CORREO
RSS
Ti estás aquí > Inicio / música en galego
Música en galego
Os boirenses Supersandwich gañan a primeira edición do certame “Nsaio no camiño”
Xénero: | 17 / 9 / 2007 + VIDEO
Na final celebrada o pasado sábado máis de catro milleiros de persoas reuníronse no Pazo de Feiras e exposicións de Lugo para ver as actuacións dos seis grupos finalistas e a posterior actuaciópn do grupo Los Suaves. Supersandwich, formado por once músicos, acudiu como finalista na categoría de mestizaxe do certame. Os composteláns “Pito de Pikasso” foron finalistas na modalidade de rock, o grupo de Ponteareas Capitán Furilo o foron na categoría de pop mentres de Colectivo Oruga, Coanhadeira e Solemne eran finalistas nas categorías de novas tendencias, folk e hip-hop respectivamente. Supersandwich mestura a rumba o ska e o rock sobre unha base funky. O premio, valorado en 30.000 euros, consiste na gravación e promoción dun disco. A Dirección Xeral de Xuventude anunciou a intención de editar un disco coas cancións dos finalistas e a preparación dunha segunda edición deste certame.
Máis información en El Progreso
Os compositores galegos de finais do XIX trasladaron á música a identidade do país
Xénero: | 14 / 9 / 2007
Cando se cumpren cen anos da estrea oficial do himno galego na Habana, a Universidade de Santiago celebra unhas xornadas para pór en común diferentes visións sobre o papel identitario que desenvolveu a música no século XIX. Precisamente un dos profesores participantes das xornadas, Luís Costa, explica que os coros e os compositores galegos desenvolveron un papel fundamental no desenvolvemento da nosa identidade. Na súa opinión, tanto Aires da Terra, que marcou os camiños do coralismo, como Veiga, Montes ou Chané como directores de diferentes orfeóns, foron quen de ofrecer música con carácter voluntario.
Máis información en Galicia Hoxe
Unha edición facsímile recupera o “Cancioneiro Gallego” de Bal y Gay
Xénero: | 13 / 9 / 2007
Vigo acollerá a presentación a vindeira semana unha edición facsímile do “Cancioneiro Gallego”. Esta obra do músico Bal y Gay, considerado un dos piares da nosa etnomusicoloxía, foi a primeira que se desenvolveu a través dunha recollida no rural e supuxo unha ruptura cos sistemas de traballo previo. O libro conta cun prólogo do catedrático da USC Carlos Villanueva, que reclamou a necesidade de recuperar material inédito vencellado a esta obra.
Máis información en Galicia Hoxe e nos nosos arquivos
O segundo disco de Fanny + Alexander saerá á rede no vindeiro outubro
Xénero: | 12 / 9 / 2007 + AUDIO + VIDEO
O segundo disco longo do dúo compostelán Fanny+Alexander verá a luz o vindeiro mes de outubro no netlabel A Regueifa a súa obra baixo licenza Creative Commons. Co título de "Finais dos 70s, comezos dos 80s" Noel Feáns e Efi Arias presentan nove temas, sete propios e dúas versións de Fuxan os Ventos e The Smiths, nos que continúan o vieiro iniciado no seu debut Lusco e Fusco mesturando pop, electrónica, rock, hip-hop e música tradicional galega. As letras serán, de novo, adaptacións de obras de poetas galegos, dende Elvira Riveiro a Pilar Pallarés pasando por Daniel Salgado, Carvalho Calero e Lois Pereiro. O primeiro “single”, “Danzarei para ti (se botas outra moeda)”, xa pode escoitarse no seu Myspace, mirarse en Youtube e e descargarse en mp3 na Regueifa.
María do Ceo presenta un novo disco no que viaxa musicalmente entre Camariñas e Lisboa
Xénero: | 11 / 9 / 2007
A cantante luso-galega María do Ceo presentará este mércores , día 12, ás 12 da mañá, no Café Isaac, de Ourense o seu novo disco “Tan lonxe Tão lonxe”. No seu sétimo disco, a fadista nacida en Oporto presenta unha dúcia de temas nas que fai “unha viaxe de Camariñas a Lisboa” recollendo estilos e ritmos diferentes de cada lugar. O disco conta cunha presentación, a xeito de prólogo, escrita po Patricia Kraus. A cantante ten en proceso un seguinte traballo discográfico previsto para a primavera do 2008 que levará por título Moraima e no que cantará poemas de Curros Enrriquez, Celso Emilio Ferreiro, etc.
A Sala Capitol de Compostela poderá cancelar a súa programación musical
Xénero: | 7 / 9 / 2007
En poucos anos, a Sala Capitol, ubicada en Santiago de Compostela, converteuse nun referente galego e estatal na súa programación musical, pero o seu propietario, Francisco Sanín, anunciou que esta actividade poderá finalizar en outono, “debido á falta de apoios”. Desde a súa apertura, a sala tivo un complicado encaixe administrativo para delimitar os usos e os horarios de apertura deste antigo cine compostelán. Agora, Sanín anuncia que, de non frutificar as negociacións co Concello de Santiago para estender o horario de apertura, finalizará esta programación. Recentemente, Santiago xa viu o peche doutros dous espazos emblemáticos de programación cultural: a Sala Yago e a Sala Galán.
Máis información en El País e La Voz de Galicia
O novo selo Kamikaze Música presentará tres lanzamentos discográficos antes de rematar o ano
Xénero: | 4 / 9 / 2007
Con “As palabras espidas” dos galegos NAO inaugurarase o vindeiro 12 de novembro o catálogo discográfico de Kamikaze Música a nova editora creada pola empresa viguesa de servizos e xestión musical Kamikaze Producións. O disco de NAO ven de rematar a súa gravación nos estudios Garate de Andoain baixo a produción de Kaki Arkarazc, a formación de rock metaleiro presenta once temas novos neste seu primeiro traballo discográfico. Kamikaze Música prepara tamén dous discos a cargo dos grupos lusos Peste & Sida e Bob Da Rage Sense, de punk e Hip-Hop respectivamente, que se agarda que saia á rúa o 26 de novembro.
Brais Monxardín faise co premio Constantino Bellón de gaita tradicional
Xénero: | 3 / 9 / 2007
Os cinco finalistas do premio Constantino Bellón, convocado polo Ateneo Ferrolán, tiveron que interpretar este venres pasado no Teatro Jofre de Ferrol dúas pezas, unha composta por Iván Costa e outra da súa propia creación. Ao final, o xurado escolleu ao gaiteiro da Fonsagrada Brais Monxardín como gañador da edición anual deste prestixioso certame. Monxardín levará un premio de 3.000 euros. O xurado tamén concedeu dous accésit: un para Daniel Lumbreras, procedente de San Sebastián, e outro para Pablo de Vigo.
Sobre o Premio Constantino Bellón na nosa hemeroteca; a noticia no Diario de Ferrol
O Ateneo Ferrolán outórgalle a Gaita de Ourto ao artesán Rubén González
Xénero: | 28 / 8 / 2007
Gaiteiro e artesán de oitenta e dous anos, Rubén González foi galardoado onte co premio Gaita de Ouro polo Ateneo Ferrolán. Esta distinción, que fai parte dos premios Constantino Bellón, recoñece o traballo no campo da música tradicional. A Gaita de Prata foi para o coro Cántigas da Terra, da Coruña, polo seu traballo de divulgación desde 1916.
Máis información no Diario de Ferrol e nos nosos arquivos
O grupo Sacha na horta gaña o certame A Polo Ghit co tema “Biocultivos”
Xénero: | 20 / 8 / 2007
Logo de moito escoitar e votar, esta fin de semana fíxose público por fin o nome do grupo gañador da edición 2007 do certame A polo Ghit, que organizan a Radio Galega e Vieiros. “Biocultivos”, de Sacha na horta, foi a gañadora, seguida de “O Son do Son”, de Mordecáns e “Pinguinha”, de Amacuca.
Máis información en Vieiros