CORREO
RSS
Ti estás aquí > Inicio / NOTICIA / Fernando Buide e Quico Cadaval fan ópera bufa coa Galicia contemporánea
Fernando Buide e Quico Cadaval fan ópera bufa coa Galicia contemporánea
decembro 1, 2021
O vindeiro 9 de decembro o Auditorio de Galicia acollerá a estrea da ópera cómica 'A sombra de Cristal', unha coprodución do Centro Dramático Galego (CDG), a Real Filharmonía de Galicia e a Asociación de Amigos da Ópera de Santiago. Este espectáculo de nova creación ten texto e dirección escénica de Quico Cadaval e música de Fernando Buide. A Real Filharmonia, dirixida polo director titular e artístico da orquestra, o mestre Paul Daniel, contará coas voces da soprano María Hinojosa, do barítono César San Martín e do actor Víctor Mosqueira -que fai de personaxe muda- para a representación. A estrea poderá seguirse en liña en directo pola canle de YouTube da Real Filharmonía de Galicia e ao día seguinte haberá outra sesión aberta ao público xeral, o día 10.
O argumento de 'A sombra de Cristal' leva a unha Galicia contemporánea a ópera cómica 'La serva padrona' de Pergolesi, segundo foi presentada onte nun acto ao que asistiron o secretario xeral de Cultura, Anxo M. Lorenzo; a xerente do Consorcio de Santiago, Belén Hernández; o director titular e artístico da orquestra, Paul Daniel; o presidente da Asociación de Amigos da Ópera de Santiago, Jesús Couceiro; o compositor Fernando Buide, o director Quico Cadaval, a soprano María Hinojosa, o barítono César San Martín e a directora técnica da agrupación, Sabela García. A ópera, segundo o comunicado, conta a historia de Trocado, un conselleiro da Xunta de Galicia que ten ao seu cargo a Consellería de Harmonía e Innovación. Culto, sensible e tímido, teme os espazos abertos e os eventos multitudinarios e, ademais, é barítono. Por fortuna para el, conta coa protección de Cristal, a súa xefa de prensa, creativa, moderna e visionaria, ademais de soprano; así como de Marcial, o policía que coida a súa seguridade, un exmilitar de pasado heroico que se sente rebaixado a gardacostas. Cristal ve como, unha e outra vez, os seus proxectos chocan coa desidia de Trocado, que se entrega á melomanía e ao hedonismo, polo que tece, coa axuda de Marcial, un plan para rematar coa situación. Pero non conta con que Trocado, gran coñecedor da música barroca, detecta sorprendentes semellanzas entre as astucias de Cristal e o argumento de 'La serva padrona' de Pergolesi.