CORREO
RSS
Noticias
A Real Filharmonía de Galicia presenta unha nova temporada na que consolida o seu repertorio propio
Xénero: | 12 / 9 / 2007
A catedral de Santiago será o escenario no que a Real Filharmonía de Galicia abra o vindeiro día 27 (21:30 horas) a súa temporada 2007/08. Un concerto que sintetiza as liñas desta edición: obras clásicas, contemporáneas e, sobre todo, elevará á categoría de solistas integrantes da propia formación. Ademais, interpretará obras encargadas aos compositores galegos Juan Vara (titulada “Enigmas da temporalidade” sobre un poema de Eloy Sánchez Rosillo) e a Xabier de Paz. Entre as orquestras convidadas destaca a Orquestra Sinfónica de Galicia, que dirixirá Víctor Pablo e a Wiener Akademie, dirixida por M. Haselbock.
Máis información no web do Auditorio e sobre a Real Filharmonía na nosa hemeroteca
María do Ceo presenta un novo disco no que viaxa musicalmente entre Camariñas e Lisboa
Xénero: | 11 / 9 / 2007
A cantante luso-galega María do Ceo presentará este mércores , día 12, ás 12 da mañá, no Café Isaac, de Ourense o seu novo disco “Tan lonxe Tão lonxe”. No seu sétimo disco, a fadista nacida en Oporto presenta unha dúcia de temas nas que fai “unha viaxe de Camariñas a Lisboa” recollendo estilos e ritmos diferentes de cada lugar. O disco conta cunha presentación, a xeito de prólogo, escrita po Patricia Kraus. A cantante ten en proceso un seguinte traballo discográfico previsto para a primavera do 2008 que levará por título Moraima e no que cantará poemas de Curros Enrriquez, Celso Emilio Ferreiro, etc.
A Sala Capitol de Compostela poderá cancelar a súa programación musical
Xénero: | 7 / 9 / 2007
En poucos anos, a Sala Capitol, ubicada en Santiago de Compostela, converteuse nun referente galego e estatal na súa programación musical, pero o seu propietario, Francisco Sanín, anunciou que esta actividade poderá finalizar en outono, “debido á falta de apoios”. Desde a súa apertura, a sala tivo un complicado encaixe administrativo para delimitar os usos e os horarios de apertura deste antigo cine compostelán. Agora, Sanín anuncia que, de non frutificar as negociacións co Concello de Santiago para estender o horario de apertura, finalizará esta programación. Recentemente, Santiago xa viu o peche doutros dous espazos emblemáticos de programación cultural: a Sala Yago e a Sala Galán.
Máis información en El País e La Voz de Galicia
Os coruñeses Grasa presentan na Fnac a súa primeira maqueta e videoclip
Xénero: | 6 / 9 / 2007 + VIDEO
O sexteto Grasa, formado hai dous anos con antigos compoñentes de outras bandas coruñesas como Enkueros e Peyotex, presenta hoxe nas instalacións da tenda Fnac da Coruña a súa primeira maqueta autoproducida gravada a principios deste ano. O grupo presenta tamén o seu videoclip “Karthikeyan” no que se mesturan imaxes de animación con imaxe real . O concerto, ás 19,30 horas, servirá para coñecer mellor os temas deste traballo e ver o vídeo producido por eles mesmos. Grasa está formado por Tereza Filgueiras, Diego Díaz, Manuel Seoane, Ricardo Costa, Rafael Hermo e Antonio de la Prieta. O grupo actuará o vindeiro 6 de outubro no Café Cultural Auriense da cidade das Burgas.
Máis información en El Ideal Gallego
O novo selo Kamikaze Música presentará tres lanzamentos discográficos antes de rematar o ano
Xénero: | 4 / 9 / 2007
Con “As palabras espidas” dos galegos NAO inaugurarase o vindeiro 12 de novembro o catálogo discográfico de Kamikaze Música a nova editora creada pola empresa viguesa de servizos e xestión musical Kamikaze Producións. O disco de NAO ven de rematar a súa gravación nos estudios Garate de Andoain baixo a produción de Kaki Arkarazc, a formación de rock metaleiro presenta once temas novos neste seu primeiro traballo discográfico. Kamikaze Música prepara tamén dous discos a cargo dos grupos lusos Peste & Sida e Bob Da Rage Sense, de punk e Hip-Hop respectivamente, que se agarda que saia á rúa o 26 de novembro.
Brais Monxardín faise co premio Constantino Bellón de gaita tradicional
Xénero: | 3 / 9 / 2007
Os cinco finalistas do premio Constantino Bellón, convocado polo Ateneo Ferrolán, tiveron que interpretar este venres pasado no Teatro Jofre de Ferrol dúas pezas, unha composta por Iván Costa e outra da súa propia creación. Ao final, o xurado escolleu ao gaiteiro da Fonsagrada Brais Monxardín como gañador da edición anual deste prestixioso certame. Monxardín levará un premio de 3.000 euros. O xurado tamén concedeu dous accésit: un para Daniel Lumbreras, procedente de San Sebastián, e outro para Pablo de Vigo.
Sobre o Premio Constantino Bellón na nosa hemeroteca; a noticia no Diario de Ferrol
Iván Ferreiro e Carlos Jean optan a levar cadanseu Grammy latino
Xénero: | 30 / 8 / 2007
A lista de candidatos aos premios Grammy Latinos conta un ano máis con nomes galegos. Desta volta o vigués Iván Ferreiro pode facerse co premio ao mellor álbum de rock vocal polo seu traballo “Las siete y media”. Pola súa banda, o ferrolán Carlos Jean ten a posibilidade de levar o galardón ao mellor produtor.
Máis información en Galicia Hoxe; lista de candidatos en Terra; máis información nos nosos arquivos
O Festival de Ópera da Coruña chega á súa 55 edición
Xénero: | 23 / 8 / 2007
O tenor Giuseppe Sabatini dará comezo este domingo á 55 edición do Festival de Ópera da Coruña. Canda a el, esta cita musical achegará aos escenarios herculinos representacións de “La Boheme” de Puccini, “Don Pasquale” de Donizetti, “A historia do soldado” de Stravinski, galas líricas e conferencias.
Máis información en Galicia Hoxe; o programa do evento no web de Amigos da Ópera; máis sobre o festival nos nosos arquivos
O grupo Sacha na horta gaña o certame A Polo Ghit co tema “Biocultivos”
Xénero: | 20 / 8 / 2007
Logo de moito escoitar e votar, esta fin de semana fíxose público por fin o nome do grupo gañador da edición 2007 do certame A polo Ghit, que organizan a Radio Galega e Vieiros. “Biocultivos”, de Sacha na horta, foi a gañadora, seguida de “O Son do Son”, de Mordecáns e “Pinguinha”, de Amacuca.
Máis información en Vieiros
O gaiteiro Pablo Devigo fíxose co premio da Festa do Gaiteiro de Soutelo de Montes
Xénero: | 20 / 8 / 2007
Soutelo de Montes acolleu este sábado o IX Concurso de Música Tradicional Avelino Cachafeiro, considerado un dos máis prestixiosos do país. Pablo Devigo, de 17 anos e veciño de Castro Caldelas resultou gañador do certame. Canda a el, Óscar Ibáñez e o recente gañador do trofeo MacCrimmon, Edelmiro Fernández, ocuparon cadanseu posto no podio.
Máis información en La Voz de Galicia, e máis sobre o MacCrimmon nos nosos arquivos