CORREO
RSS
Noticias
A ciber-verbena de GalegoZ reafírmase no terceiro disco da banda
Xénero: | 16 / 4 / 2009 + AUDIO
GalegoZ comezaron a facerse notar no 2006 co seu primeiro disco Galician Chimpanzee editado por Ouvirmos. Despois viñeron Revolution Dance, tamén editado con Ouvirmos en 2007 e finalmente presentan a súa consolidación definitiva como proxecto musical con este Viñeron da Galiza interior que con produción propian editan a través do selo A Regueifa Plataforma. Fieis ás súas consignas musicais e reivindicativas GalegoZ afondan no seu Aranhoto Style nestes cinco novos temas nos que as bases electrónicas e sampleados fusiónanse con elementos do funk, reggae e a máis ecléctica das seleccións musicais combinada con letras combativas buscando mover mente e corpo ao mesmo tempo nunha ciber-verbena. A banda Galegoz está formada por: Marcos Payno (voz ), Denís Mutante (voz), Pulpiño Viascón (batería, percusións e voz), Manuel Payno (trompeta e coros), Alex Salgueiro (frauta traveseira e teclado), Tomás Ruído (Técnico de son ) e Matías Olazábal (guitarra), ademais das colaboracións de membros do Colectivo Perverso.
Pepe Vaamonde Grupo busca as súas raíces autoeditando o seu terceiro disco
Xénero: | 15 / 4 / 2009 + VIDEO
Durante os últimos días do presente mes de abril, o que será o terceiro traballo discográfico de Pepe Vaamonde Grupo Introterra estará dispoñible nas principais tendas de discos de Galicia. O disco gravouse entre os Estudios PKO de Madrid, Estudios Bruar da Coruña e Metrópolis de Vigo. Introterra está autoeditado pola banda e distribuído por Lonxa Cultural, nel reúnese, de xeito condensado, a esencia da banda. Pepe Vaamonde Grupo inicia estes días unha pequena xira promocional por terras galegas que os levará a actuar, nas próximas semanas, nas cidades de A Coruña, Pontevedra, Santiago de Compostela e Lugo, comezando o vindeiro venres 17 de abril, no Forum Metropolitano de A Coruña (Rúa Río Monelos s/n). En Introterra ofrece 11 temas cos que resumir, de xeito conciso, o que é a traxectoria e o estilo da propia formación nestes últimos 8 anos e ollando, de xeito claro, cara ás raíces da mesma.
A Coruña acollerá a primeira mostra de videoclips
Xénero: | 6 / 4 / 2009 + DOCUMENTO
Video Killed the Radio Star foi o primeiro videoclip emitido pola MTV a principios de agosto de 1981. Esta peza da historia audiovisual da música dálle nome á primeira mostra de videoclips Cidade da Coruña, que se celebrará entre o 29 de xuño e o 4 de xullo. Polyrock, entidade organizadora deste certame, centra o evento no panorama musical e audiovisual galego declarándose “conscientes da existencia da gran cantidade de obras que merecen saír á luz na nosa comunidade”. Dacordo coas bases poderán presentarse pezas realizadas entre os anos 2007 e 2009 como complemento de traballos discográficos de selos independentes, ou ben producidas directamente polos músicos. Co único condicionante de que estes sexan galegos, ou cun mínimo da metade dos membros da formación de orixe galega. A mostra contará cun circuíto de proxección nocturna en diferentes locais de lecer da cidade. O prazo de recepción de traballos (en DVD ou AVI e de menos de 10 minutos de duración) está aberto ata o 8 de maio.
Un cedé e un deuvedé recollen as melodías cantadas no ciclo anual da tradición galega
Xénero: | 3 / 4 / 2009 + AUDIO
Antes de que houbera formas tecnolóxicas de medir o tempo como son os reloxos, a xente guiábase polo sol e pola lúa. Era unha forma de adaptar a vida ás diferentes épocas do ano (a pascua, o maio, o magosto...) que sempre estiveron acompañadas de melodías. A Asociación de Gaiteiros Galegos decidiu facer un traballo que reunise música para doce meses (ou trece lúas) que lembrasen o ciclo anual da tradición galega. O resultado é 13 lúas, un cedé e un deuvedé, que recollen tanto as cancións así como un documental didáctico sobre o calendario lunar.
O disco de Luar na Lubre ao vivo xa está nas tendas
Xénero: | 1 / 4 / 2009
Logo da presentación oficial de onte, o novo disco de Luar na Lubre, Ao vivo, está xa dispoñible. Baixo este título, o grupo presenta un dobre CD e mais un DVD documental nos que se recollen as súas actuacións no Teatro Colón da Coruña os días 22 e 23 de xaneiro. Canda a temas habituais do grupo, inclúense colaboracións con artistas coma Luz Casal, Diana Navarro ou Pedro Guerra. Luar na Lubre comeza agora a xira de presentación do álbum, con citas en Madrid, Donostia ou Ageda xa confirmadas.
Editado o cuarto volume do Seminario Permanente de Jazz de Pontevedra
Xénero: | 31 / 3 / 2009
O Seminario Permanente de Jazz de Pontevedra, xunto co Concello e o Pazo de Cultura desa cidade veñen de presentar a o novo traballo discográfico resultado dos concertos organizados polo SPJ. JAZZ LIVE! No Principal Vol.IV ( Free Code Jazz Records, 2009) recolle en pusoc máis dunha hora oito temas gravados ao vivo escollidos de entre as catro actuacións do ciclo “Jazz no Principal 2008”, en febreiro e marzo dese ano, nos que o SPJ-Group estivo acompañado polo vibrafonista malagueño Arturo Serra, o harmonicista Antonio Serrano, o trompetista valenciano Voro García e o saxofonista estadounidense Bobby Martínez. O pasado sábado 28 de marzo celebrouse o último concerto do ciclo do 2009 no que o SPJ Group estivo acompañado polo saxofonista cubano Román Filiú.
Pasos de Metal
Xénero: | 30 / 3 / 2009 + DOCUMENTO
A escena do heavy metal e do rock duro en Galicia posúe desde hai anos unha grande vitalidade e variedade. A comezos de 2007 o Gallaecian Metal Compilation facía en 27 temas unha panorámica destes estilos. Agora, chega unha nova entrega desta escolma, acompañada da primeira publicación en galego dedicada a este estilo. Dúas propostas que queren revolucionar a situación destes estilos no país.
O segundo ciclo Espazos Sonoros contará con 88 concertos
Xénero: | 27 / 3 / 2009
Espazos Sonoros, o ciclo que achega a música a espazos de interese cultural e histórico de todo o país xa ten o programa da súa segunda edición. Desta volta serán 88 os concertos que se poderán ver entre o 15 de abril e o 28 de xuño en 27 lugares de todo o país coma a Illa de San Simón, o forte de San Lourenzo ou o aeródromo de Rozas. Música antiga, contemporánea, jazz ou folk son algúns dos estilos que se poderán escoitar no programa, con actuacións do Grupo Meendinho, Emilio Cao, Moscow Art Trio, Camerata Vivace ou Abe Rábade Trío entre moitos outros.
Drum Drama pon no mercado o seu primeiro disco Acero orgánico
Xénero: | 26 / 3 / 2009 + VIDEO
Tras dez anos de autoedición e directo, DrumDrama, formación viguesa composta por Drama (Mc antes coñecido como Jazztastilo) e El Malvado Sam (produtor), presentou a finais do pasado ano o seu primeiro álbum editado de forma totalmente profesional, Acero orgánico. Gravado e mesturado en por “Trabajos Para Un Mundo Perfecto” e editado por Renegade Prods, selo do francés afincado en Galicia Alain Mani, “Albendy”. Drum Drama ofrecen nestes vinte temas un disco maduro e fresco, no que encontraremos a colaboración do mellor do Hip-Hop en Galicia. Produtores como Jal-Beats ou Karmasound, o rap de Rack Eterno, El Seis ou El Pillo Astuto entre outros, Wöyza, Jose ou Emeson e as mans de Dj Kaze ou o propio Karma constrúen tema a tema, xunto con Drama e El Malvado Sam, un disco con diferentes climas, que tende pontes entre a realidade e a fantasía.
Unha última noite de rock para a sala Clangor
Xénero: | 25 / 3 / 2009
A desaparecida discoteca compostelá Clangor “abrirá” unha noite máis de xeito simbólico e como homenaxe cun concerto no Multiusos do Sar. O local foi un referente musical para toda unha xeración e acolleu numerosos concertos de primeiras figuras do pop e o rock nacionais e internacionais na década dos 80. O evento previsto para o 11 de outubro de 2010, coincidindo co vinte aniversario da explosión dunha bomba na sala, presentouse hoxe en rolda de prensa xunto con dúas producións audiovisuais que recollerán nun documental a historia de Clangor así como un thriller baseado no atentado terrorista que sufriu. Fernando Pereira, dono e picadiscos do local, e Loquillo coincidiron en valorar a importancia da proposta de Clangor no seu contexto histórico como “moito máis que música” e a súa desaparición como un “baixón” para o nivel musical da noite de Santiago. O concerto contará con actuacións de grupos coma Nacha Pop, The Godfathers, Loquillo, The Cult ou Paul Simon, membro de The Clash, como peche o propio Pereira volverá poñerse aos pratos rememorando o son da sala.