CORREO
RSS
Noticias
Os festivais de verán asómanse con esperanza
Xénero: | 23 / 12 / 2021
Co final de ano comezan a moverse esperanzadas as noticias sobre os festivais de cara ao verán. Nesta semana tres foron as novidades relativas a estes eventos que foron avanzándose de cara a convencer ao público máis previsor, as tres relativas a festivais da provincia de Pontevedra. Así, dos festivais Revenidas, Vive Nigrán e Portamérica xa temos noticias sobre os primeiros nomes do seu cartel, as datas ou mesmo algunhas outras cousas. Moitos deles xa teñan á venda abonos e entradas con descontos para os máis madrugadores.
Tanxugueiras queren amosar por vez primeira a diversidade lingüística en Eurovisión
Xénero: | 21 / 12 / 2021
Tanxugueiras son hoxe "Trending topic" en España. Na súa participación na carreira cara ao festival de Eurovisión, as de Teo presentaban na medianoite o tema co que aspiran a representar ao país nese certame internacional de televisións estatais. 'Terra' ten arestora máis de 100.000 reproducións, tras doce horas de presentación oficial na canle de YouTube (houbo unha filtración previa por mor da hora neocelandesa) e a proposta non deixou indiferente a ninguén, sobre todo no que ten que ver coa presenza das linguas oficiais do territorio estatal. "Non hai fronteiras. Ez dago mugarik. No hi ha fronteres. Nun hai fronteres. No hay fronteras ", así repite en galego, euskera, bable, catalán e castelán un dos retrousos deste alalá de Novo Trad das Tanxugueiras. O resto do tema cántase enteiro en galego e fai unha reivindicación da tradición e das raíces coa rotunda afirmación dunhas gorxas que cantan en voces que "veñen para quedar". De saír adiante sería a primeira vez que un tema nunha lingua oficial do Estado diferente ao castelán representaría a España nos 60 anos de certame. Polo festival europeo pasou en 2011 outra artista galega, Lucía Pérez, que contou en castelán a canción "Que me quiten lo bailao".
Sete festivais galegos compiten nos premios ibéricos do sector
Xénero: | 17 / 12 / 2021
A pesares da dificultade para organizar este tipo de eventos, no ano 2021 puidéronse celebrar algúns festivais musicais en Galicia, moitos deles cun cambio de formato adaptado á situación. Grazas a iso ata sete destas citas realizadas na nosa comunidade veñen de presentarse nalgunha das 22 categorías dos VI Iberian festival Awards, certame que premia eventos de España e Portugal. Citas xa veteranas nestes galardóns como Portamérica, SonRías Baixas, WOS ou O Son do camiño, volven buscar recoñecmento nalgunhas das moitas categorías destes galardóns, entran con forza tamén outras novas como O Son dos Arrieiros, da Estrada, e Nachiños Fest, de Ferrol. Agora mesmo o certame está en fase de votación por parte do público a través de Internet, despois os resultados que decida o público pasarán pola decisión dun xurado que comunicará o seu veredicto nunha gala en Lisboa o 26 de marzo de 2022. En anteriores anos xa foron premiadas algunhas das citas galegas neste certame.
A folktrónica de Baiuca aspira a mellor disco estatal do 2021
Xénero: | 16 / 12 / 2021
O tribalismo máxico da 'folktrónica' presentado por Baiuca no seu segundo disco, 'Embruxo' (Raso Estudio, 2021), entrou na lista de 15 finalistas ao Premio Ruído ao mellor disco do ano. Este galardón outorgado pola Asociación de Periodistas Musicais, que celebra este ano a súa sétima edición, coloca o álbum do artista galego á par de outros nomes moi recoñecidos e veteranos da música estatal, coma Kiko Veneno, Vetusta Morla, Quique González, Zahara, C.Tangana ou Morgan, entre outros. Este premio xa recaeu antes en propostas galegas, concretamente Triángulo de Amor Bizarro gañouno dúas veces, en 2016 e na pasada edición de 2020. A resolución do Premio Ruído ten que pasar agora, entre estes quince finalistas, por unha nova fase de votacións que remata o vindeiro 30 de decembro.
Música para escoitar cos pasos do Camiño
Xénero: | 14 / 12 / 2021
Unha persoa que fixese o Camiño de Santiago a pe entre Roncesvalles e a capital galega en 26 días, camiñando 5 horas ao día, podería chegar a escoitar durante o seu percorrido a lista enteira de reprodución de música galega 'Escoita o Camiño. Escoita Galicia'. Esta lista dispoñible en Spotify reúne ao longo de 134 horas e 37 minutos ata 2019 cancións de 1000 artistas e grupos galegos. A Fundación SGAE en Galicia coa colaboración da Xunta de Galicia a través da AGADIC e do Xacobeo 21-22 é a responsable deste enorme compendio reproducible completo de temas, que ademais tamén se ofrecen agrupados dun xeito máis manexable en 22 listas de reprodución temáticas, das que 13 xa estarán operativas nos vindeiros días. As agrupacións de cancións poden ter que ver con xéneros musicais, coma no caso do jazz ou a clásica, ou verse ofrecidas de xeito conceptual como "Campo da festa" (pachanga e pasodoble), "Chíscalle o ollo" (romántica), "Definamos morriña" (nostálxica), etc. Tamén existe unha lista que agrupa as músicas na función do uso da lingua galega, "En galego", reunindo diversos estilos, que ofrece arestora 71 cancións. A súa difusión focalizarase inicialmente nos albergues e noutros puntos destacados do Camiño de Santiago en Galicia, mediante códigos QR para o acceso directo ás listas, así como mediante as redes sociais.
Lucía Aldao comparte a súa 'Pava'
Xénero: | 14 / 12 / 2021
A poeta Lucía Aldao estréase na música en solitario cun proxecto de disco virtual propio. Nos últimos tempos estabamos afeitos a non disociar a Lucía da súa compañeira na poesía e nos escenarios , María Lado, no dúo Aldaolado. Agora Lucía Aldao (A Coruña, 1982) xa ten nas plataformas dixitais 'Pava', un disco de cinco temas propios que non aspira a converterse en disco físico senón puramente como cancións para ser escoitadas e descargadas, de tal xeito que mercar o traballo (para os 100 primeiros compradores) supón recibir o dereito de descarga das cancións e a escultura realizada pola artista Laura Pazos para ilustrar a portada do traballo.
Segundo disco da Orquesta Galega de Liberación
Xénero: | 10 / 12 / 2021
A Orquestra Galega de Liberación, a formación de jazz improvisado na que participan ata dezaseis artistas destacados da escena musical galega baixo a dirección de Xacobe Martínez Antelo, ven de presentar o que é o seu segundo traballo discográfico tras o inaugural 'Orquestra Galega de Liberación' publicado a primeiros deste mesmo 2021. 'Na Loita' é o título deste traballo que foi gravado ao vivo e composto a tempo real no concerto dado pola formación durante o pasado Festival Jazz de Ría en Narón este verán. A OGL está conformada neste álbum por Max Gómez (batería); LAR Legido (batería); Javier Pereiro (trompeta); Olivier Cano (saxo alto); Xosé Miguélez (saxo tenor); Diego Alonso (saxo tenor); Rosolino Marinello (clarinete baixo); Rubén Fernández (voz); Sheila Patricia (voz); Antonio Bravo (guitarra); Manuel Cebrián (guitarra); Elena Vázquez (violín); María José Pámpano (viola); Macarena Montesinos (violoncello); Saúl Puga (contrabaixo) e a dirección de Xacobe Martínez Antelo. Con sete temas que ofrecen algo máis dunha hora de música 'Na Loita' está xa dispoñible en todas as plataformas dixitais.
Clara Pino e Pablo Vidal finalizan o ano con Xela
Xénero: | 9 / 12 / 2021
A Cidade da Cultura acollía o pasado 2 de decembro a presentación de Xela. Clara Pino e Pablo Vidal fechan as homenaxes a Xela Arias do en que se lle dedicou o día das letras a presentar sete cortes con versións de textos da poeta.
Unha nova xeración de Meniños Cantores volve tender a ponte musical nas beiras do Miño
Xénero: | 2 / 12 / 2021
Arredor de trinta anos teñen agora algunhas das crianzas protagonistas do primeiro volume de 'Meniños cantores' publicado en 2005, un proxecto baseado na música e compartido por centros de ensino das dúas beiras da fronteira entre Galicia e Portugal. Case dezasete anos despois, unha nova xeración ven de ser recollida no 'Meniños cantores. Volume 2' que foi presentado hoxe na sede do Consello da Cultura Galega en presenza das entidades participantes, encabezada pola asociación Ponte.. Nas Ondas! (PNO!) impulsora do proxecto. Dezasete centros educativos de Galicia e Portugal participan nesta xeira do proxecto no que ademais outros tantos artistas de ambos países actuaron como padriños en canda un destes lugares para as gravacións das cancións escollidas, que representan un patrimonio musical compartido por unha comunidade que, como subliñou a presidenta do Consello da Cultura Galega, xa existía "antes de que houbera unha raia pintada no mapa".
Fernando Buide e Quico Cadaval fan ópera bufa coa Galicia contemporánea
Xénero: | 1 / 12 / 2021
O vindeiro 9 de decembro o Auditorio de Galicia acollerá a estrea da ópera cómica 'A sombra de Cristal', unha coprodución do Centro Dramático Galego (CDG), a Real Filharmonía de Galicia e a Asociación de Amigos da Ópera de Santiago. Este espectáculo de nova creación ten texto e dirección escénica de Quico Cadaval e música de Fernando Buide. A Real Filharmonia, dirixida polo director titular e artístico da orquestra, o mestre Paul Daniel, contará coas voces da soprano María Hinojosa, do barítono César San Martín e do actor Víctor Mosqueira -que fai de personaxe muda- para a representación. A estrea poderá seguirse en liña en directo pola canle de YouTube da Real Filharmonía de Galicia e ao día seguinte haberá outra sesión aberta ao público xeral, o día 10.