CORREO
RSS
Noticias
A Pedreira presenta o disco e espectáculo 'BASAL'
Xénero: | 20 / 6 / 2024
Este vindeiro domingo, 23 de xuño, o Teatro Colón da Coruña acollerá a presentación de BASAl, o novo disco e espectáculo de Ugía Pedreira, 'A Pedreira' dentro do ciclo 'Coa nosa voz' da Deputación Provincial. Segundo o dicionario da RAG, basal é un adxectivo para aquilo "que está situado na base dunha formación orgánica ou dunha construción". No seu novo traballo e segundo en solitario, "BASAL" (Raso estudio, 2024) A Pedreira mantén perceptible a súa base permanente e interior construíndo sobre ela con capacidade orgánica e fluída. Neste disco de oito temas faise unha viaxe polas diferentes 'a-pedreiras' que conviven dentro de Ugía e que xuntas debuxan o mapa do seu percorrido vital e musical desde os tempos de Chouteira fai trinta anos ata a actualidade. Jazz, folk tradicional, electrónica, rock, sons brasileiros, mexicanos, cubanos ou portuarios de todas as costas... Tal e como podemos escoitar se facemos un percorrido pola súa discografía, colaboracións e espectáculos dentro dela viven todas as músicas coas que imos topar neste disco que xa está dispoñible en plataformas dixitais.
A Asociación de Compositores edita tres cadernos de obras orixinais para cámara
Xénero: | 18 / 6 / 2024
No ano 2012 a Asociación Galega de Compositores abriu estre os seus asociados unha convocatoria para a edición de partituras inéditas de música para grupos de cámara. Os obxectivos eran acadar maio proxección en Galicia a este tipo de agrupacións e fornecer o corpus musical con novas obras orixinais e inéditas. Tres anos despois a AGC ven de presentar o froito desa iniciativa plasmado en tres volumes que se dividen segundo o número de instrumentos de vento e/ou percusión para os que están escritas: Dúos e Trios; Cuartetos; Quintetos.
Medalla Castelao para as pandeireteiras Leilía
Xénero: | 18 / 6 / 2024
O Consello da Xunta aprobou onte a concesión das Medallas Castelao da comunidade deste ano. Entre os cinco nomes que recibirán esta distinción está o da formación Leilía, que o pasado ano anunciou o fín da súa actividade artística tras 34 anos sobre os escenarios. No anuncio, o presidente da Xunta, Alfonso Rueda, destacou a característica de "pioneiras" do conxunto de pandeireteiras na promoción do folclore galego e o feito de que "abriron camiño a moitos que artistas e agrupacións que viñeron detrás". A Medalla Castelao é unha condecoración de carácter civil outorgada pola Xunta de Galicia ás personalidades e institucións que destacan polo seu traballo no eido artístico, literario, deportivo, económico ou intelectual. A gala de entrega celebrarase o vindeiro 28 de xuño, coincidindo co aniversario da aprobación do plebiscito do primeiro Estatuto de Autonomía de Galicia e do regreso a Galicia dos restos mortais de Castelao. Xunto a Leilía imporáselles outras medallas a o deportista Borja Golán, o empresario Amancio López Seijas, a activista Maite Isla e a Asociación de Médicos Galegos (Asomega). A formación musical conformada por Ana Rodríguez, Rosario Rodríguez, Montse Rivera, Felisa Segade, Patricia Segade e Mercedes Rodríguez recibiu o pasado ano o Premio Opinión Andaina Senlleira á súa traxectoria de 34 anos e cinco discos.
A Real Filharmonía pon en valor o inconformismo como motor da creación musical
Xénero: | 17 / 6 / 2024
A Real Filharmonía de Galicia presentou este venres as chaves da temporada 2024-25. 'Inconformistas' é o lema desta nova temporada co foco en compositoras e compositores que ousaron desafiar as normas establecidas abrindo novos territorios sonoros. Deste xeito, a programación ten como fío condutor a música de tres figuras destacadas da composición: parte de Ludwig van Beethoven, "o inconformista orixinal" quen sentou as bases do repertorio orquestral moderno; detense tamén na figura de Hector Berlioz, grande experimentador da tímbrica, e esténdese ata o presente, coa atención na innovación compositora de Raquel García-Tomás, primeira compositora en residencia da RFG. No tecido deste fío narrativo, a tempada percorre a traxectoria e as obras de artistas incomprendidas/os no seu tempo cuxa pegada é hoxe indiscutible no gran repertorio musical: aos nomes de Franz Schubert, Anton Bruckner, Gustav Mahler, Charles Ives, Edgard Varèse, ou o inclasificable roqueiro Frank Zappa -por citar só algúns deles—-, súmanse os de mulleres como Marianne von Martinez, Elisabeth Jacquet de la Guerre, Ruth Crawford-Seeger, que contribuíron a traspasar fronteiras sonoras e de xénero.
A Orquestra Sinfónica de Galicia fará unha xira por España
Xénero: | 10 / 6 / 2024
A Coruña acollía este venres 7 de xuño a presentación da nova temporada da Orquestra Sinfónica de Galicia. Un orzamento de 2,1 millóns de euros sosterá este programa que amplía a súa actividade a novas localidades do país. En total serán 35 concertos de abono na Coruña e 15 actuacións en Ferrol, Vigo, Santiago, Mondoñedo, Vilagarcía, Ponteareas, Carballo, Melide, Rianxo, Arteixo, Culleredo ou Vimianzo e como novidade esta tempada, Sobrado e Ribeira.
Unha homenaxe o 12 de xuño lembrará a Dorothé Schubarth
Xénero: | 5 / 6 / 2024
O Museo do Pobo acollía na mañá deste 5 de xuño a presentación do acto de homenaxe que esta entidade, canda ao Consello da Cultura e o Instituto da Lingua Galega, lle van tributar a Dorothé Schubarth. A actividade, que "pretende ser un convite á festa e ao baile" será aberta a toda a cidadanía e pretende recoñecer "o papel central que a musicóloga e compositora suíza representou para a música tradicional galega", segundo explican as entidades convocantes, un traballo que a presidenta do Consello da Cultura, Rosario Álvarez, cualificou como "titánico e xeneroso".
A Coruña acolle a primeira edición do festival 'Aquí tamén se fala'
Xénero: | 5 / 6 / 2024
A campaña de normalización lingüística 'Aquí tamén se fala', que promove o IES Plurilingüe Rafael Dieste da Coruña, dá un novo paso. Este 7 de xuño a praza da Concordia da Cidade Herculina acolle a primeira xeira do "festival de música contemporánea galega" que reúne a catro grupos que cantan na nosa lingua a partir das 17 horas con entrada de balde.
Malkeda reiníciase cun disco homónimo
Xénero: | 31 / 5 / 2024
A banda de Metal pontevedresa Malkeda ten desde hoxe xa un cuarto traballo discográfico longo dispoñible coa publicación do seu disco homónimo "Malkeda" (Thornado Music), xa dispoñible nas plataformas dixitais. Se ben o feito de usar o propio nome para titular un disco adóitase facer nun primeiro ou segundo álbum e resulta pouco habitual xa na cuarta entrega dun percorrido discográfico que comezou fai 17 anos en 2007, os oito anos que separan este traballo do anterior "Cumulonimbo" (Maldito records, 2016) semella que formaron parte desta necesidade de reafirmar a identidade sonora do grupo e marcar un momento de reinicio. Cargados dun son duro, sen concesións, moi hardcore, a banda ofrece neste traballo nove temas novos, escuros nas letras, potentes na presencia e contundentes na sonoridade. O disco de Malkeda contén neste feixe temas unha reivindicación dun son con reminiscencias das grandes bandas de hardcore dos 90, un resultado no que seguro que ten moito que ver o traballo do produtor, Iago Lorenzo nos Estudios Planta Sónica de Vigo, capaz de destacar esa cualidade das composicións que as pode elevar a memorables. Para a canción "Sin futuro" o grupo contou tamén coa colaboración de Ra Díaz, baixista dos californianos Korn. En novembro do pasado ano presentaron en redes "Que asco das", que sería o primeiro dos catro avances deste álbum que hoxe mesmo sae para goce dos seguidores dos pontevedreses e do público do rock máis duro.
A conservación do patrimonio sonoro centra unha xornada no Gaiás
Xénero: | 31 / 5 / 2024
"Transformando a música en patrimonio" é o título baixo o que hoxe ten lugar unha xornada técnica na Biblioteca de Galicia, co obxectivo que os asistentes coñezan non só como se está a traballar sobre o patrimonio sonoro en bibliotecas como a Biblioteca Nacional de España ou a Biblioteca de Catalunya, senón tamén achegarse ao labor que están desenvolvendo institucións como o Arquivo Sonoro de Galicia, dependente do Consello da Cultura Galega, ou o Arquivo do Patrimonio Oral da Identidade, posto en marcha polo Museo do Pobo Galego, para conservar a herdanza sonora de todas as galegas e galegos. Neste sentido intervirán a Coordinadora técnica do Arquivo Sonoro de Galicia do CCG, Cristina Pujales Prats, e Concepción Losada Vázquez, como coordinadora do Arquivo do Patrimonio Oral da Identidade (APOI) do Museo do Pobo Galego, ademais de representantes da institución estatal e a catalana.
O Ciclo Coa Nosa Voz reúne a catro representantes da canción de autora
Xénero: | 22 / 5 / 2024
O domingo 2 de xuño, e xa cun confirmado cheo total, Guadi Galego abrirá o ciclo Coa Nosa Voz, que cada domingo do mes levará ao Teatro Colón da Coruña a unha artista representativa da 'canción de autora'. A área de cultura da Deputación promove este ciclo que acollerá as actuacións de Guadi Galego, Antía Muiño, Uxía e Ugía Pedreira. As entradas poderán retirarse de balde, na páxina web de ataquilla.com.