CORREO
RSS
Ti estás aquí > Inicio / Xéneros / Pop
Música Pop
Guadi Galego sae do folk en Lúas de outubro e agosto
Xénero: | 24 / 11 / 2014
Dez temas de letras reflexivas e maduras nos que a voz de Guadi Galego sae do rexistro folk. Esta é a aposta que ex-cantante de Berrogüetto fai con Lúas de outubro e agosto, o seu segundo álbum, que sae á venda mañá, 25 de novembro a coincidir co Día contra a Violencia de Xénero. Arranxos eléctricos con aires jazz, baixos e baterías conviven co acordeón de Santi Cribeiro e o clarinete de Pablo Pascual no que supón un achegamento da cantante ao pop melódico. A maior parte dos temas do volume foron compostos pola propia Galego e graváronse nos estudios Alis Records de Baeza. O álbum sae á venda da man de Fol Música, e o seu primeiro single, Matriarcas acadou un éxito fulminante en Youtube, co preto de 15.000 visualizacións en só dous días.
Lucía Pérez volta con Quitapenas
Xénero: | 14 / 7 / 2014
Quitapenas é o sexto disco da cantante do Incio Lucía Pérez, e o primeiro que lanza logo da súa participación en Eurovisión en 2011. Gravado nos estudios Montepríncipe de Madrid, o proxecto supón un punto de inflexión na carreira da artista, coa aposta por temas pop e con toques latinos. Aínda que cantado en castelán, mesmo cunha versión do Moonlight Shadow de Mike Olfield, o álbum inclúe tamén o tema Sete chorares en galego. A edición en CD do álbum está dispoñible en exclusiva con La Voz de Galicia ata o vindeiro 21 de xullo, e distribuirase posteriormente polas tendas. A versión dixital está xa á venda nas principais plataformas internacionais.
The Lost Omelette-makers chegan a Discos da Máquina
Xénero: | 27 / 5 / 2014
O segundo LP de The Lost Omelette-makers viu a luz este mes como o novo lanzamento de Discos da Máquina. Daniel Santos é o único membro do grupo e asina os temas de A calor dun corpo estraño, o seu segundo LP con este alias. Pop lo-fi con letras desquiciadas e arranxos traballados amosan a creatividade deste proxecto, que está a facer a súa xira de presentación. Canda a sete cancións de composición propia, Santos inclúe Romeo&Cuneta, curiosa versión da Romeo y Julieta popularizada por Karina que ambienta nas obras das compostelá rúa de San Pedro.
Ataque Escampe retornan con O disco vermello
Xénero: | 23 / 5 / 2014
A emigración, a contradición entre a evasión e o compromiso, historias universais contadas desde uns puocos. Ataque Escampe apostan por un son cunha maior presenza de bases electrónicas e presentan O disco vermello. Letras coidadas e reivindicativas nas que se mesturan ritmos como "o pop e o dub e o rap de mentira e o soul de Filadelfia", segundo eles mesmos explican no texto de presentación. Once temas dispoñibles en Bandcamp e que en breve sairán en formato CD. O álbum foi gravado por Arturo Vaquero nos estudios Abrigueiro e que ven a luz da man de Discos da Máquina.
Villanueva debuta con Viajes de ida
Xénero: | 13 / 5 / 2014
Villanueva é o nome do novo proxecto musicaldo vigués Josete Diaz, antigo membro de Martynez. Co título Viajes de ida lanza o seu primeiro disco en solitario, un volume de 10 cancions que estará dispoñible a partir do vindeiro 20 de maio en formato físico e dixital da man de Esmerarte. Nesta nova etapa o músico oscila entre o rock e o pop con colaboracións como as de Ramiro Nieto, Carlos Sosa, Javier Doria e Oscar García nos instrumentos e con Ángel Luján á produción. A Sala Costello de Madrid acollerá a presentación do proxecto o mesmo día 20.
O Festival Brincadeira volve celebrarse este ano e será en Compostela
Xénero: | 21 / 4 / 2014
O Festival Brincadeira, tamén coñecido como Brincadeira-Rock, volve das súas cinsas dous anos despois da súa anterior edición. O festival nacido en Ordes en 2010 pasou a celebrarse en Cambre en 2012 e viu cancelada a súa prevista volta a Ordes en 2013 pola baixa recadación prevista. Agora os organizadores veñen de confirmar que este ano volverán levantar os escenarios, desta ocasión no recinto do Monte do Gozo en Santiago de Compostela entre o 7 e o 9 de agosto. Ademais, malia que o resto do cartel aínda non se coñece, puideron avanzar unha das actuacións estelares: a cantante Gloria Gaynor, diva da música disco-soul dos anos 70 e mundialmente famosa por temas como I will survive, que xa enviou un saúdo para os “brincadeiros”. Hoxe mesmo saen á venda os primeiros abonos con acampada ao prezo de 29 euros.
Información actualizada 17:30:
Xa se coñece o resto do cartel do Festival Brincadeira 2014 que inclúe entre outros moitos grupos e artistas a Bad Manners, Georgie Dann, The Zombie Kids, Fangoria, Lory Money, Guadalupe Plata, Fluzo, Los Chavales, Familia Caamagno, Ruxe-Ruxe, Tony Lomba, Mad Professor e mesmo a Ultranoite no país dos ananos de Chévere.
Los Televisores presentan o seu primeiro disco
Xénero: | 20 / 3 / 2014
Logo dun single e de participar no recompilatorio Galician Bizarre, Los Televisores chegan co seu primeiro LP. Chicos i chicas presenta oito temas de punk.pop nos que se deixa sentir a pegada de propostas como Alaska ou Kaka de Luxe con letras cheas de humor. O trío de Chantada presentou o álbum o pasado 15 de marzo en La Iguana de Vigo.
O Podría ser de Paul Álvarez está xa á venda
Xénero: | 23 / 1 / 2014
Oito temas nos que a guitarra leva a voz cantante, con toques de flamenco e chiscadelas ao pop compoñen Podría ser. O guitarrista coruñés Paul Álvarez debuta cun disco autoeditado coa etiqueta The Orchard na que amosa o seu bo facer coas cordas. Miguel Lamas, Risto Vuolanne, Iago Mouriño, Juan Cabe, Pablo Añón ou Sara Vázquz son algúns dos colaboradores que participan no lanzamento. O disco está á venda en tendas dixitais e mais en locais da Coruña como Discos Portobello ou a Cervecería A Franxa.
Pablo Seijas laza o seu primeiro álbum en solitario
Xénero: | 3 / 1 / 2014
Un concerto na sala herculina LeClub o vindeiro 17 de xaneiro será a presentación pública de Para brillar, o primeiro disco de Pablo Seijas. O coruñés membro da banda Misterioso Viaje Holanda debuta en solitario cun volume autoeditado no que presenta trece temas persoais que rachan co son do grupo para apostar por un son máis pop e intimista. Logo do concerto de presentación, no que contará con banda, o artista iniciará unha xira na que traballará en solitario o formato acústico. O álbum está dispoñible en iTunes e para a súa libre escoita en Bandcamp, e o cantante anuncia a súa intención de facer unha edición física.
Quatro D Abril volta con Mundo circular
Xénero: | 27 / 12 / 2013
A sala Karma de Pontevedra acolle esta noite o concerto de presentación do novo traballo de Quatro D Abril. O grupo xoga na casa para estrear Mundo circular, un volume con nove temas que afonda na liña pop e melódica do seu primeiro traballo. Cunha nova formación na que só se manteñen dous dos catro membros orixinais, o conxunto contou coa produción de David Feito, guitarrista de El Sueño de Morfeo para o novo traballo.
REPORTAXE
Disco con etiqueta
Data.O vinte de maio o público e un xurado escollerán o Primeiro disco pop do ano de solistas galegos
