CORREO
RSS
Ti estás aquí > Inicio / Xéneros / Pop
Música Pop
Ataque Escampe entrega os seus Primeiros bicos
Xénero: | 15 / 2 / 2017
Tres anos despois do seu Disco vermello, os composteláns Ataque Escampe voltan cun álbum gris. Primeiros bicos está xa dispoñible para a escoita en liña e sairá á venda, tanto en formato LP como dixital o vindeiro 27 de febreiro. Segundo adianta o grupo, a capa gris do disco poderase rañar cunha moeda para descubrir os debuxos agochados debaixo, con catro variantes deseñadas por David Silva. Aínda que a marcha de Álex Charlón como cantante se deixa sentir no son, o quintento mantén o seu característico estilo, se caso máis cru e eléctrico, cunha especial pegada de tons funk que se mesturan sen complexos con salsa ou soul para animar unhas letras sempre intensas. O álbum, que ve a luz da man de Discos da Máquina, gravouse no estudio As Gonzalinhas de Lalín. A Sala Capitol da capital galega acollerá o concerto de presentación do novo traballo nun concerto no que o grupo compartirá escenario con Emilio José o vindeirio 24 de febreiro.
Villanueva abre o seu Zoo para dos
Xénero: | 7 / 2 / 2017
Desde o pasado 27 de xaneiro está á venda Zoo para dos, o segundo traballo do vigués Villanueva. Sony Music Spain presenta dez novos temas gravados nos madrileños Reno Estudios. Pop electrónico, melodías coidadas e un importante traballo vocal son as características dun álbum no que predomina un matiz hedonista. Na nómina de colaboradores, nomes como Ramiro Nieto (Zahara) Martí Perarnau (Mucho) Martiño Toro (Iván Ferreiro) Iago Reigosa, Maryan Frutos (Kuve) e Lola García Garrido (Xoel López). O artista volve así ao formato álbum logo dunha exitosa xira de dous anos co que fora o seu primeiro traballo, Viajes de Ida, de 2014. O Costello Club, en Madrid, acollerá o concerto de presentación do álbum.
Chega Está bien, o primeiro LP de Dois
Xénero: | 16 / 1 / 2017
Cunha edición exclusiva de só 50 copias en vinilo con bono para a descarga dixital, Discos de Kirlian e Orphan Records acaban de lanzar Está bien. O trío vigués Dois debuta na longa duración con este traballo, no que achegan doce temas en galego e castelán. As claves pop low-fi e a psicodelia artellan un volume no que Óscar Raña, guitarra e voz, Guillermo Portas ao baixo e José Fran Novoa á batería lle tiran partido a unha formación mínima para crear melodías consistentes e letras alucinadas. O grupo gravou o traballo no estudios Terraforma e fixo a primeira presentación pública en La Iguana Club, de Vigo.
Eladio y Los Seres Queridos homenaxean á musica tradicional en Cantares
Xénero: | 2 / 12 / 2016
Como unha particular homenaxe á música tradicional que escoitaban os seus pais e eles mesmos de cativos, Eladio y Los Seres Queridos presentan un disco novo Cantares (Esmerarte). O álbum confórmano dez temas seleccionados einterpretados desde os sons pop que van desde o Fonte do araño, de Emilio Cao ao Teño saudade de Andrés do Barro pasando por Marín por ti, Flor da murta, unha versión de A Bruxa de Milladorio, dúas versións das cancións de Fuxan os Ventos Cantiga de amigo e Meu amor é mariñeiro, Camariñas, Havemos de ir a Viana e Quen puidera namorala de Luis Emilio Batallán. Deste particular canto a Galicia a banda explica que facer este disco era unha “débeda” que tiñan "coas cancións da nosa infancia, un cariño para os nosos pais pero tamén para os nosos fillos, para que non as esquezan", din desde o grupo. Pero Cantares tamén é segundo Eladio y Los Seres Queridos “un disco para que os que non son galegos descubran parte do noso cancionero.”
Chega o Dream of winter de Kozmic Blues
Xénero: | 15 / 11 / 2016
Apenas un ano despois da súa presentación con Premonition, Kozmic Blues continúa a súa carreira discográfica e lanza Dream for winter. O dúo ferrolán, formado por Elisa Sánchez e Andrés Toimil achega once novos temas, entre eles unha versión, nos que continúa a predominar o acústico e o xogo de voces. Tons suaves para cancións con aires de rock e pegadas dos anos setenta manteñen o estilo do anterior traballo. O álbum, autoeditado con apoio dunha campaña de crowdfunding, foi gravado no estudios Abrigueiro de Friol.
Guadi Galego continúa a súa aposta pop con O mundo está parado
Xénero: | 4 / 11 / 2016
A abandonar definitivamente os aires folk, Guadi Galego afonda na súa vertente máis pop con O mundo está parado. A intérprete achega no seu terceiro traballo seis temas propios, tres compostos por Carlos Abal e un de Pachi García, que repite com produtor. O resultado, un álbum cheo de sentimentos no que sobrancea a voz da artista, con rexistros que van do íntimo ao pop clásico e que apostan por un son máis sofisticado que en anteriores traballos. O álbum preséntase nunha tiraxe limitada de mil exemplares en formato LP cun CD incluído. Os cartafoles do disco inclúen cadansúa fotografía de Carlos Abal cunha colección de dez diferentes. Ademais, o álbum estará dispoñible en plataformas dixitais. Trisquel Artesanía acolle esta tarde, a partir das 20 horas, unha sesión de sinaturas deste proxecto.
Iván Ferreiro convídanos á súa Casa
Xénero: | 28 / 10 / 2016
O sexto álbum en solitario de Iván Ferreiro aparece como resultado do ano sabático que colleu o músico vigués en 2015. Casa achega doce temas nos que o abandono e a exaltación da amizade teñen unha especial pegada. O músico explora novos ámbitos sonoros nun disco que conta con colaboracións de Amaro Ferreiro, Leiva, Pablo Novoa ou Nico Pastoriza a complementar o seu universo poético. Gravado a medias entre Gondomar e Barcelona, Ferreiro contou con Ricky Falkner para a produción do novo proxecto, que edita Warner Music. O álbum preséntase en edición especial, en dixipack e en formato LP, co extra do CD Todo lo demás.
Luís Emilio Batallán rodéase de voces en 70 y 29
Xénero: | 26 / 5 / 2016
Bachatas, boleros, baladas, toques electrónicos e mesmo algún toque de reggaeton. Luís Emilio Batallán amosa a súa vertente máis latina en 70 y 29, o traballo que acaba de publicar con Universal Music. O cantante galego acompáñase nesta nova aventura de colaboracións de altura como as de Joaquín Sabina, Pablo Milanés ou Joan Manuel Serrat entre outras e traballa co produtor cubano Dagoberto González JR. O álbum, á venda desde o pasado 13 de maio, está dedicado á desaparecida nai do artista.
Amaro Ferreiro preséntase en solitario con Biólogo
Xénero: | 28 / 4 / 2016
Malia a ter unha longa carreira musical en diferentes proxectos como Los Piratas e a acompañar o seu irmán Iván, Amaro Ferreiro presenta aínda agora o seu primeiro proxecto en solitario. Biólogo achega doce temas na liña de pop habitual neste compositor. Aínda que o disco, editado por Warner Music sairá á venda o venres 29 de abril, Ferreiro preséntao ao público a noite anterior cun concerto no pub compostelán Sónar no marco do ciclo SantiAutor. Ata entón, o álbum pódese escoitar en exclusiva no web MondoSonoro.
Novedades Carminha decláranse Campeones del mundo
Xénero: | 4 / 4 / 2016
Da man de Ernie Récords, Novedades Carminha daba a coñecer o pasado 1 de abril o seu cuarto disco. Campeones del mundo amosa un xiro na carreira do grupo, cunha aposta polos ritmos máis bailables que non deixan fóra as letras irónicas e os tons punks dos seus comezos. Mesturas de rock e de electrónica coinciden en temas como Que Dios reparta fuerte, Lento ou Chispas relax que se poden escoitar tanto en formato CD como en plataformas dixitais. O álbum gravouse nos estudios sevillanos de La Mina con Hevi, de Malandrómeda como produtor.
REPORTAXE
Disco con etiqueta
Data.O vinte de maio o público e un xurado escollerán o Primeiro disco pop do ano de solistas galegos
