CORREO
RSS
Ti estás aquí > Inicio / Xéneros / Folk
Música Folk
Fuxan os Ventos recibirán o Premio Martín Códax de honra
Xénero: | 23 / 9 / 2022
A histórica formación musical Fuxan os Ventos celebra o seu 50 aniversario na música neste ano 2022 e os Premios Martín Códax da Música súmanse á conmemoración entregándolle ao grupo o galardón honorífico da súa novena edición. Desde Músicas ao Vivo, entidade organizadora dos premios, consideran que este recoñecemento pon de relevo o significado que a música de Fuxan os Ventos tivo para a sociedade galega cun repertorio que foi camiñando do folk á música popular coa prevalencia dunhas letras "ben propias ou de poetas, que abrangueron temáticas moi amplas, en ocasións reivindicativas con temas como a emigración, a autonomía, a ecoloxía e a pobreza, ou recolledoras dunha tradición oral coa que tivo intenso contacto o grupo". O galardón entregarase na gala dos 9º Premios Martín Códax da Música o vindeiro 5 de outubro no Pazo da Cultura de Pontevedra, onde tamén se proxectará un vídeo con entrevista e homenaxe á banda.
O Cancioneiro de Buño recupera 84 cantigas de comezos do século XX
Xénero: | 10 / 8 / 2022
Edicións Embora publica, co apoio do Concello de Malpica e da Real Academia Galega o Cancioneiro de Buño. Este volume recupera 84 coplas de tradición oral, recollidas en 1910 a Dolores Cancela Pérez, daquela de 17 anos. Este material supón a máis antiga recollida de música popular no concello de Malpica e saíron orixinalmente publicadas orixinalmente no Boletín da Academia Galega.
O 'Diluvio' de Tanxugueiras triunfa
Xénero: | 10 / 8 / 2022
Tanxugueiras segue a colleitar fitos para a historia da música galega. Co seu recente terceiro álbum, 'DILUVIO' (Calaverita Records), publicado o pasado venres 29 de xullo, veñen de situarse como o disco máis vendido en tendas físicas na semana do seu lanzamento, quedando por riba de nomes como Beyoncé ou Harry Styles. O dato, facilitado por GFK e Promusicae (Productores de Música de España), dá conta da boa acollida que recibiu, entre o público, o novo traballo das cantareiras, que este mesmo fin de semana recolleron durante a súa actuación no festival SonRías Baixas o disco de ouro polo sinxelo 'Terra', co que competiron no Benidorm Fest e que hoxe en día supera os 30 millóns de reproducións na suma das plataformas. No cómputo global de vendas físicas e dixitais, 'DILUVIO' ocupa a cuarta posición entre un cento de discos, só por atrás dos novos traballos discográficos de Bad Bunny, Rosalía e Beyoncé, e por riba de figuras de tirón internacional como C. Tangana, Sebastian Yatra ou Rauw Alejandro. O disco de ouro por 'Terra' , outorgado tamén pola auditoría GFK e Promusicae ven motivado ao superar máis de 30.000 copias vendidas, o que se traduce, aproximadamente, en máis de 12 millóns e medio de reproducións en plataformas dixitais. 'Terra', publicado o 21 de decembro de 2021, suma xa máis de 30 millóns de reproducións.
Quico Comesaña presenta o seu primeiro traballo en solitario
Xénero: | 8 / 8 / 2022
Cun extenso percorrido musical ás costas como integrante de formacións importantes e coñecidas como Fía na roca e Berrogüetto, Quico Comesaña (Navia, 1962) asina o seu primeiro disco en solitario "Mãe", que ven de saír á venda este pasado mes de xullo. No disco, Comesaña aposta polas composicións longas, puramente instrumentais e cun marcado carácter de 'suite' para un traballo integrado por catro pezas de arredor de 10 minutos e de nomes tan evocadores dese folk ligado ao concepto cosmogónico de 'Nai terra' como Clorofilia, Marea, Animal Sapiens e Terránea. Preséntase coma unha homenaxe ao feito feminino dador da vida.
Unha ampla delegación galega visitará o Festival Intercéltico de Lorient
Xénero: | 1 / 8 / 2022
O Festival Intercéltico de Lorient, na Bretaña, recupera a normalidade e contará neste 2022 cunha ampla delegación da música e do baile tradicional do noso país. No marco dos 120 espectáculos que se programan na 51 edición do evento estarán presentes Caamaño&Ameixeiras, Fiandola e mais a colaboración de crnds e Fransy González, artista que tamén participará no espectáculo orixinal Celtic Odyssée. O festival celébrase entre os días 5 e 14 de agosto.
Xacarandaina estrea en Santa Comba o espectáculo 'Endaterra'
Xénero: | 18 / 7 / 2022
Xacarandaina porá ata 80 artistas en escena para estrear este sábado, 23 de xullo, en Santa Comba a súa nova montaxe de música e baile 'Endaterra'. O espectáculo creado e dirixido polo coreógrafo Henrique Peón fusiona distintas artes escénicas como son o teatro, o baile e a música tradicional galega (melódica e vocal) tradicional para poñer en valor a arte inmaterial da ruta xacobea que transcorre dende A Coruña até Santiago e a que leva até Fisterra e Muxía. O corpo de baile constitúese con trinta persoas de entre 17 e 35 anos que, mentres que o grupo de pandeiretas está formado por doce mulleres que se encargarán da percusión de man. A peza tamén incluirá un grupo de gaitas que abrangue tres destes instrumentos, tamboril, bombo e pandeireta que, xunto co saxo, clarín, trompeta e tubo da charanga tocarán pezas tradicionais de distintas épocas. O coro contará con 35 voces e o amplo despregue artístico completarase con Os do fondo da barra, grupo doce homes e un acordeonista que se encargarán de representar coa compaña de percusión os antigos cantos de taberna.
Xacarandaina leva o baile tradicional ás rutas de peregrinación con Endaterra
Xénero: | 12 / 7 / 2022
Un espectáculo que combina baile tradicional, danza, música de raíz, teatro, imaxes ilustradas, paisaxe sonora, deseño de luz e unha banda sonora exclusiva. Esta é a proposta de Endaterra, nova produción da agrupación tradicional Xacarandaina que se poderá ver en diferentes concellos polos que transcorre o Camiño Inglés a Santiago e mais a ruta Fisterra-Muxía.
A Zona da Zanfona recupera os cursos de formación na súa nova xeira
Xénero: | 7 / 7 / 2022
O festival Zona da Zanfona volta a Rianxo na súa décimo oitava edición. Canda aos habituais concertos de balde, a cita mantén a xuntanza de escolas de zanfona e recupera, logo de dous anos, os cursos de aprendizaxe. Entre os días 8 e 10 de xullo poderán verse na vila recitais do virtuoso italiano Francesco Giusta, do proxecto portugués de Pedro Viana e João Martins, e do espectáculo Arredor da roda do coro histórico Cántigas da Terra creado especialmente sobre este instrumento.
Os XXI Premios Opinión da Música de Raíz recoñecen a Fol Música
Xénero: | 9 / 6 / 2022
O Teatro Rosalía de Castro da Coruña acollía na noite deste 8 de xuño a gala dos XXI Premios Opinión da Música de Raíz. Os galardóns resultaron neste ano moi repartidos e ningún dos proxectos galardoados obtivo recoñecemento e máis dunha categoría.
Unha foliada para recuperar a festa furtada
Xénero: | 6 / 6 / 2022
Recuperar a festa furtada pola represión fascista e homenaxear a artistas de todo o país que a padeceron son os obxectivos da 'Foliada da Memoria' que vai facer a Deputación de Pontevedra sábado 2 de xullo en Moneixas (Lalín). A entidade provincial organiza este evento a través do programa ‘O Pasado Por Vir' do departamento de Memoria Histórica, coa colaboración da agrupación Os Dezas de Moneixas e do Concello de Lalín. A xornada será de memoria festiva e durará todo o día, con actividades para todos os públicos e homenaxes non só á xeración arrebatada senón tamén á quen tomou o relevo e non deixou que a música cesase de sonar. Xurxo Souto conducirá este acto. A actual agrupación dos Dezas de Moneixas e a súa escola farán vibrar as gaitas e a percusión en honor de quen xa non están.
novidades discográficas
Alvela
FAIA
Feira
De Ninghures
Tradimensional
Ailá
Vinde todas
Carmela
BâNZô
Os do Fondo da Barra
REPORTAXE
Aprender das cantigas
Data.Antón Castro aproveita a nosa música tradicional para ensinar solfexo aos seus alumnos
