CORREO
RSS
Ti estás aquí > Inicio / música en galego
Música en galego
Xistra de Coruxo amplía fronteiras con A Charurga
Xénero: | 5 / 6 / 2014
"Mitade charanga, mitade murga" é como definen Xistra de Coruxo o seu último álbum. A Charurga presenta dezaseis temas nos que estes músicos queren revivir "aquel proceso galeguizador que os nosos antecesores fixeron con todo tipo de melodías, incluídas as de procedencia non galega, e que agora forman parte do arquivo da Asociación Gaiteiros dá Xistra". Ghotas, pasodobres, polcas ou rumbas conviven con muiñeiras, marchas procesionais, cantos de caberna e mesmo un samba. Segundo explica na presentación do traballo "son melodías e ritmos popularizados por cuartetos, murgas, charangas e mesmo por aquelas incipientes orquestras da primeira metade do século XX que neste proxecto aparecen unificadas, reharmonizadas e reinterpretadas dun xeito libre".
A Quenlla musica a Díaz Castro en Desorballando Outonos
Xénero: | 4 / 6 / 2014
Quince poemas de Díaz Castro musicados son a proposta que fai o grupo A Quenlla en Desorballando Outonos. O novo disco da formación, que chega só 2 meses despois do seu último traballo, recupera uns versos do homenaxeado no Día das Letras "que amosan ao autor en distintas situacións e distintos intres da súa vida, para poñerlles a harmonía recreada nos seus soños e nos nosos anceios, con voz sobre a sinfónica orquestración da Terra e no preciso poemario que máis o define", segundo explica a presentación do traballo. Gravado nos estudios do Concello de Arzúa, o proxecto presentouse ao público o pasado 18 de maio no marco da I Festa da Fala de Guitiriz.
Tonecho Castelos & Pablo Esqueira debutan Nas Mariñas
Xénero: | 3 / 6 / 2014
Da man de Inquedanzas Sonoras está xa nas tendas Nas Mariñas, o disco de debut do dúo Tonecho Castelos & Pablo Esqueira. Temas tradicionais e composicións de autor con aire folk altérnanse nun traballo que parte do encontro entre o violín e o acordeón como base, acompañados por instrumentos como o bouzouki ou o piano. O proxecto conta tamén cunha versión didáctica pensada para un público familiar.
O Real Coro Toxos e Froles publica o disco do seu centenario
Xénero: | 30 / 5 / 2014
Un repaso polos temas que marcaron a súa historia é a primeira proposta que fai o Real Coro Toxos e Froles de Ferrol para conmemorar o centenario que cumpre en 2015. 100 anos achega 14 temas entre so que se atopan clásicos de Pascual Veiga ou Juan Montes ou as foliadas de Comba, de Corrubedo e de Cortegada, as pandeiradas de Lamas e do Grobe, ou cancións como Lonxe da terriña, Ferrolada e San Benitiño, entre outras. O Teatro Jofre de Ferrol acolle mañá o concerto co que se inician as celebracións do centenario e que servirá de presentación do novo traballo. A partir das 22:30, a formación actuará acompañadao da Coral de Ruada de Ourense e do grupo de baile Cantigas e Agarimos, de Santiago de Compostela. O álbum, editado por PAI Música gravouse no estudio Casa de Tolos.
Oito grupos de música explican nun vídeo por qué cantan en galego
Xénero: | 30 / 5 / 2014
Nao, Machina, Arrhythmia, Zenzar, Superoito, Familia Caamagno, Caiman do río Tea e Lydia Botana son os protagonistas do vídeo E ti porque cantas en Galego?. O blog Galegueando publicaba o pasado 16 de maio esta iniciativa coa que quere promover o rock na nosa lingua.
O coro Cantares do Brión publica o seu primeiro disco de repertorio
Xénero: | 28 / 5 / 2014
O Coro Tradicional Cantares do Brión naceu en 2010 e recolle neste seu primeiro disco de título Arruídos o repertorio destes catro anos de actividade musical. Ademais de pezas tradicionais dos catálogos doutros coros máis veteranos como Aires da Terra, Cántigas da Terra, Cantigas e Agarimos, Coral De Ruada e Toxos e Froles Arruídos inclúe obras de nova creación, composición dos membros do coro Luís Correa “Caruncho” e Pablo Rial Salgueiro, que é o director da agrupación, súas son as pezas Tríadas do vento no mar, Camiño de Ourense, Na Touba do Brión, Foliada de Vincios, Has de cantar; e outras con harmonización e arranxos para coro como é O carro, de Mero Iglesias, con letra de Manuel María. Cantares do Brión está integrado na actualidade por 60 persoas, a maioría delas do Val Miñor, fundamentalmente da parroquia de Vincios, pero tamén doutras comarcas como O Condado, O Baixo Miño, Soutomaior ou Vigo. O disco foi gravado no Centro Cultural de Vincios por Planta Sónica e mesturado en Planta Sónica.
The Lost Omelette-makers chegan a Discos da Máquina
Xénero: | 27 / 5 / 2014
O segundo LP de The Lost Omelette-makers viu a luz este mes como o novo lanzamento de Discos da Máquina. Daniel Santos é o único membro do grupo e asina os temas de A calor dun corpo estraño, o seu segundo LP con este alias. Pop lo-fi con letras desquiciadas e arranxos traballados amosan a creatividade deste proxecto, que está a facer a súa xira de presentación. Canda a sete cancións de composición propia, Santos inclúe Romeo&Cuneta, curiosa versión da Romeo y Julieta popularizada por Karina que ambienta nas obras das compostelá rúa de San Pedro.
Berros do Castro recupera o patrimonio musical da comarca ártabra
Xénero: | 26 / 5 / 2014
Un libro-CD de 120 páxinas que repasa solitas, cuartetos, bandas ou fabricantes de instrumentos que traballaron nas comarcas de Ferrol, Eume e Ortegal desde o século XIX. Esta é a proposta que fai a Asociación Berros do Castro en Tanto encanto reunido, un proxecto que inclúe 15 pezas nas que esta agrupación reinterpreta parte do repertorio destes músicos históricos. O volume conta con colaboracións como as de Daniel Bellón, Pablo Carpintero ou Alonso Caxade na música e textos de Pablo Carpintero e Xosé Varela, e está publicado por Edicións Embora.
Ataque Escampe retornan con O disco vermello
Xénero: | 23 / 5 / 2014
A emigración, a contradición entre a evasión e o compromiso, historias universais contadas desde uns puocos. Ataque Escampe apostan por un son cunha maior presenza de bases electrónicas e presentan O disco vermello. Letras coidadas e reivindicativas nas que se mesturan ritmos como "o pop e o dub e o rap de mentira e o soul de Filadelfia", segundo eles mesmos explican no texto de presentación. Once temas dispoñibles en Bandcamp e que en breve sairán en formato CD. O álbum foi gravado por Arturo Vaquero nos estudios Abrigueiro e que ven a luz da man de Discos da Máquina.
Brinca Vai! propón unha viaxe musical polos doce meses do ano
Xénero: | 22 / 5 / 2014
O Samaín, o Magosto, o Apalpador, o Entroido ou o verán teñen cadanseu tema en Brinca Vai!. O novo disco de Paco Nogueiras propón unha viaxe polos doce meses do ano noutras tantas cancións que repasan festas, xogos populares e historias. O proxecto, editado por Kalandraka nun libro-CD-DVD conta cun web de apoio no que se publicarán actividades didácticas e contidos extra. O espazo Libros para Soñar de Vigo acolle este venres 23 a presentación do proxeccto.