MeGA

O novo disco da banda grovense Nadadora xa está nas tendas desde hoxe mesmo

Xénero: Pop | 28 / 5 / 2007 + VINCULO

Hoxe sae á venda o segundo álbum de longa duración do grupo Nadadora. A carreira deste sexteto afincado n´O Grove xa conta con dous discos anteriores, o mini CD "Aventuras dentro de cajas" en 2004 e o álbum "Todo el frío del mundo" en 2005 que conseguiron que este grupo fose collendo un espazo propio na música e aumentando paulatinamente o número de seguidores. O seu novo álbum "Hablaremos del miedo" ten 10 cancións cantadas en castelán e algunha, “Todo o mundo protesta", en galego como xa é habitual nos anteriores traballos. O disco, editado polo mesmo selo dos anteriores, Jabalina Música, foi gravado nos estudios Círculo Polar de O Grove e masterizado por Alan Douche. e incorpora como novidade a introdución de instrumentos de corda e vento, así como arranxos orquestrais.

Máis información en Sono-Tone

Cultura pesenta o primeiro Certame de Bandas de Música Populares con outras medidas de apoio a estes grupos

Xénero: Clásica/Lírica | 24 / 5 / 2007

Entre os días 23 e 25 de novembro deste ano celebrarase en Santiago un concurso no participarán 21 nadas do país tras pasar un proceso previo de seleción. Así se anunciou tras unha reunión da conselleira de cultura, Ánxela Bugallo, cos representantes da Federación Galega de Bandas de Música Popular. O certame está concibido como un punto de encontro entre as bandas do país e forma parte dun programa de accións coas que a consellaría quere apoiar e potenciar estas formacións cun investimento total de 250.000 euros. Estes cartos dividiranse entre o devandito concurso, a organización de encontros entre bandas, a participación destas en competicións internacionais, o financiamento de actividades formativas, estudos e renovación e galeguización do repertorio así como un apoio específico para a banda da federación.

Máis informaión en Galicia Hoxe

As firmas dedicadas á xestión de concertos coordínanse na Asociación Galega de Empresarios Musicais

Xénero: Miscelánea | 24 / 5 / 2007

O proceso de reorganización do sector da música galega continúa. Desta volta, "El País" achéganos a nova da vindeira constitución da Asociación Galega de Empresarios Musicais (AGEM). Esta nova entidade quere agrupar as firmas que traballan na música en directo e conta xa con trece asociados, entre eles Nordesía, Nocturna, XXL Producións, La Fábrica de Chocolate, Nalgures ou Producións Independentes Culturais.

Máis información en El País e nas nosas reportaxes sobre música

O grupo Xochilmica grava na Casa das Crechas un tema para o seu próximo disco

Xénero: Folk | 23 / 5 / 2007

Este xoves día 24 o grupo Xochilmica entrará no pub Casa das Crechas de Santiago para executar e gravar en directo un dos temas que encherán o seu próximo disco. Con esta finalidade sobre as 22:30 horas reuniranse no local compostelán con colaboradores de luxo como o mestre gaiteiro Edelmiro Fernández, con Pedro Pascual (Marful, Talabarte Trio), con Santi Cribeiro e Quin Fariña (Berrogüetto) , Manuel Amigo (Dhais) e as voces das pandereteiras de “Cantigas e Agarimos”. A Casa Das Crechas, un dos maiores santuarios da musica folk en Galicia fai este ano o seu vinte aniversario e vai servir a Xocilmica coma marco perfecto para esta gravación. Xochilmica ven actuando desde o ano 2003, o seu primeiro disco “5 elementos gravouno como resultado de ter gañado o “V Certame de Música Folk de Radio Obradoiro”.

Os Cempés despediranse do seu público na gala dos VI Premios Opinión de Música Folk

Xénero: Folk | 21 / 5 / 2007

O vindeiro 11 de outubro o escenario do Teatro Colón na Coruña acollerá a gala e entrega dos VI Premios Opinión de Música Folk e xa está confirmado o cartel de músicos que actuarán nesta celebración. A gala servirá como colofón de despedida para o grupo ferrolán Os Cempés, que se disolve despois dunha ducia de anos en activo e dará aquí o que probablemente sexa o seu último concerto. Tamén o trío Nordestin@s, grandes protagonistas do ano discográfico acompañarán coa súa actuación esta gala, así como está prevista a actuación do gaiteiro Xosé Miguélez, primeiro intérprete deste instrumento en posuír un título oficial d mesmo. A voz de Maite Dono pechará as actuacións da gala acompañada por un piano.

Máis información en La Opinión

Bota a andar Mega, o soportal de Culturagalega.org dedicado á música

Xénero: Miscelánea | 15 / 5 / 2007

Grupos, discos, empresas, concertos, novidades, análises, cancións, vídeos... Todo o que teña que ver coa música no noso país ten un oco en Mega. "Música en Galicia" é o lema do novo soportal de Culturagalega.org sae hoxe á rede coa intención de cubrir un ámbito da nosa cultura que se atopa en plena transformación. Ao xeito dos outros soportais do noso medio, este espazo quere ser un espazo de referencia que recolla toda a actualidade do sector.

Máis información en Mega

Xabier Díaz rescata músicas populares no seu segundo traballo en solitario

Xénero: Folk | 15 / 5 / 2007 + AUDIO + IMAXES

O segundo traballo de Xabier Díaz “Coplas Para Icía“ (Músicas de Salitre,2007) xa ten anunciada a súa chegada ás tendas para a segunda quincena deste mesmo mes. En “Coplas Para Icía” Díaz ten como compañeiros de viaxe ao percusionista e gaiteiro Pedro Lamas e o acordeonista Suso Iglesias. Neste disco Díaz rescata músicas do pobo tomadas do seu propio arquivo, compilación froito dun extenso traballo de campo entre os anos 1990 e 2000. A presentación en concerto está prevista para o vindeiro 22 de xuño en Culleredo ( A Coruña ) . Xabier Díaz foi finalista aos Premios da Academia da Música no 2005 polo disco “Músicas de Salitre“ que fixo xunto con Guillermo Fernández e co que acadou o 3º posto na edición dos galardóns La Opinión do mesmo ano.

Entre Trastes fai un percorrido pola música celta para instrumentos de corda no seu primeiro disco

Xénero: Folk | 15 / 5 / 2007

A discográfica ourensá Zouma Records ven de sacar á venda o disco “Entre Trastes”, primeiro da formación do mesmo nome. Álvaro Iglesias ao contrabaixo, Daniel Vilar á guitarra e Xosé Liz ao bouzuki conforman este trío de virtuosos das cordas. Todos eles teñen xa unha ampla experiencia na música tradicional e actuaron xunto a artistas como Carlos Núñez, Pancho Álvarez ou Rodrigo Romaní entre outros. Álvaro Iglesias e Xosé Liz tamén forman parte do grupo Aran. Nos rece temas deste primeiro disco presentan un percorrido polas posibilidades que a música celta presenta para os instrumentos de corda.

Preséntase a Asociación Galega de Músicos Alternativos

Xénero: Alternativa | 14 / 5 / 2007

Os movementos de integración que están a soprar no sector da música chegan aos propios creadores. Acaba de se facer pública a creación da Asociación Galega de Músicos Alternativos (AGMA), un colectivo que pretende unir autores e intérpretes e que nace cunha vocación claramente profesional. Entre outros obxectivos, a AGMA quere mellorar as condicións de traballo, asesorar os seus socios, e servir como foro de debate sobre os problemas do sector.

Máis sobre a situación do sector nos nosos arquivos

A segunda edición do programa Vai de Camiño achegan 181 actuacións de danza, música e maxia

Xénero: Miscelánea | 11 / 5 / 2007

Nada menos de 118 vilas dos concellos polos que pasan as diferentes rutas xacobeas contarán este verán con 181 actuacións de música, danza e maxia. A segunda edición do programa Vai de Camiño contará coa presenza de Milladoiro, Uxía, Leilía, Mercedes Peón, Deluxe ou Berrogüetto, entre moitos outros.A proposta, organizada polo Xacobeo, duplica amplamente o número de actuacións do pasado ano.

Máis información en Galicia Hoxe, en Xornal Galicia e en La Voz de Galicia