CORREO
RSS
Noticias
Galicia estreará stand propio no Womex baixo o selo Galician Tunes
Xénero: | 15 / 9 / 2008
Por primeira vez, a Xunta contará cun espazo propio no Womex, a principal feira do mundo no xénero World Music (música étnica, folk, de raiceira), e que se celebrará entre o 29 de outubro e o 2 de novembro en Sevilla. 16 empresas galegas participarán neste importante evento destinado a programadores, especialistas e empresas musicais e poderán empregar os servizos do stand, como zonas de xuntanzas ou un servizo de tradutores en inglés e francés. A Axencia Galega das Industrias Musicais (AGADIC) tamén organizará outras actividades de promoción, entre as que sobranceará unha noite galega, o sábado 1 de novembro, coas actuaicións de Narf, Mutenrohi e Xosé Manuel Budiño.
O Conservatorio Folque trasládase en Santiago para ampliar o seu proxecto musical
Xénero: | 12 / 9 / 2008
O mes de outubro arrancará un novo curso académico do Conservatorio de Música Tradicional e Folque. Faráo con imporantes novidades xa que o proxecto dirixido por Ugía Pedreira deixa Lalín para trasladarse as instalacións da Escola de Altos Estudos musicais en Santiago, despois de conseguir apoios da Dirección Xeral de Creación e Difusión Cultural, do Consorcio de Santiago e da Axencia Galega das Industrias Culturais (AGADIC). A iniciativa deixa de depender do padrodado de Lalín despois de que o concello evidenciara que non podía custear os 150.000 euros que supuña a amplicación do proxecto. Coñece a traxectoria no noso dosier.
A revista El Cultural destaca catro concertos en Galicia da temporada sinfónica
Xénero: | 12 / 9 / 2008
Comeza a temporada sinfónica que, segundo a revista El Cultural destaca por non ofrecer grandes sorpresas nin grandes exceso. No seu repaso á programación anual a publicación ofrece as citas ineludibles entre as que hai catro concertos en Galicia. Comeza co concerto inaugural da Real Filharmonía na Catedral de Santiago o vindeiro día 26 de setembro cun programa sobre Mozart. Tamén en santiago, o 16 de outubro destaca a visita do inglés David Atherton para dirixir á Filharmonía cun programa sobre Igor Stravinksy (Auditorio de Galicia). As outras citas son para a Sinfónica de Galicia: unha na que presentará A Walkiria de Wagner (25 de outubro), outra na que achegará obras de Grieg e Bruckner e, por último, o ciclo de Mendelssohn (16 e 23 de xaneiro).
Ecléctica Ensemble presenta o seu disco en sociedade na Coruña e Vigo
Xénero: | 12 / 9 / 2008 + AUDIO
O colectivo musical no que militan Ugia Pedreira, Ramón Pinheiro, Nacho Muñoz, Richard Rivero e Phiplippe Copin entre outros volve á carga na presentación do seu primeiro disco autoeditado Ecléctica Ensemble. Malia que o 19 de xuño fixérase xa una festa de presentación do disco é agora, pasado o verán e os compromisos dos músicos, cando fan una presentación en sociedade a través de dous encontros co seu público na Coruña e Vigo. Ramón Pinheiro e Nacho Muñoz actuarán como voceiros do colectivo presentando a filosofía deste peculiar traballo musical. As citas comezan hoxe ás 19 horas na Fnac da Coruña e seguen o vindeiro martes ás 11:45 horas no MARCO en Vigo. Un espectáculo multimedia amenizará as presentacións. O vinilo de seis temas ven acompañado por un CD coas cancións e un cartel deseñado por Pancho Lapeña de Aduaneiros sem fronteiras. Ecléctica Ensemble naceu ao abeiro do Conservatorio de Música tradicional e Folque de Lalín no ano 2000.
Kimuru presenta en concerto o seu segundo disco Piedras y Confetis
Xénero: | 10 / 9 / 2008
Quique Fernández Muruáis, o músico de Lugo tamén coñecido como Kimuru, actúa hoxe ás 21 horas no Parque Rosalía de Castro da súa cidade na que será a presentación pública do seu segundo traballo. En “Piedras y Confetis” Kimuru volve aos métodos compositivos e aos temas que xa usou en “Todas las naves espaciales son de plástico” (Falcatruada, 2006) malia asegurar que non se trata de un disco continuista co anterior grazas a un distinto sentido da atemporalidade. O disco está producido de novo por Arturo Vaquero e o propio Kimuru, sae autoeditado e foi gravado a finais do 2007 nos Estudios Abrigueiro de Friol Lugo. Entre os cambios máis notables está a entrada de novos músicos no proxecto musical liderado por Quique Muruáis, como son Xosé Luis Saqués á batería e Xavier Pérez no piano e guitarra. A entrada ao concerto é de balde.
Som do Galpom gaña o II Nsaio no Camiño
Xénero: | 5 / 9 / 2008
O quinteto de Ames Som do Galpom fíxose gañador do II Certame Nsaio no Camiño, que organiza a Dirección Xeral de Xuventude e o Xacobeo. O grupo asinará agora un contrato cunha discográfica estatal e outro cunha empresa de management. Canda a eles, chegaron á final Maryland, Telémaco, Sinefres e Loba Loo dos 150 grupos que se inscribiron no certame. Os finalistas terán agora a oportunidade de participar en circuítos de música ao vivo e diferentes eventos.
AGADIC abre a convocatoria para a Rede Galega de Música ao Vivo 2009
Xénero: | 4 / 9 / 2008 + DOCUMENTO
Abriuse o pasado 1 de setembro e ata o 30 deste mes a convocatoria a músicos e salas para apuntarse na Rede Galega de Música ao Vivo por o ano 2009. Este programa, agora convocado desde a nova Axencia Galega das Industrias Culturais – AGADIC- presenta algunhas variacións nas normas de funcionamento que o rexerán na seguinte xeira. Se ben o caché máximo que pode presentar un grupo mantense nos 800 euros rebaixa o número de concertos esixibles de seis a catro actuacións contratadas para ter una proposta musical na rede. A nova convocatoria tamén cambia o modelo de subvención ás salas das actuacións do 85% fixo anterior a entre 75% e 90% en función do caché dos músicos, a máis caché menos subvención, e da lingua que estes usen, apoiando cun 5% de subvención adicional os casos de músicos e grupos que usen a lingua galega. Suprímese tamén o reparto entre músicos e sala das recadacións de billeteira que superen a inversión, quedando o empresario co resultado íntegro de venda das entradas.
O teatro galego comparte protagonismo nas programacións de Santiago e Vigo
Xénero: | 4 / 9 / 2008
Diferentes entidades presentan estes días a súa programación cultural para os vindeiros meses. Onte fíxoo o concello de Santiago que segue fiel ao seu estilo programando teatro galego, o ciclo de Lied mais o regreso do programa de baile SCQ Danza. Ademais, coincide co inicio da temporada da Real Filharmonía de Galicia que ofrecerá un concerto na Catedral o vindeiro día 26. Pola súa parte, o Teatro Principal de Ourense acollerá 23 espectáculos nos que se pon o énfase no teatro galego e no ballet clásico. Ademais, os programadores presentaron un ciclo de música de cámara todos os xoves co que pretenden combater a idea de que a música é só para as elites.
Fuxan os ventos ofrecerá dous concertos en Santiago tras vinte anos da súa última actuación
Xénero: | 3 / 9 / 2008 + IMAXES
Hai máis de dúas décadas que o grupo Fuxan os Ventos decidiu poñer punto e final a unha traxectoria de máis de trinta anos e oito disco editados. Despois de todo este tempo,os seus compeñentes decidiron voltar ao escenario para dous concertos. Son os que fan parte do ciclo Sons da Diversidade que organiza a concellaría de Cultura en Santiago e no que porán en escena o espectáculo Terras de soño. Nas sesións recuperarán as súas cancións máis senlleiras como A Carolina ou A Sementeira na compaña dalgúns dos “seus mellores amigos”, tal e como figura na nota de prensa remitida. A cita será os días 18 e 19 de outubro en Santiago.
Xa están decididos os cinco grupos finalistas do certame Nsaio no Camiño
Xénero: | 2 / 9 / 2008
A clasificación esta pasada fin de semana dos boirenses Sinefres (rock) e dos composteláns Loba Loo (folk) pecha o cartel de finalistas desta II edición de Nsaio no Camiño que se completa con Maryland (categoría pop), Som do Galpom (mestizaxe) e Telémaco (novos valores). Lugo acollerá este xoves, 4 de setembro, a fase final deste certame na que competirá un grupo por cada unha das categorías musicais do certame. Un xurado especializado escollerá ao gañador definitivo de Nsaio no Camiño 2008. O premio será a gravación dun disco nun dos mellores estudos de gravación de España e a sinatura dun contrato cunha discográfica de nivel estatal e máis un contrato de management. O traballo discográfico será distribuído e promovido en todo o Estado. O artista consagrado que respaldará este concerto será o grupo de rock e tex-mex Los Lobos.