CORREO
RSS
Ti estás aquí > Inicio / Xéneros / Folk
Música Folk
Cantigas de mulleres achega unha escolma de voces femininas
Xénero: | 13 / 12 / 2012
Guadi Galego, Marful, Sés, Rosa Cedrón e Cristina Pato, Doa, María Manuela, Mónica de Nut ou Malvela son algunhas das voces femininas que se atopan en Cantigas de mulleres. Uxía Senlle coordinou este proxecto que lanza Fol Música e que compila 17 temas cantados, e nalgúns casos compostos por músicas galegas. Con este disco reivindícase a importancia do papel da muller no noso panorama sonoro. "Somos moitas as mulleres na composición, non só as intérpretes. Non somos só voces transmisoras do que outros escriben....cada vez somos máis as mulleres autoras: creadoras de textos e melodías que nos expresan e reivindican; voces que atronan contra o silenciamento e entoan cántigas tecidas coas nosas emoción", sinala Uxía na presentación do proxecto.
Fernando Barroso e Luís Peixoto lanzan Pop
Xénero: | 12 / 12 / 2012
Non contentos co seu traballo no seo de Assembly Point, e da participación en bandas como Os Cempés, Anxo Lorenzo Band ou Riobó, Fernando Peixoto e Luís Barroso debutan como dúo no campo da música de raíz. Pop, o seu flamante disco, achega 15 temas, na practica totalidade de composición propia, que amosan as mestría coas cordas dos dous músicos. Guitarras, bouzouki, mandola, guitarra portuguesa, viola braguesa, cavaquinho, mandolina ou banjo mestúranse na música deste traballo, que se gravou no estudio A Ponte.
Chega o IX Día do Orgullo Gaiteiro
Xénero: | 10 / 12 / 2012
O Día do Orgullo Gaiteiro, a celebración que a aula de música tradicional Gomes Mouro organiza cada ano en Ourense, chega á súa IX Edición os vindeiros 13, 14 e 15 de decembro. Emilio do Pando, recuperador do birimbao en Galicia e mais o artesán e gaiteiro Rubén González serán homenaxeados nesta xeira. Ademais, haberá conferencias como a de Cástor Castro sobre O gaiteiro de texas, un curso de gaita de fol, concertos e obradoiros. Tamén se presentará Sanfonices, libro CD de homenaxe a Faustino Santalices que edita Difusora.
Rodrigo Romaní presenta As arpas de Breogán
Xénero: | 3 / 12 / 2012
O instrumento musical que máis caracterizou a carreira musical de Rodrigo Romaní reclama todo o protagonismo en As arpas de Breogán, terceiro disco do músico. O proxecto conta con duas arpas, voces, contrabaixo e percusión en formato de cuarteto, acompañados por ocarinas ou elementos de ambientación electrónica. O volume recolle adaptacións de temas tradicionais, como Mi morena canda a composicións propia como a suite As arpas de Breogán, nos que o autor se achega á música clásica.
Chegan as I Xornadas Arredor da Música Tradicional
Xénero: | 27 / 11 / 2012
A Asociación de Gaiteiros Galegos organiza as I Xornadas Arredor da Música Tradicional, un encontro que se desenvolverá os vindeiros 15 e 16 de decembro en Lugo. O evento, que está orientado a afeccionados e profesionais deste sector, servirá para presentar diferentes proxectos e investigacións arredor do noso folclore musical, así como o de Zamora, Portugal, Euskadi ou asturias. Iniciativas didácticas como Son do fol, o traballo do grupo Os Chichisos, o Cancioneiro de Cabana de Bergantiños ou as últimas investigacións de Pablo Carpinteiro son algunhas das iniciativas que se derán a coñecer neste encontro.
Virandeira debuta con Sons do Atlántico
Xénero: | 19 / 11 / 2012
Cun título que expresa a vocación céltica da súa música, Virandeira ten xa nas tendas Sons do Atlántico primeiro disco deste grupo vigués. Violín, teclado e ventos engádense ás gaitas neste traballo que achega 11 temas, na súa maior parte instrumentais. O álbum sae da man de inquedanzas sonoras, e está á venda vía web e en establecementos comerciais, ademais de poder escoitarse en plataformas como Spotify. O grupo presentará no vindeiro Culturgal, en Pontevedra, este traballo.
Mel de Meiga debuta con Crecente
Xénero: | 16 / 11 / 2012
Crecente é o título do álbum de debut da formación Mel de Meiga, o novo proxecto musical de Eva Carreras. A cantante, coñecida por ter participado no programa Operación Triunfo, vira a súa carreira cara ao folk cun grupo no que conta con antigos músicos de MutenRohi. Canda a ela, Carlos Campos “Kakus”, Iván Salgado, Pablo Dalama, Loren Tabarés, Leonel Vignola e Luis Manuel Pérez completan a formación. O seu primeiro traballo, editado por Inquedanzas Sonoras, presenta dez temas nos que predomina o folk con compoñente vocal e toques pop que se deixan sentir no emprego do baixo ou da batería.
O grupo Castro-Floxo de Ourense leva o premio IAR de Folclore
Xénero: | 12 / 11 / 2012
O prestixioso premio IAR de Folclore foi para o grupo Castro-Floxo de Ourense na súa XXI edición. O galardón, que organiza o grupo de baile IAR da asociación de vecinos de O Castrillón-Urbanización Soto, da Coruña, recoñeceu o traballo dos ourensáns na recuperación do patrimonio inmaterial. Castro-Floxo naceu en 1977 da man do etnógrafo Xaquín Lorenzo, Xocas, e ten na actualidade 1.500 membros. O vindeiro 17 de novembro a Ágora coruñesa acollerá a gala de entrega, na que actuarán o propio grupo organizador e mais o grupo de música tradicional D'Atura.
Os irmandiños de Vincios debutan con Monte Galiñeiro
Xénero: | 12 / 11 / 2012
Logo de cinco anos de traballo na música de raíz, o grupo Os Irmandiños de Vincios acaba de publicar Monte Galiñeiro, o seu primeiro álbum. Cun son no que buscan ecos do das murgas tradicionais, o grupo está composto por oito membros que engaden a instrumentos como a gaita ou o tamboril, saxo, clarinete e acordeón. En total presentan 16 temas, entre tradicionais e propios, interpretados cun xeito que quere lembrar os grupos galegos dos anos 30. A vindeira cita para os interesados en coñecer este traballo será o 17 de novembro no Centro Cultural de Vincios. Con posterioridade, o grupo estará tamén presente no Culturgal.
Luar na Lubre celebra os seus 25 anos cun recompilatorio
Xénero: | 8 / 11 / 2012
Corenta e cinco cancións. Un CD con temas instrumentais, outro cos grandes éxitos do grupo, un terceiro de dúos e mais un DVD cunha actuación ao vivo en Compostela e sete videoclips. Estes son os contidos de Sons da Lubre nas noites de luar, a caixa coa que Luar na Lubre celebra os seus vinte e cinco anos no mundo da música. Entre as voces que participan nas novas versións de temas do grupo, atopamos nomes coma Lila Downs, Luz Casal, Ismael Serrano, Adriana Valera, Pat Kilbride, Pedro Guerra ou Diana Navarro. O grupo presentaba onte no Teatro Principal de Compostela este traballo, que se poderá ver ao vivo en Lugo o vindeiro 14 de decembro e en Ourense o 16.
novidades discográficas
Repichoca
Tiruleque
Alvela
FAIA
Feira
De Ninghures
Tradimensional
Ailá
Vinde todas
Carmela
REPORTAXE
Aprender das cantigas
Data.Antón Castro aproveita a nosa música tradicional para ensinar solfexo aos seus alumnos
