano. A entrega do premio terá lugar o próximo domingo día 31 de agosto, as 20:30 horas, no Teatro Jofre de Ferrol coincidindo coa Final do XVIII Concurso de Gaita Galega “Constantino Bellón”.
O Teatro Colón estreará a ópera galega “Camiñar polo arame cunha lata de cervexa”
Xénero: | 14 / 8 / 2008
A Coruña conta cunha gran tradición operística. Desde hai varias décadas existe unha asociación que organiza un festival de ópera, hai outro a maiores dedicado a Mozart e, ademais, nesta cidade estrearase en breve unha ópera contemporánea. Leva por título Camiñar polo arame cunha lata de cervexa e Juan Durán é o compositor e Manuel Lourenzo o dramaturgo. A ópera galega, que se estreará o vindeiro 13 de setembro (ás 21:00 horas), contará coa participación do Grupo Instrumental Século XXI, o barítono Javier Franco e a sorprano Carme Durán e a escenografía é de Rodrigo Roel.
Los Mecánicos gravan o seu primeiro disco cunha actuación en directo
Xénero: | 13 / 8 / 2008
O trío coruñés gravará en directo o que será o seu primeiro disco no pub Garufa, do que ademais do son tamén collerán o nome para o disco. En “Garufa ye-ye” Fernando Esclusa, José M. Martínez e Tito Ritman plasmarán o seu directo no que repasan a música pop dos anos sesenta e setenta tanto española como anglosaxona ou americana. O concerto, que terá lugar ás 23 horas deste xoves 14 de agosto, durará unha hora e media e a entrada é libre, aínda que aforo é limitado. Os tres músicos levan desde o pasado ano dando concertos como Los Mecánicos e proceden de outras bandas da cidade como Guru Deva, Deluxe, The Majestics e a Tribeca Band. Previsiblemente o disco sairá editado por Wonderland Discos.
Pablo Devigo consegue o trofeo McCrimmon do Festival de Lorient
Xénero: | 6 / 8 / 2008
O 2008 é o ano de Pablo Devigo (Castro Caldelas, 1990). Principalmente porque este gaiteiro de 18 anos foi o gañador dos festivais de gaita de Bandeira, A Estrada, o Manuel Villanueva de Poio e o de composición organizado polo concello de Ferrol e que leva o nome de "Constantino Bellón" . O último premio que acaba de sumar engadir ao seu palmarés é o trofeo McCrimmon na modalidade de “gaita” (existe tamén a de “gaita escocesa”) que se concede no marco do Festival de Lorient.
Os músicos da Rede de Locais de Ensaio dispoñen dun novo portal para difundir a súa actividade
Xénero: | 6 / 8 / 2008
A Dirección Xeral de Xuventude e a de Creación e Difusión Cultural xuntaron onte aos seus representantes, Rubén Cela e Luís Bará, para presentar o portal Nsaio.org. A nova plataforma da Rede Galega de Locais de Ensaio da Xunta vertebra así o sistema ofrecendo un espazo autoxestionable que lles permitirá aos grupos e artistas que usan estes locais de introducir todo tipo de información sobre o seu traballo, a documentación relativa aos servizos que ofrece a Dirección Xeral de Xuventude, noticias, concursos e mesmo unha radio con mostras de música dos grupos da rede. Por toda Galicia existen actualmente dezasete locais dentro desta rede e as previsións son que cheguen a ser trinta antes de final de ano.
Ribeira de Piquín galardoa a traxectoria artística de Xosé Manuel Seivane
Xénero: | 31 / 7 / 2008
Xosé Manuel Seivane estivo durante máis de cincuenta anos traballando no seu obradoiro de gaitas. Unha traxectoria que ademais de convertelo nun dos mellores profesionais no seu campo, acaba de valerle unha homenaxe por parte da Asociación Recunchos de Ribeira de Piquín. A festa terá lugar o vindeiro 9 de agosto, cun gran xantar, un concerto da súa filla, Susana Seivane, así como a instalación dun busto de bronce e unha placa na praza do Chao.
Cinco agrupacións representarán á música galega no Festival Intercéltico de Lorient
Xénero: | 29 / 7 / 2008
As melodías do grupo Quempallou serán a primeira mostra da música galega en soar no escenario da importante cita bretoa que se inicia este venres na pequena cidade de Lorient. Durante os dez días do evento representantes musicais do países celtas pasarán polo escenario que xa é un referente internacional xunto con outros da nos aterra como Ortigueira ou Moaña, co que coincide este ano. Os outros que tamén estarán en Bretaña será a Banda de gaitas Xarabal, de Vigo; Cantigas e Agarimos, de Santiago; os ourensáns Mutenrohi e as cantareiras Leilía, que actuarán no día do peche do evento que este ano alcanza a súa trixésima oitava edición.
O grupo Pesdelán debuta en concerto buscando poñer a todos a bailar
Xénero: | 24 / 7 / 2008
Practicamente cada un dos sete compoñentes do grupo que se presenta en concerto o vindeiro luns foi ou é parte doutro proxecto musical coñecido do panorama galego. Berrogüetto, Leilía, Alfolíes, Xochilmica, Almáciga ou a banda de Susana Seivane son algúns destes grupos dos sete artistas que integran Pesdelán, que buscan nesta nova aposta recuperar a cultura participativa das festas e poñer á xente a bailar cun repertorio que abrangue temas tradicionais galegos e portugueses, arranxados dun xeito divertido e orixinal. Pesdelán son Guadi Galego, Uxía Cribeiro, Montse Rivera, Mercedes Prieto, Xan Pampín, Carlos Freire e Miguel Flores. A súa presentación terá lugar cun concerto aberto na Praza do Toural de Compostela ás 23 horas do luns 28 de xullo, na mesma praza estarán desde as 20:30 horas ofrecendo un obradoiro de danzas galegas e portuguesas para ir quentando os pés do persoal.
O quinteto Som do Galpom publica o seu primeiro disco
Xénero: | 23 / 7 / 2008 + AUDIO
O netlabel A Regueifa Plataforma ven de editar o primeiro EP dos composteláns SOM DO GALPOM, un quinteto de rap-funk formado hai tres anos na aldea d´A Moniña, unha formación que desde os seus comezos buscou apoiarse en tres estilos de música diferentes: o funky, o reggae e o rap. Neste tempo xa levan dado moitos concertos por toda a xeografía, acadaron o segundo premio no certame GZcrea 2007 e gañaron o IV Concurso Galego do Foundation Reggae Festival. Som do Galpom son Gael Bassave (voz e letras), Brais Bassave (violín e composición), Xurxo Climent (guitarras clásica e eléctrica), Jano Castro (baixo) e Aitor Garcia (batería). O disco, de seis temas, esta editado baixo licenza Creative Commons e pode ser descargado de balde.