CORREO
RSS
Noticias
Abe Rábade homenaxea á flora galega en 'Botánica'
Xénero: | 22 / 9 / 2022
O novo de Abe Rábade é un traballo imbricado tanto na terra que esta dedicado á vexetación autóctona de Galicia conformando un campo de visión aberto ao mundo que funde o rural co urbano. O pianista e compositor compostelán ven de sacar á rúa 'Botánica' ( Karonte Reords), o seu décimo quinto disco, e fará a súa presentación en concerto este sábado no marco do festival Maré, no Teatro principal de Santiago en horario matinal (12:00 horas).
O MUMI servirá de escaparate para vinte propostas musicais galegas ou lusas
Xénero: | 20 / 9 / 2022
Vinte directos doutras tantas bandas e artistas están programados no terceiro encontro profesional Músicas no Minho - MUMI 2022, que se celebrará do 29 de setembro ao 1 de outubro na Eurocidade Tui- Valença. Dez nomes de Galicia e outros dez de Portugal amosarán ao público, profesional e tamén xeral, a diversidade de propostas musicais que conviven na escena actual. A organización do MUMI 2022 presentou a programación de showcases e avanzou que durante o encontro, a oferta para profesionais desenvolverase no Teatro Municipal de Tui e no Espazo OFF da Academia de Música da Fortaleça de Valença, mentres que os concertos abertos ao público terán lugar na Avenida da Estaçao de Valença e no Paseo da Corredoira de Tui. O artista portugués Omiri e o proxecto galego de Xosé Lois Romero & Aliboria serán os encargados de ofrecer o concerto de apertura do MUMI 2022 o xoves 29 de setembro na Avenida da Estaçao de Valença.
Santiago acolle o crisol musical de Maré 22
Xénero: | 19 / 9 / 2022
Comeza esta semana o festival Maré de músicas e artes atlánticas (antes Cantos na Maré) na súa XVIIIª edición, a terceira en Santiago de Compostela. Do 21 ao 25 de setembro, Maré volverá celebrarse en distintas localizacións da capital galega coma o Teatro Principal, o Auditorio de Galicia, a Sala Capitol, a Praza da Quintana e outros emprazamentos do patrimonio monumental, clubes e o parque de San Domingos de Bonaval, epicentro do festival no que estará situado o escenario Xacobeo. O evento segue a apostar pola creación feminina e da mocidade, a experimentación, as novas linguaxes artísticas e a diversidade cultural poñendo o foco naqueles territorios cos que Galicia comparte lazos lingüísticos, históricos e outros sentimentais das dúas beiras do Atlántico. Ademais dunha ampla representación galega, o cartel inclúe artistas procedentes doutras comunidades do Estado, como Catalunya, Asturias ou Euskadi, e doutros países e territorios como Angola, Brasil, Portugal, o Rajastán na india, os balcáns, Arxentina, Francia, o Sáhara Occidental, Guiné-Bissau ou Escocia. En total, maré 22 sumará máis de 30 actuacións.
A zoqueira Elena Ferro celebra a primeira Foliada Eferro
Xénero: | 16 / 9 / 2022
Celebrar unha foliada cultural na eira do seu obradoiro na aldea de Merza, en Vila de Cruces. Esta é o proxecto que a recoñecida zoqueira Elena Ferro fará realidade este 17 de setembro coa celebración da primeira Foliada Eferro.
O Premios Martín Códax dan a coñecer os seus finalistas
Xénero: | 15 / 9 / 2022
A novena edición dos Premios Martín Códax da Música conta xa con finalistas. A Asociación Músicas ao Vivo, que organiza o certame, presentou na tarde deste 14 de setembro os proxectos seleccionados polo xurado para competir na última fase dos galardóns.
Volve a experimentación sonora do Sinsal Outono
Xénero: | 13 / 9 / 2022
Os días 16 e 17 de setembro regresa a Vigo o Sinsal Outono, o ciclo de concertos intrinsecamente vinculados á experimentación sonora, á vangarda e á creación contemporánea nas súas múltiples expresións. Neste 2022 desenvolverase nun dos espazos de referencia do universo da investigación, creación, innovación e produción contemporánea no ámbito local, comarcal e galego, e que acompañou o desenvolvemento e proxección da propia Sinsalaudio ao longo destas dúas últimas décadas: o Museo de Arte Contemporánea de Vigo (MARCO). Sinsal Outono 2022 ofrecerá dúas noites ateigadas de experimentación e de visualización de propostas musicais contemporáneas con bandas e artistas chegadas de distintos puntos Madrid, Valencia e Portugal, grazas tamén á colaboración do Instituto Camoes. Dullmea, El Hijo, Luís Fernandes e Otro conformarán o cartel desta nova edición do ciclo.
O WOS Festival volve a Santiago con plena potencia
Xénero: | 7 / 9 / 2022
A VI edición de WOS Festival x SON Estrela Galicia ultima preparativos antes da súa celebración esta semana entre o 8 e o 11 de setembro en Compostela. O evento presentouse esta mañá en rolda de prensa no Concello de Santiago. O programa está formado por numerosos concertos, con estreas a nivel nacional e internacional, dj sets, cinema e un programa de conferencias en torno ao pensamento e debate. A nova entrega de WOS Festival supón a volta á normalidade do evento tras das restricións pandémicas, ao igual que os que se veñen desenvolvendo desde principios do verán deste ano. A edición deste 2022 desenvolverase en doce localizacións de valor patrimonial da capital galega: o museo CGAC, o Teatro Principal, as Igrexas de Bonaval e da Universidade, as salas Capitol e Malatesta, a Fundación Eugenio Granell, a Sede Afundación, o Auditorio Abanca, o cinema Numax, a Fundación SGAE e o Parque de Bonaval.
Nace o Holanola Fest en Santiago como lugar de encontro de diversidade musical
Xénero: | 2 / 9 / 2022
A capital galega conta cun novo festival, o HOLANOLA FEST, que celebrará a súa primeira edición do 20 ao 25 de setembro a iniciativa do Riquela Club e terá lugar en varios locais da cidade. A iniciativa, que xorde dun dos promotores do Outono Códax, ten o obxectivo de xerar un lugar de intercambio cultural entre artistas galegos, flamencos e de Nova Orleans, o festival reunirá dezasete propostas procedentes dos Estados Unidos, Galicia e o resto do Estado. A idea é que o espectador, pero tamén os músicos, teñan un lugar de encontro, atravesado por diferentes achegas culturais, construíndo durante uns días unha comunidade baseada no intercambio de saberes ao redor da música. Ademais de no Riquela Club, esta edición inaugural desenvolverase noutros locais de Santiago de Compostela, como o Flamingo o Modus Vivendi ou o Fuco Lois. Haberá tamén unha sesión vermú na praza de Feixóo a cargo da agrupación compostelá Cantigas e Agarimos, e conversas en formato dúo, abertas ao público, conducidas polos xornalistas musicais Fernando Navarro e Jacovo Rivero.
Sheila Patricia seleccionada para actuar no WOMEX de Lisboa
Xénero: | 24 / 8 / 2022
Sheila Patricia actuará no Lusofónica Stage da 28ª edición de Womex, a Worldwide Music Expo, que se celebrará en Lisboa do 19 ao 23 de outubro. Neste multitudinario encontro internacional a artista redondelá ofrecerá un concerto levando os temas do seu disco 'Orixe', o seu primeiro LP e tamén o seu proxecto máis ambicioso e persoal, no que aposta polas súas raíces musicais con tinguras de vangarda e mesmo ritmos de world music, confirmándose como unha das voces máis prometedoras do actual panorama musical galego. Sheila Patricia foi seleccionada por parte do xurado internacional para actuar no Lusofónica Stage, escenario que acolleu ás Tanxugueiras na edición celebrada o ano pasado no Porto.
O IKFEM ofrece un amplo abano de estilos musicais e espectáculos en Tui
Xénero: | 12 / 8 / 2022
Desde o vindeiro venres 19 de agosto e ata o día 26 terá lugar a Xª edición do IKFEM, festival internacional de teclado da Eurocidade Tui-Valença. A celebración da primeira década de actividade deste evento transfronteirizo celebrarase nesta ocasión en Tui cun extenso e variado programa con máis dunha ducia de artistas convocados e ata 15 concertos ademais doutras actividades pensadas para toda a familia. O programa inclúe espectáculos e artistas de todas variedades musicais, desde o tradicional o pop, o rock, música clásica e barroca, fado, jazz, etc... O evento comezará o venres 19 de agosto cun concertos especial que ocupara a ponte de ferro que une Galicia e Portugal. Será unha tarde de concertos na mítica ponte metálica con varios grupos sorpresa e onde 10 pianos soarán simultaneamente cruzando as fronteiras nun escenario único no mundo sobre o río Miño para celebrar a décima edición de IKFEM e o Ano Santo Xacobeo. O programa completo está dispoñible no web do evento.