CORREO
RSS
Noticias
Concertos conmemorativos
Xénero: | 23 / 5 / 2013
A compostelá Sala Capitol acolle o vindeiro 25 de maio o concerto de décimo aniversario de Dios Ke Te Crew. O grupo de hip-hop prepara unha actuación especial na que prometen moitas sorpresas e ademais agasallará os asistentes cun CD no que se inclúen dous temas inéditos. De xeito paralelo, voltan aos escenarios logo de once anos, Dhais. O coñecido grupo de folk actuará o vindeiro 24 de maio no marco da Gala dos Premios Opinión. O retorno realízase como unha homenaxe ao frautista Luís Areán e mais ao baixista César Morais, membros do grupo que finaron.
Xoel López finalista a mellor artista dos Premios da Musica Independente
Xénero: | 22 / 5 / 2013
Hoxe déronse a coñecer en Madrid os finalistas aos Premios da Música Independente. Un recoñecemento aos traballos de discográficas, artistas e profesionais que se moven no eido. Xoel López, co seu último traballo Atlántico, é finalista na categoría de premio Estrella Galicia ao mellor artista español. Tamén está o nome de Abe Rábade entre os autores de Café Latino 25 Aniversario finalista a mellor álbum de jazz e músicas contemporáneas. Entre as novidades desta edición, destaca a creación dunha categoría para o mellor álbum en lingua galega. Os gañadores saberanse o vindeiro 17 de xuño no transcurso dunha galega.
Galego para días libres
Xénero: | 21 / 5 / 2013
Un caderno didáctico con actividades para vacacións dirixido aos máis novos da casa en galego, castelán e inglés. E que inclúe un disco con temas de Aries, Grampoder, Wild Balbina, Musel, Álex Casanova, Javi Pretty, Montañas e Sacramento. Bababúm vacacións é un proxecto que xorde do traballo de Cinta Arribas e María Ramos e mais de Carlos Pereiro (Carlangas de Novidades Carminha) na parte musical. Segundo explican os promotores, a intención desta iniciativa é propor actividades que pais e fillos poidan desenvolver en conxunto. Os interesados en coñecer polo miúdo o proxecto terán unha ocasión na Romaría Pop que se celebra no compostelán parque de Belvís o vindeiro 15 de xuño.
Banda Baile Asalto convida á festa
Xénero: | 20 / 5 / 2013
Temas de festa e de baile, tirados da tradición mais mesturados con metais, guitarras, batería e toques de jazz. Cos seus seis membros repartidos entre Pontevedra e Vigo, Banda Baile Asalto presenta o seu primeiro disco, homónimo do grupo. Gravado nos estudos composteláns A Ponte, en grande medida ao vivo, o CD achega dez temas mais un bonus e conta con colaboracións como as de Eliseo Parra, Uxía Senlle ou Rodrigo Romaní entre outros. O grupo está a desenvolver unha xira de presentación que pasou xa por Compostela, Boiro ou Vigo.
O grupos asaltan as verbenas
Xénero: | 20 / 5 / 2013
Ofertar unha alternativa ás orquestras e introducir concertos de grupos galegos nas programacións festivas de verán. Este é o obxectivo de dous proxectos que se acaban de presentar en paralelo, Verbena Galega e Galicia on The Road. Detrás, para alén da crise, está o convencemento de que temos música para todos os gustos e que está a mudar o público das festas.
PortAmérica fecha o seu cartel
Xénero: | 16 / 5 / 2013
Banda de Turistas, Editors, Gin Ga, La Habitación Roja, Niños Mutantes, Niño y Pistola, Sala & the Strange Sounds, Sethler e Vetusta Morla son as incorporacións que completan o cartel de PortAmérica. O festival que se celebrará en Nigrán entre o 18 e o 20 de xullo ten xa á vendas as entradas e contará cun total de 24 bandas. Ademais, o evento contará de novo coa presenza do grupo nove no apartado gastronómico, e acollerá a estrea de Portamérica año cero, un documental que recolle a xestación deste evento e que conta coa participación do propio público do evento, a achegar as súas propias gravacións. O proxecto está dirixido por Alberto Baamonde e Alexandre Cancelo.
Pito de Pikasso volta con Arrock con chícharos
Xénero: | 15 / 5 / 2013
Dous anos despois do último traballo, os composteláns Pito de Pikasso presentan Arrock con chícharos, terceiro disco da formación. O novo álbum, autoeditado, foi gravado no Laboratorio Soyuz e achega doce temas de punk rock en galego. O disco presentarase o vindeiro sete de xuño cun concerto na compostelá Sala Capitol no que tamén estarán Vicky Polard.
Forraje lanza Quejidos que no escucha nadie
Xénero: | 14 / 5 / 2013
A Sala Moon de Compostela acolle este xoves, a partir das 22 horas, o concerto de presentación de Quejidos que no escucha nadie, o cuarto disco de Forraje. A banda da Pobra do Caramiñal lanza o álbum da man de Warner Music Spain e coa produción de Kolibrí Díaz, de Marea. Dez temas de rock con letras coidadas e un grande protagonismo das guitarras que conta con colaboracións como a de Robe, de Extremoduro. O concerto contará tamén coa participación de Memoria de Pez, grupo que presenta Tocar madera, o seu novo disco.
Uxía presenta Rosalía pequeniña
Xénero: | 13 / 5 / 2013
A Editorial Galaxia presentaba esta mañá Rosalía pequeniña, un libro disco que mestura poemas de Rosalía de Castro, ilustracións de Marina Seoane e mais a voz de Uxía. O proxecto, editado na colección Sonárbore, está dirixido aos máis pequenos da casa e presenta unha Rosalía meniña que busca dialogar directamente cos ouvintes. No disco atópanse colaboracións como as de Sés, Isaac Palacín, Habelas Hainas ou Magín Blanco, e con Sergio Tannus a cargo da gravación e da dirección musical. O volume conta cun total de 28 páxinas e sae á venda por 20 euros.
Esquíos lanzan Porcocan
Xénero: | 10 / 5 / 2013
O sexto disco de Esquíos está xa na rúa e mais na rede. Porcocan mantén o ton punk-rock do grupo en 12 temas cheos de enerxía e con grandes doses de crítica social. O grupo desenvolvera unha campaña de crowdfunding para financiar este proxecto, que finalmente non conseguiu fondos abondos para cubrir os gastos de lanzamento. O volume foi gravado nos estudios Abrigueiro, e os primeiros concertos de presentacion serán o 25 de maio no Pub Gañetes da Estrada e o día 31 en Pontemuiños, Pontevedra.