CORREO
RSS
Ti estás aquí > Inicio / Xéneros / Jazz/Blues
Música Jazz/Blues
A Estrada abre o Obradoiro de Música Moderna Carlos Barruso
Xénero: | 21 / 8 / 2019
A Fundación Cultural da Estrada, do Concello pontevedrés, acollerá de xeito inmediato o Obradoiro de Música Moderna Carlos Barruso, mantendo así o legado de ensino do saxofonista, multiinstrumentista e mestre Carlos Barruso, premio Honorífico Músicas ao Vivo na gala deste ano dos Martín Códax. Barruso, enfermo dun cancro en fase terminal, presentou onte no Estrada este proxecto xunto co edil de Cultura, Juan Constenla, esperanzado ante o feito de que non se perda así o que foi o seu traballo de ensino durante máis dunha década. O obradoiro, que xa está aberto á matriculación, ofrecerá dúas horas semanas e está enfocado na especialización en jazz, blues ou rock en complementariedade coas escolas de música ou conservatorio municipal, máis enfocadas cara o clásico ou popular, o obradoiro inclúe tamén o canto alén do instrumental. Un dos obxectivos de futuro deste Obradoiro de Música Moderna (OMM) na Fundación Cultural da Estrada é o de cumprir un dos desexos de Barruso e chegar a montar unha "Big Band" a medio ou longo prazo, para o cal desde a fundación se ofrecen intencións de continuidade do proxecto. Rubén Servide será o encargado principal de impartir as clases neste curso baixo a supervisión do aínda activo Carlos Barruso.
Joey de Francesco e Judith Hill son as estrelas deste ano na cita internacional
Xénero: | 8 / 7 / 2019
A cidade de Pontevedra xa ten preparada a programación da súa cita estival co jazz. A capital provincial ten unha longa traxectoria e tradición afianzada polo Seminario Permanente de Jazz e este ano vai pola 27ª edición do seu Festival internacional de Jazz e Blues entre o 23 e o 28 de xullo. Seis concertos de artistas de calado internacional conforman a columna vertebral do evento no que ademais hai unha interesante oferta de jam-sessions, un obradoiro, tres sesións de mediodía de "jazz de taberna" e unha ambientación musical de rúa na procura dos cidadáns. As prazas do Teucro e da Ferrería serán de novo os epicentros do grande concertos, todos de balde, e por elas pasarán a formación pontevedresa Mr.River; o cuarteto no que o guitarrista madrileño Álvaro del Valle lidera ao saxofonista redondelán Fernando Sánchez, o contrabaixista vilagarcián Pablo Patiño e o batería vigués David Puime; desde Filadelfia chega o Joey De Francesco Trío; a vocalista de Los Angeles Judith Hill, que chega acompañada dunha poderosa formación é un dos pratos fortes deste ano. Ademais tamén estarán en Pontevedra o vocalista e compositor de Minneapolis, Jose James e músiico pontevedrés Gabriel Peso pechará o programa na formación de trío xunto a David Ruíz ao contrabaixo e Miguel Asensio á batería. Outras cinco formacións serán as que fagan as jam-sessions no local da Gramola na Praza Méndez Núñez outras tres estarán durante a fin de semana ás 13 horas na Taberna do Jazz (Rúa de San Sebastián) cos concertos de Jazz de taberna. Un programa que demostra o respeto aos músicos locais e a vitalidade que mantén a cita pontevedresa con estes xéneros.
Cartel internacional para o festival Blues Museum de Lugo
Xénero: | 4 / 7 / 2019
Por terceiro ano Lugo acolle o Blues Museum, Festival Internacional de Blues. Unha cita musical de concertos ao aire libre e gratuítos entre o 19 e 0 21 de xullo. Un festival organizado pola Deputación de Lugo e o Concello de Lugo que achega a música ao museo provincial e á rúa. E Nesta edición cabe destacar o apoio á paridade na programación xa que o 50% do cartel é feminino. O Blues Museum aposta por artistas de nome internacional e estatal dos eidos do blues, gospel e o soul. O espazo dos concertos convive entre Patrimonios da Humanidade como a Muralla de Lugo, o Camiño Primitivo a Santiago de Compostela ao seu paso por Lugo e a Catedral de Santa María. A pianista e cantante británica Izo FitzRoy estará tanto na apertura como no peche do ciclo, polo que tamén pasarán Yolanda Brown, que dará dous concertos e un deles para público familiar, tamén pasarán por Lugo Ben Poole, Chris O´Leary Band, Watermelon Slim e a formación Aretha Soul Divas and The Silverbacks.
O Festival +QueJazz da Coruña crece e amplía espazos co Teatro Colón
Xénero: | 11 / 6 / 2019
Chega á súa sexta edición o Festival +QueJazz da Coruña coa intención de facerse un oco no circuítos de prestixio do xénero. Con ese obxectivo este ano suma o espazo do Teatro Colón aos clubs Garufa Club e Jazz Filloa, tradicionais e inescusables abandeirados do jazz na cidade herculina. Alén diso o evento presenta na súa programación doce propostas entre o 3 e o 20 de xullo encabezadas no cartel por unha figura internacional do talle de Bill Evans, que en compañía de The Spy Killers abrirá o festival o día 3 no Teatro Colón. O festival conta por vez primeira co apoio do Concello e a esta cabeza de cartel engádense figuras como o pianista cubano afincado en Nova York Dayramir González, talento emerxente do jazz latino, que estará no Garufa o 12 de xullo. Polo mesmo escenario pasará a banda madrileña Mighty Vamp (6 de xullo). Nas actuacións previstas no Jazz Filloa, destacan Ton&Teira, unha de vibráfono e guitarra para dar vida a temas que van desde o clásico jazz a músicas suramericanas, flamenco ou temas de composición propia. Pecharán o ciclo o día 20 no Garufa Club o galego Valentín Caamaño coa súa proposta en cuarteto The Blind Wrestler, xunto a Lar Legido, Xosé Miguélez e Alfonso Calvo e máis o trío Puerta Sur.
Desaparece o mítico Dado-Dadá Jazz Club
Xénero: | 6 / 5 / 2019
A piques de cumprir os corenta anos como un dos clubs de jazz de referencia de Galicia, o Dado-Dadá Jazz Club de Santiago ven de pechar a súas portas, segundo informa o xornal compostelán El Correo Gallego. O local pechou por un traspaso no que vai incluída a perda do nome e unha profunda reforma para transformalo nunha sala que seguira mantendo como actividade a música en vivo e os espectáculos baixo o nome de eMe Music Club e aberta a xéneros musicais de estilos variados. Aberto desde 1980 por Carlos Asorey (finado en 2007) e logo rexentado pola súa dona Carmen Eixo, o Dado-Dadá Jazz Club formou parte dun escaso listado de salas que desde finais dos anos setenta apostaron pola música de jazz no país e das que poucas seguen manténdose, unha menos agora. Ademais de músicos de jazz galegos, estatais e internacionais, polo seu escenario pasaron cantautores, músicos folk, humoristas e magos, dentro destes últimos o club santiagués era unha parada obrigada nas súas xiras.
Santiago inaugura o primeiro ciclo Primavera Jazz
Xénero: | 6 / 5 / 2019
Finalmente Santiago parece terlle achado un oco para o jazz na súa axenda de eventos. Entre os días 8 e 12 de maio un total de 15 artistas encherán de jazz dous espazos públicos da capital galega e varios locais hostaleiros no que será o primeiro evento dedicado a este xénero musical nunha cidade na que sempre estivo presente a través da súa programación de concertos en salas ou das súas festas . A cabalo entre os formatos de ciclo e festival a primeira edición do Primavera Jazz aparece como unha oferta que ademais serve para enlazar culturalmente os espazos da zona nova de Santiago e do casco monumental. A programación, centrada neste estilo musical ven convenientemente impulsada dende o Concello, o que fai posibles os concertos nos locais de hostalaría en virtude da Lei de Espectáculos Públicos de Galicia, e conta coa colaboración da Asociación Veciñal Raigame, do Ensanche, e da Asociación Cultural Cidade Vella.
Xacobe Martínez Antelo presenta 'Capturas'
Xénero: | 23 / 4 / 2019
O contrabaixista compostelán Xacobe Martínez Antelo presenta o seu novo traballo discográfico como líder de formación. Capturas (autoeditado, 2019) é o segundo disco gravado en formación de trio, existindo outros dous gravados en formación de cuarteto e quinteto. O batería Max Gómez repite nesta formación con Martínez Antelo e complétase o trío co saxo tenor de Xosé Miguelez. Capturas presenta oito temas de composición propia de Xacobe Martínez. Un traballo profundo, maduro e que está ancorado no rpesente como o demostran os títulos das pezas, desde A política lingüística de Alberte co que abre o disco a Conciliade malditos, Non alimenten ó Troll ou O precariado. Composicións todas elas orixinais e inspirada en feito cotiáns e realidades agresivas que forman parte do actual contexto vital. O disco, presentado en formato digi-pack, foi gravado, mesturado e masterizado este pasado mes de marzo nos estudos Savik Sound de José Trincado, "Triqui", un sitio habitual de músicos de jazz e onde Martínez Antelo xa ten gravado outros traballos. O disco está en plataformas dixitais e pode adquirirse no web de Martínez Antelo.
Valentín Caamaño presenta o seu terceiro disco 'The blind wrestler'
Xénero: | 31 / 1 / 2019
O guitarrista e vocalista Valentín Caamaño presenta hoxe en Compostela The Blind Wrestler (TinyMoon Records), o terceiro disco da súa traxectoria profesional tras Green with envy (Free Records, 2017). Malia que o disco xa leva case un ano no mercado ata agora Caamaño non o presentara na súa cidade e o fará cunha formación en cuarteto, ampliada respecto ao disco no que se presenta en trío, con Alfonso Calvo ao contrabaixo e LAR Legido á batería. O saxo tenor de Xosé Miguélez, xa presente en dous dos sete temas de The Blind Wrestler engadirase agora na interpretación da totalidade do repertorio. O disco presenta cinco temas autoría do propio Caamaño, un de Alfonso Calvo e a versión do tema de Irving Berlin How Deep Is The Ocean. Jazz, swing e outros sons cos que Caamaño adoita cociñar as súas composicións están presentes no álbum. O disco gravouse nos estudios Bruar, con Xabier Ferreiro como enxeñeiro de son. A Sala Riquela acolle hoxe ás 21:00 horas este concerto en entrada libre.
Abe Rábade Trío presenta hoxe o novo disco 'Doravante'
Xénero: | 18 / 1 / 2019
Abe Rábade Trío presentan cun concerto hoxe no Circulo de Bellas Artes de Madrid o seu novo traballo discográfico Doravante (Nuba + Karonte Records, 2018). No disco Abe Rábade (piano), Pablo Martín Caminero (contrabaixo) e Bruno Pedroso (batería) ofrecen once temas entre os que abundan as composición do pianista pero onde tamén ahí sitio para a interpretación de pezas tradicionais galegas como Alalá das Mariñas e O paxaro cando chove. Ademais o trío tamén fai seus temas de outros como é o caso Just one of those things de Cole Porter, In love in vain de Jerome Kern ou o tema de pehe do álbum, Hasta siempre comandante, no que o trío de jazz interpretan o tema de carlos Puebla y sus Tradicionales. O disco ábrese coa singular peza Revolutionary, na que Rábade pon música a unha entrevista realizada á activista norteamericana antirracista e feminista Angela Davis en 1970. Doravante xa está dispoñible desde hoxe nas plataformas dixitais e á venda en tendas físicas e dixitais. O concerto de presentación enmárcase no ciclo Jazz Círculo e comezará ás 21:30 horas.
Los Hermanos Zapruder publican na rede o seu terceiro álbum
Xénero: | 7 / 1 / 2019
Logo de catro anos de silencio discográfico, Los Hermanos Zapruder voltan á palestra cun novo álbum que, como os anteriores, está dispoñible no seu Bandcamp. Os dez novos temas de Long Way Zaphome manteñen a orientación de jazz, soul e R&B da banda, con algunhas experimentacións como os toques disco de Cheater Man ou achegamentos ao funkhy. A voz de Li'l Eba continúa á fronte da formación de Gondomar, con Germán Prieto á guitarra, Simón López ao baixo, Iván Trigo na batería e Diego Sampedro a se ocupar dos teclados.
REPORTAXE
Unha escola de improvisación
Data.O Seminario Permanente de Jazz de Pontevedra tira o seu cuarto disco e consolídase como centro de formación neste estilo musical
