CORREO
RSS
Noticias
Iago Fernández debuta con Agromando
Xénero: | 15 / 2 / 2012
Da man de Freecode Jazzrecords chega ás tendas Agromando, primeiro disco do batería cangués Iago Fernández. O proxecto achega dez cortes de jazz contemporáneo, mesturado con diferentes influencias, dos cales sete son da autoría deste músico e outros tres versións Radiohead ou Djaván. Canda a el, participan no proxecto Demian Caboud, Xan Campos, André Fernandes, Virxilio da Silva, Zé Pedro, João Mortágua e mais Baptiste Techer. A obra gravouse e masterizouse nos Boom Studios de Vila Nova de Gaia o pasado mes de xuño
La Casa de Arriba celebra o seu XIIIº aniversario ofrecendo concertos
Xénero: | 13 / 2 / 2012
Nun momento no que son moitas as salas de concertos e espectáculos que están a pechar chega desde Vigo a boa nova dun local emblemático que celebra o seu décimo terceiro aniversario. A “cervexería pop” La Casa de Arriba (MartinCodax, 23) leva desde o ano 1999 programando música en directo na cidade olívica. Polo local pasaron importantes músicos da escena independente e pop mesmo de nivel internacional e tamén foron moitas as bandas e artistas do país que nos seus inicios levaron alí os seus directos como Eladio y los Seres Queridos, Trem Fantasma, La Familia ou Niño y Pistola, que alí mesmo asinaron o seu primeiro contrato discográfico como informa o webzine independente Desconcierto. Para celebrar o aniversario La Casa de Arriba programou case vinte de actuacións tanto nacionais como internacionais durante os meses de febreiro e marzo repartidos coa Sala Playmobil, do mesmo dono. Un programa difundido cun atípico cartel para un local de pop no que o deseñador gráfico e ilustrador Roberto Argüelles homenaxea a Isaac Díaz Pardo cuns trazos semellantes a Luís Seoane. Argüelles ten no seu haber o Primeiro premio na Bienal de Caricatura de Ourense en 2002, primeiros premios en 2000 e 2002 do Salón do Cómic de Cangas e primeiro premio do Certame de Cómic de Arteixo.
Vilagarcía acollerá a III Mostra Musical do Eixo Atlántico
Xénero: | 10 / 2 / 2012
Coa intención de favorecer o intercambio entre intérpretes musicais de Galicia e Portugal, Vilagarcía asume a organización da III Mostra Musical do Eixo Atlántico. A reponsable de Educación do Concello presentaba onte a nova edición deste evento, que contará coa presenza xa confirmada de músicos de catorce entidades locais desta organización. Na última edición reuníronse arredor de douscentos participantes, e prevese un incremento na participación.
Isi Vaamonde Band lanza o seu primeiro disco
Xénero: | 7 / 2 / 2012
Engadindo un Band ao seu nome, o músico cambadés afincado en Madrid Isi Vaamonde presenta o seu primeiro disco, Live in heartland. A obra gravouse nos estudios Abrigueiro de Guimarei coa banda a tocar ao vivo e foi autoproducido polo galego. Na liña dos seus anteriores EPs, Vaamonde mantén a súa aposta polo folk-rock americano con letras en inglés, e achega 12 temas habituais do seu repertorio, mesturando composicións orixinais con dúas versións de David Bowie (Heroes) e mais Inmaculate Fools (Wish you were here). Canda a Vaamonde, participan no proxecto Jesús Parra, Edu Pulpillo, Gonzalo Peñalosa, Jaime Caro e Volker Ledwig. A obra, autoeditada, está á venda por dez euros.
Aprender e cantar
Xénero: | 7 / 2 / 2012
Nos últimos anos están a se multiplicar as obras de carácter didáctico que se achegan á nosa música tradicional. Dentro desta liña, acaba de saír do prelo Para cantar veño eu. Unha viaxe pola cultura musical galega da man dos Chichisos. Como peculiariades, presenta a aposta por seguir o itinerario dunha asociación como fío condutos e atender a partes pouco difundidas da nosa tradición.
A Sinfónica de Melide celebra os seus 18 anos cunha publicación
Xénero: | 6 / 2 / 2012
Nun municipio con 8.000 habitantes, co único apoio do concello e vencellado a un conservatorio, Fernando Vázquez Arias asumiu o reto de crear a Orquestra Sinfónica de Melide. A formación cumpre neste 2012 a súa maioría de idade. Son 18 anos de traxectoria que recolle unha publicación coa que se pretende documentar a súa evolución. Neste tempo, a formación desenvolveu proxectos como o musical “Gallaecia” ou “Grandes coros de ópera”, entre outras propostas.
Cos ollos nos cantares de cego
Xénero: | 6 / 2 / 2012
Non hai tantos anos a figura do cego a cantar os seus romances e historias de crimes e sucedidos era imprescindible en canta romaría houbese no noso país. Coa mudanza de costumes, perdeuse este oficio, e o singular repertorio vencellado a el quedou restrinxido á memoria popular e a uns poucos proxectos de investigación. Agora, varias iniciativas reivindican e actualizan este legado, ao tempo que a rede achega posibilidades inéditas de se achegar a el.
Cristina Pato coordina un encontro formativo de carácter internacional no ámbito da música
Xénero: | 3 / 2 / 2012
Un equipo de profesorado de luxo (de Chucho Valdés a Guadi Galego, pasando por Wu Tong) coordinado por Cristina Pato. O formato do Galician Connection é de clases prácticas, encontros “cara a cara”, foros e debates participativos e un concerto de clausura no Museo de Galicia. A proposta foi presentada hoxe na Cidade da Cultura, lugar no que se desenvolverá o programa do 11 ao 13.
Quiosco: Sons da Galiza 20
Xénero: | 3 / 2 / 2012
Acaba de subir á rede o número 20 da revista dixital Sons da Galiza. A publicación dedícalle a súa capa á caboverdiana Mayra Andrade, que nos visitou no último Cantos na Maré e mais ao grupo Banda Baile Asalto, que chega desde Pontevedra co seu "folk fresco". Canda a isto, achégase unha mostra da exposición fotográfica Mans de Óscar Martínez, que amosa esa parte da anatomía de diferentes músicos do país en Vigo. Canda a isto, Sergio Lago, director do Culturgal, valora a última edición da da feira, repásanse as últimas novidades discográficas e faise unha panorámica do sector musical do país na forma de noticias breves.
Quiosco: Ao vivo 11
Xénero: | 2 / 2 / 2012
A Axencia Galega das Industrias Culturais acaba de publicar o Pdf do número 11 da revista Ao vivo. O lanzamento dedícalle a súa capa a Iván Ferreiro, que repasa a súa traxectoria. Canda a el, o último lanzamento de Leilía e o retorno de Os Cempés son outros contidos destacados. A revista complétase con artigos sobre Pedrito Diablo y los Cadáveras, O Neno Elliott e Magín Blanco, o pub Ultramarinos ou o acordeonista Xosé Ramón Vázquez, sen esquer un repaso de 2011, as últimas novidades discográficas ou a habitual axenda.